2022ལོའི་ཟླ་1ཚེས་1ཉིན་ནས་བཟུང་། གྲོང་ཁྱེར་དང་གྲོང་རྡལ་གྱི་འགན་བཅོལ་ནང་ཞུགས་པའི་ལས་བཟོའི་སྤྱིར་བཏང་གི་སྒོ་བསྟེན་སྨན་བཅོས་འགྲོ་གྲོན་གཅིག་གྱུར་ཐེབས་རྩའི་སྨན་རིན་རྩིས་ཞུའི་ཁྱབ་ཁོངས་སུ་བཅུག་པ་དང་། སྤྱིར་བཏང་གི་སྒོ་བསྟེན་སྨན་བཅོས་གཅིག་གྱུར་ལམ་ལུགས་ཀྱིས་འགན་བཅོལ་ནང་ཞུགས་མཁན་དང་འགན་བཅོལ་ནང་ཞུགས་མཁན་ཚན་པའི་གྲོན་དངུལ་འཇལ་བའི་ཁུར་པོ་ལྕི་རུ་མ་བཏང་བར། མི་སྒེར་གྱི་རྩིས་ཁྲར་འཇུག་ཐབས་ལེགས་སུ་བཏང་སྟེ་ལས་ཐོག་མི་སྣའི་ཚན་པས་འཇལ་བའི་གྲོན་དངུལ་ནས་མི་སྒེར་གྱི་རྩིས་ཁྲའི་ནང་འཇུག་རྒྱུའི་དངུལ་དང་རྒན་ཡོལ་ཞུས་པའི་མི་སྣའི་རྩིས་ཁྲར་འཇུག་པའི་བསྡུར་ཚད་ཀྱི་དངུལ་ལེགས་སྒྲིག་བྱས་རྗེས་གཅིག་གྱུར་ངང་ཐེབས་རྩའི་ཁོངས་སུ་བཅུག་སྟེ། སྒོ་བསྟེན་སྨན་བཅོས་ཀྱི་མཉམ་རོགས་འགན་ལེན་ལམ་སྲོལ་འཛུགས་རྒྱུར་སྤྱད་ནས། འགན་བཅོལ་ནང་ཞུགས་པའི་མི་སྣའི་སྒོ་བསྟེན་སྨན་བཅོས་ཀྱི་ཐོབ་ཆ་མཐོ་རུ་གཏོང་གི་ཡོད་པ་རེད།
གྲོང་ཁྱེར་དང་གྲོང་རྡལ་གྱི་ལས་བཟོའི་སྤྱིར་བཏང་གི་སྒོ་བསྟེན་སྨན་བཅོས་ལ་ཆ་བཞག་ན་སྨན་པ་བསྟེན་པའི་བརྒྱུད་རིམ་གཤམ་གསལ་ཏེ།
དང་པོ།
སྨན་པ་བསྟེན་མཁན་གྱིས་ཐོབ་ཐང་ལག་ཁྱེར་འཁྱེར་ནས་ཨང་ཀི་བཀག་རྗེས་སྨན་བཅོས་བྱེད་སའི་ཚན་ཁག་སུ་བསྐྱོད་ནས་བརྟག་དཔྱད་དང་སྨན་བཅོས་བྱེད་དགོས།
གཉིས་པ།
སྨན་བཅོས་ཚར་རྗེས་སྨན་རིན་འཇལ་སར་བསྐྱོད་ནས་སྨན་རིན་འཇལ་དགོས་ཤིང་། ལས་བཟོའི་གཞི་རྩའི་སྨན་བཅོས་འགན་བཅོལ་ནང་ཞུགས་མཁན་གྱིས་སྨན་བཅོས་འགན་བཅོལ་གྱི་གློག་རྡུལ་དཔང་འཛིན་ནམ་སྤྱི་ཚོགས་འགན་བཅོལ་གཱའམ་ཡང་ན་ཐོབ་ཐང་ལག་ཁྱེར་འཁྱེར་ནས་སྨན་རིན་རྩིས་རྒྱག་དགོས་པ་དང་། སྨན་རིན་རྩིས་ཞུ་བྱེད་ཆོག་པའི་ཚད་གཞི་ལོན་པ་མ་ཟད་སྲིད་ཇུས་ཀྱི་ཁྱབ་ཁོངས་དང་མཐུན་པའི་སྨན་རིན་ཐད་ཀར་སྨན་ཁང་གི་སྐར་ཁུང་ནས་སྒོ་བསྟེན་སྨན་བཅོས་ཀྱི་གཅིག་གྱུར་རྩིས་ཞུ་བྱེད་ཆོག་པས། ནད་པས་མི་སྒེར་གྱིས་སྤྲོད་དགོས་པའི་ཆ་ཤས་ལས་སྤྲོད་དགོས་ཀྱི་མེད།
གསུམ་པ།
མི་སྒེར་གྱིས་སྤྲོད་དགོས་པའི་ཆ་ཤས་དེ་སྒེར་གྱི་རྩིས་ཁྲའི་མ་དངུལ་ནས་སྤྲོད་ཆོག་ཅིང་། སྨན་རིན་རྩིས་ཞུ་བྱེད་ཆོག་པའི་ཚད་གཞི་ནི་ལས་ཐོག་ལས་བཟོར་སྒོར་300དང་རྒན་ཡོལ་ཞུས་པའི་མི་སྣར་སྒོར་210ཡིན་པ་དང་། རྩིས་ཞུའི་བསྡུར་ཚད་ནི་རིམ་གཉིས་མན་གྱི་དམིགས་འཛུགས་སྨན་ཁང་དུ་ལས་ཐོག་ལས་བཟོར་70%དང་རྒན་ཡོལ་ཞུས་པའི་མི་སྣར་80%ཡིན་པ་དང་། རིམ་གསུམ་དམིགས་འཛུགས་སྨན་ཁང་དུ་ལས་ཐོག་ལས་བཟོར་60%དང་རྒན་ཡོལ་ཞུས་པའི་མི་སྣར་70%ཡིན་པ། ལོ་འཁོར་གྱི་སྒོ་བསྟེན་སྨན་བཅོས་ཀྱི་གཅིག་གྱུར་གཏོང་སྤྲོད་བཅད་གྲངས་ནི་སྒོར་3000ཡིན་པ་རེད། སྨན་རིན་རྩིས་ཞུ་བྱེད་ཆོག་པའི་ཚད་གཞི་མན་དང་ལོ་འཁོར་གྱི་གཏོང་སྤྲོད་བཅད་གྲངས་མཐོ་ཤོས་ཡན་གྱི་སྤྱིར་བཏང་གི་སྒོ་བསྟེན་སྨན་བཅོས་འགྲོ་གྲོན་མི་སྒེར་གྱིས་སྤྲོད་དགོས།