དཔྱིད་ཀ།
འཛིན་མའི་བཞིན་བཟང་སྣུམ་ཞག་དོད་དུ་གྱུར།།
སྦྲང་ཆར་ཟིལ་མས་ཚེ་སྲོག་གསར་པ་སྦྱིན།།
གངས་འཁྱགས་བཞུར་བའི་འབབ་རྒྱུན་རྣ་བར་སྙན།།
རྩྭ་ལྗང་འབུས་པའི་ས་གཞི་ཉམས་རེ་དགའ།།
དབྱར་ཁ།
དབྱིག་འཛིན་བུ་མོས་སྔོ་ལྗང་གོས་སུ་བཀླུབས།།
སྤང་ལྗོངས་ཡངས་པོར་མེ་ཏོག་སྡུག་གུར་བཞད།།
ཕྱུགས་རིཌ་དཀར་ནག་དགའ་བདེའི་དཔལ་ལ་རོལ།།
ཨ་ཁུ་འབྲོག་པའི་ངོ་གདོང་འཛུམ་གྱིས་ཁེངས།།
སྟོན་ཁ།
རབ་མཛེས་ལྟ་སྡུག་འཛིན་མའི་ཞིང་ཁམས་སུ།།
རབ་བཟང་སྟོན་གྱི་འབྲས་བུའི་མགོ་ལྕོག་ལྡེམ།།
རབ་གསལ་གཡང་ཁྱིམ་གྲུ་བཞིའི་བང་མཛོད་ཆེ།།
རབ་མཆོག་འབྲུ་སྣ་ལྔ་ཡིས་བཀངས་འདི་བཟང་།།
དགུན་ཁ།
གསེར་ལྡན་དགའ་མས་རབ་དཀར་གོས་བཟང་གྱོན།།
ཁྲི་གདུགས་ཉི་མའི་འོད་སྣང་རྒྱང་ནས་བཀྱེད།།
ཆུ་ཡི་ལྷ་མོ་ཤེལ་དཀར་ཁྱིམ་དུ་གཟིམ།།
དྲི་བཞོན་བུ་མོས་ཁེར་རྐྱང་ཤུ་གླུ་ལེན།།