མཐོན་མཐིང་ཨ་སྔོན་དགུང་གི་རང་མདངས་མཛེས།།
གསེར་ལྡན་འཛིན་མའི་མངལ་གྱི་གངས་རི་མཛེས།།
དུས་བཞིའི་ནང་གི་གྲང་རེག་ཅན་འདི་མཛེས།།
མཛེས་གསུམ་འཛུམ་པའི་ལོ་གསར་དགའ་སྟོན་བསུ།།
ས་ལའི་སྨན་ལྗོངས་ཁ་བས་བཀླུབས་པ་མཛེས།།
ནོར་འཛིན་དགའ་མ་གཉིད་ལ་ཡུར་བ་མཛེས།།
དུས་བཞིའི་ནང་གི་བསིལ་ལྡན་ཅན་འདི་མཛེས།།
མཛེས་གསུམ་འཛུམ་པའི་བོད་ཀྱི་ལོ་གསར་བསུ།།
གོ་ལའི་ཡང་རྩེ་གངས་ཅན་བོད་ཡུལ་མཛེས།།
ཁ་བའི་ཡུལ་འདིར་ལོ་གསར་བསུ་ལ་གྲབས།།
བཀྲ་ཤིས་ལོ་གསར་རྟེན་འབྲེལ་མི་འཕྱུགས་ཕྱིར།།
ཕུན་ཚོགས་སྟ་གོན་ལྷག་བསམ་གཙང་མས་གནང་།།
ཕྱི་རྒྱུ་ནོམ་པས་ཕྱུག་པའི་ཁང་བཟང་དང་།།
ལོངས་སྤྱོད་ཀླུ་དང་མཉམ་པའི་རྒྱས་སྤྲོས་སོགས།།
སུ་ལ་འཁུ་བའི་འབྱོར་པ་མེད་གྱུར་ཡང་།།
ནང་མི་མཉམ་འཛོམས་ཡོང་བའི་ལོ་གསར་བསུ།།
དགའ་དགའ་མཉམ་དུ་འཛོམས་པའི་ནམ་དུས་འདིར།།
བསིལ་བསིལ་རླུང་གིས་ཉེ་དུ་ཕྱོགས་ནས་བཀུག །
དཀར་དཀར་གངས་རིས་ཕྱོགས་བཞིའི་མགྲོན་རྣམས་འབོད།།
སྙན་སྙན་ཤིས་ཚིག་བསྒྲོན་ནས་ལོ་གསར་བསུ།།