འདི་ནི་ཟླ་6ཚེས་9ཉིན་གྱི་སྔ་དྲོ་མཐོ་རྒྱུགས་ཚར་རྗེས་སློབ་མ་ཚོས་དགའ་སྤྲོའི་ངང་རྒྱུགས་ར་ནས་དོན་བཞིན་པ། 

ཟླ་6ཚེས་9ཉིན་གྱི་སྔ་དྲོའི་ཆུ་ཚོད་11དང་སྐར་མ་30ལ་དྲིལ་བརྡ་གྲགས་པ་དང་བསྟུན་ནས་2021ལོའི་མཐོ་རྒྱུགས་མཇུག་འགྲིལ་བ་རེད།

ཆུ་ཚོད་11དང་སྐར་མ་30ལ་ལྷ་ས་སློབ་འབྲིང་གི་རྒྱལ་སྒོ་དལ་བུར་ཕྱེ་བ་དང་སྦྲགས་མི་རིགས་ཀྱི་གྱོན་ཆས་གྱོན་པའི་རྒྱུགས་སྤྲོད་སློབ་མ་ཚོས་རྒྱུགས་ར་ནས་དོན་ཏེ་ལང་ཚོའི་ངོ་གདོང་ལས་འཛུམ་མདངས་འཕྱུར། “ཡིག་རྒྱུགས་བཏང་ཚར་སོང”“སང་ཉིན་ང་ཚོ་སྤོ་ལོ་རྒྱག་པར་འགྲོ”ཞེས་པ་སོགས་རྒྱུགས་རའི་སྒོ་འགྲམ་དུ་རྒྱུགས་སྤྲོད་སློབ་མ་ཚོ་མཉམ་དུ་འཛོམས་ཏེ་རང་ཉིད་ཀྱི་དམིགས་བསལ་བྱ་ཐབས་ལ་བརྟེན་ནས་མཐོ་རྒྱུགས་མཇུག་འགྲིལ་རྗེས་ཀྱི་བདེ་ལྷོད་དང་དགའ་སྣང་མཚོན་པར་བྱས། རྒྱུགས་རའི་ཕྱི་རུ་སྒུག་པའི་ཁྱིམ་བདག་དང་དགེ་རྒན་གྱིས་ཀྱང་ཁོང་ཚོའི་འགྲམ་དུ་ཡོང་སྟེ་ལ་ལས་མེ་ཏོག་སྤྲད་པ་དང་། ལ་ལས་འཐམ་སྟེ་སྐུལ་ལྕག་བྱེད་པ། ལ་ལས་དྲན་རྟེན་པར་རྒྱག་པ་སོགས་བྱས་ནས་མཐོ་འབྲིང་གི་དུས་མཚམས་མཇུག་འགྲིལ་བར་རྟེན་འབྲེལ་ཞུས།

ཤེས་རྟོགས་བྱུང་བར་གཞིགས་ན། ཟླ་6ཚེས་10ཉིན་ནས་བཟུང་རང་ལྗོངས་ཀྱིས་མཐོ་རྒྱུགས་ཀྱི་དྲ་ཐོག་རྒྱུགས་བཅོས་ལས་དོན་སྤེལ་རྒྱུ་དང་སྔོན་དཔག་ལྟར་ན་ཟླ་6ཚེས་25ཉིན་སྦྱངས་འབྲས་དང་སློབ་བསྡུའི་ཚོད་འཛིན་གྱི་སྐར་གྲངས་དམའ་ཤོས་ཁྱབ་བསྒྲགས་བྱ་རྒྱུ་ཡིན་པ་རེད།