འདི་ནི་ཚན་ཞིབ་མི་སྣས་བོད་ལྗོངས་དིང་རི་རྫོང་གི་རོང་ཤར་ནས་རྙེད་པའི་ལོ་མ་མང་བའི་སྲན་དམར་གསོམ་ཤིང་ཡིན་པ།

རྒྱལ་ཁབ་ནགས་ལས་དང་རྩྭ་ཐང་ཅུས་ཁུན་མིང་རྩད་ཞིབ་འཆར་འགོད་ཁང་གི་བརྟག་དཔྱད་བྱས་འབྲས་གསར་ཤོས་ལས་མངོན་པར། ཚན་ཞིབ་མི་སྣས་ཇོ་མོ་གླང་མའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་ནས་གཞི་ཁྱོན་ཆེ་བའི་རྩ་ཆེ་ལ་སྟོངས་ཉེར་ཡོད་པའི་ལོ་མ་མང་བའི་སྲན་དམར་གསོམ་ཤིང་གི་ཁྱུ་ཚོ་ཞིག་རྙེད་པ་རེད། དེ་ནི་ལོ་40ལྷག་ཙམ་གྱི་རྗེས་རང་རྒྱལ་ནས་རྙེད་པའི་ལོ་མ་མང་བའི་སྲན་དམར་གསོམ་ཤིང་གི་ཁྱུ་ཚོ་གནས་ཡུལ་གཉིས་པ་དེ་ཡིན་པ་རེད།

རྒྱལ་ཁབ་ནགས་ལས་དང་རྩྭ་ཐང་ཅུས་ཁུན་མིང་རྩད་ཞིབ་འཆར་འགོད་ཁང་གི་མཐོ་རིམ་བཟོ་བཀོད་ཆེ་མོ་བ་ཀྲའོ་མིང་ཤུས་ཀྱིས་ངོ་སྤྲོད་བྱས་པར་གཞིགས་ན། རང་རྒྱལ་དུ་སྤེལ་བའི་མཚོ་བོད་ས་མཐོའི་ཕྱོགས་བསྡུས་ཚན་རིག་རྟོག་ཞིབ་ཀྱི་ཞིབ་འཇུག་ཐེངས་དང་པོའི་ནང་ཚན་ཞིབ་མི་སྣས་1975ལོར་བོད་རང་སྐྱོང་ལྗོངས་སྐྱིད་གྲོང་རྫོང་ནས་ལོ་མ་མང་བའི་སྲན་དམར་གསོམ་ཤིང་གི་ཁྱུ་ཚོ་ཐེངས་དང་པོ་དེ་རྙེད་པ་རེད།

ཇོ་མོ་གླང་མའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་ལོ་མ་མང་བའི་སྲན་དམར་གསོམ་ཤིང་ཁྱབ་ཚུལ་སྔར་བས་མཐིལ་རྟོགས་གསལ་པོ་ཡོང་བ་མ་ཟད་དེ་མཚུངས་ཀྱི་སྲུང་སྐྱོང་ཐབས་ཇུས་བཟོ་ཆེད། ཇོ་མོ་གླང་མའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དོ་དམ་ཅུས་ཀྱི་མངགས་བཅོལ་ལྟར། 2019ལོ་ནས་2020ལོ་བར་ཀྲའོ་མིང་ཤུས་ཀྱིས་ཚན་རིག་ཞིབ་འཇུག་ཚོགས་པའི་སྣེ་ཁྲིད་དེ་སྲུང་སྐྱོང་ཁུལ་ནང་གི་ལོ་མ་མང་བའི་སྲན་དམར་གསོམ་ཤིང་གི་མི་མངོན་པའི་ཁྱབ་ཁུལ་ལ་བརྟག་དཔྱད་ཐེངས་གཉིས་པ་བྱས་པ་རེད།

ཀྲའོ་མིང་ཤུས་ཀྱི་ཚོགས་པས་བོད་རང་སྐྱོང་ལྗོངས་དིང་རི་རྫོང་གི་རོང་ཤར་ནས་རང་རྒྱལ་གྱི་གཞི་ཁྱོན་ཆེ་བའི་ལོ་མ་མང་བའི་སྲན་དམར་གསོམ་ཤིང་གི་ཁྱུ་ཚོ་གནས་ཡུལ་གཉིས་པ་དེ་རྙེད་ཡོད། བརྟག་དཔྱད་བྱས་འབྲས་ལས་མངོན་པར། ཁྱུ་ཚོ་དེའི་ཁྱབ་ཁུལ་གྱི་གཞི་ཁྱོན་མུའུ་7500ལྷག་ཙམ་དང་སྡོང་རྐང་3000ཡན་ཟིན་གྱི་ཡོད། རོང་ཤར་ནི་ལོ་40ཡི་རྗེས་རང་རྒྱལ་དུ་སླར་ཡང་རྙེད་པའི་ལོ་མ་མང་བའི་སྲན་དམར་གསོམ་ཤིང་གི་ཁྱབ་ཁུལ་ཞིག་ཡིན་པ་རེད།

ངོ་སྤྲོད་བྱས་པར་གཞིགས་ན། ལོ་མ་མང་བའི་སྲན་དམར་གསོམ་ཤིང་ནི་རྩི་ཤིང་ཁྲོད་ཁྱབ་ཁྱོན་ཆུང་ཤོས་དང་ཐོན་ཁུངས་གསོག་ཚད་ཉུང་ཤོས་ཀྱི་སྲན་དམར་གསོམ་ཤིང་ཞིག་ཡིན་པ་དེ་རྒྱལ་ཁབ་ཀྱི་རིམ་པ་དང་པོའི་གཙོ་གནད་སྲུང་སྐྱོང་གི་རི་སྐྱེས་རྩི་ཤིང་གི་ཁོངས་སུ་གཏོགས་ཀྱི་ཡོད་པས་རྒྱལ་ཡོངས་ཀྱི་རི་སྐྱེས་རྩི་ཤིང་གི་ཁྱུ་ཚོ་ཉུང་ཤོས་ནང་བཅུག་པ་མ་ཟད། འཛམ་གླིང་གི་རང་བྱུང་སྲུང་སྐྱོང་མནའ་འབྲེལ་གྱིས་སྟོངས་ཉེར་ཡོད་པའི་དངོས་རིགས་སུ་ཚོད་སྐོར་བྱས་ཡོད།

ཀྲའོ་མིང་ཤུས་ཀྱིས་ད་རེས་ཤེས་རྟོགས་ཐུབ་པ་ལས་རང་རྒྱལ་དུ་ལོ་མ་མང་བའི་སྲན་དམར་གསོམ་ཤིང་གི་ཐོན་ཁུངས་གསོག་ཚད་ཆེས་ཆེར་མང་དུ་ཕྱིན་ནས་དངོས་རིགས་དེའི་སྐྱེ་དངོས་དངོས་ཁམས་རིག་པ་དང་། སྐྱེ་དངོས་རིག་པ། ཁྱུ་ཚོའི་སྐྱེ་ཁམས་རིག་པ་བཅས་ཐད་ཞིབ་འཇུག་བྱ་རྒྱུར་ཕན་པ་གལ་ཆེན་ཐོན་རྒྱུ་ཡིན་ལ། ཇོ་མོ་གླང་མའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་སྣོད་བཅུད་ཀྱི་རིན་ཐང་དང་སྲུང་སྐྱོང་གི་རིན་ཐང་སྔར་བས་མཐོ་རུ་འགྲོ་རྒྱུ་རེད་ཅེས་བཤད་པ་རེད།