2020ལོའི་ཟླ་11ཚེས་4ནས་19ཉིན་བར། བོད་རང་སྐྱོང་ལྗོངས་ལུས་རྩལ་ཅུས་དང་རང་སྐྱོང་ལྗོངས་སློབ་གསོ་ཐིང་གིས་གཙོ་གཉེར་བྱས་པའི“བོད་རང་སྐྱོང་ལྗོངས་ཀྱི་ལུས་རྩལ་རྣམ་གྲངས་སློབ་གྲྭར་ཁྱབ་གདལ་གཏོང་བའི”རིམ་སྤེལ་བྱེད་སྒོ་ལྷ་ས་གྲོང་ཁྱེར་གྱི་སློབ་གྲྭ་ཁག་ཏུ་སྔ་རྗེས་སུ་སྤེལ་བ་རེད། ལུས་སྦྱོང་ལུས་རྩལ་དང་། ལོ་ཆུང་བྱིས་པའི་ལན་ཆིའུ་སྤོ་ལོ། བྱིས་པའི་འགྲེང་འཁོར། རྐང་འཁོར། སྲོལ་རྒྱུན་ལུས་རྩལ་སོགས་ཀྱི་རྣམ་གྲངས་སློབ་གྲྭར་ཁྱབ་གདལ་བཏང་བ་རེད།
“བོད་རང་སྐྱོང་ལྗོངས་ཀྱི་ལུས་རྩལ་རྣམ་གྲངས་སློབ་གྲྭར་ཁྱབ་གདལ་གཏོང་བ”ནི་རྒྱལ་ཁབ་ཀྱིས“ལུས་རྩལ་དང་སློབ་ཁྲིད་ཟུང་འབྲེལ”གྱི་འབྲེལ་ཡོད་བསམ་འཆར་དངོས་སུ་བཏོན་པའི་རྒྱབ་ལྗོངས་ཆེན་པོའི་འོག་ཁྱབ་གདལ་བཏང་བའི་བོད་ཀྱི་དམིགས་བསལ་ཁྱད་ཆོས་ཟབ་མོ་ལྡན་པའི་བྱེད་སྒོ་ཞིག་ཡིན་པ་དང་། བྱེད་སྒོ་དེས་སློབ་མའི་ལུས་རྩལ་འཚོ་བ་དེ་བས་ཕུན་སུམ་ཚོགས་སུ་གཏོང་བ་དང་། དེ་བས་ཆེད་ལས་ལྡན་པའི་གཞོན་ནུ་ལོ་ཆུང་གི་ལུས་རྩལ་བྱེད་སྒོ་སློབ་གྲྭར་སྤེལ་ཏེ། གཞོན་ནུ་ལོ་ཆུང་གི་ཚོགས་སྤྱིས་ལུས་རྩལ་གྱི་རྩལ་ནུས་ཁོང་དུ་ཆུད་པ་དང་ལུས་རྩལ་རྣམ་གྲངས་སློབ་གྲྭར་རྩ་བ་བརྟན་པོ་ཚུགས་པ་དང་ཕུན་སུམ་ཇེ་ཚོགས་སུ་གཏོང་བ་མ་ཟད། ད་དུང་ལུས་རྩལ་ལ་བརྟེན་ནས་འབད་འབུངས་སྟོབས་བརྩོན་དང་། དཔའ་ངར་ཆེར་བསྐྱེད་ཀྱིས་སྔོན་ཐོན་བརྩོན་ལེན། མཐུན་སྒྲིལ་རོགས་རེས་བཅས་ཀྱི་སྙིང་སྟོབས་སྐྱེད་སྲིང་ཐུབ་སྟེ། གཞོན་ནུ་ལོ་ཆུང་གི་ཚོགས་སྤྱིར་དེ་བས་བདེ་ཐང་དང་བདེ་སྐྱིད་ལྡན་པའི་ཁོར་ཡུག་ཅིག་གཏོད་ཡོད།
ཟླ་11ཚེས་4ཉིན་གྱི་ཕྱི་དྲོར། 2020ལོའི་བོད་རང་སྐྱོང་ལྗོངས་ཀྱི་ལུས་རྩལ་རྣམ་གྲངས་སློབ་གྲྭར་ཁྱབ་གདལ་གཏོང་བའི་བྱེད་སྒོའི་འགོ་ཚུགས་མཛད་སྒོ་ལྷ་ས་གྲོང་ཁྱེར་ཚོད་ལྟའི་སློབ་ཆུང་གི་སློབ་ཁུལ་ཨ་མར་དངོས་སུ་སྤེལ་བ་རེད། ད་ཐེངས་ཀྱི་གསོ་སྦྱོང་དུས་ཡུན་ཉིན་4ཡིན་པ་དང་། དེ་ལུས་སྦྱོང་ལུས་རྩལ་དང་། ལོ་ཆུང་བྱིས་པའི་ལན་ཆིའུ་སྤོ་ལོ་ཁག་གཉིས་སུ་དབྱེ་ཡོད་ཅིང་། སློབ་མ་500ཙམ་སྦྱོང་བརྡར་ལ་ཞུགས་ཡོད་པ་རེད། ཕྲུ་གུ་ཚོས་རྒྱལ་ཁབ་རིམ་པའི་ལུས་སྦྱོང་ལུས་རྩལ་རྩལ་ཁྲིད་པ་ཚེ་རིང་སྐྱིད་དང་ཕུལ་བྱུང་གི་ལན་ཆིའུ་སྤོ་ལོའི་རྩལ་ཁྲིད་པ་བསྟན་འཛིན་ནོར་བུའི་སྣེ་ཁྲིད་འོག་ལུས་སྦྱོང་ལུས་རྩལ་དང་ལན་ཆིའུ་སྤོ་ལོ་སྦྱོང་བརྡར་བྱས་པ་རེད།
ཟླ་11ཚེས་17ཉིན་གྱི་སྔ་དྲོར། 2020ལོའི“བོད་རང་སྐྱོང་ལྗོངས་ཀྱི་ལུས་རྩལ་རྣམ་གྲངས་སློབ་གྲྭར་ཁྱབ་གདལ་གཏོང་བའི”རིམ་སྤེལ་བྱེད་སྒོ་སྟེ་བྱིས་པའི་འགྲེང་འཁོར་རྣམ་གྲངས་ལྷ་ས་གྲོང་ཁྱེར་ཚོད་ལྟའི་བུ་བཅོལ་ཁང་གི་སློབ་ཁུལ་ཨ་མར་གཉེར་བ་རེད།
གསོན་ཤུགས་ཀྱིས་ཁེངས་པ།
ཕྲུ་གུ་ཚོས་ཐག་པ་འཐེན་བཞིན་པ།
ཕྲུ་གུ་ཚོས་ལུས་སྦྱོང་རྩེ་བཞིན་པ།
འགོ་ཚུགས་མཛད་སྒོ་སྤེལ་ཡུལ་དུ། རྩལ་ཁྲིད་པས་དགེ་སློབ་ཚོར་རྐང་འཁོར་གཏོང་སྟངས་སོགས་བསླབས་པ་རེད། དེ་རྗེས་དགེ་སློབ་ཚོར་དངོས་སྦྱོང་དང་ནང་སྦྱོང་བྱས་པ་མ་ཟད། ད་དུང་གྲ་སྒྲིག་དང་། རྐང་འཁོར་བཞོན་པ། གཏོང་འགོ་ཚུགས་པ། ཁ་འགོག་པ། ཁུག་ཆ་སྐོར་བ་སོགས་ཀྱི་བརྒྱུད་རིམ་ཁག་ལ་དམིགས་ནས་ཆེད་ལས་ཀྱི་སློབ་ཁྲིད་དང་ནང་སྦྱོང་བྱས་པ་རེད།
བྱེད་སྒོ་སྤེལ་ཡུལ་དུ། བོད་ལྗོངས་ལུས་བདེ་ཁམས་བཟང་ལུས་རྩལ་རིག་གནས་འཕེལ་རྒྱས་ཚད་ཡོད་ཀུང་སིའི་བྱིས་པའི་མཛུབ་ཁྲིད་དགེ་རྒན་ཟླ་བ་ཚེ་རིང་དང་བཀྲ་དོན་གྱིས་བུ་བཅོལ་ཁང་གི་དགེ་རྒན་ཚོར་བྱིས་པའི་འགྲེང་འཁོར་གྱི་བེད་སྤྱོད་རིན་ཐང་ངོ་སྤྲོད་ཞིབ་ཕྲ་བྱས་པ་རེད།
2020ལོའི་ཟླ་11ཚེས་15ཉིན། “བོད་རང་སྐྱོང་ལྗོངས་ཀྱི་ལུས་རྩལ་རྣམ་གྲངས་སློབ་གྲྭར་ཁྱབ་གདལ་གཏོང་བའི”བྱེད་སྒོ་ལྷ་ས་དགེ་འོས་སློབ་གྲྭའི་ཞོར་གཏོགས་སློབ་ཆུང་དུ་སྤེལ་བ་རེད། ལུས་རྩལ་ཐང་དུ་རུ་མི་ཁག་གཉིས་སུ་བགོས་ནས་ཐག་འཐེན་འགྲན་བསྡུར་བྱས་པ་དང་། ངར་སློང་རུ་ཁག་གིས་ཀྱང་འགྲན་བསྡུར་ལ་ཞུགས་མཁན་ཚོར“ཤུགས་རྒྱོབ། ཤུགས་རྒྱོབ”ཅེས་འབོད་བཞིན་ཡོད། ཐག་འཐེན་འགྲན་བསྡུར་ནི་བསྡུས་རིས་ཙམ་ཞིག་རེད། ད་ཐེངས་ཀྱི་བྱེད་སྒོའི་རྣམ་གྲངས་སྣ་མང་ཕུན་སུམ་ཚོགས་པ་དང་སྤྲོ་སྣང་ཆེན་པོ་ལྡན་ཡོད། དེར་ཐག་འཐེན་དང་། ཐེ་པེད། ཐག་མཆོང་སོགས་སྲོལ་རྒྱུན་གྱི་ལུས་རྩལ་རྣམ་གྲངས་མང་པོ་ཚུད་ཡོད་པས། སློབ་མ་1200ཙམ་གྱིས་སྲོལ་རྒྱུན་ལུས་རྩལ་གྱི་ཡིད་དབང་འཕྲོག་ཤུགས་ཚོར་ཡོད།
ཕྲུ་གུ་ཚོས་རྩལ་ཁྲིད་པ་དང་མཉམ་དུ་ལན་ཆིའུ་སྤོ་ལོ་སྦྱོང་བཞིན་པ།
ཚེས་19ཉིན། བྱེད་སྒོ་གཉེར་མཁན་བོད་ལྗོངས་ཧོན་ཧའེ་བྱེས་བགྲོད་ལུས་རྩལ་ཚད་ཡོད་ཀུང་སིས་སློབ་གྲྭ་དེ་དང་མཉམ་དུ་སློབ་མ་ཚོར་དམིགས་བསལ་གྱི“སློབ་ཐོན་མཛད་སྒོ”ཞིག་གཉེར་ནས། འགྲན་བསྡུར་ཛ་དྲག་པོ་བྱས་པ་བརྒྱུད། སློབ་མ་ཚོས་སྲོལ་རྒྱུན་གྱི་ལུས་རྩལ་བྱེད་སྒོ་ཁག་གི་རྩལ་འགྲན་ལ་མཐུན་སྒྲིལ་རོགས་རེས་དང་དཔའ་ངར་ཆེར་བསྐྱེད་ཀྱིས་སྔོན་ཐོན་བརྩོན་ལེན་བྱས་ཏེ། དུས་ཡུན་གཟའ་འཁོར་གཅིག་གི་གསོ་སྦྱོང་དེར་རྒྱུགས་ལན་ཡག་པོ་ཞིག་སྤྲད་པ་རེད།