ཉེ་ཆར། གསར་འགོད་པས་བོད་ལྗོངས་ཆབ་མདོ་གྲོང་ཁྱེར་སྟེང་ཆེན་རྫོང་མི་དམངས་སྨན་ཁང་དུ་བཅར་འདྲི་བྱེད་སྐབས་གནས་ཚུལ་འདི་འདྲ་ཞིག་འཕྲད་བྱུང་།
བཅིངས་འགྲོལ་དམག་སྤྱི་ཁྱབ་སྨན་ཁང་གསོ་རིག་ལྟེ་གནས་ཨང་ལྔ་པའི་རོགས་སྐྱོར་སྨན་བཅོས་རུ་ཁག་གིས་ལས་འགན་ལེགས་སྒྲུབ་བྱས་རྗེས་སྟེང་ཆེན་རྫོང་མི་དམངས་སྨན་ཁང་ནས་ཁ་གྱེས་སྐབས། སྨན་དོན་མི་སྣ་དང་སྟེང་ཆེན་རྫོང་གི་ཤང་དང་གྲོང་རྡལ་ཁག་གི་ནད་གཞི་སང་དྲག་ཏུ་ཕྱིན་པའི་མིས་སྦག་སྦག་བཞོན་ནས་སྨན་བཅོས་རུ་ཁག་གི་རུ་མི་ཚོར་ཁ་བཏགས་གཡོགས་པར་ཡོང་བ་རེད།
སྐབས་དེར། ཆར་པ་སིམ་སིམ་འབབ་པ་དེ་རིམ་བཞིན་ཇེ་ཆེར་ཕྱིན་ཡང་སྐྱེལ་མ་ཞུ་མཁན་ཇེ་མང་ནས་ཇེ་མང་དུ་ཕྱིན་ཞིང་། སྨན་གཡོག་ཅིག་གིས་སྨན་བཅོས་རུ་ཁག་གི་རུ་མིར་འཐམས་ནས་ཕན་ཚུན་འབྲལ་མི་ཕོད་པའི་ངང“སང་ལོ་སླར་ཡང་ཕེབས་རོགས”ཞེས་བཤད།
“ཡོང་ངེས་ཡིན། ཡོང་ངེས་ཡིན”ཞེས་སྨན་གཡོག་དེར་ལན་བཏབ།
སྨན་བཅོས་རུ་ཁག་ལ་ཁས་ལེན་དེ་འདྲ་ཇི་ལྟར་ཐོབ་པ་ཡིན་ནམ། གསར་འགོད་པས་འདྲི་བ་འདི་འདྲ་ཞིག་བཅངས་ནས་བཅར་འདྲི་བྱས་པ་ཡིན།
ནད་ཁང་དུ་གསར་འགོད་པས་ནད་གཞི་རིམ་བཞིན་དྲག་སྐྱེད་ཡོང་བཞིན་པའི་བཀྲ་ཤིས་ཚེ་བཀྲ་མཐོང་།
བཀྲ་ཤིས་ཚེ་བཀྲ་ནི་ཐུམ་འབུའི་ནད་ཕོག་པའི་ནད་པ་ཞིག་ཡིན། འདི་ལོའི་ཟླ་བདུན་པའི་ཟླ་སྟོད་དུ་གཤགས་བཅོས་བྱས་ཀྱང་ཉིན་བརྒྱད་ཀྱི་རྗེས་སུ་གློ་བའི་འཕར་རྩ་འགག་པའི་ནད་གཞི་ཐོན། གཤགས་བཅོས་བྱས་རྗེས་ཀྱི་བླ་གཉན་ནད་ཐོན་ནས་ཤི་བ་ཡང་ཧ་ཅང་མང་། སྨན་བཅོས་རུ་ཁག་གི་རུ་དཔོན་བཅིངས་འགྲོལ་དམག་སྤྱི་ཁྱབ་སྨན་ཁང་གི་གསོ་རིག་ལྟེ་གནས་ཨང་ལྔ་པའི་མཆིན་མཁྲིས་ཕྱི་བཅོས་ཚན་ཁག་གི་ཀྲུའུ་རེན་གཞོན་པ་ཀྲུའུ་ཀྲེན་ཡུས་ཀྱིས་བཤད་པ་ལྟར་ན། “འདི་ནི་ཕྱི་ནད་སྨན་པ་སུ་ཞིག་ཡིན་ཡང་འཕྲད་མི་འདོད་པའི་ནད་གཞིའི་རིགས་ཤིག་རེད”
བཀྲ་ཤིས་ཚེ་བཀྲ་མྱུར་སྐྱོབ་བྱ་ཆེད། སྨན་བཅོས་རུ་ཁག་གི་རུ་མི་ཚོས་ཆུ་ཚོད་48རིང་རྒྱུན་ཆད་མེད་པར་ནད་བཅོས་སྲོག་སྐྱོབ་བྱས་པ་དང་། ལྷག་པར་དུ་ཀྲུའུ་ཀྲེན་ཡུས་ཀྱིས་བསྟུད་མར་ཆུ་ཚོད་30རིང་ངལ་གསོ་མ་བརྒྱབ་པར་སྨན་བཅོས་བྱས་མཐར་བཀྲ་ཤིས་ཚེ་བཀྲ་སྲོག་ཉེན་ལས་ཐར་བ་རེད། ཡིན་ན་ཡང་ནད་པའི་ཡན་ལག་གི་བྱེད་ནུས་ཅུང་ཉམས་ནས་དང་ཐོག་ལག་པ་ཡང་འགྱོག་མི་ཐུབ་པར་གྱུར་པས། སྨན་བཅོས་རུ་ཁག་གིས་སྨན་གཡོག་གི་གཞོགས་འདེགས་འོག་ཡང་བསྐྱར་བཀྲ་ཤིས་ཚེ་བཀྲའི་ཡན་ལག་གི་བྱེད་ནུས་སླར་གསོ་བྱས་པ་རེད།
གསར་འགོད་པས་བཀྲ་ཤིས་ཚེ་བཀྲ་མཐོང་སྐབས། ཁོང་ནད་ཁྲིའི་སྟེང་དུ་བསྡད་དེ་ལག་གཉིས་བརྐྱངས་རྐུམ་བྱེད་ཐུབ་ཀྱི་ཡོད་པ་རེད།
“སང་ཉིན་ང་སྨན་ཁང་ནས་དོན་ཆོག་གི་འདུག སྨན་པ་ལགས། ཐུགས་རྗེ་ཆེ”ཞེས་བཀྲ་ཤིས་ཚེ་བཀྲས་བཤད།
ནད་ཁང་གཞན་ཞིག་ནང་དུ་ཡོད་པའི་ནད་པ་ཚེ་རིང་ལྷ་མོ་ལོ་བཅུའི་གོང་ཐུམ་འབུའི་ནད་གཤགས་བཅོས་བྱེད་མྱོང་ཡོད་ཀྱང་འདི་ལོར་ནད་ལོག་བརྒྱབ། སྟེང་ཆེན་རྫོང་འཕྲོད་བསྟེན་ཅུས་ནས་སྨན་བཅོས་རུ་ཁག་ཕེབས་ཡོད་པའི་གནས་ཚུལ་ཐོས་རྗེས་རྫོང་སྨན་ཁང་དུ་གཤགས་བཅོས་བྱེད་པར་ཡོང་བ་རེད། “ཁོ་མོར་ཕོག་པ་ནི་འབུར་དབྱིབས་ཐུམ་འབུའི་ནད་ཡིན་ལ། ད་རེས་གཟེར་མིག་གཉིས་བཀོག་པས་ཕྱིས་སུ་སྤྱིར་ན་ནད་ལོག་རྒྱག་གི་མ་རེད”ཅེས་ཀྲུའུ་ཀྲེན་ཡུས་ཀྱིས་བཤད།
གཤགས་བཅོས་བྱས་མ་ཐག་ཡིན་པས། ཚེ་རིང་ལྷ་མོ་ནད་ཁྲིའི་སྟེང་ནས་འབབ་ཐུབ་ཀྱི་མེད་ཀྱང་། ཁོ་མོའི་ནང་མིས་སྨན་བཅོས་རུ་ཁག་ལོག་གྲབས་ཡོད་པ་ཤེས་རྗེས་ཆེད་མངགས་གོས་དར་ཞིག་ཕུལ་བ་རེད།
མི་དམངས་སྨན་ཁང་གི་སྨན་གཡོག་ཚེ་རིང་སྒྲོན་སྐྱིད་ཀྱང་སྐྱེལ་མ་ཞུ་བར་ཡོང་ཞིང་། ཁོ་མོས“སྨན་བཅོས་རུ་ཁག་ཡོང་རྗེས་ཚད་ལྡན་ནད་ཁང་འཛུགས་སྐྲུན་ལ་སྐུལ་འདེད་ཐེབས་པ་མ་ཟད། ད་དུང་སྨན་ཁང་གི་ནད་སྐྱོང་ཆུ་ཚད་ཀྱང་མཐོ་རུ་ཕྱིན་སོང” ད་ཆ་ནད་པ་ཚོར་ནད་སྐྱོང་སྔར་བས་ཡག་པོ་ཐུབ་ནས་མགྱོགས་མྱུར་དྲག་སྐྱེད་ཡོང་གི་འདུག་ཅེས་བཤད།
“སྨན་བཅོས་རུ་ཁག་གིས་ད་དུང་ས་གནས་དེ་གའི་མི་སེར་ཚོའི་བསམ་བློར་ཡང་འགྱུར་ལྡོག་བཏང་ཡོད” སྔོན་ཆད་ནད་པ་མང་པོ་ཞིག་ལ་དུས་ཐོག་ཏུ་སྨན་བཅོས་ཐུབ་ཀྱི་མེད། སྨན་བཅོས་རུ་ཁག་ཡོང་རྗེས། མང་ཚོགས་ཚོ་ཁོང་ཚོའི་ལག་རྩལ་ལ་ཡིད་ཆེས་བྱེད་པ་དང་ནད་པ་ཚོར་སྨན་བཅོས་དུས་ཐོག་ཏུ་བྱེད་ཐུབ་ཀྱི་འདུག དེ་ལས་གལ་ཆེ་བ་ཞིག་ནི་མི་སེར་ཚོས་སྨན་བཅོས་རུ་ཁག་ནི་ཀྲུང་དབྱང་གིས་མངགས་པ་ཞིག་ཡིན་པ་ཤེས་ཀྱི་ཡོད་པས་ཚང་མས་ཏང་གི་བཀའ་དྲིན་ཚོར་གྱི་ཡོད་ཅེས་སྟེང་ཆེན་རྫོང་མི་དམངས་སྨན་ཁང་གི་ཡོན་ཀྲང་ནམ་མཁའ་རྒྱལ་མཚན་གྱིས་བཤད།
བཅར་འདྲི་ཚར་རྗེས། གསར་འགོད་པས་སྨན་བཅོས་རུ་ཁག་གི་རུ་མི་ཚོས་སྨན་ཁང་གི་ལྟ་ཞིབ་འཕྲུལ་ཆས་ཚང་མ་གཙང་མར་ཕྱིས་ཡོད་པ་མཐོང་བྱུང་།
ཤིན་ཧྭ་གསར་འགྱུར་ཁང་གི་གསར་འགོད་པ་ཀྲུའུ་ཆིས།