སྒྱུར་བཅོས་སྒོ་དབྱེ་བྱས་ཚུན་དང་ལྷག་པར་དུ“ལོ་ལྔ་ཚན་བཅུ་གཉིས་པ”ཚུན་དུ། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚད་མཐོའི་མཐོང་ཆེན་དང་ཐུགས་ཁུར་རྒྱབ་སྐྱོར་དང་ལྗོངས་ཡོངས་ཀྱི་ལས་རིགས་སློབ་གསོའི་འཐབ་ཕྱོགས་ཁག་གི་མི་སྣ་ཚོའི་ཐུན་མོང་འབད་བརྩོན་འོག བོད་ཀྱི་དེང་རབས་ལས་རིགས་སློབ་གསོར་འཕེལ་རྒྱས་མྱུར་པོ་བྱུང་ནས་འབྲིང་རིམ་ལས་རིགས་སློབ་གསོ་རྨང་གཞིར་བྱེད་པ་དང་། མཐོ་རིམ་ལས་རིགས་ཀྱི་མཐོ་རིམ་ཆེད་ཚན་གཙོ་གནད་དུ་བྱེད་པ། སློབ་རྒྱུས་སློབ་གསོ་དང་ལས་རིགས་རྩལ་ནུས་གསོ་སྦྱོང་ཕན་ཚུན་ཟུང་འབྲེལ་བྱེད་པ། ལྗོངས་ནང་ཁུལ་གྱི་སློབ་གཉེར་དང་ལྗོངས་ཕྱིའི་སློབ་གཉེར་གལ་ཆེ་མཉམ་འཛིན། ལྗོངས་ཕྱི་ནང་གི་ལས་རིགས་སློབ་གསོའི་ལེགས་ཆ་གསབ་རེས་བཅས་ཀྱི་དེང་རབས་ཀྱི་ལས་རིགས་སློབ་གསོའི་མ་ལག་ཅིག་གྲུབ་པ་མ་ཟད། ལས་རིགས་སློབ་གསོ་ནི་མི་སྔར་བས་མང་བའི་རང་ངོས་མཐོར་གཏོང་དང་འཚར་ལོངས་གོང་འཕེལ་ཡོང་བའི་རང་འགུལ་གདམ་ག་ཞིག་ཏུ་འགྱུར་བཞིན་ཡོད།

འཚར་ལོངས་ཀྱི“སྦྲེལ་ཟམ”བསྐྲུན་ནས།

འབྱུང་འགྱུར་སྔར་བས་སྣ་མང་ཕུན་སུམ་ཚོགས་པོ་ཡོང་བར་བྱེད་པ།

“སློབ་ཆེན་འཚོ་བ་ཧ་ཅང་སྐྱིད”། 2018ལོར་ལྷ་ས་གྲོང་ཁྱེར་གྱི་འབྲིང་རིམ་ལས་རིགས་ལག་རྩལ་སློབ་གྲྭ་གཉིས་པའི་སློབ་མ་བུ་ཆུང་རང་ལྗོངས་ཀྱི་མཐོ་རྒྱུགས་དཀྱུས་མར་ཞུགས་ནས་ཀྲེན་ཀྲོའུ་སློབ་ཆེན་དུ“སློབ་ཆེན་འགྲིམ་པའི”ཕུགས་འདུན་གྲུབ་ཡོད། བུ་ཆུང་གིས་དགའ་སྤྲོའི་ངང་གསར་འགོད་པར་སློབ་གྲྭར་ལོ་གཅིག་སློབ་སྦྱོང་བྱེད་རིང་རང་ཉིད་ཀྱི་ཆེད་ལས་ཤེས་བྱ་དང་རྩལ་ནུས་ཕུན་སུམ་ཚོགས་སུ་ཕྱིན་ནས་འབྱུང་འགྱུར་གྱི་ལས་རིགས་དོན་གཉེར་ཐད་ཡིད་ཆེས་ཀྱིས་ཁེངས་སོང་ཞེས་བརྗོད་བྱུང་།

དོན་དུ་བུ་ཆུང་དང་འདྲ་བར་འབྲིང་རིམ་ལས་རིགས་ནས་སློབ་གྲྭ་ཐོན་མཁན་མང་པོ་ཡོད། འབྲིང་རིམ་ལས་རིགས་ཀྱི་སློབ་མར་འཚར་ལོངས་ཀྱི“སྦྲེལ་ཟམ”སྔར་བས་ཡག་པ་ཞིག་འཛུགས་པ་དང་། ཕྲུ་གུ་དེ་བས་མང་བ་སློབ་ཆེན་དུ་སྐྱོད་པའི་ཕུགས་འདུན་འགྲུབ་ཆེད། རང་ལྗོངས་ཀྱིས་སློབ་མ“ཕྱིར་སྐྱོད་པ”ནས་འགོ་བཙུགས་ཏེ་སློབ་མའི་རིམ་པ་མཐོར་གཏོང་གི་བྱ་ཐབས་གཉིས་བཏོད་པ་སྟེ། གཅིག་ནི་འབྲིང་རིམ་ལས་རིགས་སློབ་མས་ཁ་གཏད་ཀྱི་མཐོ་རིམ་ལས་རིགས་དང་མཐོ་རྒྱུགས་དཀྱུས་མར་ཞུགས་ནས་རིམ་པ་གཅིག་གིས་མཐོ་བའི་སློབ་གྲྭར་བསྐྱོད་དེ་མུ་མཐུད་སློབ་སྦྱོང་བྱས་ནས་འབྲིང་རིམ་ལས་རིགས་སློབ་མ“སློབ་ཆེན་དུ་སྐྱོད་པའི་ཕུགས་འདུན”འགྲུབ་པར་བྱེད་ཀྱི་ཡོད།

དེ་ནི་རང་ལྗོངས་ཀྱིས་ལས་རིགས་སློབ་གསོའི་སྒྱུར་བཅོས་མགྱོགས་སུ་གཏོང་བའི་བྱ་ཐབས་ནུས་ལྡན་གྱི་གྲས་ཤིག་རེད། 

ཉེ་བའི་ལོ་ཤས་རིང་། རང་ལྗོངས་ཀྱིས་བྱ་ཐབས་རབ་དང་རིམ་པ་སྤྱད་དེ་གོང་འོག་དང་གཡས་གཡོན་སྦྲེལ་མཐུད་ཐུབ་པའི་ཤེས་ལྡན་པ་གསོ་སྐྱོང་གི“སྦྲེལ་ཟམ”ཞིག་ཧུར་ཐག་བཙུགས་ནས་འབྲིང་རིམ་ལས་རིགས་སློབ་གསོ་རྨང་གཞིར་བྱེད་པ་དང་། མཐོ་རིམ་ལས་རིགས་ཀྱི་མཐོ་རིམ་ཆེད་ཚན་གཙོ་གནད་དུ་བྱེད་པ། སློབ་རྒྱུས་སློབ་གསོ་དང་ལས་རིགས་རྩལ་ནུས་གསོ་སྦྱོང་ཕན་ཚུན་ཟུང་འབྲེལ་བྱེད་པ། ལྗོངས་ནང་ཁུལ་གྱི་སློབ་གཉེར་དང་ལྗོངས་ཕྱིའི་སློབ་གཉེར་གལ་ཆེ་མཉམ་དུ་འཛིན་པ། ལྗོངས་ཕྱི་ནང་གི་ལས་རིགས་སློབ་གསོའི་ལེགས་ཆ་གསབ་རེས་བཅས་ཀྱི་དེང་རབས་ཀྱི་ལས་རིགས་སློབ་གསོའི་མ་ལག་ཅིག་ཧུར་ཐག་བཏོད་ཡོད།

མ་དངུལ་ཤུགས་ཆེ་རུ་བཏང་ནས།

ལས་རིགས་སློབ་གསོའི་གོང་འཕེལ་ལ་གསོན་ཤུགས་གསར་པ་བསྣན་པ།

2013ལོར་ལས་རིགས་སློབ་གྲྭ་བཙུགས་ཚུན། ལྷ་ས་གྲོང་ཁྱེར་གྱིས་སྔ་རྗེས་སུ་མ་དངུལ་སྒོར་དུང་ཕྱུར་10ལྷག་ཙམ་བཏང་ནས་ལྷ་ས་གྲོང་ཁྱེར་གྱི་ལས་རིགས་ལག་རྩལ་སློབ་གྲྭ་དང་པོ་དང་གཉིས་པ་བསྐྲུན་པ་དང་སློབ་གཉེར་གྱི་ཆ་རྐྱེན་ལེགས་བཅོས་བྱས་ཡོད། མིག་སྔའི་བར། ལྷ་ས་གྲོང་ཁྱེར་དུ་འབྲིང་རིམ་ལས་རིགས་ལག་རྩལ་སློབ་གྲྭ་གཉིས་ཡོད་པར་སློབ་གྲྭར་འགྲོ་མུས་ཀྱི་སློབ་མའི་བསྡོམས་འབོར་7000ཙམ་ཟིན་པ་མ་ཟད། ཡུལ་སྐོར་གྱི་ཞབས་ཞུ་དོ་དམ་དང་། ཟོག་འགྲེམས་ཀྱི་ཞབས་ཞུ་དོ་དམ། མི་རིགས་ཀྱི་རོལ་དབྱངས་ཞབས་བྲོ་སོགས་ཆེད་ལས་30ལྷག་ཙམ་བཀོད་སྒྲིག་བྱས་པའི་ཁར་ད་དུང་བོད་སྨན་སྦྱོར་རྟ་དང་། ཐང་ག་འབྲི་བཞེངས། བོད་བཟོའི་ཤིང་རྐོ་སོགས་དེང་རབས་ཅན་གྱི་དངོས་སྦྱོང་འཁོར་ཁང་7དང་དངོས་སྦྱོང་ཁང་8བསྐྲུན་ཡོད།

མ་དངུལ་འབོར་ཆེན་བཏང་བ་དེས་ལྷ་ས་གྲོང་ཁྱེར་གྱི་ལས་རིགས་སློབ་གསོའི་འཕེལ་རྒྱས་ལ་གསོན་ཤུགས་གསར་པ་བསྣན་ཡོད། 2018ལོར་ལས་རིགས་སློབ་གྲྭ་གཉིས་པོ་ནས་ཐོན་པའི་སློབ་མ་1950གཞི་རྩའི་ཆར་ལས་ཞུགས་ཐུབ་ཡོད་པ་རེད།

སློབ་གྲྭ་དང་ཁེ་ལས་མཉམ་ལས་གཏིང་ཟབ་བྱས་ནས།

ལས་ཞུགས་ཐབས་ལམ་སྔར་བས་རྒྱ་ཆེར་བཏང་བ།

2018ལོའི་ཟླ་6ཚེས་27ཉིན་བོད་ཀྱི་ལས་རིགས་ལག་རྩལ་སློབ་གླིང་དང་ཀྲུང་གོ་ལན་ཐུང་བོད་ལྗོངས་ཡན་ལག་ཀུང་སིའི་དབར་སློབ་གྲྭ་དང་ཁེ་ལས་ཀྱི་འཐབ་ཇུས་མཉམ་ལས་ཀྱི་གྲོས་མཐུན་འཇོག་པའི་མཛད་སྒོ་ལྷ་སར་འཚོགས་པ་ལས་ཕྱོཌ་གཉིས་པོས་ཆ་འཕྲིན་ཅན་དང་། ཤེས་ལྡན་པ་གསོ་སྐྱོང་། དངོས་སྦྱོང་ལས་ཞུགས། “གཉིས་གཏོད”སློབ་གླིང་འཛུགས་སྐྲུན་སོགས་ཁྱབ་ཁོངས་ལ་མཉམ་ལས་གཏིང་ཟབ་བྱེད་རྒྱུ་མཚོན་གྱི་ཡོད།

མིག་སྔའི་བར། བོད་ལྗོངས་ལས་རིགས་ལག་རྩལ་སློབ་གླིང་ལ་སློབ་གྲྭ་དང་ཁེ་ལས་ཀྱི་མཉམ་ལས་ཚན་པ་51ཡོད་པ་དང་ཆེད་ལས་ཁྱབ་ཚད་100%ཟིན་ཡོད་པ་དང་། ལྷ་སའི་འབྲིང་རིམ་ལས་རིགས་སློབ་གྲྭ་གཉིས་པོར་སློབ་གྲྭ་དང་ཁེ་ལས་ཀྱི་མཉམ་ལས་ཚན་པ་157ཡོད་པ་དང་ཆེད་ལས་ཁྱབ་ཚད་100%ཟིན་ཡོད་པ། དེ་བྱིངས་ཀྱི་གྲོང་ཁྱེར་དང་ས་ཁུལ་6གི་འབྲིང་རིམ་ལས་རིགས་སློབ་གྲྭར་སློབ་གྲྭ་དང་ཁེ་ལས་ཀྱི་མཉམ་ལས་ཚན་པ་ཁྱོན་96ཡོད་པ་དང་ཆེད་ལས་ཁྱབ་ཚད་73%ཟིན་ཡོད་པ་རེད། བསྡོམས་རྩིས་བརྒྱབ་པར་གཞིགས་ན། ལོ་5ཡི་རིང་། རང་ལྗོངས་ཀྱི་ལས་རིགས་སློབ་གྲྭས་ཁྱོན་ལྗོངས་ཡོངས་ཀྱི་ལས་རིགས་ཁག་ལ་རྩལ་ནུས་ལྡན་པའི་ཤེས་ལྡན་མི་སྣ་ཁྲི་5ལྷག་ཙམ་གསོ་སྦྱོང་བྱས་ཡོད་པ་རེད།