2017ལོ་ཤར་ཚུན། ལོ་ལྟར་སློབ་ཁེ་མཉམ་ལས་ཀྱི་ཁེ་ལས་15དང་མཉམ་དུ་སློབ་མར་དངོས་སྦྱོང་བྱས་པ་ལས་ལོ་རེར་མཉམ་ལས་ཁེ་ལས་སྡེ་ཚན་དུ་སློབ་མ་མི་ཐེངས་400ལྷག་ཙམ་དངོས་སྦྱོང་བྱེད་པར་བསྐྱོད་ཡོད།

2018ལོར། འབྲིང་རིམ་ལས་རིགས་སློབ་གྲྭའི་སློབ་ཐོན་སློབ་མ་མཐོ་རྒྱུགས་དང་ཁ་གཏད་མཐོ་རིམ་ལས་རིགས་སློབ་གྲྭར་རྒྱུགས་འཕྲོད་ཚད་58%དང་སློབ་མ་ལས་ཞུགས་ཐོག་མར་ཐུབ་ཚད་50%ཟིན་ནས། སློབ་གྲྭའི་སློབ་རིམ་འཕར་ཚད་དང་ལས་ཞུགས་ཐུབ་ཚད་སྔར་བས་མཐོ་རུ་ཕྱིན་ཡོད།

2018ལོའི་སྟོན་ཀའི་སློབ་དུས་སུ་ནག་ཆུ་གྲོང་ཁྱེར་གྱི་འབྲིང་རིམ་ལས་རིགས་སློབ་གྲྭར་ལས་རིགས་སློབ་གསོ་དང་ལེན་བྱེད་པའི་དམའ་འབྲིང་སློབ་མ་4055ཟིན་ནས། ལས་རིགས་སློབ་གསོ་དང་ལེན་བྱེད་པའི་སློབ་མའི་མི་གྲངས་ལྡབ་འཕར་བྱུང་ཡོད།

ཐོབ་པའི་གྲུབ་འབྲས་ལ་བལྟས་ན། ཉེ་བའི་ལོ་ཤས་རིང་། ནག་ཆུ་གྲོང་ཁྱེར་གྱིས་ལས་རིགས་སློབ་གསོ་འཕེལ་རྒྱས་བཏང་བའི་རི་མོ་མིག་ལམ་དུ་གསལ་ལེར་འཆར་འོང་། “ང་ཚོས་གསོ་རླུང་དཀོན་པའི་མཐོ་གྲང་ཁུལ་དུ་ལས་རིགས་སློབ་གསོའི་སོན་རྡོག་རེ་རེ་བཏབ་ནས། ས་བབ་ཇི་ཙམ་མཐོ་ཞིང་། ཆ་རྐྱེན་ཇི་ཙམ་དཀའ་ཚེགས་ཆེ་ཡང་། དོན་དངོས་ལས་ར་སྤྲོད་བྱུང་བར། ཏང་གི་དྲོ་སྐྱིད་འོད་སྣང་འཕྲོ་ས་གང་དུ་ཡང་བཏབ་པའི་སོན་ལ་ལོ་ལེགས་འབྲས་བཟང་སྨིན་ངེས་རེད”ཅེས་པའི་ནག་ཆུ་གྲོང་ཁྱེར་སློབ་གསོ་ཅུས་ཀྱི་ཅུས་ཀྲང་གཞོན་པ་ཐག་ཆོད་རིན་ཆེན་གྱི་སྐད་ཆ་དུམ་བུ་དེས་ལས་རིགས་སློབ་གསོ་འཕེལ་རྒྱས་ཤུགས་ཆེན་གཏོང་བའི་ནག་ཆུ་གྲོང་ཁྱེར་གྱི་ཆོད་སེམས་དང་ཡིད་ཆེས་མཚོན་པར་བྱས།

ལས་རིགས་སློབ་གསོ་ལེགས་ལ་མྱུར་བའི་སྒོ་ནས་འཕེལ་རྒྱས་གཏོང་བར། འགག་རྩ་ནི་ལྟ་བ་བསྒྱུར་རྒྱུ་དེ་རེད། 2018ལོའི་སྟོན་ཀའི་སློབ་བསྡུའི་ལས་མཇུག་འགྲིལ་བའི་བར། ནག་ཆུ་གྲོང་ཁྱེར་གྱི་འབྲིང་རིམ་ལས་རིགས་སློབ་གྲྭས་སློབ་མ་1500བསྡུ་རྒྱུའི་ལོ་འགོའི་འཆར་གཞི་སྔོན་ལ་ལེགས་སྒྲུབ་བྱས་པར། ལེགས་གྲུབ་བྱུང་ཚད་100%(ནག་ཆུ་གྲོང་ཁྱེར་ལས་རིགས་ལག་རྩལ་སློབ་གྲྭས་70%དང་རྫོང་རིམ་པའི་ལས་རིགས་སློབ་གསོ་ལྟེ་གནས་ཀྱིས་30%ལེགས་སྒྲུབ་བྱས་ཡོད)ཟིན་ནས། སློབ་བསྡུ་ལེགས་སྒྲུབ་བྱེད་ཚད་ལྗོངས་ཡོངས་ཀྱི་ཨང་དང་པོར་སླེབས་པ་དང་། གྲོང་ཁྱེར་ཡོངས་ཀྱི་འབྲིང་རིམ་ལས་རིགས་སློབ་གྲྭར་ལས་རིགས་སློབ་གསོ་དང་ལེན་བྱེད་མཁན་དམའ་འབྲིང་སློབ་མ་4055ཟིན་ནས། འབྲིང་རིམ་ལས་རིགས་སློབ་གྲྭའི་སློབ་བསྡུའི་མི་གྲངས་ལོ་རེ་བཞིན་ཆག་འགྲོ་བའི་རྣམ་པར་འགྱུར་ལྡོག་གཏོང་ཐུབ་པ་མ་ཟད། མཐོ་འབྲིང་དུ་བསྐྱོད་མ་ཐུབ་པའི་དམའ་འབྲིང་སློབ་ཐོན་སློབ་མར་ལས་རིགས་སློབ་གསོ་བརྒྱུད་གྲུབ་འབྲས་ཐོབ་པའི་ཤེས་ལྡན་པ་ཆགས་པའི་ཐབས་ལམ་གཞན་ཞིག་ཀྱང་རྙེད་ཐུབ་པ་རེད།