འདི་ནི་སི་ཁྲོན་ཞིང་ཆེན་ཁྲེང་ཏུའུ་བོད་ལྗོངས་སློབ་འབྲིང་གི་ཕྲུ་གུ་ཚོས“ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་ལག་བསྟར་དང་ཐོག་མའི་བསམ་འདུན་མ་བརྗེད་པར་ཏང་གི་རྗེས་སུ་འབྲང་བའི”སྒྲོག་འགྲེལ་ནན་ཏན་ངང་ཉན་བཞིན་པ།

ནང་སའི་བོད་ལྗོངས་འཛིན་གྲྭའི་སློབ་མས་ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱེད་པར་སྐུལ་འདེད་གཏོང་བ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་བསམ་བློར་དྲག་ཆས་སྤྲོས་པ། མི་རིགས་བསྐྱར་དར་གྱི་ལས་འགན་ཆེན་པོ་ཁུར་ཐུབ་པ་དང་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་འཛུགས་སྐྲུན་གྱི་དུས་རབས་ཀྱི་མི་གསར་ཞིག་གསོ་སྐྱོང་བྱེད་ཆེད། ཉེ་ཆར་གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ཡོན་ལྷན་ཁང་དང་རང་སྐྱོང་ལྗོངས་སློབ་གསོ་ཐིང་གིས་གཙོ་གཉེར་བྱས་པ་དང་། བོད་ལྗོངས་གཞོན་ནུའི་ཚགས་པར་ལས་ཁུངས་དང་ནང་སའི་བོད་ལྗོངས་འཛིན་གྲྭ་དོ་དམ་ལྟེ་གནས་ཀྱིས་སྒྲུབ་འགན་ཁུར་བའི་2017ལོའི“ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་ལག་བསྟར་དང་། ཐོག་མའི་བསམ་འདུན་མ་བརྗེད་པར་ཏང་གི་རྗེས་སུ་འབྲང་བའི”ནང་སའི་བོད་ལྗོངས་འཛིན་གྲྭའི་མི་རིགས་མཐུན་སྒྲིལ་གྱི་སློབ་གསོའི་བྱེད་སྒོ་ཧྲན་ཏུང་ཅི་ནན་བོད་ལྗོངས་སློབ་འབྲིང་དང་། ཀྲེང་ཀྲོའུ་སློབ་འབྲིང་བཞི་པ། སི་ཁྲོན་ཁྲེང་ཏུའུ་བོད་ལྗོངས་སློབ་འབྲིང་སོགས་སློབ་གྲྭ་6ལ་གཉེར་བ་རེད།

ཚོགས་ཆེན་བཅུ་དགུ་པའི་དགོངས་དོན་སེམས་ལ་གཏིང་ཟབ་ཟུག་པར་བྱས་པ།

ད་རེས་ཀྱི་བྱེད་སྒོའི་ཐོག་ལྗོངས་ཏང་ཨུད་ཏང་གི་སློབ་གྲྭའི་དགེ་རྒན་ཆེ་མོ་བ་གཞོན་པ་གཉིས་གདན་དྲངས་ནས་ཚང་མར་ཏང་གི་ཚོགས་ཆེན་བཅུ་དགུ་པའི་དགོངས་དོན་གསལ་འགྲེལ་དང་། སྒྱུར་བཅོས་སྒོ་དབྱེ་བྱས་ཚུན་དང་། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐོབ་པའི་གྲུབ་འབྲས་ཆེན་པོ་དང་ལྗོངས་ཡོངས་ཀྱི་མི་རིགས་མཐུན་སྒྲིལ་ལ་ཐོབ་པའི་གཡུར་ཟའི་གྲུབ་འབྲས་ངོ་སྤྲོད་བྱས་པ་རེད།

“ཚོགས་ཆེན་བཅུ་དགུ་པའི་སྙན་སྒྲོན་ནི་སྤྱི་ཡོངས་ལ་སྤྱི་འདོམས་དང་། རྔམ་བརྗིད་ལྡན་པ། དགོངས་པ་གཏིང་ཟབ་པ། ནང་དོན་ཕུན་སུམ་ཚོགས་པ་བཅས་ཡིན་པས། བསམ་བློ་བཅིངས་འགྲོལ་དང་། དུས་བསྟུན་ཡར་བརྩོན། སྒྱུར་བཅོས་གསར་གཏོད་བཅས་ཀྱི་སྙན་སྒྲོན་ཡག་པོ་ཞིག་དང་། འཛམ་གླིང་གི་གནས་ཚུལ་དང་། རྒྱལ་ཁབ་ཀྱི་གནས་ཚུལ། ཏང་གི་གནས་ཚུལ་བཅས་ལ་དམ་པོར་དམིགས་པའི་སྙན་སྒྲོན་ཡག་པོ་ཞིག་ཡིན། ལོ་དེ་དག་ནང་རྒྱལ་ཁབ་ལ་ཉིན་རེ་བཞིན་འཕོ་འགྱུར་ཆེན་པོ་བྱུང་བ་མཐོང་སྐབས། གུང་གཞོན་སྡེ་ཚོགས་ཀྱི་ཚོགས་མི་ཞིག་གི་ངོས་ནས། ངས་རང་ཉིད་ནས་འགོ་བཙུགས་ཏེ་སློབ་སྦྱོང་ཡག་པོ་བྱས་ནས་རྒྱལ་ཁབ་ཀྱི་དྲིན་ལན་འཇལ་བ་དང་། དུས་རབས་ཀྱི་གསར་འབྱེད་པ་ཞིག་བྱེད་པ་ལས། རྗེས་ལུས་གཏན་ནས་མི་ཐེབས་པ་བྱ་རྒྱུ་ཡིན”ཞེས་ཀྲེང་ཀྲོའུ་སློབ་འབྲིང་བཞི་པའི་མཐོ་རིམ་ལོ་རིམ་གཉིས་པའི་འཛིན་གྲྭ་བདུན་པའི་ངག་དབང་འབྲུག་གྲགས་ཀྱིས་བཤད།

མི་རིགས་མཐུན་སྒྲིལ་གྱི་འགྲོ་ལམ་ཆེ་མོའི་ཐོག་སྐྱོད་པ།

སྒྲོག་འགྲེལ་ཚོགས་པས་ཚོགས་ཆེན་བཅུ་དགུ་པའི་དགོངས་དོན་སློབ་གྲྭ་ཁག་ཏུ་སྒྲོག་འགྲེལ་བྱས་པ་མ་ཟད། ཕ་ཡུལ་གྱི་ཡུལ་མི་ཚོའི་ཚབ་བྱས་ནས་བུ་ཕྲུག་ཚོར་ཁམས་བདེའི་འཚམས་འདྲི་ཡང་ཞུས་ཡོད། སློབ་གྲྭ་ཞིག་ཏུ་སླེབས་རིམ་བཞིན་སྒྲོག་འགྲེལ་ཚོགས་པའི་ཁོངས་མིས་སློབ་ཁང་དང་། ཟ་ཁང་། ཉལ་ཁང་བཅས་སུ་བསྐྱོད་དེ་སློབ་མ་ཚོར་གཟིགས་པ་མ་ཟད། ཁོང་ཚོར་སློབ་སྦྱོང་ཡག་པོ་བྱས་ཏེ་དགེ་རྒན་དང་ཁྱིམ་བདག་གི་རེ་བ་ཆུད་ཟོས་སུ་གཏོང་མི་ཉན་པའི་ལྕག་སྐུལ་བྱས་པ་རེད།

“འདི་ལོའི་ཟླ་9པར་སློབ་འགོ་ཚུགས་སྐབས་ངའི་མཆིན་པའི་ཟུངས་ནུས་ཤོར་ནས་མཆིན་པའི་ཕྲ་ཕུང་80%ཕན་མེད་དུ་གྱུར་བའི་ནད་ཕོག་པ་བརྟག་དཔྱད་བྱུང་སོང་། ངའི་ཕ་མ་གཉིས་ཀ་འབྲོག་པ་ཡིན་པས་རིག་གནས་མེད་པའི་ཁར་ཁྱིམ་གྱི་འཁོས་ཀ་ཞན་པས། ནད་གཞི་ཚབས་ཆེ་ཆུང་ཇི་ཡིན་མ་ཤེས་པས། བོད་དུ་ལོག་ནས་ནད་བཅོས་བྱ་རྒྱུའི་རེ་བ་བྱེད་ཀྱི་འདུག སློབ་གྲྭའི་དབུ་ཁྲིད་ཚོས་ངའི་ཕ་མའི་བསམ་ཚུལ་མཁྱེན་རྗེས་འཕྲལ་དུ་ངའི་ཕ་མ་དང་འབྲེལ་བ་བྱས་ནས་ཁོང་གཉིས་ལ་གནམ་གྲུའི་སྤ་སེ་ཉོས་པ་མ་ཟད། ངའི་སྨན་རིན་ཡང་སྔོན་ལ་བཏང་གནང་བྱུང་། ངས་སྙིང་དབུས་ནས་སློབ་གྲྭ་དང་སྲོག་སྐྱོབ་དྲིན་ཅན་ཚོར་ཐུགས་རྗེ་ཆེ་ཞུ་རྒྱུ་ཡིན”ཞེས་ཁྲེང་ཏུའུ་བོད་ལྗོངས་སློབ་འབྲིང་མཐོ་འབྲིང་ལོ་རིམ་གཉིས་པའི་སློབ་མ་ཀརྨ་སྟོབས་ལྡན་གྱི་སྐད་ཆའི་ཚིག་འབྲུ་རེ་རེའི་ནང་ནས་སེམས་འགུལ་དང་དྲིན་ཚོར་གྱི་བསམ་པ་ཞིག་ཚོར་ཡོང་གི་འདུག

སློབ་གསོ་སློབ་ཁྲིད་བྱེད་སྟངས་གསར་གཏོད་དང་ལེགས་སུ་བཏང་བ།

ཧྲན་ཏུང་ཞིང་ཆེན་ཅི་ནན་བོད་ལྗོངས་སློབ་འབྲིང་གིས་ཐོག་མཐའ་བར་གསུམ་དུ“ཕྱིར་སྐྱོད་པ་དང་ནང་དུ་གདན་དྲངས་པའི”དགེ་རྒན་གསོ་སྦྱོང་འཐབ་ཇུས་མཐའ་འཁྱོངས་བྱས་ཏེ“བརྒྱུད་རོགས་འཁྲིད་གསུམ་གྱི་འདུ་འགོད”བརྒྱུད་སློབ་ཁྲིད་བྱེད་སྟངས་བསླབས་ནས་ན་གཞོན་དགེ་རྒན་འཚར་ལོངས་ཡོང་བ་བྱས་པ་དང་། རང་ལྗོངས་ཀྱི་སློབ་གྲྭའི་ཕུལ་བྱུང་དགེ་རྒན་དང་སྤེལ་རེས་དང་། རྒྱལ་ཡོངས་ཀྱི་གྲགས་ཅན་སློབ་གྲྭའི་ཐོན་ཁུངས་མཉམ་སྤྱོད། རིགས་གཅིག་མཁས་ཅན་སློབ་གྲྭར་གདན་དྲངས་ནས་འཆད་ཁྲིད། ཚན་ཞིབ་ཁྲིད་སྟོན་སོགས་ཀྱི་བྱ་ཐབས་བརྒྱུད་དགེ་རྒན་གྱི་མཐོང་རྒྱ་ཐོས་རྒྱ་ཆེ་རུ་བཏང་སྟེ་གནས་གཅེས་ལས་བརྩོན་དང་སྒེར་སེམས་མེད་པར་ལེགས་སྐྱེས་འབུལ་རྒྱུར་སྤྲོ་བའི་དགེ་རྒན་གྱི་དཔུང་ཁག་ཅིག་ཆགས་པ་བྱས་པ་རེད།

སློབ་གྲྭ་དེའི་ཀུན་སྤྱོད་ཀྲུའུ་རེན་ཚའོ་ཧྥུང་གིས་སློབ་གྲྭས་ནང་སའི་བོད་ལྗོངས་འཛིན་གྲྭ་དང་ཅི་ནན་གྲོང་ཁུལ་གྱི་སློབ་གྲྭར་སྔོན་དུ“སློབ་ཚན་བདམས་ནས་འཛིན་གྲྭར་ཞུགས་པའི”བྱ་ཐབས་ལག་ལེན་བསྟར་ཏེ། རང་སོ་སོའི་ཁྱད་ཆོས་ལྡན་པའི་རིག་ཚན་སློབ་ཁང་བཙུགས་ནས་སློབ་ཁྲིད་ཀྱི་ཐོན་ཁུངས་དགེ་སློབ་ཀྱིས་སྤྱོད་ཆོག་ཆོག་ཡོང་བ་དང་ཐམས་ཅད་ཞབས་འདེགས་ཞུ་རྒྱུ་གཙོ་བོར་བྱས་ཏེ། སློབ་མའི་གནས་བབ་མངོན་གསལ་དོད་པོ་ཡོང་བ་བྱས་པ་དང་། སྲིད་འཛིན་འཛིན་གྲྭའི་སྒྲིག་ཁོངས་མེད་པ་བཟོས་ཏེ“ཀུན་སྤྱོད་སློབ་དཔོན་ལམ་ལུགས”ནང་འདྲེན་བྱས་ནས་གཞན་དབང་རྣམ་པའི་དོ་དམ་ནས་རང་འགུལ་ངང་ཞུགས་པའི་དོ་དམ་བྱེད་སྟངས་ལ་བསྒྱུར་བ་དང་། དེ་སྔའི་གཏན་འཇགས་རྣམ་པའི་དོ་དམ་དེ་བརྒྱུད་རིམ་རང་བཞིན་གྱི་གདེང་འཇོག་བྱེད་སྟངས་ལ་བསྒྱུར་བ། སློབ་མར་བརྩི་འཇོག་དང་རང་སྐྱོང་ནན་བཤད་བྱས་ཏེ་སློབ་མ་ཡོངས་ལ་ཀུན་སྤྱོད་སློབ་གསོ་གཏོང་བའི་ཐབས་ཤེས་གསར་པ་འཚོལ་ཞིབ་བྱས་ཡོད་ཅེས་ངོ་སྤྲོད་བྱས་པ་རེད།