དབྱར་ཁ་ཤར་བའི་མཚམས་སུ་སློབ་གྲྭ་ཆེ་མོ་བ་ཁག་གཅིག་སློབ་གྲྭ་ཐོན་ཉེར་ཡོད། ཁོང་ཚོའི་ངོས་ནས་བརྗོད་ན། ལས་ཞུགས་ཐུབ་རྒྱུ་ནི་ལོ་བཅུ་གྲངས་རིང་སློབ་སྦྱོང་བྱས་རྗེས་འཕྲད་པའི“རྒྱུགས་ཆེན”གལ་ཆེན་ཞིག་རེད། སློབ་ཐོན་སློབ་མའི་གྲངས་ཚད་ལོ་རེ་བཞིན་མང་དུ་སོང་བའི་རྐྱེན་གྱིས་ཉེ་བའི་ལོ་ཤས་རིང་རང་ལྗོངས་ཀྱི་སློབ་གྲྭ་ཆེ་མོ་བའི་ལས་ཞུགས་གནད་དོན་དེ་སྤྱི་ཚོགས་ཀྱིས་དོ་ཁུར་བྱེད་པའི་གླེང་མང་སར་གྱུར་ཡོད།

སློབ་གྲྭ་ཆེ་མོ་བས་ལས་ཞུགས་ཐད་གདམ་ག་ཨང་དང་པོ་གང་ཞིག་བྱེད་ཀྱི་ཡོད་དམ། གཞུང་ལས་པར་རྒྱུགས་སྤྲོད་རྒྱུ་དེ་མི་མང་ཆེ་བའི་གདམ་ག་ཡིན། གཞུང་ལས་པར་རྒྱུགས་འཕྲོད་ན“གསེར་ཕོར”གྱི་གནད་དོན་ཐག་གཅོད་ཐུབ་པ་མ་ཟད། “བརྟན་པོ”ཡོད་པ་མཚོན་ལ་དེ་བས་དཀའ་བ་སྤྱོད་ཐེངས་གཅིག་ལ་གཏན་བདེ་ཐོབ་པའང་མཚོན།

“ལས་ཞུགས་གཅིག་གིས་ཚེ་གང་གཏན་འཁེལ་བྱེད་པའི”བསམ་བློ་གཏོང་སྟངས་ལ་བསམ་ཤེས་བྱེད་ཐུབ། འོན་ཀྱང་ད་ཆ་ཤེས་ལྡན་པ་སྐོར་བསྐྱོད་དང་། ལས་ཞུགས་བསྐྱར་མ། རང་བརྟེན་ལས་གཏོད་བཅས་སྤྱི་ཚོགས་ཡོངས་ཀྱི་ཡོངས་ཁྱབ་ཀྱི་སྣང་ཚུལ་ཞིག་ཏུ་གྱུར་ཡོད། ལས་རིགས་ནི་འགྱུར་ལྡོག་གཏོང་ཆོག་པ་ཞིག་དང་། ལས་ཞུགས་ནི་གནས་ཚུལ་འགྱུར་ལྡོག་གི་བརྒྱུད་རིམ་ཞིག་ཡིན་པས་སློབ་གྲྭ་ཆེ་མོ་བས་ལས་ཞུགས་བྱེད་ཐེངས་དང་པོར་རྣམ་ཀུན་གྱི་བསམ་བློའི་ཐོག་ནས་ལྟ་སྟངས་འཛིན་དགོས་པ་མ་ཟད། “སྔོན་ལ་ལས་ཞུགས་དང་། རྗེས་ལ་ལས་འདེམས། སྔོན་ལ་འཚོ་གནས། རྗེས་ལ་འཕེལ་རྒྱས་གཏོང་བ”བཅས་ཀྱི་སེམས་ཁམས་ལྡན་དགོས། ལས་ཞུགས་ཐེངས་དང་པོ་ཡག་པོ་མ་བྱུང་ཡང་སླད་ཕྱིན་ལས་ཀ་བསྐྱར་འདེམས་བྱེད་ཆོག་པའམ་ཡང་ན་རང་བརྟེན་ལས་གཏོད་ཀྱི་ལམ་བུའི་ཐོག་བསྐྱོད་ཆོག

སློབ་གྲྭ་ཆེ་མོ་བས་ལས་ཞུགས་ཐད“དཀའ་བ་སྤྱོད་ཐེངས་གཅིག་ལ་གཏན་བདེ་ཐོབ་འདོད་ཀྱི་བསམ་བློ་འཁྱེར་མི་རུང”ལས་ཞུགས“བརྟན་པོ་ཡོང་རེ”བྱེད་པ་ནི་དེ་ཙམ་བློས་འགེལ་ཆོག་པ་ཞིག་མིན། སྤྱི་ཚོགས་ཐོག་གི་ལས་རིགས་ཁག་ཚང་མར་མི་འདྲ་བའི་ཆ་ཡོད། “བརྟན་པོ”ཞེས་པ་ནི་བལྟོས་བཅས་ཙམ་ཡིན། ད་ཆ་དར་བཟོ་ཆེ་བའི་ལས་གནས་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འགྱུར་ལྡོག་བྱུང་བ་དང་ཆབས་ཅིག་ཕྱིས་འབྱུང་མཐའ་གཅིག་ཏུ་མི་འགྱུར་བར་གནས་པའི་ངེས་པ་མེད། ལས་ཞུགས་ཐེངས་དང་པོར“ཚེ་གང་གཏན་འཁེལ”དང“དཀའ་བ་སྤྱོད་ཐེངས་གཅིག་ལ་གཏན་བདེ་ཐོབ་འདོད་བྱེད་པ”ནི་དོན་དངོས་ཀྱི་གནས་ཚུལ་དང་མི་འཚམ་པ་ཞིག་ཡིན་པ་ནི་སྨོས་ཅི་དགོས།

ཉེ་བའི་ལོ་ཤས་རིང་དགའ་འོས་པ་ཞིག་ནི། མཐོ་སློབ་ཁག་གིས་སློབ་གྲྭ་ཆེ་མོ་བའི་ལས་ཞུགས་ཐད་མཛུབ་ཁྲིད་བྱེད་ཤུགས་ཟམ་མི་ཆད་པར་ཆེ་རུ་བཏང་བ་མ་ཟད། རྒྱལ་ཁབ་དང་རང་སྐྱོང་ལྗོངས་ཀྱི་རིམ་ཁག་སྲིད་གཞུང་སྡེ་ཚན་གྱིས་མཐོ་སློབ་ཀྱི་སློབ་ཐོན་སློབ་གྲྭ་ཆེ་མོ་བ་གཞི་རིམ་དུ་ལས་ཞུགས་བྱེད་པར་བསྐྱོད་རྒྱུར་ལྕག་སྐུལ་གཏོང་བའི་གཟིགས་སྐྱོང་སྲིད་ཇུས་བཏོན་པས། སློབ་གྲྭ་ཆེ་མོ་བ་མང་པོ་ཞིག་གིས་འདུ་ཤེས་ལ་འགྱུར་ལྡོག་ཧུར་ཐག་བཏང་ནས་གཞི་རིམ་དང་། གྲོང་གསེབ། འབྲོག་ཁུལ་བཅས་སུ་རང་བརྟེན་ལས་གཏོད་བྱེད་པར་བསྐྱོད་འདོད་ཡོད་པ་དེ་རེད།

ལྷག་པར་དུ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དམངས་ཀྱིས་བྱ་གཞག་སྐྲུན་པ་དང་། ཀུན་གྱིས་གསར་གཏོད་བྱེད་པའི་ལས་དོན་ཤུགས་ཆེན་སྤེལ་བ་དང་ཆབས་ཅིག དེར་སྐུལ་འདེད་བཏང་བས་ལྗོངས་ཡོངས་སུ“དམངས་ཀྱིས་བྱ་གཞག་སྐྲུན། ཀུན་གྱིས་གསར་གཏོད་བྱེད”པའི་རྣམ་པ་བཟང་པོ་ཞིག་རགས་ཙམ་ཆགས་ཡོད། སློབ་གྲྭ་ཆེ་མོ་བའི་རང་བརྟེན་ལས་གཏོད་ཐད་རང་ལྗོངས་ཀྱིས་ཁྲལ་བསྡུ་དང་དངུལ་བུན་སོགས་ཐད་གཟིགས་སྐྱོང་སྲིད་ཇུས་བཏོན་ནས་རང་བརྟེན་ལས་གཏོད་བྱ་རྒྱུར་ལྕག་སྐུལ་གཏོང་བ་མ་ཟད། རང་བརྟེན་ལས་གཏོད་དེ་ལས་ཞུགས་ཀྱི་ཁ་ཕྱོགས་གསར་པར་གྱུར་ཡོད།

སློབ་ཐོན་སློབ་མ་ཕལ་ཆེ་བས་ལས་ཞུགས་ཐད“དཀའ་བ་སྤྱོད་ཐེངས་གཅིག་ལ་གཏན་བདེ་ཐོབ་འདོད་བྱེད་པ”དེ་ནི་མི་འགྲིག་པ་ཞིག་མིན་ཡང། མི་ཚང་མར་ལས་ཀ་གང་འདྲ་ཞིག་རག་མིན་ནི་རང་ངོས་ཀྱི་ཆ་རྐྱེན་དང་ཕྱི་རོལ་ཡུལ་གྱི་རྒྱུ་རྐྱེན་གྱི་ཚོད་འཛིན་སོགས་ལ་རག་ལུས། སློབ་གྲྭ་ཆེ་མོ་བས་ལས་ཀ་འདེམས་སྐབས་དང་ཐོག་དངོས་ཐོག་བདེན་འཚོལ་གྱི་སྒོ་ནས་རང་ཉིད་ལ་ངོས་འཛིན་བྱེད་དགོས་ཏེ། “ངས་གང་ཞིག་སྒྲུབ་འདོད་པར”བསམ་བློ་གཏོང་དགོས་ལ“ངས་གང་ཞིག་སྒྲུབ་ན་འཚམ་པོ་ཡོད་པར”ཡང་བསམ་བློ་ཞིབ་ཕྲ་བཏང་ནས། རང་གི་རེ་བའི་ལས་ཀ་དང་འཚམ་པ་ཞིག་ཡོང་བ་བྱེད་དགོས།

ཤེས་བྱ་དང་དཔལ་འབྱོར་དར་རྒྱས་ཆེ་བའི་དུས་རབས་སུ་སློབ་གྲྭ་ཆེ་མོ་བར་ཤེས་བྱའི་གནས་ཚད་དང་ལག་རྩལ་མཐོ་ཙམ་ཡོད་པས། གསར་འབྱེད་ཀྱི་སྙིང་སྟོབས་ལྡན་ལ་ལས་གཏོད་ཀྱི་མི་མངོན་པའི་སྟོབས་ཤུགས་ཆེན་པོའང་ལྡན་ཡོད། “དཀའ་བ་སྤྱོད་ཐེངས་གཅིག་ལ་གཏན་བདེ་ཐོབ་པ”དང“བརྟན་པོ་ཁོ་ན་དོན་གཉེར་བྱེད་པའི”བསམ་བློ་འདོར་ཕོད་པ་བྱས་ནས། གཞན་བརྟེན་ལས་ཞུགས་དེ་རང་བརྟེན་ལས་གཏོད་དུ་འགྱུར་རྒྱུ་ནི་སློབ་གྲྭ་ཆེ་མོ་བས་རང་ངོས་ཀྱི་རིན་ཐང་མངོན་འགྱུར་དང་རང་ངོས་ཀྱི་རང་སྟོབས་ནུས་པ་དང་། སྤྱང་གྲུང་དང་བློ་གྲོས་འདོན་པའི་ཡངས་ཤིང་རྒྱ་ཆེ་བའི་གར་སྟེགས་ལྟ་བུ་ཡིན་ཞིང་། དེ་ནི་དུས་རབས་ཀྱི་བླང་བྱ་དང་འཚམ་པའི་ལས་ཞུགས་ཀྱི་འཕེལ་ཕྱོགས་ཤིག་ཀྱང་རེད།