ང་ཨའོ་གླིང་ནས་ཁ་བྲལ་སྐབས།ཨན་བདེ་ལེགས་ལོ་བཅུ་བཞི་རེད།ང་རང་ཐའེ་པེ་གྲོང་ཁྱེར་སྲིད་གཞུང་གི་ལས་ཀ་མཇུག་འགྲིལ་ཏེ་ང་རང་གི་འཚོ་བ་སྐྱེལ་བའི་དུས་ཚོད་ཡོད་སྐབས།ཨན་བདེ་ལེགས་ལོ་བཅོ་བརྒྱད་ལ་སླེབས་པའི་ཕོ་གསར་ཞིག་ཏུ་གྱུར་ཟིན་པ་དང་།གཟུགས་པོའི་རིང་ཚད་སྨི་1.84ཡོད་པ་མ་ཟད།མོ་ཌ་བཏང་ཆོག་པའི་ལག་ཁྱེར་ཡོད་པ་དང་།ཨར་ཁང་ནང་འགྲོ་སྐྱོད་བྱས་ཆོག་པའི་མཐོ་སློབ་ཀྱི་སློབ་མ་ཞིག་ཏུ་གྱུར་འདུག ངོ་གདོང་ལ་དམར་འབྱར་སྐབས་ཀྱི་བྱམས་པོ་བྱེད་སྙིང་འདོད་པའི“རྒྱགས་རིལ”དག་མི་མངོན་པར་ཐིག་རིས་དང་གྲུ་ཟུར་དབྱེ་མཚམས་གསལ་ལ་སྒམ་བརླིང་ལྡན་པའི་མིག་མདངས་ནས་ཁེར་རྐྱང་གི་བར་ཐག་ཞིག་མངོན་ལ།ལག་པར་ཨ་རག་དམར་པོ་བླུགས་པའི་གྱི་ལ་སི་ཞིག་འཁྱེར་ཏེ་སྒྲོག་ཙེའི་ཟུར་ཅིག་ཏུ་བསྡད་དེ་ངོ་ནག་བསྡུས་ཏེ་ལྟ་བཞིན་མཆིས།

མིག་མདུན་གྱི་འཆར་སྣང་དེ་དག་ང་མི་གོམས་པར་ངའི་མཛའ་ཞིང་བརྩེ་བའི་ཨན་ཨན་གང་དུ་སོང་ངམ།ངས་པང་ཁར་བཏབ་ཅིང་།འོ་བྱེད་པ་དང་།ལག་གདངས་སྦྲེལ་བ།ཉིན་མཚན་རྟག་ཏུ་དྲན་པར་བྱེདཅིང་།སྐྲ་ནས་རྔུལ་དྲི་ཁ་བའི་བུ་ཆུང་ཆུང་དེ་གང་དུ་སོང་བ་རེད་དམ།

ང་ཁོང་གི་འཁྲིས་སུ་བཅར་སྐབས།ཁོང་གིས་ཕྱིར་བཤོལ་བརྒྱབ།ང་རང་དང་སྐད་ཆ་བཤད་དགོས་ཡོད་ཟེར་དུས།སྐད་ཆ་ག་རེ་བཤད་རྒྱུ་ཡོད།ང་ཁྱེད་ཀྱིས་བརྩེ་བའི་བུ་ཨན་ཨན་མིན།ང་ནི་ང་ཡིན་ཟེར།

ང་ཁོང་དང་སྐད་ཆ་ཤོད་འདོད་ཡོད།འོན་ཏེ་བུས་ཉན་འདོད་ཡོད་ཀྱང་།   ཁ་གདངས་མ་ཐག་ག་རེ་ཤོད་དགོས་མིན་ང་རས་ཀྱང་ཧ་གོ་མ་སོང་།གང་ལགས་ཤེ་ན།ལོ་ན་བཅོ་བརྒྱད་ལ་སོན་པའི་བུ་ཁོང་ངས་ངོ་མི་ཤེས་པར་གྱུར་འདུག   ཁོང་ག་རེ་བསམ་གྱི་ཡོད་མིན་དང་།གནད་དོན་ལ་ལྟ་སྟངས་གང་འདྲ་འཛིན་གྱི་ཡོད་མེད།གང་ལ་དོ་སྣང་བྱེད་པ་དང་གང་ལ་དོ་སྣང་མི་བྱེད་པ།གང་ལ་དགའ་བ་དང་གང་ལ་མི་དགའ་བ།དེ་ལྟར་བྱེད་དགོས་དོན་གང་ཡིན་མིན།གང་གིས་ཁོང་ཁ་སྐྱེངས་པོ་བཟོ་བ་དང་གང་གིས་ཁོང་དགའ་བས་མྱོས་མིན།ངའི་རིན་ཐང་ལྟ་བ་དང་ཁོང་གི་རིན་ཐང་ལྟ་བའི་དབར་བར་ཐག་ག་ཚོད་ཡོད་མིན་སོགས་ངས་གང་ཡང་མི་ཤེས།

ཁོང་འཇར་མན་དུ་ཡོད་ཅིང་།ང་རང་ཤང་ཀང་དུ་ཡོད།ཁ་པར་བརྒྱབ་རེས་བྱས་ཀྱང་།

བདེ་པོ་ཡིན་པས།  

ཡིན།

སློབ་གྲྭ་གང་འདྲ་འདུག

སྣང་དག་མི་འདུག

འདི་ལྟ་བུ་རེད།

གུང་གསེང་རིང་ཐུག་རེས་ཡོད་ནའང་།ཁོང་གིས་དུས་ཚོད་ཚང་མ་ཁོང་གི་གྲོགས་པོ་དང་རོལ་ཅིང་།དགོང་མོ་ང་དང་ཁ་སྤྲོད་དུ་བསྡད་དེ་ཁ་ལག་ཟ་སྐབས་ཀྱང་།ཁ་ཁུ་སིམ་མེར་མིག་གཉིས་ལག་ཐོགས་ཁ་པར་ཐོག་འབུར་ཚུགས་སུ་ལྡིར་བ་དང་མཛུབ་རྩེ་དག་ཆ་འཕྲིན་བརྒྱུད་བསྐུར་བྱེད་པར་བྲེལ།

ཁོང་ང་ལ་བརྩེ་བ་ཡོད་པ་ངས་ཤེས་ཀྱི་ཡོད།འོན་ཏེ་བརྩེ་བ་དང་དགའ་པོ་གཉིས་གཅིག་པ་མིན།བརྩེ་བའང་རྒྱུས་ལོན་པ་དང་གཅིག་པ་མིན།བརྩེ་བ་ནི་དོན་དངོས་ཐོག་མི་དགའ་བ་དང་།རྒྱུས་མེད་པ།འབྲེལ་འདྲིས་མེད་པ་བཅས་ཀྱི་ཁ་གཡར་ས་ཞིག་རེད།བརྩེ་བ་ཡོད་པར་བརྟེན།རྒྱུན་གཏན་ཡིན་པའི་འབྲེལ་བ་དག་དགོས་པ་མེད་པ་ལྟ་བུར་གྱུར།

མིན།ང་རྙི་དེ་ལྟ་བུའི་ནང་ཚུད་ཀྱི་མིན།ངར་བུ་ཆུང་ཨན་ཨན་དང་འབྲེལ་བ་ཆད་པ་གའི་མི་འདུག  ངས་འཚར་ལོང་བྱུང་བའི་ཨན་བདེ་ལེགས་རྒྱུས་ལོན་པ་བྱེད་ཀྱི་ཡིན།མི་དེ་ངེས་པར་དུ་ངོ་ཤེས་པ་བྱེད་ཀྱི་ཡིན།ལོ་ངོ་18ལ་སླེབས་པའི་མི་དེ་ངོ་ཤེས་པ་བྱེད་ཀྱི་ཡིན།དེས་ན་ངས་ཁོང་ལ་ང་དང་འཕྲིན་ཡིག་འབྲི་བའི་ཐབས་ལ་བརྟེན་ནས་ཆེད་སྒྲིག་ལེ་ཚན་ཅིག་སྤེལ་འདོད་ཡོད་མེད་སྐད་ཆ་དྲིས་པ་ཡིན།ཆ་རྐྱེན་ནི་ཁས་བླངས་ཚེ་ཡིན་གཅིག་མཐའ་འཁྱོལ་བ་བྱ་རྒྱུ་དེ་རེད།

བུས་ཁས་བླངས་སོང་།འོན་ཏེ་ང་ཡིད་མ་ཆེས་པར་དངོས་འབྲེལ་རེད་དམ།རང་གིས་རྩེད་མོ་བརྩེས་པ་མ་རེད་པ་ཞེས་ཚ་འདེད་ཐེངས་འགའ་བཏང་བ་ཡིན། དུས་བཅད་ཟིན་པས།ཡི་གེ་མ་བྲིས་རང་བྲིས་རེད་འདུག

དེབ་འདོན་རྒྱུའི་བསམ་ཚུལ་མེད་ལ།ཀློག་པ་པོ་ཡོད་མིན་དེ་བས་བསམ་བློ་བཏང་མེད།བསམ་བློ་གཅིག་རང་ཡོད་པ་ནི་བྱ་ཐབས་དེ་བརྒྱུད་ལོ་18ལ་སླེབས་པའི་མི་ཞིག་གི་འཇིག་རྟེན་ནང་འཛུལ་ཐུབ་པ་བྱ་རྒྱུ་དེ་ཡིན།

དེར་བརྟེན།ཀློག་པ་པོའི་ཡི་གེ་འཛམ་གླིང་ས་ཕྱོགས་གང་ས་ནས་གཅིག་རྗེས་གཉིས་མཐུད་ངང་འབྱོར་སྐབས།ང་དངོས་འབྲེལ་སྐྱི་གཡའ་བ་ཞིག་བྱུང་།  ཉིན་ཞིག ཐའེ་པའེ་ཡི་དཔེ་ཚོང་ཁང་ཞིག་གི་ནང་དུ་དེབ་ཉོས་ཏེ་བང་སྒྲིག་ནས་བརྩིས་རྒྱག་དུས།སྐྱེས་པ་དར་མ་ཞིག་ངའི་འཁྲིས་སུ་ཡོང་ནས་ངའི་ལག་པ་ནས་འཇུས་ཏེ།སྐད་ཤུགས་དམའ་པོས“ཁྱེད་རང་གི་རྩོམ་ཡིག་མེད་ཚེ།ང་དང་ངའི་བུ་ཆ་རྒྱུས་ད་རྒྱུས་མེད་པ་ལྟ་བུར་གྱུར།གང་ལགས་ཤེ་ན། ང་ཚོས་ཕན་ཚུན་གླེང་མོལ་ཇི་ལྟར་བྱེད་དགོས་མིན་ཤེས་ཀྱི་མི་འདུག”ཅེས་ཁོང་གིས་སྒམ་ཞིང་ནན་ལ་མིག་ནང་མཆི་ཞག་འཁྱིལ་ནས་བཤད་བྱུང་།

ཕ་མ་མང་པོ་ཞིག་གིས་ཁོང་དང་འདྲ་བར་རྩོམ་ཡིག་བུ་ཕྲུག་རྣམས་བཀླག་ཏུ་འཇུག་པ་དང་།དགོང་དྲོ་ཁ་ལག་བཟའ་སྐབས་དེའི་སྐོར་སྤེལ་རེས་བྱེད་ཀྱི་ཡོད།ཨ་རི་དང་ཁ་ན་ཀྲའི་ཕ་མ་ཚོས་ཡི་གེ་བསྐུར་ཏེ་ང་ཚོའི་འཕྲིན་ཡིག་གི་དབྱིན་ཡིག་དཔར་མ་དགོས་འདོད་བྱེད་ཀྱི་འདུག   ཁོང་ཚོ་དབྱིན་ཡིག་གི་ཁོར་ཡུག་ནང་འཚར་ལོངས་བྱུང་བའི་ཕྲུ་གུ་ཚོ་དང་མཉམ་སྤྱོད་བྱ་རྒྱུར་སྟབས་བདེ་པོ་ཡོང་ཆེད་རེད་འདུག  ཕྲུ་གུའི་ངོས་ནས་བཤད་ན།རང་ཉིད་ཀྱང་ལོ་ན་སུམ་ཅུ་བཞི་ཅུར་སླེབས་པའི་མི་རྒན་ཞིག་ཡིན་པ་དང་ཕ་མ་དང་ཕན་ཚུན་འབྲེལ་གཏུགས་བྱེདཐབས་བྲལ་བར་གྱུར།མ་གཞི་སེམས་ནང་ཕ་མར་བརྩེ་བ་བཅངས་ཡོད་རུང་།བརྩེ་བ་དེ་ནི་ཟླ་བ་དང་ལོ་མང་པོ་མོག་པོར་ལུས་པ་དང་།ན་ཚས་ཁེངས་པའི་རྨ་ཁར་རྨ་རས་དཀྲི་ཐབས་བྲལ་བ་ལྟ་བུར་གྱུར།

ལོའི་རིམ་པ་མི་འདྲ་བ་ནས་ཡོང་བའི་ཡི་གེ་མང་པོ་འདི་དག་མཐོང་སྐབས།ཕ་མ་ག་ཚོད་དང་བུ་ཕྲུག་ག་ཚོད་ཁྱིམ་ཚང་གཅིག་གི་ནང་འཚོ་གནས་བྱེད་ཀྱི་ཡོད་ནའང་སྐད་ཆ་གང་ཡང་ཤོད་རྒྱུ་མེད་པ་དང་།ཕན་ཚུན་དབར་བརྩེ་དུང་ཡོད་ནའང་ངོ་མི་ཤེས་པ།ཕན་ཚུན་འབྲེལ་བ་བྱེད་འདོད་ཡོད་ཀྱང་འབྲེལ་ཟམ་མེད་པ།བརྩེ་བ་མཚོན་པར་བྱེད་འདོད་ཀྱང་མཚོན་ཐབས་བྲལ་བ་བཅས་ཤེས་རྟོགས་བྱུང་།ང་ཚོའི་དབར་ཡི་གེ་བསྐུར་བ་དག་ནི་མཚན་དགུང་གི་རྒྱ་མཚོའི་ཐོག་གི་དར་བརྡ་དང་འདྲ་བར་མཚོ་ཐོག་ཏུ་འགྲོ་སྐྱོད་མི་བདེ་བར་ཡམ་ཡོམ་གྱིས་མཚོ་ཁུག་འཚོལ་བཞིན་པའི་གྲུ་པ་ཁོ་ནས་མཐོང་བ་དང་མཚུངས།

རྩོམ་ཡིག་འབྲེ་བའི་བརྒྱུད་རིམ་ཧ་ཅང་དཀའ་ལས་ཁག་པོ་བྱུང་།ཨན་བདེ་ལེགས་ཀྱིས་ང་དང་རྒྱ་སྐད་བརྒྱབ་ནའང་རྒྱ་ཡིག་མི་ཤེས་སྟབས།ང་གཉིས་འཕྲིན་ཡིག་རེ་རེ་བཞིན་གོ་རིམ་འདི་དག་བརྒྱུད་དགོས་པ་སྟེ།

གཅིག    ཨན་བདེ་ལེགས་ཀྱིས་དབྱིན་ཡིག་ཐོག་ནས་ང་ལ་ཡི་གེ་འབྲི་ཡི་ཡོད།ཁོང་གི་ཡིག་རིགས་ཡག་ཤོས་ནི་འཇར་མན་གྱི་ཡི་གེ་ཡིན་པ་དང་།ངའི་ཡི་གེ་ཡག་ཤོས་ནི་རྒྱ་ཡིག་རེད།དེས་ན་ང་གཉིས་གཉིས་ཀས་གོམ་གང་མདུན་སྤོས་ཀྱིས་དབྱིན་ཡིག་ཐོག་ནས་འབྲེལ་གཏུགས་བྱེད་ཀྱི་ཡོད།

གཉིས།ངས་ཁོང་གི་དབྱིན་ཡིག་རྒྱ་ཡིག་ཏུ་བསྒྱུར་བ་དང་།ཡིག་སྒྱུར་བྱེད་པའི་བརྒྱུད་རིམ་ནང་ངེས་པར་དུ་ཐག་རིང་ཁ་པར་བརྒྱབ་སྟེ་རྒྱ་སྐད་ཐོག་ནས་གྲོས་བསྡུར་བྱས་ནས་མིང་ཚིག་འདི་དོན་གང་ཡིན་པ་དང་།མིང་ཚིག་གཞན་ཞིག་མི་སྤྱོད་པར་ཡིན་གཅིག་འདི་སྤྱོད་དོན་གང་ཡིན་མིན།མིང་ཚིག་འདིའི་འཇར་མན་ཡི་གེ་གང་འདྲ་ཡིན་པ།དུམ་བུ་གཉིས་པ་དེ་མཇུག་ཏུ་བཞག་ན་བརྗོད་དོན་གཙོ་བོ་དེ་བས་གསལ་བ་ཡོད་མིན།ངས་གོ་བ་ལོག་སྒྲུབ་བྱས་མིན།རྒྱ་ཡིག་ཀློག་པ་པོ་རྣམས་ཀྱིས་ཁྱོད་ཀྱི་ལྟ་བ་གོ་བ་ལེན་བྲལ་བས་དེ་ལས་ཞིབ་ཚགས་ཙམ་གྱི་ཐོག་ནས་འགྲེལ་བཤད་བརྒྱབ་ན་འགྲིག་གམ།

གསུམ།ཨན་བདེ་ལེགས་ལན་བརྒྱབ་བདེ་པོ་ཡོང་ཆེད། ངས་དབྱིན་ཡིག་ཐོག་ནས་བྲིས་པའི་ཡིག་ལན་ཨན་བདེ་ལེགས་ལ་བསྐུར་བ།

བཞི།ངས་དབྱིན་ཡིག་ཐོག་ནས་བྲིས་པའི་ཡི་གེ་རྒྱ་ཡིག་ཐོག་ནས་ཡང་བསྐྱར་རེ་འབྲི་དགོས་པ།——ཡིག་སྒྱུར་བྱས་ན་མི་ལེགས་པས་ཡང་བསྐྱར་འབྲི་དགོས་པ།

བརྒྱུད་རིམ་བཞི་པོ་དེ་དག་ནང་།ང་གཉིས་ཕན་ཚུན་གྲོས་བསྡུར་བྱེད་པ་དང་རྩོད་པ་རྒྱག་པའི་གནད་མང་དུ་མཆིས།ངས་རྟག་ཏུ་ཁོང་གི་རྩོམ་སྲོལ་ཞིབ་ཕྲ་མེད་པར་ཐབས་ཆག་ཡིན་པ་སྐྱོན་བརྗོད་བྱེད་པ་དང་།ཁོང་གིས་ང་ཞིབ་ཚགས་དྲགས་པ་དང་།ཉེས་མེད་ཉེས་འདོགས་བྱས་ཚུལ་ཤོད།རྩོམ་ཡིག་འབྲི་བའི་བརྒྱུད་རིམ་ནང་།ང་ཚོའི་མི་ཚེའི་མཚན་ཉིད་ཧེ་བག་ཆེན་པོ་ཡོད་པ་སྟེ།ཁོང་གིས་རྩོམ་འབྲི་རྒྱུ་དེ“རྩེད་མོར”བརྩི་བ་དང་།ངས་རྩོམ་འབྲི་རྒྱུ་དེ“དོན་ཆེན”ལ་བརྩིས་ཀྱི་ཡོད།ང་ཚོའི་རིན་ཐང་གི་ལྟ་བ་དང་འཚོ་བར་བཅངས་པའི་རྣམ་འགྱུར་ཡང་མི་འདྲ་བར་བསྡུར་གྲངས་ཐོན་པ་སྟེ།ཁོང་གིས་འཇིག་རྟེན་བྱ་བ་ཆ་གསུམ་རྩེད་མོར་བརྩི་བ་དང་།ཆ་གཉིས་ནག་མདོག་གི་ཁ་མཚར་དུ་བརྩི་བ།ཆ་ལྔ་གཟབ་ནན་བྱེད་ཀྱི་ཡོད་པ་དང་།ངས་མི་ཚེའི་ཆ་བརྒྱད་གཟབ་ནན་བྱེད་པ་དང་།ཆ་གཉིས་ནི་བློ་རིག་དང་དོགས་གཞི་རེད།ཁོང་གིས་ང་ལ་ཁྲེལ་དགོད་ཆེས་ཆེར་བྱེད་ཅིང་།ངས་ཁོང་ལ་ཞིབ་འཇུག་ནན་པོ་བྱེད་ཀྱི་ཡོད།

ལོ་བཅོ་བརྒྱད་སླེབས་པའི་མི་ཞིག་རྒྱུས་ལོན་པ་བྱེད་པར་རང་ཉིད་རྒྱུས་རྩ་བ་ནས་མེད་པ་ཞིག་ཏུ་བརྩིས་ཏེ་འགོ་ནས་སྦྱོང་དགོས།

ཆེད་སྒྲིག་ཁོ་ན་ལོ་གསུམ་བྲིས་པ་དང་།བར་དུ་རྩོམ་ཡིག་ཐེངས་མང་ནར་འགྱངས་བྱེད་དགོས་བྱུང་ནའང་།མཐར་འགོ་མཇུག་ཡོད་པར་མཐའ་འཁྱོངས་ཐུབ་བྱུང་།ཁོང་གི་ལོ་ཆུང་གཞོན་སྐྱེས་ཚོར་ཡིག་ལེན་བསྐུར་དུས།སྐབས་འགར་ཁོང་ལ“རང་རང་གི་ཨ་མ་དང་ཡི་གེ་བྲིས་ཏེ་འབྲེལ་གཏུག་བྱེད་ཀྱི་ཡོད་དམ།དེ་དངོས་གནས་རེད་པས”ཞེས་སྐད་ཆ་འདྲི་སྐབས།ཨན་བདེ་ལེགས་ཀྱིས་རྒྱུ་འགྲོ་ཆུང་ལ་དོན་གོ་ཆོད་པའི་སྒོ་ནས“ཇོ་ལགས། རྩོམ་ཡོན་གསོག་དགོས་རེད་པཱ”ཞེས་ལན་རྒྱག་གི་ཡོད།

ཁོང་གིས་སྐབས་དེ་དུས་ཁས་ལེན་དགོས་དོན་ངས་ད་ལྟའང་ཧ་གོ་མ་སོང་ལ།སེམས་ནང་ལའང་ཁོང་གིས་ལོ་གསུམ་ཏག་ཏག་ཡི་གེ་བསྐུར་རེས་བྱས་པ་བསམ་ཡུལ་ལས་འདས་པའི་སྣང་བ་ཞིག་སྟེར།ང་ཚོ་ནི་མི་རབས་གཉིས་ཀྱི་མི་ཡིན་པ་དང་།ང་གཉིས་བར་ལོ་ཁྱད་སུམ་ཅུ་ཡོད་ལ།ང་གཉིས་ཀྱང་རྒྱལ་ཁབ་གཉིས་ཀྱི་མི་ཡིན་པ་དང་།བར་དུ་ཤར་ནུབ་ཀྱི་རིག་གནས་གཉིས་ཀྱི་ཧེ་བག་ཡོད།ང་ཚོའི་དབར་ལའང་ཁོང་ལོ་18ལ་སོན་པའི་ལོ་དེར།ཆུ་ཁར་གཡེང་བའི་རྩྭ་བཞིན་རང་དགར་འཕྱོ་བར་བྱེད་པ་དང་།ཁེ་གྲགས་ལ་མི་བརྩོན་པར་རང་རང་གི་ལས་ལ་འབུངས།འོན་ཏེ།ངེད་གཉིས་ཀྱིས་བྲོ་བ་མི་འདྲ་བ་མྱངས།ངས་འབད་བརྩོན་བྱས་པ་དང་།ཁོང་ལའང་འབད་པ་ལས་བྱུང་བའི་གྲུབ་འབྲས་ཐོབ།ངའི་མི་ཚེའི་ནང་ལོ་18ལོན་པའི་མི་ཞིག་ངོ་ཤེས་པ་དང་།ཁོང་གིས་ཀྱང་རང་གི་མི་ཚེའི་ནང་རང་གི་ཨ་མ་ཐོག་མར་ངོ་ཤེས།

དེའི་རྗེས་ཀྱི་མི་ཚེའི་བགྲོད་ལམ་ནང་།ཕར་འགྲོ་ཚུར་འོང་དང་གྱེས་ཐོར་གྱི་གནས་ལས་རྟག་བརྟན་མི་འགྱུར་གྱི་གནས་བབ་ཅིག་ཅི་ལ་འོང་།འོན་ཏེ་ལོ་གསུམ་གྱི་མཚོ་ཐོག་གི་དར་བརྡ་དེ་ནམ་མཁའི་རྒྱུ་སྐར་བཞིན་ལྟ་བ་དང་།ཟླ་འོད་བཞིན་འཚེར་བས་ད་དུང་ང་རེ་འདོད་གང་བྱེད་དགོས་སམ།