དྲོ་སྐྱིད་སྦྱིན་པ།

“ཞལ་འདེབས་མཛོད་འཇུག་དང་། དགེ་སྒྲུབ། རོགས་རེས”བཅས་་བྱས་ནས་གྲྭ་བཞི་གྲོང་གསར་གྱི་གྲོང་མི་རྣམས་ཀྱིས་ཞལ་འདེབས་འབུལ་བའམ་ཡང་ན་དངོས་པོ་གོང་ཁེ་པོས་འཚོང་བ་སོགས་ཀྱིས་སྡེ་ཁུལ་གཅིག་པའི་གྲོང་མིར་ཕན་བདེ་བསྐྲུན་ནས་རང་སྟོབས་རང་འཕེལ་ཡོང་བར་བྱས་པ་རེད།

ལོ་68ལ་སླེབས་པའི་རྒད་པོ་ཕུར་བུས་མ་དངུལ་གྲབས་གསོག་བྱས་ནས་སྡེ་ཁུལ་དུ་གྲྭ་བཞི་གྲོང་གསར་སྡེ་ཁུལ་གྱི“གཉིས་ལྡན་དུད་སྦྲེལ”དམངས་ཕན་དབུལ་སྐྱོར་ས་ཚིགས་ཤིག་བཙུགས་ནས་གྲོང་མིའི་གྱོན་གོས་རལ་བ་འཚེམ་རོགས་བྱས་ཏེ་དངུལ་ཕྲན་བུ་ལས་ལེན་གྱི་མེད་པ་དང་། གྲྭ་བཞི་གྲོང་གསར་གྱི་ཤར་ཕྱོགས་ཚོགས་ཆུང་ལྔ་པའི་སྒོ་རྟགས་དང་པོའི་ཁྱིམ་གྱི་གཡང་འཛོམས་ཀྱིས་བསླས་འཐག་ཐོན་རྫས་བཙོངས་ནས་ཕྲུ་གུ་སློབ་གྲྭར་བཏང་བ་རེད།

ཞལ་འདེབས་དངོས་པོ་ཐོ་བཀོད་མཛོད་བཅུག་བྱས་ཏེ་དགོས་མཁོ་ཡོད་པའི་གྲོང་མིར་སྤྲད་པ།

“སུའེ་དང་ཐང་རྒྱལ་རབས་སྐབས་དར་བའི་རྒུད་སྐྱོབ་མཛོད་ཁང་འཛུགས་པའི་གོམས་གཤིས་བཟང་པོའི་ལེགས་ཆར་དཔེ་བལྟས་ནས། སྡེ་ཁུལ་དུ་དེང་རབས་ཀྱི་ཁྱད་ཆོས་ལྡན་པའི་ཞལ་འདེབས་མཛོད་འཇུག་བྱེད་སྒོ་སྤེལ་བ་རེད” གསར་འགོད་པས་བྱེད་སྟངས་དེའི་སྐོར་གསལ་པོར་ཤེས་ཆེད། གྲྭ་བཞི་གྲོང་གསར་གྱི་དཔལ་འབྱོར་འཕེལ་རྒྱས་གཞུང་དོན་ཁང་གི་ལས་བྱེད་པ་ཞིག་གིས་དྲིལ་བསྒྲགས་དེབ་བཏོན་ནས། ཞལ་འདེབས་མཛོད་འཇུག་གི་འབྲེལ་ཡོད་ལས་ཀ་བྱེད་སྟངས་གསར་འགོད་པར་རི་མོའི་ལམ་ནས་བསྟན་པ་རེད།

རི་མོའི་ནང་། བཟའ་བཅའ་དང་། འཛིན་ཆས། ཅ་དངོས་རྙིང་པ། འཚོ་བའི་མཁོ་ཆས་བཅས་ལག་ཟུང་ཞིག་གིས་མཛོད་ཁང་དུ་འཇུག་བཞིན་པ་དང་། གྲྭ་བཞི་སྡེ་ཁུལ་གྲོང་ལྷན་གྱི་དཔལ་འབྱོར་འཕེལ་རྒྱས་གཞུང་དོན་ཁང་ལ་སྡེ་ཁུལ་གྱི་གྲོང་མིའི་གཅེས་སེམས་མཚོན་པའི་ཅ་དངོས་འབྱོར་རྗེས་དེ་དག་ཐོར་འགོད་ཀྱི་ཡོད། “སྡེ་ཁུལ་གྱི་དྲ་མིག་ལས་དོན་པས་དུས་རྒྱུན་ལས་ཀའི་ཁྲོད་སྡེ་ཁུལ་གྱི་གྲོང་མི་དང་ཁ་བརྡ་བྱེད་རིང་སུ་ལ་ཅ་དངོས་གང་མཁོ་ཚུལ་འདྲི་ཡི་ཡོད་པ་དང་། ཇ་ཁང་དུ་ཅི་འཕྲོས་མོལ་འཕྲོས་བྱེད་སྐབས་སམ་ཡང་ན་གྲོང་པ་ཁྱིམ་མཚེས་ཀྱི་སྐོར་འཆད་སྐབས། གྲོང་མི་སུ་ལ་ཅ་དངོས་གང་མཁོ་བ་ཐོས་འཕྲལ། གྲོང་ལྷན་གྱིས་དངོས་པོའི་རྩིས་ཐོར་བལྟས་ནས་ཅ་དངོས་བླངས་ཏེ། ལས་དོན་པ་མངགས་ནས་གྲོང་མིའི་ཁྱིམ་ལ་སྐྱེལ་གྱི་ཡོད་པ་རེད”

ཞལ་འདེབས་མཛོད་འཇུག་གི་ལས་ཀ་ཕུད། གྲྭ་བཞི་གྲོང་གསར་གྱིས་ད་དུང་དགེ་སྒྲུབ་ལས་ཀར་དམ་འཛིན་བྱེད་ཅིང་། “སྡེ་ཁུལ་གྱིས་ཟླ་བ་རེར་དུས་ཚོད་དང་ས་ཆ་གཏན་འཁེལ་བྱས་ནས་འོས་འགན་སྨན་བཅོས་བྱེད་པའམ་ཡང་ན་དྲིལ་བསྒྲགས་བྱེད་སྒོ་སྤེལ་གྱི་ཡོད། སྐབས་རེ་གྲོང་མིས་རང་ཁྱིམ་གྱི་ཅ་དངོས་རྙིང་པ་ཁྱེར་ནས་བརྗེ་པོ་བརྒྱབ་པ་ལས་བྱུང་བའི་དངུལ་གྱིས་སྡེ་ཁུལ་གྱི་འཚོ་བར་དཀའ་ངལ་ཡོད་པའི་ཁྱིམ་ཚང་ལ་རོགས་རམ་བྱེད་ཀྱི་ཡོད”ཅེས་གྲྭ་བཞི་གྲོང་གསར་སྡེ་ཁུལ་གྲོང་ལྷན་གྱི་བུད་མེད་ཀྲུའུ་རེན་ཚེ་བརྟན་སྒྲོལ་མས་བཤད་ཅིང་། ཁོང་གིས་དགེ་སྒྲུབ་ནི་སྡེ་ཁུལ་གྱི་གྲོང་མིས་བསྒྲུབས་པའི་སྤྱི་ཕན་གྱི་བྱེད་སྒོ་སྟབས་བདེ་ཞིག་ཡིན་ཞེས་བཤད།

གྲོང་མིར་སྟབས་བདེ་བསྐྲུན་ལ་རང་ཉིད་ལའང་ཡོང་འབབ་བྱུང་བ།

2016ལོའི་ཟླ་9པར། གྲྭ་བཞི་གྲོང་གསར་སྡེ་ཁུལ་ཁོངས་སུ“གྲྭ་བཞི་གྲོང་གསར་སྡེ་ཁུལ་གྱི‘གཉིས་ལྡན་དུད་སྦྲེལ’དམངས་ཕན་ས་ཚིགས”ཞེས་འཁོད་པའི་ཚོང་ཁང་སྒོ་ཕྱེ་བ་དང་། དེ་ནི་སྡེ་ཁུལ་གྱིས་དགེ་སྒྲུབ་བྱ་སྤྱོད་ཀྱི་རྨང་གཞིའི་ཐོག་མུ་མཐུད་ཕན་ཚུན་རོགས་རེས་ཀྱི་བྱེད་སྟངས་ཞིག་རེད། དམངས་ཕན་ས་ཚིགས་སུ་ལོ་68ལ་སླེབས་པའི་རྒད་པོ་ཞིག་གིས་ཉིན་ལྟར་བྲེལ་བའི་ངང་ལས་ཀ་བྱེད་བཞིན་ཡོད་ཅིང་། “སྐུ་ཁམས་བཟང་། ང་ལ་སྒོ་ཤེལ་ཡོལ་ཞིག་འཚེམ་རོགས་གནང”ཞེས་ཞོགས་པ་སྔ་མོ་ནས་སྒོ་ཕྱེ་མ་ཐག་རྒད་པོ་ཕུར་བུར་ཚེམ་བུའི་ལས་ཀ་ཞིག་བྱུང་ནས་ཉིན་དེའི་ལས་ཀའི་འགོ་ཚུགས་ཤིང་། རས་ཆར་ཐིག་བརྒྱབ་ནས་དྲས་འཚེམ་བྱས་པ་བརྒྱུད། ཉིན་ཕྱེད་ཙམ་ལ་ལག་རྩལ་བྱང་ཆུད་པའི་རྒད་པོས་ཁྲོམ་རར་སྒོར་150རི་བའི་སྒོ་ཡོལ་གཅིག་བཟོས་ཚར་བ་དང་། ལས་གླ་སྒོར་80ལས་བླངས་མེད་པ་རེད།

“ཐེངས་ཤིག་ངའི་སྟོད་གོས་ཀྱི་འཐེན་སྒྲོག་ལ་སྐྱོན་ཤོར་ནས་འཚེམ་བཟོ་ཁང་དུ་བཟོ་གླ་ཇི་ཙམ་དགོས་མིན་དྲིས་པར་སྒོར་20དགོས་ཟེར། དེ་ནས་བསྡུར་བ་ཅུང་ཙམ་བྱས་རྗེས་སོ་སོས་ཚོང་ཁང་ནས་འཐེན་སྒྲོག་ཅིག་ཉོས་ནས་བཟོས་པ་ཡིན་ལ། དེར་སྒོར་5ལས་དགོས་ཀྱི་མི་འདུག དུས་དེ་ནས་བཟུང་ངས་སྡེ་ཁུལ་གྲོང་ལྷན་དང་འབྲེལ་བ་བྱས་ནས་ས་ཆ་ཞིག་སྤྲོད་རོགས་ཞུས་པ་མ་ཟད། རང་ཉིད་ཀྱི་སྟོབས་ཤུགས་ཕྲན་བུ་བཏོན་ཏེ་གྲོང་མི་ཚོར་འཚེམ་དྲས་བྱེད་རོགས་བྱས་པ་དང་། རྒྱུ་ཆའི་དངུལ་དང་གླ་ཆ་ཕྲན་བུ་ལས་མི་བསྡུ་རྒྱུའི་ཐག་བཅད་པ་ཡིན”ཞེས་བགྲེས་སོང་ཕུར་བུས་བརྗོད་བྱུང་། དམངས་ཕན་ས་ཚིགས་དེའི་སྐོར་གླེང་ཚེ་ཉེ་འགྲམ་གྱི་ཡུལ་མི་ཚོས་ཀྱང་དེ་གའི་ཅ་དངོས་གོང་ཁེ་བའི་ཁར། སྐབས་རེ་སློབ་མ་དང་ཡུལ་མི་དབུལ་པོ་དེ་གར་འཚེམ་བཟོ་བྱེད་པར་ཡོང་ཚེ་བགྲེས་སོང་གིས་ཐ་ན་འགྲོ་གྲོན་ཁྱོན་ནས་ལེན་ཀྱི་མེད་ཅེས་བརྗོད་པ་དང་། ཚོང་བྲིན་ཁ་རྒྱུག་པས་བགྲེས་སོང་ཁོང་གིས་སྐབས་འགར་བྲེལ་འཚུབ་ཆེ་རྐྱེན་མངགས་ཐོ་ཁག་གཅིག་སྡེ་ཁུལ་གྱི་འཚེམ་བཟོ་བ་གཞན་ལ་སྤྲོད་ཀྱི་ཡོད་པ་རེད།

གྲྭ་བཞི་གྲོང་གསར་གྱི་ཡུལ་མི་གཡང་འཛོམས་ནི་དེའི་ཁྲོད་ཀྱི་འཚེམ་བཟོ་བ་ཞིག་རེད། ཚོན་མདངས་རྣམ་པར་བཀྲ་ཞིང་སྣ་ཁ་མང་བའི་འཐག་དངོས་དེ་དག་ནི་གཡང་འཛོམས་ཀྱིས་ལོ་11རིང་འཐག་ལས་བྱས་པའི་དཔང་པོ་རེད། བཟའ་ཟླ་ཚེ་ལས་འདས་རྗེས་ཁོ་མོས་འཐག་ལས་མི་བྱེད་ཀ་མེད་བྱུང་བ་དང་། ལོ་མང་པོར་དཀའ་ལས་བརྒྱབ་མཐར། ད་ཆ་བུའང་གཉེན་བསྒྲིགས་ཤིང་ལས་ཀར་ཞུགས་པ་རེད། དེར་བསྟུན་འཚོ་བའི་གནོན་ཤུགས་ཆུང་དུ་སོང་ཡོད་མོད། འོན་ཀྱང་འཐག་ལས་ནི་སྔ་མོ་ནས་ཁོ་མོའི་གོམས་གཤིས་སུ་གྱུར་ཟིན། “ད་ཆ་ཁྱིམ་དུ་འཐག་ལས་བྱས་པ་མཐའ་དག་བཙོངས་ཟིན་པ་དང་ཆབས་ཅིག་ཚོང་ཡང་ཡག་པོ་འདུག སྐབས་རེ་ངས་ཅ་དངོས་ཁག་གཅིག་བགྲེས་སོང་གི་སར་འཁྱེར་ནས་བཙོངས་ཀྱི་ཡོད་པས་མངགས་ཐོ་མང་དུ་འགྲོ་ཡི་འདུག”ཅེས་གཡང་འཛོམས་ཀྱིས་དགོད་འཚེར་འཚེར་ངང་བརྗོད་བྱུང་། “དེ་གའི་ཅ་དངོས་རྣམས་གཞན་ལས་གོང་ཁེ་བ་འདུག སྐབས་འགར་དུད་ཚང་དབུལ་པོའི་མི་སྟོད་གོས་ཀྱི་འཐེན་སྒྲོག་བཟོ་བར་ཡོང་སྐབས་ཁོང་གིས་དངུལ་ལེན་གྱི་མི་འདུག”ཅེས་གྲྭ་བཞི་གྲོང་གསར་སྡེ་ཁུལ་གྱི་གྲོང་མིས“གཉིས་ལྡན་དུད་སྦྲེལ”དམངས་ཕན་དབུལ་སྐྱོར་ས་ཚིགས་ལ་གདེང་འཇོག་གང་ལེགས་བྱེད་ཀྱིན་འདུག