འདི་ནི་པེ་ཅིང་སློབ་ཆེན་སྨན་ཁང་གི་རིགས་གཅིག་མཁས་ཅན་གྱིས་རང་སྐྱོང་ལྗོངས་མི་དམངས་སྨན་ཁང་དུ་སྐྱ་འགྲིབ་གཤགས་བཅོས་བྱེད་པའི་གནས་ཚུལ་ཡིན་པ།
ཉེ་ཆར། པེ་ཅིང་སློབ་ཆེན་སྨན་ཁང་དང་པོའི་མིག་ནད་ཚན་ཁག་གི་རིགས་གཅིག་མཁས་ཅན་ཕན་དབྱིན་ཙི་དང་། ལི་ཅུན། དབྱང་སུང་ལིན་བཅས་བོད་རང་སྐྱོང་ལྗོངས་མི་དམངས་སྨན་ཁང་དུ་སྐྱ་འགྲིབ་གཤཌ་བཅོས་དང་དེ་བཞིན་རིག་གཞུང་སྤེལ་རེས་བྱེད་པར་སླེབས་པ་རེད།
ད་ཐེངས་ཀྱི་བྱེད་སྒོའི་དམིགས་ཡུལ་ནི་ཀྲུང་དབྱང་རྩ་འཛུགས་པུའི་སྨན་བཅོས་ཤེས་ལྡན་མི་སྣའི“ཚོགས་སྒྲིག་རྣམ་པའི”བོད་སྐྱོར་ལས་དོན་སྔར་བས་དོན་འཁྱོལ་བྱས་ཏེ། རོགས་སྐྱོར་བྱ་ཡུལ་དང་བྱེད་མཁན་ཕྱོགས་གཉིས་པོའི་མཉམ་ལས་སྤེལ་རེས་ལ་ཤུགས་སྣོན་རྒྱག་པ་དང་། པེ་ཅིང་སློབ་ཆེན་སྨན་ཁང་གི་མིག་ནད་ཚན་ཁག་གི་སྟོབས་ཆེ་བའི་སྨན་བཅོས་ཀྱི་ཐོན་ཁུངས་ལེགས་ཆར་བརྟེན་ནས། གཤཌ་བཅོས་སློབ་ཁྲིད་དང་། རིག་གཞུང་འཆད་ཁྲིད། རིགས་གཅིག་མཁས་ཅན་གྱིས་ནད་ཁང་སྐོར་ཞིབ་སོགས་ཀྱི་བྱེད་སྟངས་བརྒྱུད། འདུ་ཤེས་གསར་པ་བརྒྱུད་བསྒྲགས་དང་ལག་རྩལ་གསར་པ་ཁྱབ་གདལ་བཏང་སྟེ། བོད་རང་སྐྱོང་ལྗོངས་མི་དམངས་སྨན་ཁང་མིག་ནད་ཚན་ཁག་གི་རིག་ཚན་འཕེལ་རྒྱས་དང་ཤེས་ལྡན་མི་སྣའི་དཔུང་ཁག་འཛུགས་སྐྱོང་ལ་སྐུལ་འདེད་བཏང་ནས་མཐར་ལྗོངས་ཡོངས་ཀྱི་མི་རིགས་ཁག་གི་མང་ཚོགས་ལ་ཕན་བདེ་སྐྲུན་ཆེད་དུ་རེད།
བྱེད་སྒོ་སྤེལ་རིང་། པེ་ཅིང་སློབ་ཆེན་སྨན་ཁང་གི་མིག་ནད་ཚན་ཁག་གི་རིགས་གཅིག་མཁས་ཅན་3གྱིས་ས་མཐོ་མི་འཕྲོད་པ་དང་ལམ་བར་གྱི་ངལ་བར་མ་འཛེམས་པར། ལྷ་སར་འབྱོར་བའི་ཉིན་གཉིས་པར་གཤགས་བཅོས་བྱེད་འགོ་ཚུགས་ཏེ་ཁྲག་ཤེད་མཐོ་བའི་རྙོག་འཛིང་སྐྱ་འགྲིབ་གཤགས་བཅོས་སོགས་གཤགས་བཅོས་ཐེངས་25བྱས་པ་རེད། པེ་ཅིང་སློབ་ཆེན་སྨན་ཁང་མིག་ནད་ཚན་ཁག་གི་རིགས་གཅིག་མཁས་ཅན་གྱིས་རིགས་པའི་གཞུང་ལུགས་དང་ལག་ལེན་ཟུང་འབྲེལ་དང་གཤགས་བཅོས་མཛུབ་ཁྲིད་དང་རིག་གཞུང་འཆད་ཁྲིད་བྱས་ནས་བོད་ཀྱི་མིག་ནད་ཚན་ཁག་གི་འཕེལ་རྒྱས་ལ་རྩ་ཆེའི་ཉམས་མྱོང་སློབ་ཁྲིད་བྱས་པས། ལྗོངས་ཡོངས་ཀྱི་མིག་ནད་ཚན་ཁག་གི་སྨན་དོན་མི་སྣ་དང་མིག་ནད་ཕོག་མཁན་གྱི་དགའ་བསུ་དང་བསྔགས་བརྗོད་ཆེན་པོ་ཐོབ་པ་རེད།