འཛམ་གླིང་ཁྱོན་དུ་རྩྭ་དང་འབུ་གཉིས་ལུས་གཅིག་གི་ངོ་བོར་གནས་པའི་སྐྱེ་དངོས་སྣེ་གྲངས་500ཙམ་ཡོད་ལ། རང་རྒྱལ་ཁོ་ནར་དབྱར་རྩྭ་དགུན་འབུ་འདྲ་བའི་སྐྱེ་དངོས་སྣེ་གྲངས་ 90 ལྷག་ཙམ་ཡོད། སྐྱེ་དངོས་ཀྱི་འབུ་ཕྲ་འགའ་ཞིག་འབུ་སྲིན་གཞན་གྱི་ལུས་ཐོག་ཏུ་གཞན་རྟེན་བྱས་ནས་སྐྱེ་འཚར་གྱི་བརྒྱུད་རིམ་ཁྲོད་དུ་རྩྭ་སྣར་གྱུར་པ་ཐམས་ཅད་ནི་དབྱར་རྩྭ་དགུན་འབུ་མ་ཡིན། རང་རྒྱལ་གྱི་སྲོལ་རྒྱུན་ཀྲུང་ལུགས་གསོ་རིག་ནང་གི་དབྱར་རྩྭ་དགུན་འབུ་དང་། ཡང་ན་བོད་ལུགས་གསོ་རིག་ནང་གི་སྔོ་ད་བྱིད་ཅེས་པ་ནི་མདོ་དབུས་ཁམས་གསུམ་དང་དེ་བཞིན་ཉེ་འབྲེལ་གྱི་མཐོ་གྲང་སྤང་རིའི་ལོགས་སུ་སྐྱེ་ཐུབ་པ་དེ་ཁོ་ན་ཡིན་ནོ། དེང་སྐབས་ཚན་རིག་ཞིབ་འཇུག་མི་སྣས་དབྱར་རྩྭ་དགུན་འབུའི་སྟེང་དུ་སྐྱེ་དངོས་ཕྲ་རབ་ཀྱི་འབུ་ཕྲ་གཞན་རྟེན་བྱས་ཡོད་པར་ངོས་འཛིན་བྱེད་བཞིན་ཡོད་ལ། མི་རྣམས་ལ་དབྱར་རྩྭ་དགུན་འབུ་རྗེན་པར་ཟ་རྒྱུ་མེད་པའི་དྲན་སྐུལ་བྱེད་བཞིན་ཡོད། དེ་བཞིན་དབྱར་རྩྭ་དགུན་འབུ་ནི་ངོ་བོ་སྙོམས་ཤིང་ནུས་པ་དལ་བས་ལུས་ཟུངས་གསོ་སྐབས་ངེས་གཏན་གྱི་དུས་ཚོད་ནང་དུ་གྲངས་འབོར་གང་འཚམ་ཞིག་བཟས་ན་གཞི་ནས་ནུས་པ་ཐོན་པའི་ངོས་འཛིན་བྱེད་བཞིན་ཡོད། འོན་ཀྱང་ཡིད་གཟབ་བྱེད་དགོས་པ་ཞིག་ནི་མི་སོ་སོའི་ལོ་ཚད་དང་ཡང་ན་གཟུགས་པོ་ཡག་ཉེས་ལ་གཞིགས་ནས་མང་ཉུང་ཚོད་འཛིན་བྱེད་དགོས་པ་ལས་ཚད་ལས་བརྒལ་ན་སྣ་ཁྲག་ཐོན་པ་དང་། གཉིད་མི་ཁུག་པ་སོགས་་མི་འཕྲོད་པའི་རྟགས་མཚན་ཐོན་མོད། འོན་ཀྱང་དབྱར་རྩྭ་དགུན་འབུ་ཟ་མཚམས་བཞག་ན་མི་འཕྲོད་པའི་རྟགས་ཀྱང་ཡལ་འགྲོ།