ཤིན་ཧྭ་གསར་འགྱུར་ཁང་ཁྲུང་ཆིང་ནས་གློག་འཕྲིན་འབྱོར་པ་གཞིར་བཟུང་། 2016ལོའི་མཐོ་རྒྱུགས་རན་པར་ཟླ་གཅིག་གི་དུས་ཚོད་ཀྱང་མེད་པར། སློབ་མ་ཚོ་ཡིག་རྒྱུགས་ཀྱི་གྲ་སྒྲིག་དུས་སུ་སླེབས་ཡོད་པས། ཁྱིམ་བདག་ཚོས་ཞི་ལྷོད་དུ་མི་སྡོད་པར་བྲེལ་འཚུབ་ཆེན་པོས་འཚོ་བཅུད་སྣ་ཚོགས་བཙལ་ནས་སློབ་མའི་ཀླད་པར་གསོས་གཏོང་ཐབས་བྱེད་ཀྱི་ཡོད། སྣང་ཚུལ་དེར་རིགས་གཅིག་མཁས་ཅན་གྱིས་དྲན་སྐུལ་བྱས་དོན། གཉིད་ཡག་པོ་ཉལ་རྒྱུ་དང་བསམ་བློ་ལྷོད་ཤིག་གེར་གནས་རྒྱུ་དེ་བསྐྱར་སྦྱོང་དང་ཡིག་རྒྱུགས་གྲ་སྒྲིག་གི་འཚོ་བཅུད་ཡག་ཤོས་རེད།

དམག་ཁོངས་གསོ་རིག་སློབ་ཆེན་གསུམ་པའི་ཤིན་ཆའོ་སྨན་ཁང་དབང་རྩའི་ཁོག་ནད་ཚན་ཁག་གི་ཀྲུའུ་རེན་ཡང་ཆིང་ཝུའུ་ཡིས་ངོ་སྤྲོད་བྱས་དོན། ལོ་རེའི་མཐོ་རྒྱུགས་གཏོང་ལ་ཉེ་བའི་སྐབས་སུ་མཐོ་རྒྱུགས་སློབ་མ་འགས་མཐའ་མཇུག་གི་གྲ་སྒྲིག་དུས་མཚམས་སུ་སློབ་ཚན་བསྐྱར་སྦྱོང་གི་དུས་ཚོད་དེ་བས་མང་བ་ཡོང་ཕྱིར། གཉིད་ཡག་པོ་མི་ཉལ་བ་དང་། ཚབས་ཆེ་བ་འགས་ཉིན་གཅིག་ལ་གཉིད་ཆུ་ཚོད་4ཡང་ཉལ་གྱི་མེད།

ཡང་ཆིང་ཝུའུ་ཡིས་གྲོས་འགོ་བཏོན་དོན། ཡིག་རྒྱུགས་སྔོན་གྱི་མཐའ་མཇུག་ཟླ་གཅིག་གི་གྲ་སྒྲིག་ནང་མཐོ་རྒྱུགས་སྐབས་ཀྱི་ཉལ་གསོའི་དུས་ཚོད་ལྟར་ཉལ་གསོ་བརྒྱབ་ནས། རང་ཉིད་ཀྱི་གནས་བབ་ཡག་ཤོས་སྔ་དྲོ་དང་ཕྱི་དྲོའི་ཡིག་ཚད་དུས་ཚོད་དུ་འཁེལ་བ་བྱེད་དགོས་ཏེ། ཡིག་ཚད་གཏོང་ལ་ཉེ་བའི་གྲ་སྒྲིག་དུས་མཚམས་སུ་དགོང་དྲོའི་ཆུ་ཚོད་11གོང་དུ་ཉལ་བ་དང་སྔ་དྲོའི་ཆུ་ཚོད་6པར་མལ་ལས་ལངས་བ་དང་དུས་མཚུངས། ཉིན་དགུང་སྐར་མ་སུམ་ཅུའམ་ཆུ་ཚོད་གཅིག་ཙམ་ཉལ་དགོས། སློབ་མས་ཉིན་དགུང་ཉལ་ན་ཡག་ཤོས་ཡིན། ཉིན་དགུང་གཉིད་སྐར་མ་10ཉལ་བ་དེ་དགོང་མོ་གཉིད་སྐྱིད་པོ་ཆུ་ཚོད་ཕྱེད་ཀའམ་གཅིག་ཁུག་པ་དང་ཁྱད་མེད་པས། དེ་ལྟར་བྱས་ཚེ། སྔ་དྲོའི་ངལ་དུབ་ཡོངས་སུ་སེལ་ནས་ཕྱི་དྲོ་ཧྲིལ་པོའི་ལས་ཆོད་ཆེ་བའི་སློབ་སྦྱོང་བྱ་རྒྱུར་འགན་ལེན་བྱེད་ཐུབ།