སྤྱི་ཚེས་18ཉིན་རང་སྐྱོང་ལྗོངས་ཚན་རྩལ་ཐིང་དང་ཆབ་མདོ་གྲོང་ཁྱེར་ཚན་རྩལ་ཅུས་ཀྱིས་གཙོ་གཉེར་བྱས་པའི་རང་སྐྱོང་ལྗོངས་ཀྱི་སྤྱི་ལོ་2016ལོའི་ཚན་རྩལ་གཤམ་སྐྱོད་ཀྱི་གཅིག་བསྡུས་ཞབས་ཞུའི་བྱེད་སྒོ་ཆབ་མདོ་གྲོང་ཁྱེར་བྲག་གཡབ་རྫོང་དུ་སྤེལ་འགོ་ཚུགས་པ་དང་། འགོ་ཚུགས་མཛད་སྒོའི་ཐོག་ཆབ་མདོ་གྲོང་ཁྱེར་གླུ་གར་ཚོགས་པ་དང་བྲབ་གཡབ་རྫོང་དམངས་ཁྲོད་སྒྱུ་རྩལ་ཚོགས་པའི་འཁྲབ་སྟོན་པ་ཚོས་ལྟད་མོ་ཆེ་བའི་རིག་རྩལ་འཁྲབ་སྟོན་བྱས་པ་རེད།
བྱེད་སྒོའི་ནང་ད་དུང་མང་ཚོགས་ལ་ཚན་རྩལ་ཤེས་བྱ་དང་འདེབས་འཛུགས་གསོ་སྤེལ་ལག་རྩལ། སྨན་བཅོས་འཕྲོད་བསྟེན་སོགས་ཐད་ཀྱི་དཔེ་དེབ་དང་འབྲེལ་ཡོད་དྲིལ་བསྒྲགས་དཔྱད་གཞི་སྤྲད་པ་རེད། པེ་ཅིང་གི་སྨན་བཅོས་བོད་སྐྱོར་རིགས་གཅིག་མཁས་ཅན་དང་། རང་སྐྱོང་ལྗོངས་སྨན་རྩིས་ཁང་དང་ཆབ་མདོ་གྲོང་ཁྱེར་སྨན་རྩིས་ཁང་གི་སྨན་པས་མང་ཚོགས་ལ་རིན་པ་མི་དགོས་པའི་གཟུགས་པོ་བརྟག་དཔྱད་བྱས་པ་དང་བློ་འདྲིའི་ཞབས་ཞུ་མཁོ་འདོན་བྱས་པ་རེད།
ཤེས་རྟོགས་བྱས་པར་གཞིགས་ན། ཐེངས་འདིའི་བྱེད་སྒོའི་ནང་ཚན་རྩལ་ཁྱབ་གདལ་གྱི་དཔྱད་གཞི་དང་དཔེ་དེབ་བདུན་སྟོང་ལྷག་ཙམ་དང་རིན་ཐང་སྒོར་ཆིག་ཁྲི་རི་བའི་སྨན་རྫས་སྤྲད་པ་རེད། རང་སྐྱོང་ལྗོངས་ཚན་རྩལ་ཐིང་གིས་ད་དུང་བྲག་གཡབ་རྫོང་དབྱེན་འདུམ་གྲོང་རྡལ་ཤོག་འདུམ་གྲོང་ཚོ་དང་དཀྱིག་ཐང་གྲོང་རྡལ་ཡུག་ཤོད་གྲོང་ཚོ། རང་གྲུབ་ཤང་རང་གྲུབ་གྲོང་ཚོ་བཅས་སུ་ཚན་རྩལ་ཁྱབ་གདལ་བྱེད་སྒོ་ཁང་བཙུགས་པ་མ་ཟད། བརྙན་འཕྲིན་དང་གློག་ཀླད། སྒྲ་སྐྱེད་སོགས་སྒྲིག་བཀོད་སྒྲིག་སྦྱོར་དང་རིགས་ཁག་གི་ཚན་རྩལ་ཁྱབ་གདལ་དཔེ་དེབ་སྤྲད་པ་རེད།