འདི་ལོ་རང་ལྗོངས་ཀྱི“ཚོགས་འདུ་གཉིས”ཀྱི་སྲིད་གཞུང་གི་ལས་དོན་སྙན་སྒྲོན་ནང་གྲངས་གཞི་ཞིག་བཏོན་པ་སྟེ། བོད་ཀྱི་ཚན་རྩལ་གྱིས་ཞིང་འབྲོག་ལས་འཕེལ་རྒྱས་ལ་ལེགས་སྐྱེས་འབུལ་ཚད་45%ཟིན་པ་དེ་ནི་སྤྱིར་བཏང་གི་གྲངས་ཀ་ཞིག་མིན། དེ་ལས་ཉེ་བའི་ལོ་ཤས་རིང་རང་ལྗོངས་ཀྱི་རྒྱ་ཆེའི་ཚན་རྩལ་ལས་དོན་མི་སྣར་ཐོབ་པའི་དངོས་དངོས་རྗེན་རྗེན་གྱི་གྲུབ་འབྲས་གསལ་བཤད་བྱེད་ཐུབ། གྲངས་ཀ་དེ་ལས་ང་ཚོས་མཐོང་ཐུབ་པ་ནི་ལྗོངས་ཡོངས་ཀྱི་ཚན་རྩལ་ཆེད་མངགས་པ་དང་ཚན་རྩལ་ཤེས་ལྡན་མི་སྣ་མང་པོས་རྒྱ་ཆེའི་ཞིང་འབྲོག་ཁུལ་གྱི་ཞིང་ནང་དང་། མུ་ཁ། འབྲོག་ར་བཅས་སུ་ལས་ལ་བྲེལ་བའི་གཟུགས་བརྙན་མཐོང་ཐུབ།
ཚན་རྩལ་ནི་ཐོན་སྐྱེད་ནུས་ཤུགས་ཨང་དང་པོ་ཡིན་པ་དེ་རྒྱ་ཆེའི་མི་དམངས་མང་ཚོགས་ཚོའི་ཐུན་མོང་གི་ངོས་འཛིན་ཞིག་ཏུ་གྱུར་ཡོད། འོན་ཀྱང་འཕེལ་རྒྱས་འགོར་བའི་མཐའ་མཚམས་གྲངས་ཉུང་མི་རིགས་ས་ཁུལ་ཞིག་གི་ངོས་ནས་བཤད་ན། ཚན་རྩལ་ཐོན་སྐྱེད་ནུས་ཤུགས་ཀྱི་ཆུ་ཚད་མཐོ་རུ་གཏོང་རྒྱུ་དེ་ལས་སླ་པོ་ཞིག་མིན། ལོ་རྒྱུས་དང་རང་བྱུང་ཆ་རྐྱེན་གྱིས་རྐྱེན་པས་འཕེལ་རྒྱས་འགྲོ་འགོར་བ་དང་། ཐོན་སྐྱེད་ནུས་ཤུགས་རྗེས་ལུས་ཡིན་པ། ཞིང་འབྲོག་པའི་བྱང་ཚད་མཐོ་པོ་མེད་པ་སོགས་བོད་ཀྱི“མཚོན་རྟགས”ཤིག་ཏུ་གྱུར་ཡོད། དཀའ་ཚེགས་ཆེ་བའི་ཁོར་ཡུག་དེ་ལྟ་བུའི་ཁྲོད་རང་ལྗོངས་ཀྱི་རྒྱ་ཆེའི་ཚན་རྩལ་ལས་དོན་མི་སྣས་ཚན་རྩལ་ལ་བརྟེན་ནས་ཞིང་ལས་དང་འབྲོག་ལས་དར་སྤེལ་གཏོང་བའི་ལས་འགན་ལྕི་པོ་ཕྲག་ཏུ་ཁུར་ནས་བྱ་བ་ཕྲན་ཚེགས་ནས་འགོ་བཙུགས་ཏེ་ཚན་རྩལ་གཤམ་སྤེལ་དང་ཞིང་འབྲོག་ཚན་རྩལ་གསོ་སྦྱོང་སོགས་ཀྱི་བྱེད་སྒོ་གཏིང་ཟབ་སྤེལ་ནས་རང་ལྗོངས་ཀྱི་རྒྱ་ཆེའི་ཞིང་འབྲོག་མང་ཚོགས་ལ“ཚན་རྩལ་གྱི་སྟོན་མོ”མང་པོ་ཞིག་བཤམས་པ་མ་ཟད། ད་དུང་ལག་ལེན་བརྒྱུད་ཞིང་འབྲོག་མང་ཚོགས་ཚོར་ཚན་རྩལ་ལས་འབབ་འཕར་ཕྱུག་འགྱུར་ཡོང་བའི་དངོས་ཕན་དང་ཚན་རྩལ་གྱི་སྟོབས་ཤུགས་ཚོར་ཐུབ་པ་བྱས་པ་རེད།
རང་ལྗོངས་ཀྱི་ཚན་རྩལ་གྱིས་ཞིང་འབྲོག་ལས་ལ་ལེགས་སྐྱེས་འབུལ་ཚད་མཐོ་རུ་ཕྱིན་པ་དེ་ནི་ཉེ་བའི་ལོ་ཤས་རིང་ཞིང་འབྲོག་མང་ཚོགས་ཀྱི་ཡོང་འབབ་རྒྱུན་མཐུད་ངང་འཕར་བ་དང་ཞིང་འབྲོག་ལས་དེང་རབས་ཅན་གྱི་མ་ལག་ཟམ་མི་ཆད་པར་འཐུས་ཚང་དུ་སོང་བའི་མངོན་ཚུལ་ཞིག་དང་དཔལ་འབྱོར་དང་སྤྱི་ཚོགས་ཟམ་མི་ཆད་པར་འཕེལ་རྒྱས་སོང་བ་དང་ཞིང་འབྲོག་ལས་ཐོན་ལས་གྲུབ་ཆ་རྒྱུན་མཐུད་ལེགས་སྒྲིག་བྱས་པའི་དགོས་ངེས་འབྲས་བུ་ཞིག་ཡིན་ལ། རང་ལྗོངས་ཀྱི་ཞིང་འབྲོག་དཔལ་འབྱོར་འཕེལ་རྒྱས་ཀྱི་རྒྱུན་རྣམ་གསར་པ་དང་མཐུན་པ་དང་རང་འགུལ་ངང་ཞིང་འབྲོག་དཔལ་འབྱོར་འཕེལ་རྒྱས་གཏོང་སྟངས་ལེགས་སྒྲིག་བྱེད་པའི་ཐོག་མའི་འབྲས་བུ་ཞིག་ཀྱང་ཡིན། ལྗང་མདོག་འཛད་སྤྱོད་དང་སྤུས་དག་འཛད་སྤྱོད་སོགས་འཛད་སྤྱོད་བྱེད་སྟངས་དཔྱིད་ཀྱི་དཔལ་ཡོན་བཞད་པ་ལྟར་མང་དུ་སོང་བ་དང་སྦྲགས་ང་ཚོས་དེ་བས་འབད་འཐབ་ཀྱིས་ཞིང་འབྲོག་ཐོན་རྫས་ཀྱི་ཚན་རྩལ་འདུས་ཚད་མཐོ་རུ་བཏང་ནས་ཁྲོམ་རའི་དགོས་མཁོ་གསར་པ་སྐོང་དགོས་ཀྱི་ཡོད།
དུས་སྐབས་གསར་པར་རང་ལྗོངས་ཀྱི་ཞིང་འབྲོག་ལས་དཔལ་འབྱོར་གྲུབ་ཆར་འཐབ་ཇུས་རང་བཞིན་གྱི་ལེགས་སྒྲིག་བྱེད་པར་ཚན་རིག་ལག་རྩལ་གྱི་རྒྱབ་སྐྱོར་ཤུགས་ཆེན་དགོས་ཀྱི་ཡོད། བོད་ཀྱི་ཞིང་འབྲོག་ལས་ཚན་རྩལ་འཕེལ་རྒྱས་གཏོང་བར་རང་ལྗོངས་འདི་ཉིད་སྣོད་བཅུད་བདེ་འཇགས་སྲུང་ཡོལ་གལ་ཆེན་དང་ས་མཐོའི་ཁྱད་ལྡན་ཞིང་ལས་ཐོན་རྫས་རྟེན་གཞི་གལ་ཆེན་དུ་བསྐྲུན་པའི་འཐབ་ཇུས་དམིགས་ཚད་ལ་དམ་པོར་དམིགས་ཏེ་ཐོན་ཁུངས་གསར་སྤེལ་འོས་འཚམ་བྱས་ནས་ཞིང་འབྲོག་ལས་ཚན་རྩལ་གྱི་རང་བརྟེན་གསར་གཏོད་ནུས་པ་ཆེ་རུ་གཏོང་དགོས་པ་དང་། ལག་རྩལ་ཁྱབ་གདལ་ལ་ཤུགས་སྣོན་བརྒྱབ་སྟེ་ཞིང་འབྲོག་ཚན་རྩལ་ཞབས་ཞུའི་ཆུ་ཚད་མཐོ་རུ་གཏོང་དགོས་པ། ཞིང་འབྲོག་ལས་ཀྱི་ཚན་རྩལ་ཤེས་ལྡན་མི་སྣའི་དཔུང་ཁག་གསོ་སྐྱོང་དང་སྟོབས་ཆེར་བཏང་སྟེ་ཞིང་འབྲོག་པའི་ཚན་རྩལ་རིག་གནས་བྱང་ཚད་མཐོ་རུ་གཏོང་དགོས་པ། ཞིང་འབྲོག་ལས་ཐོན་ཁུངས་གསར་སྤེལ་དང་ལུགས་མཐུན་བེད་སྤྱོད་ལ་ཤུགས་སྣོན་བརྒྱབ་ནས་ཞིང་འབྲོག་ལས་དར་སྤེལ་གཏོང་ཐབས་དེ་རགས་ལས་རྣམ་པ་ནས་ཞིབ་གཉེར་རྣམ་པར་འགྱུར་བ་བྱེད་དགོས། ཞིང་འབྲོག་ལས་ཀྱི་ཐོན་ལས་ལག་རྩལ་ཆུ་ཚད་དང་། ཐོན་རྫས་ཀྱི་སྤུས་ཚད། ཐོན་སྐྱེད་ནུས་པ་བཅས་ཆེས་ཆེར་མཐོ་རུ་གཏོང་རྒྱུ་གཙོ་ཐིག་ཏུ་བྱས་ཏེ་རང་བརྟེན་གསར་གཏོད་དང་། ནང་འདྲེན། སློབ་སྦྱོང་། ལག་ལེན་བཅས་ཕན་ཚུན་ཟུང་འབྲེལ་བྱེད་པ་དང་བོད་ཀྱི་ཁྱད་ཆོས་ལྡན་པའི་རྒྱུན་བསྲིང་འཕེལ་རྒྱས་ཀྱི་ཞིང་འབྲོག་ལས་ཀྱི་ལམ་བུ་གསར་པ་ཞིག་ཏུ་བསྐྱོད་ཐུབ་པ་བྱེད་དགོས།