དབྱར་དུས་ཚ་བ་ཆེ་བའི་སྐབས་འཐུང་བྱ་གྲང་མོ་ནི་མི་ཚོའི་ཚ་འཇོམས་སྐོམ་སེལ་གྱི་འཐུང་བྱ་མེད་དུ་མི་རུང་བ་ཞིག་རེད། འོན་ཀྱང་འཐུང་བྱ་གྲང་མོ་མི་ཚང་མར་འཕྲོད་པའི་ངེས་པ་མེད་ལ་གཤམ་གསལ་གྱི་མི་ཚོགས་ཀྱིས་འཐུང་བྱ་གྲང་མོར་འཛེམས་དགོས།
གཅིག དལ་བའི་རང་བཞིན་གྱི་ཕོ་བའི་གཉན་ཚད་དང་མཁྲིས་པའི་གཉན་ཚད། ཟས་འཇུ་དཀའ་བ་སོགས་འཇུ་བྱེད་མ་ལག་གི་ནུས་པ་ཞན་པའི་ནད་པས་འཐུང་བྱ་གྲང་མོར་འཛེམས་དགོས། རྒྱུ་མཚན་ནི་འཐུང་བྱ་གྲང་མོས་ཕོ་བའི་སྐྱི་ལྤགས་ལ་ཤུགས་རྐྱེན་ཐེབས་ཏེ་ནད་གཞི་ལྕི་རུ་འགྲོ་གི་ཡོད།
གཉིས། འཐུང་བྱ་གྲང་མོའི་ནང་ཚད་གཞི་མི་འདྲ་བའི་མངར་ཆ་འདུས་ཡོད་པས་མིའི་ཁྲག་མངར་མཐོ་རུ་ཕྱིན་ཏེ་གཅིན་སྙི་ཟགས་ཁུའི་ནད་གཞི་ལྕི་རུ་འགྲོ་བས་ནད་དེ་ཡོད་པའི་མིས་འཐུང་བྱ་གྲང་མོར་འཛེམས་དགོས།
གསུམ། སོ་རུལ་དང་སོ་ལ་གཉན་ཁ་ཡོད་པའི་མིས་འཐུང་བྱ་གྲང་མོ་འཐུང་བར་འཛེམས་དགོས།
བཞི། ཁྲག་ཤེད་མཐོ་བ་དང་འགུལ་རྩ་མཁྲེགས་འགྱུར་གྱི་ནད་པས་འཐུང་བྱ་གྲང་མོ་མང་པོ་བཏུང་ན་ཕོ་བར་ཤུགས་རྐྱེན་ཕོག་པ་དང་ཁྲག་རྩ་འཁུམས་ཤེད་ཆེ་རུ་འགྲོ་བ་སོགས་ནད་ཚབས་ལྕི་རུ་ཕྱིན་ནས་ཀླད་ཁྲག་ཤོར་ཉེན་ཡོད།
ལྔ། དབུགས་ལམ་གཉན་ཚད་དང་གློ་ཡུའི་གཉན་ཚད། གློ་ཡུའི་ཡན་ལག་དབུགས་འཚང་ནད། གྲུམ་ནད་སོགས་ཕོག་མཁན་གྱིས་ཡག་ཤོས་བྱུང་ན་འཐུང་བྱ་གྲང་མོ་འཐུང་རྒྱུ་མེད། འཐུང་བྱ་གྲང་མོའི་རིགས་ཀྱིས་དབུགས་ལམ་ངོས་ཀྱི་ནད་ཚབས་ལྕི་རུ་གཏོང་གི་ཡོད།
དྲུག རྒྱགས་ནད་ཕོག་མཁན། འཐུང་བྱ་གྲང་མོའི་ནང་མངར་ཆ་མང་པོ་འདུས་ཡོད་པས་དེས་མཆིན་པའི་མངར་ཆ་འདུས་ཚད་མཐོ་རུ་ཕྱིན་ཏེ་དེ་དག་ཚིལ་ལ་གྱུར་ནས་ལུས་པོ་དེ་ལས་ལྡོག་སྟེ་རྒྱགས་སུ་འགྲོ་ལ་ཚིལ་མཐོ་འདུས་པའི་སྤྲི་དཀར་ཁྲག་ནད་སློང་སྲིད།
བདུན། ཀལ་མི་འདང་བའི་ནད་པ། འཐུང་བྱ་གྲང་མོའི་ནང་དྲི་རྫས་དང་ཉིང་མེང་སྐྱུར་སོགས་མང་པོ་འདུས་ཡོད་པས་དེས་ཁྲག་ནང་གི་ཀལ་འདུས་ཚད་དམའ་རུ་གཏོང་བས་ཕྲུ་གུས་འཐུང་ཆེ་ན་ཀལ་མི་འདང་བའི་རང་བཞིན་གྱི་རྩ་འཁུམས་པ་དང་རུས་ཆག ཤ་གནད་ལ་ན་ཟུག་གཏོང་བ། ངལ་དུབ་ཆེ་བ་སོགས་ཀྱི་ནད་རིགས་སློང་གི་ཡོད།