རང་གཞན་སུ་ལའང་མི་ཕན་པའི།།
ནོར་དེ་མེད་པ་ཉིད་དང་མཚུངས།།
ཆུ་མེད་ས་གཞི་རྒྱ་ཆེ་ཡང་།།
མྱ་ངམ་ཐང་ཞེས་ཀུན་གྱིས་འདོར།།
དཔག་བསམ་ཤིང་ལ་བརྟེན་བྱས་ན།།
དགོས་འདོད་ཐམས་ཅད་ཆར་དུ་བསྙིལ།།
དེ་བཞིན་བཤེས་གཉེན་དམ་པ་ལ།།
བརྟེན་ན་ལེགས་ཚོགས་ལྷུན་གྱིས་གྲུབ།།
ཁ་བཤད་མང་ངམ་ཉུང་ཡང་རུང་།།
དགོས་དོན་ལག་ཏུ་བླངས་ན་གོ།།
ཆུ་ཞེང་ཆེ་ཆུང་ཅི་འདྲ་ཡང་།།
ཟབ་དང་མི་ཟབ་བརྒལ་ན་ཤེས།།
བཤེས་ལ་མི་གུས་སྐྱེ་བོ་དེས།།
གཞུང་བརྒྱ་ཤེས་ཀྱང་དོན་མི་འགྱུར།།
ཤིང་སྐམ་ལོ་བརྒྱ་ཆུར་འཕངས་ཀྱང་།།
ལོ་འདབ་སྐྱེ་བ་སྲིད་ན་མེད།།
བསམ་ཚད་ཁ་རུ་འདོན་པ་དེར།།
གཏད་ས་མེད་ཅེས་ཀུན་གྱིས་བརྙས།།
ཤག་ཤག་འབབ་པའི་ཆུ་བོ་ལ།།
བྱིས་པ་རྣམས་ཀྱང་བརྒལ་བར་བྱེད།།
བསླབ་སྦྱངས་དུས་ན་གཡེལ་བ་དེས།།
མཁས་འདོད་རེ་བ་འབྲས་མེད་ཡིན།།
མེ་ཏོག་སད་ཀྱིས་ཁྱེར་བ་ཡི།།
ཤིང་ལ་འབྲས་བུའི་རེ་བ་མེད།།