མཁྱེན་པའི་གཏིངམཐའ་མི་མངོན་ཞིང་། །
ཐུགས་བརྗེའི་ཡིད་བཞིན་ནོར་གྱིས་གཏམས། །
མཛད་པའི་རླབས་ཕྲེང་གཡོ་བ་ཅན། །
ཐུབ་དབང་ཆོས་ཀྱི་རྒྱ་མཚོ་རྒྱལ། །
རྙོག་བྲལ་དྭངས་པའི་ཆུ་རྒྱུན་གྱིས། །
ལུས་ཅན་གདུང་བ་ཞི་བྱེད་ལྟར། །
ལེགས་བཤད་གསར་པའི་བདུད་རྩི་ཡིས། །
བློ་ལྡན་སྐྱེ་བོ་དབུགས་དབྱུང་བྱ། །
དྲི་བཟང་བསྒོས་པའི་ཆུ་གཙང་དེ། །
མཆོད་ཡོན་ཞབས་བསིལ་བསང་གཏོར་སོགས། །
གང་དུ་བྱས་ཀྱང་ལེགས་པ་ལྟར། །
ལེགས་བཤད་གཏམ་ནི་ཀུན་ལ་མཛེས། །
ལུགས་གཉིས་བླང་དོར་ཤེས་པ་ཡིས། །
གནས་སྐབས་མཐར་ཐུག་དོན་འགྲུབ་སྟེ། །
བརྟག་པ་ཀུན་ལ་མཁས་པ་ཡིས། །
དེད་དཔོན་རྒྱ་མཚོར་ཞུགས་པ་བཞིན། །
ཆུ་ཕྲན་བརྒལ་བར་མི་ནུས་དེས། །
རྒྱ་མཚོར་རྐྱལ་གྱིས་ག་ལ་ཆོད། །
ཡ་རབས་ལུགས་ཀྱང་མི་ཤེས་ན། །
ཆོས་ཀྱི་དེ་ཉིད་ཇི་ལྟར་རྟོགས། །
གཟུར་གནས་རིག་པར་ལྡན་པ་དེས། །
གཞན་གྱི་ཡོན་ཏན་ལེན་པར་བྱེད། །
སྤང་ལྗོངས་གཙང་མའི་དལ་འགྲོ་མ། །
ལྷུང་ལྷུང་ཟེར་ཞིང་མེ་ཏོག་འཐུ། །
ངན་པ་ཕྱོགས་མཐའ་བསྐོར་ན་ཡང་། །
སྐྱོན་གྱི་རིགས་རྣམས་སྡུད་པར་བྱེད། །
ངམ་གྲོག་ས་རལ་ཅན་གྱི་ཆུས། །
འདམ་གྱི་སྙིགས་མ་འདྲེན་དང་མཚུངས། །
ཡོན་ཏན་དང་པོར་སློབ་དཀའ་ལ། །
ཤེས་བཞིན་མེད་ན་ཉམས་པ་སླ། །
ཆུ་ཐིགས་བསགས་པས་འགེངས་དཀའ་ཡང་། །
བོ་ན་ཅིག་ཅར་ཉིད་དུ་མཛད། །