ལོ་ལྔ་ཚན་བཅུ་གཉིས་པའི་རིང་རང་སྐྱོང་ལྗོངས་ཚན་རྩལ་ཐིང་གིས་སྒྲིག་འཛུགས་བྱས་པ་དང་། ཀྲུང་གོ་ཚན་རིག་ཁང་ས་ཁམས་ཚན་རིག་དང་ཐོན་ཁུངས་ཞིབ་འཇུག་ཟོའོ་སོགས་ལས་ཁུངས་ཀྱིས་མཉམ་འབྲེལ་ཐོག་གཉེར་བའི་བོད་ལྗོངས་ཀྱི་གཟན་རྩྭ་ཐོན་ལས་ཀྱི་ཚན་རྩལ་ཆེད་དོན་རྣམ་གྲངས་གལ་ཆེན་ལ་འགག་རྩའི་རང་བཞིན་གྱི་འགག་སྒྲོལ་བྱུང་བ་སྟེ། རྩྭ་སོན་ནང་འདྲེན་དང་འདེམས་གསོ་བྱས་རྗེས་འཛམ་གླིང་ཡང་རྩེར་གཟན་རྩྭ་སྤུས་ལེགས་སྐྱེ་འཚར་བྱུང་ཡོད་པ་རེད།
ལྷ་ས་གྲོང་ཁྱེར་ལྷུན་གྲུབ་རྫོང་མཁར་རྩེ་ཤང་དཔེ་སྣང་གྲོང་ཚོ་ནི་གཟན་རྩྭ་ཐོན་ལས་ཀྱི་གལ་ཆེའི་ཆེད་དོན་རྩྭ་སོན་ནང་འདྲེན་ཚོད་ལྟ་ཁུལ་གྱི་གྲས་ཤིག་ཡིན། སྔོན་ཆད་དཔེ་སྣང་གྲོང་ཚོར་ཡུན་རིང་ནང་ཕྱུགས་རིགས་འཚོ་ཐལ་སོང་བའི་རྐྱེན་གྱིས་རྩྭ་ཐང་ཉམས་ཞན་ཚབས་ཆེན་ཕྱིན་པ་མ་ཟད། སྤུས་ལེགས་གཟན་རྩྭའི་ཐོན་ཚད་ཀྱང་མངོན་གསལ་ཆེན་པོས་དམའ་རུ་ཕྱིན་ཡོད་པ་རེད།
སྤྱི་ལོ ༢༠༡༢ ནས་བཟུང་དཔེ་སྣང་གྲོང་ཚོས་གཟན་རྩྭ་ཐོན་ལས་ཀྱི་གལ་ཆེའི་ཆེད་དོན་རྣམ་གྲངས་ལག་བསྟར་བྱས་ནས་སྤུས་ལེགས་རྩྭ་སོན་ནང་འདྲེན་བྱས་ཏེ། མ་རྨོས་རྩྭ་འདེབས་དང་ཕྱུགས་རྩྭ་བསྲེས་འདེབས། ཆར་དུས་ལུད་སྦྱོར་སོགས་ཀྱི་ལག་རྩལ་ལ་བརྟེན་ནས་ཉམས་ཞན་རྩྭ་ཐང་ལེགས་བཅོས་བྱས་པས། ཕྱུགས་རྩྭ་ཐོན་ཚད་ཆ་སྙོམས་མུའུ་རེ་ནས་སྤྱི་རྒྱ ༡༤༨ བར་མཐོ་རུ་ཕྱིན་པ་དང་རྩྭ་སྐམ་པོའི་ཐོན་ཚད་ཆ་སྙོམས་མུའུ་རེ་ནས་སྤྱི་རྒྱ ༢༣ ཟིན་གྱི་ཡོད། གྲངས་ཀ་དེ་དག་ཐོག་ནས་དུད་ཁྱིམ་རེས་ཕྱུགས་ཟོག་གསོ་ཚགས་བྱེད་ཚད་སྔོན་མ་ལས་ལྡབ ༣ ཡན་མང་དུ་ཕྱིན་པ་མཚོན་གྱི་ཡོད་པ་རེད།
ཕྱུགས་ཟོག་གསོ་སྤེལ་གྱི་ལས་ཕྱོད་ཆེ་རུ་གཏོང་ཆེད་དཔེ་སྣང་གྲོང་ཚོས་སྤྱི་ལོ ༢༠༡༣ ལོར་རྩྭ་འདེབས་ཕྱུགས་གསོའི་ཞིང་འབྲོག་མང་ཚོགས་ཀྱི་ཆེད་ལས་མཉམ་ལས་ཁང་བཙུགས་པ་དང་། ན་ནིང་ལོ་མཇུག་ཏུ་དཔེ་སྣང་གྲོང་ཚོའི་རྩྭ་འདེབས་ཕྱུགས་གསོའི་ཞིང་འབྲོག་མང་ཚོགས་ཀྱི་ཆེད་ལས་མཉམ་ལས་ཁང་གིས་ཐེ་ཞུགས་ཞིང་དུད་རེར་ཁེ་སྤོགས་སྒོར ༦༠༠ སྤྲད་ཡོད་པ་རེད། མཉམ་ལས་ཁང་གི་གཞི་ཁྱོན་ཡང་ཐོག་མའི་གྲོང་མི་དུད་ཁྱིམ ༢༥ ནས་ད་ལྟའི་དུད་ཁྱིམ ༡༠༡ བར་འཕེལ་རྒྱས་ཕྱིན་ཡོད་པ་རེད།
བསྡོམས་རྩིས་ལ་གཞིགས་ན། རང་ལྗོངས་ཀྱིས་ལོ་ལྔ་ཚན་བཅུ་གཉིས་པའི་རིང་སྔ་ཕྱི་བསྡོམས་མ་དངུལ་སྒོར་ཁྲི་ཚོ ༢༦༧༧ བཏང་ནས། གཟན་རྩྭའི་ཐོན་ལས་གོང་འཕེལ་ལ་སྐུལ་འདེད་བཏང་བ་དང་རྩྭ་སོན་སྣེ་ཁ་བརྒྱ་ལྷག་ཙམ་ནང་འདྲེན་བྱས་ཡོད་པས། སྤུས་ལེགས་གཟན་རྩྭ་འདེབས་གསོའི་དུས་ཚོད་དང་གཞི་ཁྱོན་ཆེ་རུ་གཏོང་བ་སོགས་ཐད་ཕན་འབྲས་བཟང་པོ་ཐོན་ཡོད། སྤྱི་ལོ ༢༠༡༡ ལོར་སྤེལ་འགོ་ཚུགས་པའི་བོད་ལྗོངས་རྩྭ་ཐང་སྐྱེ་ཁམས་རྒྱང་ཚོར་ལྟ་ཞིབ་ཚད་ལེན་ཞེས་པའི་རྣམ་གྲངས་ཐོག་ནས་མངོན་པར་གཞིགས་ན། རང་ལྗོངས་ཀྱི་རྩྭ་ཕྱུགས་གྲུབ་ཆ་ཉིན་རེ་བཞིན་དོ་སྙོམས་སུ་འགྲོ་བ་དང་རྩྭ་ཐང་སྐྱེ་ཁམས་ཀྱིས་སྐྱེ་ཁམས་མ་ལག་ཧྲིལ་པོ་གོང་འཕེལ་ཡག་པོ་འགྲོ་རྒྱུར་སྐུལ་མ་ཐེབས་ཏེ། ལོ་ལྔ་ཙམ་ནང་ལྗོངས་ཡོངས་ཀྱི་སྔོ་ཁེབས་ཁྱབ་ཚད་བརྒྱ་ཆ ༡༠ ཡན་རྒྱ་ཆེར་ཕྱིན་ཡོད་པ་རེད།།