ཟླ་10ཚེས་5ཉིན་གྱི་སྔ་དྲོའི་ཆུ་ཚོད་10པར་བོད་ལྗོངས་སློབ་ཆེན་ལོ་རིམ་གསུམ་པའི་སློབ་མ་ཡེ་ཤེས་ལྷུན་གྲུབ་ཀྱིས་སློབ་གྲོགས་འགའ་ཞིག་དང་མཉམ་དུ་ཉེ་ཆར་བསྐྲུན་ཟིན་ནས་སྒོ་ཕྱེ་བའི་བོད་ལྗོངས་རང་བྱུང་ཚན་རིག་རྟེན་རྫས་བཤམས་མཛོད་ཁང་དུ་ལྟ་སྐོར་བྱེད་པར་བསྐྱོད་དེ“དེ་ནི་བོད་ཀྱི་ལོ་རྒྱུས་ཐོག་གི་ཚན་རྩལ་ཁང་དང་པོ་དེ་ཡིན་པ་གོ་ཐོས་བྱུང་བ་དང་སློབ་གྲྭ་དང་ཐག་ཉེ་བས་སློབ་གྲོགས་དང་མཉམ་དུ་དེར་མྱོང་ཚོར་བྱེད་པར་ཡོང་བ་ཡིན”ཞེས་བཤད་པ་རེད།

རང་བྱུང་ཁང་ནང་འཛུལ་ཏེ་ཡེ་ཤེས་ལྷུན་གྲུབ་དང་སློབ་གྲོགས་ཚོས་ལངས་གཟུགས་འགུལ་རིས་བརྒྱུད་མཚོ་བོད་ས་མཐོའི་འཕོ་འགྱུར་ཆེན་པོ་ཉམས་ལེན་བྱས་པ་དང་། ཚན་རྩལ་ཁང་ནང་འཛུལ་ནས་གློག་ཀླད་ཐུག་རེག་ཤེལ་ཡོལ་བརྒྱུད་བོད་རྒྱ་ཡིག་རིགས་གཉིས་ཕན་ཚུན་བསྒྱུར་བའི་ཚན་རྩལ་གྱི་ཡིད་དབང་འཕྲོག་ཤུགས་ཉམས་ལེན་བྱས་ཡོད། “བོད་ལྟ་བུ་སྐྱེ་དངོས་ཕུན་སུམ་ཚོགས་པོ་ཡོད་པ་དེ་འདྲ་འཛམ་གླིང་ཐོག་ཤིན་ཏུ་ཉུང་། ད་རེས་རྟེན་རྫས་བཤམས་མཛོད་ཁང་དེར་ལྟ་སྐོར་བྱས་པ་བརྒྱུད་ཆུང་དུས་ནས་འཚར་ལོངས་བྱེད་ཡུལ་དེར་ཧང་སངས་བྱུང”ཞེས་བཤད་པ་རེད།

“བོད་དུ་ཕྱོགས་བསྡུས་རྣམ་པའི་ཚན་རིག་ཁྱབ་གདལ་སློབ་གསོ་དང་ཡུལ་སྐོར་སྤྲོ་གསེང་རྟེན་གཞི་ཞིག་གཞི་ནས་བསྐྲུན་ཟིན་པ་དེས་བོད་འདི་ཉིད་རྒྱལ་ཡོངས་སུ་ཚན་རྩལ་ཁང་མེད་པའི་ཞིང་ཆེན་གཅིག་པུ་དེ་ཡིན་པའི་ལོ་རྒྱུས་མཇུག་འགྲིལ་ཡོད”ཅེས་ཚན་རྩལ་ཁང་དུ་ལྟ་སྐོར་བྱེད་བཞིན་པའི་བོད་རང་སྐྱོང་ལྗོངས་ཚན་རྩལ་ཐིང་གི་ཐིང་ཀྲང་གངས་ཅན་གྱིས་གསར་འགོད་པར་བཤད་པ་དང་། ཁོང་གིས་བོད་ཀྱི་རང་བྱུང་ཚན་རིག་རྟེན་རྫས་བཤམས་མཛོད་ཁང་ནང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་དང་རང་བྱུང་གི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་འགྲེམས་སྟོན་བྱེད་པ་དེ་ནི་རྒྱ་ཆེའི་གཞོན་ནུ་ལོ་ཆུང་གིས་བོད་ལ་དགའ་ཞེན་དང་། ཚན་རིག་ལ་དགའ་ཞེན། བོད་འཛུགས་སྐྲུན་བྱེད་པ་བཅས་ཀྱི་སློབ་གསོའི་སྟེགས་བུ་ཞིག་རེད་ཅེས་བཤད་པ་རེད།

ཤེས་རྟོགས་བྱུང་བར་གཞིགས་ན། རྟེན་རྫས་བཤམས་མཛོད་ཁང་དེ་རང་བྱུང་རྟེན་རྫས་བཤམས་མཛོད་ཁང་དང་། ཚན་རྩལ་ཁང་། འགྲེམས་སྟོན་ཁང་བཅས“ཁང་གསུམ་གཞི་གཅིག་ཅན”གྱི་སྤྱི་ཕན་རང་བཞིན་གྱི་ཕྱོགས་བསྡུས་རྣམ་པའི་རྟེན་རྫས་བཤམས་མཛོད་ཁང་ཆེས་ཆེ་གྲས་ཤིག་ཏུ་འཆར་འགོད་བྱས་པ་དང་མ་དངུལ་བསྡོམས་སྒོར་དུང་ཕྱུར་4.425བཏང་བའི་བཟོ་སྐྲུན་དེ་ནི་ཕོ་བྲང་པོ་ཏ་ལ་དང་དེའི་ཉེ་འདབས་ཁོར་ཡུག་གི་ཁྱད་ཆོས་ལ་གཞིགས་ཏེ་ཇུས་འགོད་བྱས་པ་ཞིག་ཡིན་ཞིང་། མིག་སྔར་རང་བྱུང་ཁང་དང་ཚན་རྩལ་ཁང་གི་འགྲེམས་ཁང་གཉིས་པོ་སྤྱི་དམངས་ལ་སྒོ་ཕྱེ་བ་དང་རང་བྱུང་ཁང་དུ་མཚོ་བོད་ས་མཐོ་དང་དེའི་ཉེ་འདབས་ས་ཁུལ་གྱི་རྩི་ཤིང་དམར་དཔེ་དང་ས་གཤིས་དམར་དཔེ་ཉར་ཚགས་བྱས་ཡོད། ཚན་རྩལ་ཁང་དུ་4Dགློག་བརྙན་ཁང་བཀོད་སྒྲིག་བྱས་པར་མཚོ་འོག་འཛམ་གླིང་ཉམས་ལེན་བྱེད་ཆོག་གི་ཡོད། ཟླ་10ཚེས་1ཉིན་བོད་ལྗོངས་རང་བྱུང་ཚན་རིག་རྟེན་རྫས་བཤམས་མཛོད་ཁང་གིས་ལྟད་མོ་བ་ཚོར་རིན་མི་དགོས་པའི་ངང་སྒོ་ཕྱེ་བ་དང་སྒོ་ཕྱེ་བའི་དུས་ཚོད་འདི་ཟླའི་ཚེས་10ཉིན་བར་ཡིན་པ་རེད།