ཡར་ཀླུང་གཙང་པོས་གནའ་ནས་ད་ལྟའི་བར་མཛེས་སྡུག་ཡིད་དབང་འཕྲོག་པའི་ས་གཞི་ལ་བརླན་བཤེར་སྦྱིན་ཏེ་ལྗང་མདོག་གི་འབྲས་བུས་གང་བར་བྱས་ལ།  བརྗིད་ཆགས་ཉམས་དགའི་ཤེལ་བྲག་རི་བོ་ནི་ལོ་རྒྱུས་སྨྲ་བའི་རྒན་པོ་ཞིག་དང་མཚུངས་པར་མིག་ཧྲིག་གེར་ཡར་ཀླུང་ཁུལ་གྱི་འགྱུར་ལྡོག་ལ་ལྟ་བཞིན་མཆིས།  དེའི་ཉེ་འདབས་ན་མཐའ་བཞི་རྐང་འཐུང་ལྗོན་ཤིང་གིས་ཡོངས་སུ་ཁེངས་པའི་ལྷོ་ཁའི་ལས་རིགས་སློབ་གྲྭ་གནས།

ལྷུན་སྟུག་སྐྱེད་ཚལ་ཡངས་པོ་ལས།། མཚར་སྡུག་མེ་ཏོག་གང་སར་བཞད།།

ལས་རིགས་སློབ་གྲྭ་འདི་ཉིད་ཐོག་མར་ལྷོ་ཁའི་དགེ་འོས་སློབ་གྲྭ་ཡིན། ལྷོ་ཁ་དགེ་འོས་སློབ་གྲྭ་ནི་སྤྱི་ལོ་1975ལོའི་ཟླ་བ་8པར་དངོས་སུ་བཙུགས་པ་དང་། སློབ་གྲྭས་སྔ་རྗེས་སུ་སློབ་གྲྭ་འབྲིང་ཆུང་དང་། བྱིས་སྐྱོང་གི་དགེ་རྒན་ཁྱོན་བསྡོམས་མི་གྲངས་ལྔ་སྟོང་ལ་ཉེ་བ་གསོ་སྐྱོང་དང་སྦྱོང་བརྡར་བྱས་པ་ཚང་མ་ལྷོ་ཁ་ས་ཁུལ་གྱི་རྫོང་བཅུ་གཉིས་ལ་ཁྱབ་ཡོད་པ་མ་ཟད། ཡང་སྒོས་སློབ་གསོའི་འཐབ་ཕྱོགས་ཀྱི་རྐང་འཛིན་པར་གྱུར་ཡོད་པ་རེད།

འདི་ནི་ལྷོ་ཁ་ལས་རིགས་སློབ་གྲྭའི་ཐོག་རྩེག་ཁང་ཆེན་ཡིན་པ།

ད་ལྟ་སློབ་གྲྭ་དེར་སློབ་ཁྲིད་ཀྱི་ས་ཚིགས་ཆེ་བ་ཁག་གསུམ་དང་། ཕྱོགས་བསྡུས་ཀྱི་ལག་ཤེས་དངོས་སྦྱོང་རྟེན་གཞི་གཅིག་ལ་རྒྱ་ཁྱོན་སྨི་ངོས་མཉམ་གྲུ་བཞི་མ་ཁྲི་ 225000ཡོད་པ་དང་།  འཛུགས་སྐྲུན་རྒྱ་ཁྱོན་ལ་སྨི་ངོས་མཉམ་གྲུ་བཞི་མ་ཁྲི 75800ཡོད་པ་རེད།  སློབ་གྲྭར་དགེ་རྒན་དང་ལས་བཟོ་བསྡོམས་མི་གྲངས་236ཡོད་པ་ལས།  ཆེད་ལས་དགེ་རྒན་221དང་། ཆེད་ལས་གཉིས་ལྡན་གྱི་དགེ་རྒན་108ཡོད།  2014ལོའི་ནང་ཐོ་འགོད་ཚུད་པའི་སློབ་ཕྲུག་ཁྱོན་མི་གྲངས 5014ཡོད་པ་ལས་རྒྱལ་ཁབ་ཀྱི་ཉིན་ཧྲིལ་པོའི་ལམ་ལུགས་ལས་རིགས་ཆེད་ལས་ཀྱི་སློབ་ཐོན་སློབ་མ་ཁྱོན་མི་གྲངས་ 2807ཡོད་པ་དང་།  དུས་ཐུང་སྦྱོང་བརྡར་གྱི་སློབ་མ་མི་གྲངས 1032ཡོད་པ། དར་མའི་རྒྱུན་མཐུད་སློབ་གསོའི་སློབ་སྦྱོང་གི་ལོ་རྒྱུས་མཐོར་འདེགས་ལ་ཞུགས་པའི་སློབ་མའི་མི་གྲངས་བསྡོམས་  1255ཡོད་པ་བཅས་རེད།

དཀའ་བ་དུ་མ་ཁྱད་བསད་ཀྱིས།། ལས་རིཊ་སློབ་གསོའི་མཛེས་རིས་བཀོད།།

སྤྱི་ལོ་1999ལོར་རང་ལྗོངས་ཀྱི་འབྲིང་རིམ་ཆེད་ལས་ཀྱི་སློབ་གྲྭ་ཁག་སྒྲིག་བཀོད་ལེགས་སྒྲིག་བྱས་པ་དང་བསྟུན་ཏེ་སྔོན་མའི་ས་ཁུལ་ལས་རིགས་སློབ་འབྲིང་དང་དགེ་འོས་སློབ་གྲྭ་གཉིས་ཟླ་སྒྲིལ་བཏང་སྟེ། “ལྷོ་ཁའི་ལས་རིགས་ལག་རྩལ་སློབ་གྲྭ”ཞེས་པར་མིང་བསྒྱུར་ནས་སློབ་གཉེར་གྱི་ཁ་ཕྱོགས་དེ་རྨང་གཞིའི་སློབ་གསོ་འཕེལ་རྒྱས་གཏོང་བ་ནས་རིམ་བཞིན་ལས་རིགས་ལག་རྩལ་སློབ་གསོ་འཕེལ་རྒྱས་གཏོང་བའི་ཕྱོགས་སུ་བསྒྱུར།

འོན་ཏེ་སློབ་གྲྭ་རང་ངོས་ལ་ལས་རིགས་སློབ་གསོའི་ཉམས་མྱོང་མེད་པ་དང་།  ལས་རིགས་ཆེད་ལས་ཀྱི་དགེ་རྒན་དཀོན་པ་སོགས་ཀྱིས་ལས་རིགས་ལག་རྩལ་སློབ་གསོའི་རེ་བ་སྐོང་མི་ཐུབ་སྟབས། སྐབས་ཤིག་རིང་སློབ་གྲྭར་སློབ་མ་བསྡུ་དཀའ་བ་དང་། ལས་ཀར་ཞུགས་དཀའ་བ།  སློབ་གཉེར་དེ་བས་དཀའ་བ་སོགས་ཀྱི་གནས་སུ་གྱར། སློབ་གྲྭའི་དབུ་ཁྲིད་དང་དགེ་རྒན་ལས་བཟོ་ཚོས་སློབ་གྲྭ་མིང་བསྒྱུར་བྱས་པ་དེས་སློབ་གཉེར་གྱི་ཁ་ཕྱོགས་དང་དམིགས་ཚད་ལ་རྩ་བའི་རང་བཞིན་གྱི་འགྱུར་ལྡོག་བྱུང་བ་ངོས་འཛིན་གསལ་པོ་བྱས་ཏེ། སློབ་གཉེར་གྱི་འདུ་ཤེས་བསྒྱུར་བ་དང་།  ཁྲོམ་ར་ཤེས་རྟོགས་བྱེད་པ།  དུས་སྐབས་དང་མཐུན་པའི་ཆེད་ལས་བཀོད་སྒྲིག་བཅས་བྱེད་ཕྱིར།ན་གཞོན་དགེ་རྒན་མང་དག་ཅིག་རྒྱལ་ནང་གི་ལས་རིགས་ལག་རྩལ་སློབ་ཆེན་དང་། རང་ལྗོངས་ནང་ཁུལ་གྱི་སློབ་ཆེན་སོགས་སུ་སློབ་སྦྱོང་དང་ལས་ཡུལ་དངོས་ཀྱི་སྦྱོང་བརྡར་ནང་ཞུགས་རྒྱུར་མངགས་པ་དང་།  སློབ་གྲྭའི་ནང་ངོས་སུ་སློབ་གཉེར་བ་དང་དགེ་རྒན་ལས་བཟོའི་ཁྲོད་དུ་ལས་རིགས་སློབ་གསོའི་མཛད་ཕྱོགས་སྲིད་ཇུས་དྲིལ་བསྒྲགས་དང་ལས་རིགས་སློབ་གསོའི་བཅའ་ཁྲིམས་སོགས་སློབ་སྦྱོང་བྱེད་པ།  དེ་བཞིན་སློབ་གྲྭའི་གོང་འོག་བློ་སེམས་གཅིག་སྒྲིལ་གྱིས་ལས་རིགས་སློབ་གསོའི་འགྲོ་ལམ་མུ་མཐུད་འཚོལ་ཞིབ་བཅས་བྱས་ཏེ་ཁྲོམ་རྭར་ཁ་ཕྱོགས་པ་དང་།  དཔལ་འབྱོར་ལ་ཞབས་འདེགས་ཞུ་བ། རྨང་གཞི་བརྟན་ཚུགས་སུ་གཏོང་བ། ནུས་རྩལ་ཤུགས་ཆེར་གཏོང་བ་བཅས་སློབ་གཉེར་གྱི་དམིགས་ཡུལ་དུ་བཟུང་ནས་བགྲང་བྱ་དེ་དག་ནང་སྔ་རྗེས་སུ་རི་མོའི་ཆེད་ལས་དང་། ཞིང་ལས་རིགས་པའི་ཆེད་ལས།  རླངས་འཁོར་ཉམས་གསོའི་ཆེད་ལས།  རྒྱ་ཟས་གཡོས་སྦྱོར་ཆེད་ལས།  ཡུལ་སྐོར་སྣེ་ཤན་གྱི་ཆེད་ལས།   རྩིས་འཁོར་ཆེད་ལས།  ཨར་སྐྲུན་ཆེད་ལས་སོགས་ཆེད་ལས་མི་གཅིག་པ་ཉི་ཤུ་ལྷག་ཙམ་བཙུགས་པར་སློབ་ཕྲུག་ཁྱོན་ཁྲི་ལས་བརྒལ་བ་སྐྱེད་བསྲིང་བྱས་པ་དང་། གཞན་ཡང་རླངས་འཁོར་གྱི་ཁ་ལོ་བའི་སྦྱོར་བརྡར་དང་།  གྲོང་ཚོའི་སྨན་པ།  ཞིང་པའི་ཨར་སྐྲུན།  བདེ་འཇགས་སྲུང་སྐྱོང་སོགས་ཡུན་ཐུང་གི་སྦྱོང་བརྡར་འཛིན་གྲྭ་གཉེར་བས་གོང་རིམ་དབུ་ཁྲིད་དང་སྤྱི་ཚོགས་ལས་རིགས་ཁག་གི་མི་དམངས་ཀྱི་གདེང་འཇོག་བཟང་པོ་ཐོབ་དང་འཐོབ་བཞིན་ཡོད་པ་རེད།

འདི་ནི་ཀྲུང་གོའི་ནུས་རྩལ་འགྲན་བསྡུར་ཆེ་མོའི་ནང་གཡོས་སྦྱོར་ཆེད་ལས་འཛིན་གྲྭའི་སློབ་མར་མཉམ་སྡེབ་ཀྱི་ཟངས་ཀྱི་བྱ་དགའ་ཐོབ་པའི་གནས་ཚུལ་ཡིན་པ།

ལས་རིགས་མཐོ་འབྲིང་གི་སློབ་གསོ་གཉེར་ཕྱོགས་ཐད།  སློབ་གྲྭས“སློབ་རིམ་སྤར་བར་རྨང་གཞི་ཡོད་པ་དང་། ལས་ཀར་ཞུགས་པར་ནུས་པ་ལྡན་དགོས་པའི་རེ་འདུན”གཞིར་བཟུང་གཅིག་ནས་སྤྱིར་བཏང་གི་མཐོ་འབྲིང་སློབ་གསོའི་སློབ་ཁྲིད་ལ་སྣང་ཆེན་བྱས་པ་དང་།  གཉིས་ནས་ལས་རིགས་ལག་རྩལ་སློབ་ཁྲིད་ལ་ཤུགས་སྣོན་བརྒྱབ་སྟེ་ཐབས་ཤེས་ཟུང་འཇུག་གིས་ཁྱོན་ཡོངས་ནས་མི་སྣ་གསོ་སྐྱོང་བྱས་སྟབས། 2002ལོ་ནས2014ལོའི་བར་གྱི་སློབ་ཕྲུག་50%ནས་60%བར་དངོས་གཞིའི་སློབ་ཆེན་དང་ཆེད་ལས་སློབ་ཆེན་དུ་ཡིག་རྒྱུགས་འཕྲོད་པ་དང་།  དེ་བྱིངས་རྣམས་ལས་རིགས་ཆེད་ལས་སློབ་ཆེན་དང་སྤྱི་ཚོགས་ཀྱི་ལས་རིགས་ཁག་ནང་ལས་ཞུགས་ཐུབ་པ་བྱུང་ཡོད།

སློབ་གཉེར་གྱི་རྣམ་པའི་ཐད།  དེ་སྔའི་གཅིག་གྱུར་གྱི་ལས་རིགས་སློབ་གསོ་དང་སྤྱིར་བཏང་སློབ་གསོ་མཉམ་གཉེར་བྱེད་པའི་རྣམ་པར་བློ་ཁོག་ཆེན་པོས་སྒྱུར་བཅོས་བྱས་ཏེ། ལས་རིགས་ལག་ཤེས་སློབ་གསོ་གཙོ་ཐིག་ཏུ་བཟུང་ནས་སློབ་གསོ་དེ་སྟབས་བསྟུན་རང་བཞིན་དང་།སྣེ་མང་རང་བཞིན་གྱི་སློབ་གཉེར་ལམ་ལུགས་ལག་ལེན་བསྟར་བས། སྤྱི་ཚོགས་ལ་མཁོ་ཆེ་བའི་མི་སྣ་དང་སློབ་གྲྭས་མི་སྣ་སྐྱེད་སྲིང་བྱེད་པའི་དུས་ཡུན་རིང་བའི་འགལ་བ་ཐག་གཅོད་ཐུབ་ཡོད་པ་རེད།  སློབ་གྲྭས་སྔ་ཕྱི་བར་གསུམ་དུ་སྤྱི་ཚོགས་ཐོག་གི་ཁེ་ལས་བྱ་གཞག་ཚན་པ་དང་འབྲེལ་བ་དམ་ཟབ་བྱས་ཏེ།  སློབ་གྲའི་ཕྱི་ནང་ཟུང་འབྲེལ་དང་། སློབ་ཡུན་རིང་ཐུང་ཟུང་འབྲེལ།  རང་གཉེར་དང་མཉམ་གཉེར་ཟུང་འབྲེལ་བཅས“ཟུང་འབྲེལ་གསུམ”གྱི་སློབ་གཉེར་བྱ་ཐབས་ལག་བསྟར་བྱས་པ་དང་།  ལས་རིགས་ལག་རྩལ་ཆེད་ལས་དང་།  དུས་ཐུང་བཀོལ་སྤྱོད་ཀྱི་སྦྱོང་བརྡར་འཛིན་གྲྭ  དགེ་རྒན་གསོ་སྦྱོང་འཛིན་གྲྭ  དར་མའི་རྒྱུན་མཐུད་སློབ་གསོའི་སློབ་སྦྱོང་གི་ལོ་རྒྱུས་མཐོར་འདེགས་གཏོང་བའི་འཛིན་གྲྭ་བཅས“བཞི་གཅིག་ཏུ་འདུས་པའི”སློབ་གཉེར་སྒྲིག་གཞིའི་རིམ་པ་བཏོད་ནས་རང་ངོས་ཀྱི་སློབ་གཉེར་ཁྱད་ཆོས་ཤིག་གྲུབ་ཡོད་པ་རེད།

འདི་ནི་རྒྱ་ཟས་གཡོས་སྦྱོར་ཆེད་ལས་འཛིན་གྲྭའི་སློབ་མ་ཡིན་པ།

ཉེ་བའི་བགྲང་བྱ་འགའ་ཤས་ནང་སློབ་གྲྭས་ལས་རིགས་ལག་ཤེས་ཀྱི་སློབ་གསོ་ཡག་པོ་གཉེར་བའི་རྨང་གཞིའི་ཐོག་ས་ཁུལ་འགྲིམ་འགྲུལ་དོ་དམ་ཚན་པ་དང་།  ངལ་རྩོལ་འགན་ནུས་ཚན་པ་སོགས་བྱ་གཞག་དང་ཁེ་ལས་ཚན་པ་བཅུ་གྲངས་འགའ་དང་མཉམ་འབྲེལ་ཐོག་འཛིན་གྲྭ་གཉེར་བས་གྲུབ་འབྲས་མངོན་གསལ་དོད་པོ་ཐོབ་ཡོད་པ་རེད།

ད་ལྟ་ལྷོ་ཁའི་ལས་རིགས་ལག་རྩལ་སློབ་གྲྭའི་སློབ་ཕྲུག་བོད་ལྗོངས་ཀྱི་ས་ཕྱོགས་གང་སར་ཁྱབ་ཡོད་པ་མ་ཟད། བོད་ལྗོངས་ཀྱི་དཔལ་འབྱོར་འཕེལ་རྒྱས་དང་།  ཞི་བདེའི་བོད་ལྗོངས་འཛུགས་སྐྲུན་བྱེད་པའི་ཁྲོད་རང་རང་གི་ནུས་པ་ལེགས་སྐྱེས་སུ་ཕུལ་ཡོད་པ་རེད།  ཁོ་ཚོའི་གཡུར་ཟའི་གྲུབ་འབྲས་ལས་མི་རྣམས་ཀྱིས་ལས་རིགས་སློབ་གསོར་འཛིན་པའི་ལྟ་ཚུལ་ལ་འགྱུར་ལྡོག་བྱུང་ནས་སློབ་གྲྭར་སློབ་ཕྲུག་མིང་ཐོ་འགོད་པར་ཡོང་མཁན་ལོ་རེ་ལས་ལོ་རེ་མང་དུ་སོང་ནས་རང་ལྗོངས་ཀྱི་ལས་རིགས་ལག་རྩལ་སློབ་གྲྭ་ཁག་གི་མདུན་གྲལ་དུ་སླེབས་ཡོད་པ་དང་།  ལས་རིགས་ལག་རྩལ་སློབ་གྲྭ་ཁག་གི་མིག་དཔེ་ལྟ་ཡུལ་ཞིག་ཏུ་འགྱུར་ཡོད་པ་མ་ཟད།གོང་རིམ་ཚན་པ་ཁག་གི་དབུ་ཁྲིད་ཀྱི་གདེང་འཇོག་བཟང་པོ་ཡང་ཐོབ་ཡོད་པ་རེད།

འདི་ནི་2002ལོ་ནས་2014ལོ་བར་ཐོབ་པའི་གཟི་བརྗིད་རྟགས་མ་ཡིན་པ།

ལོ་མང་རིང་དགེ་སློབ་རྣམས་ཀྱིས་འབད་བརྩོན་ལྷོད་མེད་བྱས་པ་བརྒྱུད།  སྤྱི་ལོ་2002ལོ་ནས2014ལོ་བར་བསྟུད་མར“རྒྱལ་ཡོངས་ཀྱི་ལས་རིགས་ལག་རྩལ་སློབ་གསོའི་སྔོན་ཐོན་ཚན་པ་དང་། བོད་རང་སྐྱོང་ལྗོངས་ཀྱི་ལས་རིགས་ལག་རྩལ་སློབ་གྲྭའི་སྔོན་ཐོན་ཚན་པ།  རྒྱལ་ཡོངས་ཀྱི་འབྲིང་རིམ་ལས་རིགས་སློབ་གྲྭའི་ཀུན་སྤྱོད་ལས་ཀའི་སྔོན་ཐོན་ཚན་པ”སོགས་ཀྱི་གཟི་བརྗིད་མཚན་སྙན་མང་པོ་ཐོབ་ཡོད་པ་མ་ཟད། དགེ་རྒན་དང་སློབ་མའི་ལག་རྩལ་གྱི་བརྩམ་བྱ་མང་པོ་ཞིག་ལ་རྒྱལ་ཁབ་རིམ་པ་དང་ཞིང་ཆེན་རིམ་པའི་གཟེངས་བསྟོད་བྱ་དགའ་ཐོབ་ཡོད་པ་དང་དུས་མཚུངས་རྒྱལ་ཡོངས་ཀྱི་ལས་རིགས་ལག་རྩལ་སློབ་གྲྭ་གཙོ་གནད་འཛུགས་སྐྲུན་བྱེད་པའི་དཔེ་སྟོན་གྱི་གྲས་སུ་ཚུད་ཡོད་པ་རེད།

འདི་ནི་ལྷོ་ཁ་ལས་རིགས་སློབ་གྲྭའི་ཟུར་ཞིག་ཡིན་པ།