གསར་འགོད་པས་ལྗོངས་སློབ་གསོ་ཐིང་ནས་ཤེས་རྟོགས་བྱས་པར།　ནང་སའི་བོད་ལྗོངས་འཛིན་གྲྭ་བཙུགས་ནས་ལོ་30ཡི་ནང་བོད་ལ་དཔལ་འབྱོར་དང་སྤྱི་ཚོགས་འཛུགས་སྐྲུན་གྱི་ཤེས་ལྡན་མི་སྣ་32116གསོ་སྐྱོང་བྱས་པའི་ནང་སློབ་ཆེན་སློབ་ཐོན་སློབ་མ་15159དང་།　འབྲིང་རིམ་དགེ་འོས་ཆེད་ཚན་སློབ་གྲྭའི་སློབ་ཐོན་སློབ་མ་4840　འབྲིང་རིམ་ཆེད་ཚན་སློབ་གྲྭའི་སློབ་ཐོན་སློབ་མ་6870　འབྲིང་རིམ་ཆེད་ལས་ལག་རྩལ་སློབ་གྲྭའི་སློབ་ཐོན་སློབ་མ་5247བཅས་ཡོད་པ་རེད།

1985ལོའི་ཟླ་9པར་བོད་རིགས་གཙོ་བོར་བྱས་པའི་བོད་ལྗོངས་ཀྱི་སློབ་ཆུང་སློབ་ཐོན་སློབ་མ་ནང་སར་སློབ་སྦྱོང་བྱེད་པར་ཐོག་མར་མངགས་ཏེ་བོད་ཀྱི་ལོ་རྒྱུས་ཐོག་གི་སློབ་གསོའི་རྣམ་པ་གསར་པ་དེ་བཏོད་ཡོད།　མིག་སྔར་པེ་ཅིང་དང་།　ཧྲང་ཧའེ།　ཀོང་ཏུང་སོགས་ཞིང་ཆེན་དང་གྲོང་ཁྱེར་21གི་སློབ་འབྲིང་དཀྱུས་མ་དང་འབྲིང་རིམ་ལས་རིགས་སློབ་གྲྭར་ནང་སའི་བོད་ལྗོངས་འཛིན་གྲྭ་དང་འབྲིང་རིམ་ཆེད་ལས་འཛིན་གྲྭ་137བཙུགས་པའི་ནང་སློབ་གྲྭར་སྐྱོད་མུས་ཀྱི་སློབ་མ་ཁྲི་1.81ཡོད་པ་རེད།

ད་ཆ་བོད་ཀྱི་མི་འབོར་ཁྲི་312ལྷག་ཙམ་ཁྲོད་ནང་སའི་བོད་ལྗོངས་འཛིན་གྲྭའི་སློབ་ཐོན་སློབ་མས་1%ཁོ་ན་ལས་བཟུང་གི་མེད་རུང་།　ཁོང་ཚོ་མང་ཆེ་བ་ལས་རིགས་ཁག་གི་རྐང་འཛིན་སྟོབས་ཤུགས་སུ་གྱུར་ཡོད།

གསར་འགོད་པས་ཤེས་རྟོགས་བྱས་པར།　ནང་སའི་བོད་ལྗོངས་འཛིན་གྲྭར་བསྡུ་ཚད་མིང་ཐོ་བཀོད་པའི་བསྡོམས་འབོར་གྱི་10%ལས་ཟིན་གྱི་མེད་པ་དང་།　　ཞིང་འབྲོག་པའི་བུ་ཕྲུག་ནང་སར་སློབ་སྦྱོང་དུ་སྐྱོད་ཐུབ་ཆེད།　སྲིད་གཞུང་གིས་བོད་ལྗོངས་འཛིན་གྲྭའི་སློབ་མ་མང་ཆེ་བ་ཞིང་འབྲོག་ཁུལ་དང་།　མཐའ་མཚམས་རྫོང་།　ས་བབ་མཐོ་བའི་ས་ཁུལ།　ལྗོངས་ནང་ཁུལ་གྱི་མི་འབོར་ཅུང་ཉུང་བའི་མི་རིགས་བཅས་ལ་ཕྱོགས་ནས་སློབ་བསྡུའི་འཆར་གཞིའི་70%ཞིང་འབྲོག་པའི་རྒྱུགས་སྤྲོད་སློབ་མ་བསྡུ་བའི་ཐད་སྤྱད་ཡོད།

ནང་སའི་བོད་ལྗོངས་འཛིན་གྲྭར་འབྲེལ་ཡོད་ཞིང་ཆེན་དང་གྲོང་ཁྱེར་གྱི་ཤུགས་ཆེའི་རྒྱབ་སྐྱོར་ཐོབ་ནས་ཞིང་ཆེན་དང་གྲོང་ཁྱེར་ཁག་གི་ནོར་སྲིད་ཀྱིས་ཆེད་དོན་འགྲོ་གྲོན་གྱི་རྩིས་ཁྲ་ལོགས་སུ་བཟོས་ཏེ་བོད་ལྗོངས་འཛིན་གྲྭའི་སློབ་མའི་སློབ་སྦྱོང་དང་།　འཚོ་བ།　སྨན་བཅོས་སོགས་ཀྱི་འགྲོ་སོང་ཐག་གཅོད་བྱས་ཡོད་པ་དང་།　ཁ་གསབ་ཚད་གཞི་དེ་ལོ་རེར་སློབ་མ་རེར་སྒོར་8000ལས་བརྒལ་ཡོད་པ་རེད།