བོད་ཡིག་ལ་མི་རིགས་གཞན་དང་མི་འདྲ་བའི་ཡིག་མགོ་ཐོད་པ་ཞིག་འབྲི་སྲོལ་ཡོད།　དེ་ནི་བོད་ཡིག་གི་ཐུན་མོང་མ་ཡིན་པའི་ཁྱད་ཆོས་ཞིག་ཡིན།　བོད་ཡིག་ལ་ཡིག་མགོ་འབྲི་བའི་དགོས་པ་གང་ཡིན་མིན་ཐད་མཁས་དབང་འགའ་ཤས་ཀྱིས་ཞིབ་དཔྱད་ལྟར་ན་ཡིག་མགོ་འབྲི་བའི་དགོས་པ་ནི་གཙོ་བོ་རྟེན་འབྲེལ་མཚོན་བྱེད་རང་ཡིན་པ་གཏན་འཁེལ་ནས་བཤད་ཆོག་པ་ཡིན།　　གང་ལགས་ཤེ་ན་བོད་མིས་བྱ་དངོས་གང་ཞིག་ལའང་མགོ་མཇུག་བརྩི་བ་དང་རྟེན་འབྲེལ་མཚོན་པར་དྭངས་ཞེན་ཆེན་པོ་བྱེད་སྲོལ་ཡོད་ཅིང་།　ཡིག་མགོའི་བཟོ་དབྱིབས་ལ་ཞིབ་པར་དཔྱད་ན་དེ་ནི་ཉི་ཟླའི་དབྱིབས་ཡིན་པ་མཐོང་ཐུབ།　ཡིག་མགོའི་བཟོ་དབྱིབས་ནི་ཉི་ཟླ་ཡིན་པ་ཅུང་གསལ་པོར་རྟོགས་ཐུབ།　བོད་མིའི་བསམ་པའི་ནང་ཉི་ཟླ་ནི་ནམ་ཡང་མི་འགྱུར་བའི་མཚོན་རྟགས་ཞིག་ཡིན་ཞིང་།　བོད་ཡིག་འདི་ཉི་ཟླ་ལྟ་བུར་ཇི་སྲིད་བར་མི་ནུབ་པར་གནས་པའི་རྟེན་འབྲེལ་མཚོན་བྱེད་དུ་ཡིག་མགོ་འབྲི་སྲོལ་དེ་ཆགས་པ་ཡིན་ཞེས་བཤད་ཆོག　ལྷག་དོན་སྤྱིར་བཏང་གི་ཡིག་རིགས་ཚང་མར་ཡིག་མགོ་འབྲི་དགོས་ངེས་ཡིན་རུང་།ཚེ་ལས་འདས་པའི་དམ་པའི་རྗེས་འཇུག་གི་ཞལ་འདེབས་ཡིག་རིགས་ཀྱི་ཁ་བྱང་ལྷ་བུའི་ཡིག་རིགས་ལ་ཡིག་མགོ་ཡེ་ནས་འབྲི་སྲོལ་མེད་པ་དེ་ཀུན་གྱིས་ཐུགས་སྣང་ཡོད་པ་ཞུ།