ཡུལ་ཁ་བ་ཅན་གྱི་ཞིང་ཁམས་སུ། །
རླབས་ཆེ་བའི་སྐྱེས་བུ་མང་འཁྲུངས་ཀྱང་། །
རྗེ་མི་ལའི་རྣམ་ཐར་ཐོས་ཙ་ན། །
ཡིད་མི་དད་བུ་ཞིག་ཡོད་རེ་སྐན། །
ལས་དང་པོ་འཇིག་རྟེན་མི་ཡུལ་ན། །
ཕ་དྲིན་ཅན་བསགས་པ་བཟང་པོ་ཡིས། །
མགོ་གཡུ་རལ་ཤིག་སེ་ཁྱིམ་གཞིས་ན། །
ནང་ཕ་མ་འཛོམས་ཤིང་ཕུ་ནུ་ལྡན། །
ཕྱི་ནང་ལ་དགོས་པ་ཀུན་འཛོམས་ཡོད། །
དུས་མི་འགྱངས་རྐྱེན་ངན་དྲག་ཆར་གྱིས། །
ཕ་བཟང་པོ་འཆི་བདག་གཤིན་རྗེས་འཁྲིད། །
ངོ་སྐྱོ་དུས་ཁྱི་ཡིས་རྨུགས་ཞེས་ལྟར། །
ཉེ་ཨ་ཁུ་ཨ་ནེས་གཙོ་བྱས་པས། །
ཁོང་མ་སྨད་མནར་གཅོད་ཚད་མེད་བཏང་། །
ལུས་སེམས་པ་སྡུག་ལ་སྦྱར་བ་གང་། །
ཕྱི་ནང་གི་རྒྱུ་ནོར་ཡོད་ཚད་འཕྲོག །
དུས་དེ་ནས་མ་རྒན་བཀའ་མངགས་བཞིན། །
མཐུ་མན་ངག་དཀའ་བས་སྦྱངས་པ་ཡིས། །
ངར་ཐག་ཆོད་དགྲ་ཤ་པང་དུ་བླངས། །
སྡིག་ཆེན་པོའི་བྱ་བ་ཡིད་ལ་འཁོར། །
བློ་འགྱུར་མེད་བླ་མའི་ཞབས་ལ་གཏུག །
དྲིན་བླ་མས་སློབ་བུ་བརྟག་པའི་ཕྱིར། །
ལུས་སེམས་ལ་དཀའ་བ་སྤྱོད་དུ་བཅུག །
བློ་ངན་རྟོགས་ཡིད་ལ་མ་སྐྱེས་པར། །
དོན་དམ་པའི་སྙིང་སྟོབས་ཆེན་པོ་ཡིས། །
དྲིན་བླ་མའི་བཀའ་གསུང་སྤྱི་བོས་བླངས། །
ཡུལ་དབེན་པ་འགྲིམས་ཏེ་ཉམས་རྟོགས་འཆར། །
མང་སློབ་བུ་རྣམས་ལ་ཆོས་འཁོར་བསྐོར། །
ཆོས་འོད་ཟེར་གངས་རིའི་དབུས་ལ་འཕྲོས། །
མཐར་འགྲོ་བ་ཡོངས་ཀྱི་སྡུག་བསྔལ་སེལ། །
ཉམ་ཐག་པའི་བུ་ཆུང་བློ་དམན་ངས། །
རྗེ་ཁྱེད་ཀྱི་མཚུངས་མེད་བློ་སྟོབས་གཅིག །
སེམས་དཀར་པོའི་ལྷག་བསམ་སྙིང་སྟོབས་གཉིས། །
མཐའ་མེད་པའི་མཛད་འཕྲིན་རླབས་ཆེན་སོགས། །
སྙན་རྣ་བའི་བཅུད་དུ་གྱུར་བའི་ཚེ། །
དྲན་ཆེ་བའི་མེ་ལྕེ་ཡིད་ན་འབར། །
རྗེ་ཁྱེད་ཉིད་དགེ་བའི་ཡོན་ཏན་ཀུན། །
སེམས་རྒྱུད་ན་ཇི་བཞིན་སྦྱར་ཐུབ་ན། །
རྟེན་ལན་གཅིག་དལ་འབྱོར་མི་ལུས་འདི། །
རབ་སྙིང་པོས་ཕྱུག་ངེས་ཨེ་མ་ཧོ། །