ནམ་རྒྱུན་ཁང་བདག་འགའ་ས་ཕྱོགས་གཞན་དུ་བྱ་བ་བསྒྲུབ་པར་ཕྱིན་ནས་ཁྱིམ་དུ་ལྟ་མཁན་མེད་པར་བརྟེན་རྐུན་མས་གོ་སྐབས་དེ་འཚོལ་གྱི་ཡོད། ཉེན་རྟོག་པས་རྒྱ་ཆེའི་ཁང་བདག་ལ་དངུལ་སྨར་ཕོན་ཆེན་དང་རྩ་ཆེའི་ཅ་དངོས་ཁྱིམ་དུ་རང་དགར་འཇོག་རྒྱུ་མེད་ལ་འགྲོ་ཁར་སྡེ་ལས་སམ་ཡང་ན་སྡེ་ཁུལ་བདེ་སྲུང་བར་འོན་གསང་བྱེད་རོགས་ཞུ་དགོས་པའི་དྲན་སྐུལ་བྱས།
སྒོ་དང་སྒེའུ་ཁུང་སྐྱོན་ཤོར་ཡོད་ན་འཕྲལ་དུ་བཟོ་དགོས།
གྲོང་མི་ཕྱིར་ཐོན་པའམ་ཡང་ན་གཉིད་ཉལ་བའི་སྐབས་རང་ཁྱིམ་གྱི་སྒོ་དང་སྒེའུ་ཁུང་བརྒྱབ་ཡོད་མེད་དང་། རླུང་འགྲོ་བཀག་ཡོད་མེད་སོགས་ལ་ཞིབ་བཤེར་བྱེད་དགོས། གལ་སྲིད་སྐྱོན་ཤོར་ཡོད་ཚེ་འཕྲལ་དུ་བརྗེ་དགོས་ལ་ཕྱིར་ཐོན་འཕྲལ་ལམ་སེང་སྒོ་རྒྱག་པའི་གོམས་གཤིས་བཟང་པོ་འཇགས་དགོས་པ་མ་ཟད། ཁྱིམ་གྱི་སྒོའི་ལྡེ་མིག་ཕྲུ་གུར་གང་བྱུང་སྤྲོད་མི་ཉན། ཕྱིར་ཐོན་སྐབས་སམ་ཡང་ན་གཉིད་ཉལ་བའི་སྐབས་སྒོ་དང་སྒེའུ་ཁུང་ཡག་པོ་རྒྱག་དགོས་ལ་ཉེན་ཟོག་སྒོ་ནང་ལོགས་ནས་ཡག་པོ་རྒྱག་དགོས། གང་ལགས་ཤེ་ན། རྐུན་མས་དོགས་ཟོན་མེད་ས་ནས་རྐུ་རྒྱག་སྲིད་པས་ཡིན། གཞན་ཡང་། གྱོད་གཞི་ཁ་ཤས་ནང་སྒེའུ་ཁུང་ཡག་པོ་བརྒྱབ་མེད་པའི་རྐྱེན་གྱིས་རྐུ་ཤོར་བ་མཐོང་རྒྱུ་ཡོད། གལ་སྲིད་སྒེའུ་ཁུང་བརྒྱབ་མེད་ཚེ་རྐུན་མས་སྨྱུག་མའི་རྩེར་ལྕགས་ཀྱུ་བསྒར་བ་སོགས་བྱས་ནས་ནང་གི་དངོས་པོ་རྩ་ཆེན་བརྐུས་འགྲོ་ཡི་ཡོད།
ཁྱིམ་དུ་མི་ཡོད་པའི་ཚུལ་བཅོས་དགོས།
གལ་སྲིད་ཁང་པར་མཛེས་བཟོ་བྱེད་མཁན་དུད་ཚང་ཡོད་ན་ཉེན་རྟོག་པས་ཨར་པོ་བར་ཐོབ་ཐང་ལག་ཁྱེར་སྟོན་དུ་བཅུག་ནས་ཐོ་བཀོད་དེ་དཔར་ལོག་ཉར་ཚགས་བྱེད་དགོས། ཁང་བདག་གིས་རང་ཁྱིམ་དུ་རྒྱུ་དངོས་ཅི་ཡོད་གཞན་ལ་ཤོད་མི་རུང་། མཛེས་བཟོ་ཚར་རྗེས་སྒོའི་སྒོ་ལྕགས་འཕྲལ་དུ་བརྗེ་དགོས། རྒན་རྒོན་དང་། བུད་མེད། བྱིས་པ་བཅས་ཁྱིམ་དུ་ཁེར་རྐྱང་སྡོད་སྐབས་སྒོ་རང་དགར་ཕྱེ་མི་རུང་། རྐུན་མས་སྔོན་ལ་དམིགས་ཡུལ་རྒྱག་པ་དང་དེ་ནས་ཁྱིམ་དུ་མི་མེད་པ་ཤེས་ཚེ་རྐུ་རྒྱག་གི་ཡོད། དེར་བརྟེན་ཁྱིམ་དུ་མི་རྒྱུན་རིང་པོ་མ་བསྡད་ཚེ་མི་ཡོད་ཁུལ་བྱེད་དགོས། དེ་ཡང་སྒེའུ་ཁུང་འགྲམ་དུ་གློག་ཤུགས་དམའ་བའི་གློག་སྒྲོན་སྤོར་དགོས་པ་དང་སྒོ་རའི་ནང་གོས་སྣེ་ཁ་ཤས་སྐེམ་པའམ་ཡང་ན་སྒོ་འགྲམ་དུ་སྐྱེས་པའི་ལྷམ་ཆ་གཅིག་འཇོག་པ་སོགས་བྱེད་དགོས།
ལྡེ་མིག་བརླག་ཚེ་སྒོ་ལྕགས་འཕྲལ་དུ་བརྗེ་དགོས།
ཁྱིམ་ལ་རྐུ་མི་ཤོར་བའི་འགག་སྒོ་དང་པོ་ནི་ཁྱིམ་གྱི་སྒོ་ཡིན། གྲོང་མིས་རྒྱལ་ཁབ་ཀྱི་བདེ་འཇགས་ཀྱི་ཚད་གཞི་དང་མཐུན་པའི་ཉེན་ཟོན་གྱི་སྒོ་དང་སྒོ་ལྕགས་སྤྱོད་དགོས། “རྐུན་མ་ཚང་མ་སྒོ་ལྕགས་འབྱེད་ཤེས་པའི་བྱང་མ་ཞིག་མ་ཡིན། ཉེན་ཟོན་གྱི་ནུས་པ་ཆེ་བའི་སྒོ་ལྕགས་ཀྱིས་རྐུན་མར་དཀའ་ངལ་བཟོ་སྲིད་པས་དེས་རྐུ་རྒྱག་རྒྱུ་མཚམས་འཇོག་བྱེད་སྲིད”ཅེས་ཉེན་རྟོག་པས་བཤད།
ལྡེ་མིག་བརླགས་པར་གྲོང་མི་མང་པོ་ཞིག་གིས་སྣང་བ་མི་གཏོང་བའི་ཁར་དུས་ཐོག་ཏུ་སྒོ་ལྕགས་བརྗེ་ཡི་མེད། “ཉིན་ཞིག་རྐུན་མས་དམིགས་ཡུལ་རྒྱག་སྐབས་གྲོང་མི་ཞིག་གི་ལྡེ་མིག་ས་ལ་ཟགས་པ་མཐོང་ནས་སྒྲུག་སྟེ་ཉིན་མོ་རྐུན་མས་བློ་ཁོག་ཆེན་པོས་ཁྱིམ་དུ་འཛུལ་མི་ཤེས་ནའང་ཉིན་དེའི་མཚན་མོར་སྒོ་ཕྱེ་ཐུབ་ཡོང་སྙམ་པའི་བསམ་པ་བཅངས་ནས་སྒོ་ཕྱེ་སྐབས་ལྡེ་མིག་བོར་བའི་མི་དེས་ཁྱིམ་གྱི་སྒོའི་སྒོ་ལྕགས་དུས་ཐོག་ཏུ་བརྗེས་མེད་པའི་དབང་གིས་སྒོ་ཕྱེ་ནས་དེའི་ནང་བཞག་པའི་རྩ་ཆེན་ཅ་དངོས་མང་པོ་ཞིག་འཁྱེར་ཕྱིན་པ་རེད”ཅེས་ཉེན་རྟོག་པས་གྱོད་གཞི་ཞིག་གི་སྐོར་ཤོད་ཀྱི་འདུག