ཉེ་དུས་སྐོར་སྐྱོད་ཚན་རྩལ་ཁང་གིས་ལྷ་ས་གྲོང་ཁྱེར་གྱི་གཞོན་ནུའི་བྱེད་སྒོའི་ལྟེ་གནས་སུ་སྐོར་སྐྱོད་འགྲེམས་སྟོན་བྱས་ཤིང་། སྐོར་སྐྱོད་འགྲེམས་སྟོན་དེ་ཀྲུང་གོ་ཚན་རིག་མཐུན་ཚོགས་ཞིབ་བཟོ་དང་སྐོར་སྐྱོད་ཚན་རྩལ་ཁང་གི་འགྲེམས་སྟོན་དངོས་པོ་ཁག་50ལས་གྲུབ་པ་དང་ཚན་རིག་འགྲེམས་སྟོན་དང་། ཚན་རིག་ཚོད་ལྟ། ཚན་རིག་ཁྱབ་གདལ་གྱི་བརྙན་པར་སོགས་དང་ཟུང་འབྲེལ་བྱས་ཡོད། ལྟ་སྐོར་བས་བཀོལ་སྤྱོད་སྟབས་བདེ་ཞིག་བྱས་ཚེ་ཚན་རྩལ་རིག་པ་ཉམས་སུ་མྱོང་ཆོག་པ་དང་དེ་བཞིན་མི་རྣམས་ཀྱི་འཚོ་བར་འགྱུར་ལྡོག་གཏོང་ཐུབ།
སྐོར་སྐྱོད་ཚན་རྩལ་ཁང་གི་ཟུར་ཞིག་ཏུ་ལོ་13ལ་སླེབས་པའི་སྐལ་བཟང་དབྱངས་ཅན་གྱིས་ངར་ལྕགས་ཀྱི་ལྷུ་སྒྲིག་སྐོར་བཞིན་འདུག ཁོ་མོས་སྐོར་བ་བརྒྱབ་པས་ངར་ལྕགས་ལྷུ་སྒྲིག་གི་ཟུར་ཞིག་གི་ཤེལ་ཏོག་ཆུང་ཆུང་དེ་ནས་འོད་འཕྲོ་གི་འདུག སྐལ་བཟང་དབྱངས་ཅན་གྱིས“ངར་ལྕགས་བརྡར་ཚེ་གློག་ཐོན་པའི་རིག་པ་དཔེ་དེབ་ཐོག་ནས་སྦྱངས་མྱོང་ཡོད་ནའང་འགྲེལ་བཤད་རྒྱག་དུས་རྙོག་དྲ་ཆེ་ཙམ་འདུག སོ་སོས་ལག་པ་འགུལ་ནས་བཀོལ་སྤྱོད་བྱས་རྗེས་རིག་པ་དེ་ཁོང་དུ་བརྟན་པོ་ཞིག་ཆུད་ཀྱི་འདུག”ཅེས་བཤད།
སྐལ་བཟང་དབྱངས་ཅན་གྱིས་གསར་འགོད་པར་རང་ཉིད་ཀྱིས་དགའ་ཤོས་བྱེད་པའི་སློབ་ཚན་ནི་དངོས་ཁམས་དང་སྐྱེ་དངོས་སློབ་ཚན་ཡིན། སྐོར་སྐྱོད་ཚན་རྩལ་ཁང་ནང་མིའི་ཀླད་ཆེན་གྱི་བཟོ་ལྟ་འགྲེམས་སྟོན་ཡང་བྱས་འདུག་པས་ཀླད་ཆེན་གྱི་ཆ་ཤས་གང་རུང་ལ་ལག་པས་ཐུག་ཚེ་LEDབརྙན་ཤེལ་ཐོག་རི་མོ་ཐོན་ནས་ཀླད་ཆེན་གྱི་གྲུབ་ཆ་དང་ནུས་པར་འགྲེལ་བཤད་བྱེད་ཀྱི་འདུག སྐོར་སྐྱོད་ཚན་རྩལ་ཁང་གིས་ངའི་སློབ་སྦྱོང་ལ་ཕན་ཐོགས་ཆེན་པོ་བྱུང་། ཕྱིར་ལོག་བྱས་རྗེས་སློབ་གྲོགས་གཞན་ལ་དེ་རིང་སྦྱངས་པའི་ཤེས་བྱའི་སྐོར་བརྗོད་ཀྱི་ཡིན་ཞེས་བཤད།
སྐལ་བཟང་དགྲ་འདུལ་ནི་ལྷ་ས་གྲོང་ཁྱེར་ཅང་སུའུ་སློབ་འབྲིང་གི་དངོས་ཁམས་དགེ་རྒན་ཞིག་ཡིན་པ་དང་ཁོང་གིས་སློབ་ཚན་འཁྲིད་སྐབས་སློབ་མ་ཚོས་ཚོད་ལྟ་དང་སློབ་ཁྲིད་ཡོ་བྱད་ལ་ཧ་ཅང་དགའ་པོ་བྱེད་པ་ཤེས་རྟོགས་བྱུང་ཡོད། སློབ་འབྲིང་གི་དངོས་ཁམས་ནི་གཙོ་བོ་རྨང་གཞིའི་ཤུགས་ཀྱི་རིག་པ་དང་། ཚ་བའི་རིག་པ། གློག་གི་རིག་པ་བཅས་དང་འབྲེལ་བ་ཡོད་པས་སློབ་མ་ཚོར་རྒྱུན་དུ་ཐུག་མང་བ་ནི་རིགས་པའི་གཞུང་ལུགས་ཡིན་ནའང་དངོས་ཁམས་ལ་ཐད་ཀའི་ཤེས་རྟོགས་དང་རྒྱུས་མངའ་དེ་ཙམ་ཡོང་གི་མེད་ཅེས་བཤད།
སྐལ་བཟང་དགྲ་འདུལ་གྱིས“སློབ་མས་སློབ་ཚན་ཐེངས་གཅིག་གཉིས་སྣང་བ་གཡེང་ཚེ་ངས་འཁྲིད་པའི་ནང་དོན་གོ་ཁག་པོར་གྱུར་གྱི་ཡོད། སྐོར་སྐྱོད་ཚན་རྩལ་ཁང་གིས་ངའི་སློབ་ཁྲིད་ཐད་བློ་སྒོ་ཕྱེད་པ་དེ་ནི་ཚོད་ལྟ་མང་ཙམ་བྱེད་པ་དང་འཚོ་བའི་ཁྲོད་ཀྱི་དཔེ་མཚོན་མང་ཙམ་དྲངས་ཏེ་རིགས་པའི་གཞུང་ལུགས་འཁྲིད་ཚེ་སློབ་སྦྱོང་གི་སྦྱངས་འབྲས་མཐོ་རུ་འགྲོ་བ་དང་ཆབས་ཅིག་ཚན་རིག་ལ་དགའ་ཞེན་བྱེད་པའི་སློབ་མའི་སྤྲོ་སྣང་འཕེལ་ནས་སློབ་སྦྱོང་བྱ་རྒྱུར་སུན་སྣང་བྱེད་པའི་སེམས་ཁམས་ལ་འགྱུར་ལྡོག་གཏོང་ཐུབ”ཅེས་བཤད།