བདག་གི་ཡབ་ཆེན་མི་ཡུལ་འདི་ལས་བྲལ་ཏེ་མི་ལོ་བཅུ་གསུམ་སོང་ཟིན།　ཡབ་འདས་པའི་མི་ལོ་འདི་དག་ནང་ཁོར་ཡུག་དང་བྱ་བ་སྣ་ཚོགས་ཤིག་གིས་རྐྱེན་གྱིས།　ཡབ་ཆེན་ཁོང་བདག་གི་དྲན་པའི་ལམ་དུ་ཡང་ཡང་འཆར་ལ།　ལྷག་པར་དུ་ཁོང་གི་བྱམས་སྙིང་རྗེ་དང་བཟོད་པ།　དེ་བཞིན་བྱ་བ་གང་ལའང་མཁས་ཤིང་བརྩོན་པའི་བག་ཆགས་ཟབ་མོ་དེས།　ངའི་དྲན་པའི་ལམ་དུ་ཁོང་འཚོ་བཞུགས་སྐབས་ཀྱི་སྣང་བརྙན་མང་དག་ཅིག་མཚན་དུས་དགུང་སྔོན་དབྱིངས་ཀྱི་སྐར་མའི་ཚོགས་བཞིན་ཡང་ནས་ཡང་དུ་འཆར།

ང་རང་ལོ་གསུམ་ཙམ་ལ་སླེབས་དུས།　སྐབས་དེའི་རྣོ་ངར་ཆེ་བའི་གྲལ་རིམ་འཐབ་རྩོད་ལས་འགུལ་གྱིས་རྐྱེན་པས་བདག་གི་ཡབ་དང་བཅས་པའི་ཉེས་མེད་སྐྱེ་བོ་མང་པོ་ཞིག་བཙོན་དུ་ཚུད།　བཙོན་ཁང་དུ་མི་ལོ་གསུམ་ཙམ་བསྡད་རྗེས་ཀྱི་སྤྱི་ལོ་１９７３ལོར་ཉེས་མེད་དཀར་འདོན་བྱུང་བས།　དེ་དུས་ང་རང་ལོ་དྲུག་ཙམ་ལ་སླེབས་ཟིན།　བཙོན་གྲོལ་བྱུང་རྗེས་པཱ་ལགས་ཁོང་ཙམ་མ་ཟད།　མི་ལོ་དེ་དག་ནང་ངན་སྨྲས་བརྙས་བཅོས་དང་།　མཐོང་ཆུང་།　ཉེས་རྡུང་སྣ་ཚོགས་མྱངས་པའི་བདག་གི་ཡུམ་ཆེན་དང་།　ང་ཚོ་བུ་ཕྲུག་རྣམས་ལའང་ལུས་སེམས་གཉིས་ཀྱི་བཅིངས་འགྲོལ་ཆེན་པོ་ཐོབ་སྟེ།　ནང་མི་ཁྲ་རོག་རོག་གི་འཚོ་བ་གསར་པ་ཞིག་སྐྱེལ་རྒྱུའི་གོ་སྐབས་ཤར།

ཡུན་རིང་ནང་བརྙས་བཅོས་དང་མཐོང་ཆུང་།　ཉེས་རྡུང་སོགས་ཀྱི་འོག་ཕ་མ་ཡ་བྲལ་གྱི་མི་ཚེ་སྐྱོ་པོ་དེ་བསྐྱལ་རྗེས།　ཕ་མ་གཉིས་འཛོམས་དང་རང་དབང་ལྡན་པའི་འཚོ་བ་གསར་པ་ཞིག་ལ་རོལ་སྐབས།　དངོས་གནས་མི་ཡུལ་ནི་དཔྱིད་དཔལ་བཞིན་དུ་མཚར་ལ།　འཚོ་བ་ནི་སྦྲང་རྩི་བཞིན་དུ་མངར་བའི་མྱོང་སྣང་དེ་ལྷག་པར་སྐྱིད་ཨང་།

མི་ལོ་དེ་དག་ནང་ཡུམ་ཆེན་ཁོང་ནས་རང་གི་བཟའ་ཟླ་ཉེས་མེད་མུན་བཙོན་དུ་ཚུད་པའི་སེམས་ཁྲལ་དང་།　གཞན་གྱིས་བརྙས་བཅོས་དང་མཐོང་ཆུང་སྣ་ཚོགས་མྱོང་དགོས་པ་མ་ཟད།　ད་དུང་ལོ་ན་རྒས་པའི་རྒན་འཁོགས་དང་།　ན་སོ་ཆུང་བའི་ང་ཚོ་བུ་ཕྲུག་ཚོའི་འཚོ་གནས་གང་སར་ལྟ་སྐྱོང་བྱེད་དགོས་པས།　ན་སོ་གཞོན་པའི་ངའི་ཨ་མ་ལགས་ཀྱི་ངོས་ནས་བཤད་ན།　དེ་ནི་བསམ་ཚོད་ལས་འདས་པའི་དཀའ་ངལ་དང་།　སྨྲ་བརྗོད་ལས་འདས་པའི་མནར་གཅོད་དང་སྡུག་བསྔལ་ཆེན་པོ་ཞིག་མ་ཡིན་ནམ།

བདག་གི་ཡབ་ཆེན་བཙོན་གྲོལ་བྱུང་རྗེས་ནང་མི་ཚང་མའི་བཞིན་ལས་བཞད་པའི་སྔར་མེད་ཀྱི་འཛུམ་མདངས་དེ་ནི་དངོས་གནས་དཔྱིད་དུས་སྤང་ལ་བཞད་པའི་མེ་ཏོག་བཞིན་དུ་མཛེས་ཤིང་ཡི་གར་འོང་།

ངའི་པཱ་ལགས་ཁོང་ནི་ཤེས་པ་དང་རིག་པ་བཀྲ་བའི་མི་ཞིག་ཡིན་ཏེ།　ལག་ཤེས་ཀྱི་རིགས་ཧ་ལམ་མ་ཤེས་པ་མེད་ཅིང་།　བཙོན་གྲོལ་བྱུང་དུས་བུད་མེད་ཅིག་དང་འདྲ་བར་སྦ་ལན་དང་ཨུ་མུ་སུག་སླ་མཁས་པ་དང་།　འཚེམ་བཟོ་མཁས་པ་ཞིག་ལྟར་ནང་མི་ཚང་མའི་གྱོན་གོས་དྲས་རྒྱག་པ་དང་འཁོར་འཚེམ་དང་ལག་འཚེམ་གང་བཏང་བཏང་ཡོད།　མ་བྱན་མཁས་པ་ཞིག་དང་མཚུངས་པར་ང་ཚོས་དེ་སྔ་ཟ་རྒྱུ་ལྟ་ཅི་མཐོང་ཡང་མ་མྱོང་བའི་ཚལ་སྣེ་ཁ་མང་པོ་བཟོ་མཁྱེན་གྱི་ཡོད།　གཞན་ཡང་པཱ་ལགས་ཁོང་གིས་ཤིང་བཟོ་རོབ་ཙམ་མཁྱེན་པ་མ་ཟད།　རྡོ་བཟོའང་མཁྱེན་ལ།　ད་དུང་རྒྱུན་ལྡན་གྱི་འཚོ་བའི་ནང་ལྕགས་བཟོ་ཡང་ཕྲན་ཙམ་མཁྱེན་ཞིང་།　ཕྱིས་སུ་ཁོང་ནས་གསུངས་པར་ལྟར་ན་དེའི་ནང་གི་ལག་རྩལ་མང་པོ་ཞིག་བཙོན་ཁང་ནང་དུ་སྦྱངས་གནང་བ་ཤ་སྟག་རེད་འདུག

སྐབས་དེ་དུས་འཚེམ་འཁོར་དང་།　སྒྲ་བསྡུ་འཕྲུལ་འཁོར།　ཆུ་ཚོད་གསུམ་ནི་ཁྱིམ་ཚང་ཞིག་ལ་ཆ་བཞག་ན།　ད་ལྟའི་གློག་ཀླད་དམ་རླངས་འཁོར་དང་འདྲ་བའི་ཁྱིམ་ཆས་གལ་ཆེན་ཤ་སྟག་ཡིན་ཞིང་།　ངའི་དྲན་ཤེས་ནང་པཱ་ལགས་ཁོང་གིས་ཁྱིམ་ནང་གི་སྒྲ་བསྡུ་འཕྲུལ་འཁོར་དེ་དང་།　ཐིར་སྒྲ་ཅན་གྱི་ཆུ་ཚོད་འཁོར་ལོ།　གཞན་ཡང་འཚེམ་འཁོར་བཅས་ཀྱི་ཁ་ཡང་ཡང་ཕྱེ་སྟེ་བཟོ་བཅོས་གནང་རྒྱུར་དགའ་བས།　ངའི་ཨ་མ་ལགས་ནས་རིན་ཐང་ཆེ་བའི་ཅ་དངོས་དེ་ཚོ་འཕྲོ་བརླག་ཤོར་དོགས་ཀྱིས་པཱ་ལགས་ཁོང་ནས་དེ་ལྟར་གནང་རྒྱུར་བཀག་འགོག་ཇི་ཙམ་བྱས་ཡོད་ཨང་།

ངའི་པཱ་ལགས་ཁོང་ནི་བུ་ཕྲུག་ལ་བྱམས་པའི་ཕ་ཞིག་ཡིན་ཏེ།　ང་ཚོ་ཆུང་དུས་ཀྱི་རྩེད་ཆས་མང་པོ་ཞིག་ཁོང་གིས་ཕྱག་གཉིས་ལ་བརྟེན་ནས་བཟོས་པ་མ་ཟད།　རྩེད་ཆས་བཟོ་རྒྱུར་མཁས་ཤིང་བྱང་བ་ཞིག་རེད།　སྐབས་དེའི་ཕྲུ་གུ་རྣམས་སྤྱི་ཚོགས་དང་ཁོར་ཡུག་གིས་རྐྱེན་པས་དམག་ཆས་གྱོན་ཞིང་དམག་རྩེད་རྩེད་རྒྱུར་དགའ་བ་སྟེ།　རྒྱུན་དུ་ཤིང་དང་ལྕགས་ལས་གྲུབ་པའི་རྩེད་ཆས་མེ་མདའ་དང་།　ཐ་ན་ལུག་མགོའི་འགྲམ་རུས་ཀྱང་རྩེད་ཆས་མེ་མདར་བྱེད་པ་ཡིན།

ངའི་པཱ་ལགས་ཁོང་གིས་ཤིང་བཟོའི་ལག་རྩལ་ཆབ་ཆབ་ལ་བརྟེན་ཏེ།　སྙིང་རུས་དང་ཞིབ་ཚགས་པོས་ང་དང་གཅུང་པོར་རིགས་དང་ཆེ་ཆུང་མི་འདྲ་བའི་མེ་མདའ་སྣ་ཚོགས་བཟོས་ཏེ།　དེ་ཚོར་ཚོས་ནག་བྱུག་རྗེས་མིག་ལ་ལྷག་པར་མཛེས་པས།　གྲོང་ཚོའི་ནང་གི་བྱིས་པ་གཞན་མང་པོའི་ཡིད་ཀྱི་དབང་པོ་རབ་ཏུ་འཕྲོག་སྟེ་ང་དང་གཅུང་པོར་ཡིད་སྨོན་ཆེན་པོ་བྱེད།　ད་དུང་སྐབས་དེའི་ཕྲུ་གུ་རྣམས་ལྕགས་སམ་ཤིང་གི་འཁོར་ལོ་ཡོད་པའི་ཤིང་སྒྲོམ་སྟེ་རིག་ཤོག་གཏོང་རྒྱུར་དགའ་ཡང་།　རྩེད་ཆས་དེ་རིགས་ནི་ཁྱིམ་ཚང་གི་ཆ་རྐྱེན་ཅུང་ཡག་པའི་ཕྲུ་གུར་མ་གཏོགས་མེད་མོད།　ངའི་བརྩེ་བའི་པཱ་ལགས་ཁོང་གི་ཕྱག་རྩལ་ལས།　ང་ཚོར་རྩེད་ཆས་དེ་འདྲ་མེད་པའི་སེམས་ཁྲལ་མི་དགོས་པ་མ་ཟད།　ཕྲུ་གུ་གཞན་གྱི་མདུན་དུ་ངོམ་བཟོ་དང་བཅས་རང་ལ་ངོ་སོ་ཆེ་བའི་སྣང་བ་དང་སྤོབས་པ་ཞིག་རང་བཞིན་དུ་ཡོང་གི་ཡོད་།

ལོ་ལྟར་བཙས་མ་བརྔས་རྗེས་ཕྲུ་གུ་རྣམས་ཤོག་བྱ་གཏོང་བར་འགྲོ་རྒྱུ་ནི་གོམས་སྲོལ་ལྟ་བུར་གྱུར་བས།　རང་རང་སོ་སོར་གཞན་ལས་ལྷག་པའི་ཤོག་བྱ་རེ་བྱུང་ན་བསམ་པ་ནི་ཕྲུ་གུ་ཚང་མའི་བསམ་འདུན་ཆེ་ཤོས་དེ་རེད་ལ།　གཞན་ལས་ལྷག་པའམ་མ་མཐར་ཡང་གཞན་དང་མཉམ་པའི་ཤོག་བྱ་རེ་ཡོད་མེད་དེས།　ཕྲུ་གུ་དེའི་གནས་བབ་དང་ངོ་སོ་མཚོན་པས།　ཕྲུ་གུ་ཚོས་རང་རང་གིས་འཇོན་ཐང་ལ་བརྟེན་ཏེ་ཤོག་བྱ་བཟོ་བའམ་གཞན་ལ་ཞུ་འབུལ་གྱིས་བཟོ་བ།　ཡང་ན་དངུལ་སྤྲད་དེ་གཞན་གྱི་ས་ནས་ཉོ་བ་སོགས་ཐབས་ཤེས་སྣ་ཚོགས་ལ་བརྟེན་ནས་བློ་ལ་བབས་པའི་ཤོག་བྱ་རེ་ཡོང་ཐབས་བྱེད་པ་ཡིན།　ངའི་པཱ་ལགས་ཁོང་ནི་ཆུང་བྱིས་པའི་དུས་ནས་ཤོག་བྱ་བཟོ་བ་དང་གློད་རྒྱུར་དགའ་ཞིང་གོམས་པ་མ་ཟད།　ཁོང་བྱིས་པའི་དུས་ཤོག་བྱ་གློད་སྐབས་ཐོག་ཁའི་སྟེང་ནས་ཟགས་མྱོང་བ་དང་།　གཞན་གྱི་ཤོག་བྱ་དང་འཐབ་ནས་མང་དུ་རྒྱལ་བ་ལ་སོགས་པའི་ཉན་སྤྲོ་བའི་གཏམ་རྒྱུད་མང་པོ་གསུངས་རྒྱུ་ཡོད།

དེ་དུས་ཤོག་བྱ་གློད་དུས་ཤོག་བྱ་མཁའ་དབྱིངས་སུ་གློད་པ་ཙམ་མ་ཡིན་པར།　ཤོག་བྱ་ཞིག་མཁའ་ལ་གློད་སྐབས་མཁའ་དབྱིངས་མཐོན་པོར་འཕུར་ཐུབ་པ་དང་།　རླུང་བུ་ཆེ་ཡང་ལྷིང་པོ་དང་བརྟན་པོའི་ངང་འཕུར་ཐུབ་པ།　མཁའ་དབྱིངས་སུ་གཞན་གྱི་ཤོག་བྱ་དང་འཛིང་མོ་བྱེད་དུས་ཤོག་བྱ་གློད་མཁན་གྱི་ལག་རྩལ་མཁས་ལོས་དང་།　ད་དུང་ཆེས་གལ་ཆེ་བ་ནི་ཤོག་བྱའི་སྤུས་ཚད་ལ་རག་ལས་པ་སྟེ།　ཤོག་བུའི་སྤུས་ཚད་དང་ཤོག་བྱའི་མདའ་དང་རྩིབས་མ།　དེ་བཞིན་སྐུད་པ་སོགས་ཕྱོགས་མང་པོའི་བཟོ་རྩལ་ལ་རག་ལས་པས།　ཤོག་བྱ་བཟོ་སྐབས་ཤོག་བུ་འདེམས་ཤེས་དགོས་པ་མ་ཟད།　ཤོག་བྱའི་མདའ་དང་རྩིབས་མ་བཟོ་སྐབས་སྨྱུག་མའི་སྤུས་ཚད་དང་སྦོམ་ཕྲ།　གུག་ཆ་དང་ལྡེམ་ཤུགས་ཆེ་ཆུང་།　ཤོག་བྱའི་གཡས་གཡོན་གྱི་ཡང་ལྕི།　ཤོག་བྱའི་བྲང་ཐག་བསྒར་སའི་དབྱེ་མཚམས་དང་བར་ཐག　དེ་བཞིན་ཤོག་བྱའི་སྐུད་པར་སྣག་གཏོང་མིན་དང་།　སྣག་གཏོང་མཁས་མིན་སོགས་དང་ཁྱད་པར་ཤིན་ཏུ་ཆེ།

ལྷག་པར་དུ་མཁའ་དབྱིངས་སུ་ཤོག་བྱ་ཕན་ཚུན་འཐབ་རེས་བྱེད་དུས།　ཤོག་བྱའི་སྐུད་པར་སྣག་བཏང་ཡོད་མེད་དང་།　སྣག་གཏོང་མཁས་མིན་ནི་གཞན་ལས་རྣམ་པར་རྒྱལ་ཐུབ་མིན་གྱི་འགག་རྩའི་ནང་གི་འགག་རྩ་རེད།　ངའི་པཱ་ལགས་ཁོང་གིས་དང་ཐོག་ཤེལ་ཕྱེ་མར་འཐག་རྗེས།　གྲོ་ཞིབ་སྤུས་ལེགས་གདམས་ཏེ་སྐྱོ་མ་བསྐོལ་ནས་དེའི་ནང་ཤེལ་ཕྱེ་དང་།　སྤྱིན།　བྱེ་མ་ཀ་ར་སོགས་བསྡུར་ཚད་རན་པོར་བླུགས་ཏེ་ལེགས་པར་སྦྱངས་རྗེས་སྐུད་པར་བྱུག་པ་དང་།　སྐུད་པར་བྱུག་དུས་ཀྱང་མང་ཉུང་རན་པར་བྱེད་ཅིང་།　དེ་ནས་དེ་ལྟར་སྣག་བཏང་བའི་སྐུད་པ་ཆུ་གྲང་མོས་བཀྲུས་རྗེས་གྲིབ་སྐམ་གཏོང་གི་ཡོད།　དེ་ལྟར་སྐུད་པར་སྣག་ཡག་ཉེས་ཇི་བྱུང་ནི་སྣག་གཏོང་མཁན་གྱི་ལག་རྩལ་ལ་རག་ལས་པ་དང་།　སྣག་ཡག་པོ་བྱུང་ན་མཁའ་དབྱིངས་སུ་གཞན་གྱི་ཤོག་བྱ་དང་འཛིང་མོ་བྱེད་དུས་ཤོག་བྱ་གཞན་གྱི་སྐུད་པ་ངལ་མེད་དུ་བཅད་དེ་གཞན་ལས་རྣམ་པར་རྒྱལ་ཐུབ།　ཤོག་བྱའི་སྣག་གཏོང་སྟངས་མ་གཞི་ཧ་ལམ་གཅིག་མཚུངས་ཡིན་མོད།　ཡིན་ནའང་ཞིབ་ཕྲའི་ལག་རྩལ་མི་འདྲ་ལ།　རང་རང་སོ་སོའི་ཁྱད་འཕགས་ཀྱི་ལག་རྩལ་གཞན་ལ་གསང་བ་བྱེད་པས།　སྣག་གཏོང་བའི་ལག་རྩལ་ལ་ཁྱད་པར་ཆེན་པོ་ཡོད།

ངའི་པཱ་ལགས་ཁོང་གི་ལག་རྩལ་ཡག་པོ་ཡོད་པས།　ང་ཚོས་ཁོང་གིས་བཟོས་པའི་ཤོག་བྱ་བཏང་སྟེ་གཞན་དང་རྒྱལ་ཕམ་འགྲན་དུས།　ང་རང་གཞན་ལ་ཕམ་པའི་ལོ་རྒྱུས་ཧ་ལམ་ཤོད་རྒྱུ་མེད།　ཁོང་གིས་མཇུག་མ་ཡོད་པའི་ཤོག་བྱ་སྣ་ཚོགས་བཟོ་ཤེས་པ་མ་ཟད།　གཞན་གྱིས་དེ་ཙམ་མི་ཤེས་པའི་མཇུག་མ་མེད་ཅིང་དབྱིབས་ཤིན་ཏུ་ཆེ་བའི་ཤོག་བྱ་ཀླད་ཀོར་འཇམ་པ་ཟེར་བའང་བཟོ་མཁྱེན་གྱི་ཡོད།　མཇུག་མེད་ཀླད་ཀོར་འཇམ་པ་ནི་མཇུག་ཡོད་ཤོག་བྱ་དང་བསྡུར་ན་ཁྱད་ཆོས་མི་འདྲ་བ་འགའ་ཡོད་དེ།　ཀླད་ཀོར་འཇམ་པ་ལག་ཏུ་འཁྱེར་དུས་འཁྱེར་བདེ་བ་དང་།　མཁའ་དབྱིངས་སུ་གློད་དུས་ཉམས་དོད་ལ་བདེ་ཅག་འཁྱུག་པ།　ལྷག་པར་དུ་མཁའ་དབྱིངས་སུ་རྒྱལ་ཕམ་འགྲན་དུས་མཇུག་ཡོད་ཤོག་བྱ་དང་བསྡུར་ན།　གཅིག་ནས་བདེ་ཅག་འཁྱུག་པའི་དགེ་མཚན་དང་།　གཉིས་ནས་ཤོག་བྱ་ཕན་ཚུན་འཛིང་མོ་བྱེད་དུས་མཇུག་ཡོད་ཤོག་བྱའི་མཇུག་མ་ཆད་སླ་བ་དང།　མཇུག་མ་ཆད་རྗེས་མུ་མཐུད་འཕུར་བའི་ནུས་པ་དང་བྲལ་ཏེ་ཤོག་བྱ་མགོ་གཡུག་དང་བཅས་རང་བཞིན་དུ་ས་ལ་ལྷུང་འགྲོ་བས།　ཀླད་ཀོར་འཇམ་པར་མ་གཞི་ནས་མཇུག་མ་མེད་པས་དེ་ལྟའི་སེམས་ཁྲལ་མི་དགོས།

ང་དང་གཅུང་པོས་པཱ་ལགས་ཁོང་གིས་བཟོས་གནང་བའི་ཤོག་བྱ་དེ་རིགས་མཁའ་ལ་གློད་དུས།　ཤོག་བྱའི་བཟོ་དབྱིབས་དང་ཆེ་ཆུང་།　ལྷག་པར་དུ་ཤོག་བྱའི་སྤུས་ཚད་ཀྱིས་རྐྱེན་པས།　བྱིས་པ་གཞན་གྱིས་ངེད་གཉིས་ལ་ཡིད་སྨོན་གྱི་མིག་མདའ་འཕེན་སྐབས་དང་།　ལྷག་པར་དུ་མཁའ་དབྱིངས་སུ་རྒྱལ་ཕམ་འགྲན་ཏེ་གཞན་གྱི་ཤོག་བྱ་རེ་རེ་བཞིན་ཕམ་ཉེས་སུ་གཏོང་སྐབས།　སྐབས་དེའི་ངའི་སྣང་ངོར་རང་ཉིད་ནི་གེ་སར་རྒྱལ་པོ་བཞིན་འཐབ་ན་མི་རྒྱལ་བ་མེད་པའི་དམག་དཔོན་ཞིག་ཡིན་པའི་ཉམས་སྣང་དང་སྤོབས་སེམས་ཤིག་གིས་ཡོངས་སུ་ཁེངས་པར་གྱུར།

ངའི་པཱ་ལགས་ཁོང་ནས་ང་དང་གཅུང་པོར་ཤོག་བྱ་བཟོ་བ་དང་བསྟུན།　ཤོག་བྱ་བཟོ་སྟངས་དང་།　སྐུད་པར་སྣག་གཏོང་སྟངས་ཀྱང་བསླབ་གནང་གི་ཡོད་པས།　རྗེས་སུ་ང་དང་གཅུང་པོས་ཀྱང་ཤོག་བྱ་སྣ་ཚོགས་བཟོ་ཤེས་པ་མ་ཟད།　སྐུད་པར་སྣག་གཏོང་སྟངས་ཀྱང་ཤེས་པར་གྱུར།　ལོ་རེའི་སྟོན་དུས་ཀྱི་ཤོག་བྱ་གློད་པའི་དུས་ཚོད་འཆར་དུས་དང་།　ཤོག་བྱ་དང་འབྲེལ་བའི་དོན་དག་ཅིག་དྲན་དུས།　ངས་པཱ་ལགས་དང་པཱ་ལགས་ཀྱི་ཤོག་བྱ་སེམས་ནས་ལྷང་ངེར་དྲན།　དེ་ནས་ད་བར་མི་ལོ་སུམ་ཅུ་ལྷག་སོང་ཟིན་མོད།　སྔར་སོང་བྱིས་པའི་དུས་ཀྱི་འཚོ་བ་དེ་དག་ལ་ཕྱིར་དྲན་བྱེད་སྐབས།　དེ་དག་ཚང་མ་ནི་མི་ཚེ་གང་པོའི་བརྗེད་པར་དཀའ་ལ་ཡིད་དུ་འོང་བའི་དྲན་འཆར་རེ་རེ་ཡིན་ཨང་།

ངའི་པཱ་ལགས་ཁོང་ནི་མི་སེམས་བཟང་ཅན་ཞིག་རེད།　ཁོང་བཙོན་གྲོལ་བྱུང་རྗེས་དེ་སྔ་གྲལ་རིམ་འཐབ་རྩོད་སྐབས་རང་ཉིད་ལ་ཉེས་མེད་འཐབ་རྩོད་གཏོང་མཁན་རྣམས་ལ་འཁོན་སེམས་མེད་པར་གུ་ཡངས་གཏོང་རྐྱང་བྱེད་པ་མ་ཟད།　རྗེས་སུ་ང་ཚོའི་འཚོ་བའི་གནས་བབ་རིམ་པས་ཡག་ཏུ་སོང་རྗེས།　གྲལ་རིམ་འཐབ་རྩོད་སྐབས་དྲག་པོའི་འཐབ་རྩོད་ལ་དགའ་བའི་མི་དེ་ཚོའི་ཁྱིམ་ཚང་འཚོ་བའི་འཁོས་བབ་ཞན་རྐྱེན།　ང་ཚོའི་ཁྱིམ་ལ་ལྟོ་གོས་གང་གི་ཐད་ནས་རེ་བ་བྱེད་དུས།　པཱ་ལགས་ཁོང་ནས་སྔར་བྱས་ལ་འཁོན་པ་དང་འཛིན་པ་མེད་པར་གང་དང་ཅི་ཡིན་ཡང་གཏོང་ཕོད་ཆེན་པོས་རོགས་རམ་གང་ཐུབ་བྱེད།　དེ་དུས་ང་ཚོས་ཁོང་ལ“དེ་སྔ་མི་དེ་ཚོས་མི་ཆོས་ལས་འདས་པའི་སྡུག་དང་མནར་གཅོད་དེ་འདྲ་གཏོང་མྱོང་བ་དེ་དག་མི་དྲན་ནམ།　ད་ལྟ་ཁོ་ཚོར་སེམས་བཟང་དེ་འདྲ་བྱེད་པའི་དགོས་པ་མེད”ཅེས་མ་འདོད་པའི་ཚུལ་དུ་གླེང་དུས།　ཁོང་ནས་ངང་རྒྱུད་རིང་པོས“མིའི་མི་ཚེ་ནི་སྐད་ཅིག་ཙམ་ཞིག་ཡིན་པས།　འཁོན་པ་བྱེད་དོན་མེད་ལ་སྙིང་པོ་མེད་པ་ཞིག་རེད།　གཅིག་བྱས་ན་ཚེ་སྔོན་མར་ང་ཚོས་ཁོ་ཚོར་ཆད་ཡོད་པས་ཚེ་འདིར་ལས་འབྲས་འཁོར་ཏེ་ཚེ་སྔོན་ཕར་ལ་ཆད་པ་རྣམས་ད་ཆ་འཇལ་དགོས་པ་ཡིན་སྲིད།　དེ་འདྲ་མིན་ན་ཚེ་འདིར་ཁོ་ཚོས་ང་ཚོར་ཆད་པས་ཚེ་ཕྱི་མར་དེའི་ལས་འབྲས་ཁོ་ཚོ་རང་གིས་འཁུར་དགོས་པས།　ང་ཚོས་འཁོན་པ་དང་འཛིན་པ་བྱས་ཚེ་ང་ཚོ་རང་ཉིད་ཀྱི་བསོད་བདེ་བསོད་ནམས་ཉམས་འགྲོ་བ་མ་ཟད།　འཁོན་པ་དང་འཛིན་པས་སྡིག་པ་གསོག་པའི་ཁར།　རང་སེམས་མི་བདེ་ཞིང་གཞན་སེམས་འཁྲུག་པར་བྱེད་པས་དགོས་པ་མེད”ཅེས་གསུངས་ཀྱི་ཡོད།

ངའི་པཱ་ལགས་ཁོང་གིས་དབང་པོ་སྐྱོན་ཅན་དང་རྒན་འཁོགས་སོགས་མི་གཉོམ་ཆུང་རྣམས་ལ་སྙིང་རྗེ་ཚད་མེད་གནང་རྒྱུ་ནི་ཁོང་གི་མི་ཚེའི་ལྟ་བའམ་འཚོ་བའི་གཏན་ཚིགས་གལ་ཆེན་ཞིག་ཏུ་བརྩི་གནང་གི་ཡོད་ཅིང་།　དེ་སྔ་པཱ་ལགས་ཁོང་ཀུང་ཧྲེའི་རྟ་སྒ་རིལ་བཏང་སྟེ་ཕག་རི་ནས་རྒྱལ་རྩེ་དང་གཞིས་རྩེ་སོགས་སུ་མེ་ཤིང་དབོར་འདྲེན་གནང་བར་ཕེབས་དུས་དང་།　དེ་བཞིན་རྗེས་སུ་མི་དམངས་ཀུང་ཧྲེ་གཏོར་ནས་ཐོན་སྐྱེད་འགན་འཁྲིའི་ལམ་ལུགས་སྐབས་ཚོང་གཉེར་གྱིས་ས་ཆ་གཞན་དུ་ཕེབས་དུས་སུ།　ལམ་བར་ལྟོ་སྐྱ་གོས་ཧྲུལ་གྱི་རྒན་འཁོགས་དང་མུ་ཏོ་བ་འདྲ་ཐུག་དུས།　དགུན་ཨ་ཧྲེང་ད་ཧྲེང་སྐབས་སུའང་རང་ཉིད་ཀྱི་ཟས་ཙམ་མ་ཟད་ལུས་ཀྱི་གྱོན་པའང་ཕུད་དེ་ཁོ་ཚོར་སྦྱིན་པ་ནི་ཐེངས་གཅིག་གཉིས་གཏན་ནས་མ་ཡིན།

ང་ཚོའི་ཕ་ཡུལ་དུ་དེ་སྔ་ཇོ་བོ་ཚེ་རིང་ཟེར་བའི་ལྕགས་བཟོ་བ་ཞིག་ཡོད་པ་དེར་ཕྲུ་གུ་ཞ་རིལ་ལག་གཉིས་ས་ལ་བཙུགས་ཏེ་སྨད་ཁོག་དྲུད་དེ་འགྲོ་དགོས་པ་ཞིག་ཡོད།　ཁོ་ཚོ་ལྕགས་བཟོ་བ་ཡིན་པའི་དབང་གིས་མི་མང་པོས་ཁོ་ཚོར་མཐོང་ཆུང་བྱེད་པ་མ་ཟད།　ཕྲུ་གུ་ཞ་རིལ་དེས་བཙོག་གཅིན་ཡང་མི་འཚོག་པས།　བཙོག་གཅིན་གི་དྲི་ངན་བཟོད་དཀའ་རྐྱེན་ཚང་མས་ཁོ་ལ་གཡོལ་གང་ཐུབ་བྱེད་ཀྱི་ཡོད།　དགུན་དུས་ཀྱི་དགོང་མོ་ཞིག་ཆུས་ཀྱི་སྒོ་རའི་ནང་གློག་བརྙན་བསྟན་པས།　གློག་བརྙན་ཚར་ནས་མི་རྣམས་རང་ཁྱིམ་ལ་ལོག་པའི་སྐབས།　ཕྲུ་གུ་ཞ་བོ་དེ་རང་ཁྱིམ་ལ་འགྲོ་བའི་ལམ་བར་དུ་ཆུ་ལ་མ་ཐར་བར་གྲར་ངར་གྱིས་ལུས་པོ་འདར་སིག་སིག་ལ་ཡོད་པ་མཐོང་དུས།　པཱ་ལགས་ཁོང་གིས་བཙོག་སྣང་སྤུ་ཙམ་ཡང་མེད་པར་ཕྲུ་གུ་ཞ་བོ་དེ་པང་ལ་བཏབ་སྟེ་ཁོ་པའི་ཁྱིམ་དུ་བསྐྱལ་རྗེས་གཞི་ནས་རང་ཁྱིམ་དུ་ལོག

ངའི་པཱ་ལགས་ཁོང་ནི་རྒན་བཀུར་གཞོན་གཅེས་ཀྱི་དཔེ་མཚོན་ལྟ་བུར་བགྲང་རུང་བ་ཞིག་ཡིན།　པཱ་ལགས་ཁོང་ནས་རང་གི་ཕ་མ་གཉིས་ལ་བསྙེན་བཀུར་ཞབས་ཏོག་མ་འཕྱུགས་པ་གནང་བས་མི་ཚད།　ང་ཚོའི་ཁྱིམ་ལ་ཨ་ཕྱི་རྒན་མོ་ཞིག་ཡོད་པ་དེར་ཡང་ཞབས་ཏོག་ཡག་པོ་སྒྲུབ་གནང་གི་ཡོད།　ཨ་ཕྱི་ཁོང་ནི་ངའི་པཱ་ལགས་ཀྱི་ཨ་ཁུའི་མ་རེད།　ངའི་པཱ་ལགས་ཀྱིས་ཨ་ཕྱི་རྒན་མོར་རང་གིས་མ་ལྟར་ཟས་གོས་གང་སྤྱིའི་ཐད་ནས་ལྟ་རྟོག་སེམས་ཁུར་གང་ལེགས་གནང་བ་མ་ཟད།　ངང་རྒྱུད་རིང་པོས་ཞབས་ཕྱི་ལེགས་པར་སྒྲུབ་སྟེ་བྱམས་པར་སྐྱོང་བས།　ཨ་ཕྱི་ལགས་ཀྱི་ཞལ་ནས“བུ་བློ་བཟང་དང་།　བུ་བློ་བཟང”ཞེས་མ་ཎི་འདྲེན་འདྲེན་བྱེད་པ་དང་།　པཱ་ལགས་ཁོང་ཡུལ་གཞན་ལ་ཕྱག་ལས་ལ་ཕེབས་དུས་ཀྱང་ཨ་ཕྱི་ལགས་ཀྱིས་ཧ་ཅང་དྲན་པོ་གནང་གི་ཡོད་ཅིང་།　སྒུག་ཡུན་མི་བཟོད་པའི་ཚུལ་དུ“བུ་བློ་བཟང་ག་དུས་ལོག་ཡོང་གི་རས”ཞེས་ཡང་ཡང་དྲིས་གནང་གི་ཡོད།

བདག་གི་པཱ་ལགས་ཁོང་ནི་སེམས་ལྤགས་སྲབ་ཅིང་།　ག་དུས་ཡིན་ཡང་མི་གཞན་ལ་ཡིད་ཆེས་ཆེན་པོ་གནང་མཁན་ཞིག་ཡིན།　ཁོང་གི་མི་ཚེའི་ནང་ཚོང་གཉེར་ཡུན་རིང་གནང་མྱོང་ཡང་།　ཁེ་བཟང་ཁོ་ན་དོན་གཉེར་བྱེད་མཁན་ཞིག་ཡེ་ནས་མིན།　གཞན་གྱིས་སྔོན་ལ་ཚོང་ཟོག་འཁྱེར་ནས་རིན་གོང་རྗེས་སུ་རྩིས་རྒྱག་རྒྱུའི་ཁས་ལེན་དམ་བཅའ་བྱས་པར།　ཡིད་ཆེས་ཆེན་པོས་སྔོན་ལ་ཚོང་ཟོག་སྔ་རྟིང་དུ་སྤྲོད་རྐྱང་གནང་བ་དང་།　རྗེས་སུ་རྩིས་རྒྱག་པའི་སྐབས་སུ་མི་མང་པོས་གནས་སྐབས་རྩིས་རྒྱག་མི་ཐུབ་ཅེས་གནས་ལུགས་རྒྱུ་མཚན་དང་སྦྲགས་ཁྱིམ་ཚང་དང་འཚོ་བའི་དཀའ་ངལ་མང་དག་ཞིག་དྲངས་དུས།　ཁོང་ནས་མུ་མཐུད་ཨུ་ཚུགས་མཐར་སྐྱེལ་བྱེད་མི་སྲིད་པ་དང་།　གཞན་གྱིས་ཐེངས་མང་དེ་ལྟར་བྱས་རྗེས་མུ་མཐུད་བུ་ལོན་དེད་དུ་འགྲོ་མི་ཕོད་པར“ཁོ་ཚོ་བུ་ལོན་སྤྲོད་མཁན་ངོ་མི་ཚ་ནའང་ང་བུ་ལོན་ལེན་མཁན་ངོ་ཚ་གི་འདུག”ཅེས་བཞག་གནང་གི་ཡོད།　མི་མང་པོ་ཞིག་གིས་ཁོང་གི་དེ་ལྟའི་ཐུགས་རྒྱུས་ལོན་རྗེས།　ཁོང་གི་ཞན་ཆ་དེ་བེད་སྤྱད་དེ་རང་ཉིད་ལ་ཁེ་བཟང་རག་ཐབས་ཁོ་ན་བྱེད་པས།　མཐར་པཱ་ལགས་ཁོང་གི་ཚོང་གཉེར་ལ་ཁེ་བཟང་མེད་པ་མ་ཟད།　མ་རྩའང་བརྡིབས་འགྲོ་བས།　ནང་མི་དང་དགའ་ཉེ་སྤུན་མཆེད་ཚོས“མི་གཞན་ཡིན་ན་ཚོང་རྒྱག་གིན་རྒྱག་གིན་ཁེ་བཟང་ཆེ་རུ་ཆེ་རུ་འགྲོ་གི་ཡོད་མོད།　བློ་བཟང་གིས་ཚོང་རྒྱག་གིན་རྒྱག་གིན་གྱོང་གུན་ཆེ་རུ་ཆེ་རུ་རེད”ཅེས་མི་འདོད་པའི་རྣམ་འགྱུར་སྟོན་མཁན་མང་།

ཐེངས་ཤིག་པཱ་ལགས་ཁྱིམ་ཚང་ཞིག་ལ་ལས་དོན་སྒྲུབ་པར་ཕེབས་སྐབས།　ཁྱིམ་ཚང་དེའི་འདོགས་ཁྱི་གང་བྱུང་དུ་བཏང་བ་དེས་རྨུགས་ནས་རྨས་སྐྱོན་བཟོས།　དོན་དེ་ནང་མི་ཚོས་ཤེས་ནས་ཁྱིམ་ཚང་དེར་རྒྱུ་མཚན་ཤོད་པར་འགྲོ་རྒྱུ་མ་ཟད།　སྨན་རིན་ལེན་པར་འགྲོ་རྩིས་བྱེད་སྐབས།　ཁོང་གིས“ཁྱིམ་ཚང་དེ་ལ་ཆ་བཞག་ཀྱང་རྐང་བཙུགས་ཏེ་ཁྱི་བཏང་ནས་མི་ལ་རྨུགས་བཅུག་པ་ཞིག་མིན་པས་དེ་འདྲ་བྱེད་མི་རུང་།　ཁྱིས་རྨུགས་པའི་རྨ་ཁར་གསོ་རྒྱུ་ཡོད་པ་དང་།　གལ་སྲིད་ཡུལ་གཅིག་གི་ཡུལ་མི་ཕན་ཚུན་བར་སེམས་ལ་རྨ་ཁ་བཟོས་ན་གསོ་ཁག་པ་མ་ཟད།　རྟག་ཏུ་གྲོང་ཚོ་གཅིག་ནང་མི་ཚེ་མཉམ་དུ་སྐྱེལ་དགོས་པས་ཁ་ནག་ངོ་ནག་གིས་མི་ཚེ་སྐྱེལ་དགོས་བྱུང་ན་སྙིང་པོ་མེད”ཅེས་ཁོང་གི་གྲོགས་པོ་ཚོར་ཕར་ལ་སེམས་གསོ་དང་ཁ་ཏ་བསླབ་བྱ་གནང་བས།　ཁ་ཤས་ཀྱིས་བློ་བཟང་རང་ནི་བློ་ཁོག་ཆུང་བ་ལ་ཟེར་བ་དང་།　ཁ་ཤས་ཀྱིས་བློ་བཟང་རང་ནི་མི་བླ་མ་དཀོན་མཆོག་ཅིག་རེད་ཟེར།　པཱ་ལགས་ཁོང་གི་མི་ཚེའི་ནང་དེ་དང་དེ་འདྲ་བའི་སྒྲུང་གཏམ་མང་བས།　འདིར་བཀོད་པ་ནི་དཔེ་མཚོན་ཙམ་དུ་ཟད།

ཕལ་ཆེར་ཁོང་གི་ལྷག་བསམ་ཟོལ་མེད་དང་བྱམས་སྙིང་རྗེའི་བསམ་པའི་ཀུན་སློང་དང་བྱ་སྤྱོད་ཀྱི་འབྲས་བུ་ཡིན་ངེས་ཏེ།　གྲལ་རིམ་འཐབ་རྩོད་ཀྱི་ཐབས་རྡུགས་ཀྱི་ལོ་ཟླའི་ནང་།　བསམ་ཤེས་མེད་པའི་སྐྱེ་བོ་ལ་ལ་ཕུད།　ཡུལ་མི་དང་གྲོང་པ་ཁྱིམ་མཚེས་མང་པོས་ཉེན་ཁ་ཆེ་བའི་སྤྱི་ཚོགས་ཀྱི་ཁོར་ཡུག་ལ་མ་བལྟོས་པར།　ང་ཚོ་ནང་མི་བུ་ཕྲུག་ཚོར་ལྐོག་ལྐོག་སུད་སུད་ལ་རོགས་པ་མང་པོ་བྱེད་མྱོང་ལ།　ངའི་ཨ་མ་ལགས་ནད་ཀྱིས་མནར་ཏེ་རྒྱལ་རྩེ་སྨན་ཁང་དུ་སྨན་བཅོས་བྱེད་རིང་།　ངོ་ཤེས་དང་མི་ཤེས་པའི་མི་མང་པོས་རོགས་རམ་མང་པོ་གནང་བ་མ་ཟད།　ཨ་མ་ལགས་ཁོང་སྨན་ཁང་དེར་སྨན་བཅོས་བྱས་ཀྱང་མ་ཕན་པར་ཚེ་ལས་འདས་རྗེས།　སྨན་ཁང་དེར་ནད་བཅོས་བྱེད་བཞིན་པའི་དེ་སྔ་ངོ་ཤེས་ཆ་རྒྱུས་མེད་པའི་མི་མང་པོས་ཕྱོགས་མང་པོའི་ཐད་ནས་རོགས་མང་གང་ཐུབ་བྱས་པ་དང་།　མི་ཁ་ཤས་རྗེས་སུ་ངའི་པཱ་ལགས་ཁོང་དང་གྲོགས་པོ་བློས་ཐུབ་ལ་གྱུར།

དེ་ནས་ལོ་མང་སོང་རྗེས་ངའི་པཱ་ལགས་ཁོང་སྐུ་ཚེས་མ་ཟིན་པར་འཇིག་རྟེན་གཞན་དུ་ཕེབས།　པཱ་ལགས་ཁོང་སྐུ་ཚེ་འདས་ཁར་ཁོང་ནས་ཞལ་ཆེམས་བཞག་གནང་དུས།　ང་རང་ནི་སེམས་སྡུག་བཟོད་མེད་ཀྱིས་ངུ་མང་དུ་ཤོར་བས།　པཱ་ལགས་ཁོང་ནས“བུ།　སེམས་སྡུག་བྱེད་མི་དགོས།　མི་ཚང་མ་འདི་ལྟར་འཛོམས་པའི་མཐའ་མར་བྲལ་དགོས་རེད།　ང་རང་ཤི་རྒྱུར་གཏན་ནས་སྐྲག་གི་མི་འདུག　ངས་སྐྱེས་ཆེན་དམ་པ་མང་པོ་དང་གནས་ཆེན་མང་པོ་ཞིག་མཇལ་མྱོང་ལ།　མི་ཚེ་འདིར་ངས་རྐང་བཙུགས་ཏེ་མི་གཞན་ལ་གནག་སེམས་གནོད་སེམས་ཀྱང་གཏན་ནས་བྱེད་མ་མྱོང་།　ངའི་རེ་བར་ཁྱེད་ཚོ་སྤུན་མཆེད་བར་དང་།　བཟའ་ཚང་ཕན་ཚུན་འཆམ་མཐུན་བྱེད་དགོས་པ་དང་།　རང་གི་སྒྱུག་ཕོ་སྒྱུག་མོ་ལའང་རང་གི་སྐྱེས་པའི་ཕ་མ་ལྟར་ཞབས་ཕྱི་གང་ལེགས་སྒྲུབ་དགོས།　བུ་རང་ཚེ་མཇུག་ལ་སྐྱིད་པོ་ཡོང་ངེས་རེད།　ངས་དུས་དང་རྣམ་པ་ཀུན་ཏུ་དཀོན་མཆོག་ལ་གསོལ་བ་སྨོན་ལམ་འདེབས་ཀྱི་ཡོད།　ཕ་མའི་སྨོན་ལམ་ཡིན་པས་གཏན་གཏན་འགྲུབ་ངེས་རེད”ཅེས་གསུངས་བྱུང་།

ཁོང་ཚེ་ལས་འདས་རྗེས་ཡུལ་སྲོལ་ལྟར་དགའ་ཉེ་སྤུན་གྲོགས་དང་གྲོང་པ་ཁྱིམ་མཚེས་ཚོས་སྐུ་ཕུང་གདན་འདྲེན་ཞུ་སྐབས།　ཚང་མས་ཁྱེད་ཤོར་ང་ཤོར་གྱིས་རྩོད་པར་བྱེད་པ་ངས་མངོན་སུམ་དུ་མཐོང་བ་མ་ཟད།　པཱ་ལགས་ཁོང་ཚེ་ལས་འདས་ཏེ་ལོ་མང་སོང་ཡང་ཁོང་གི་སྐོར་གླེང་སྐབས།　མི་ཚང་མས་ཁོང་ནི་མི་བླ་མ་དཀོན་མཆོག་ཅིག་དང་བྱང་ཆུབ་སེམས་དཔའ་རང་རེད་ཅེས་བསྔགས་པར་བྱེད་པས།　དེ་སྔ་ངས་པཱ་ལགས་ཁོང་གིས་གནང་བའི་ཕྱག་ལས་མང་པོ་ཞིག་ནི་སྙིང་པོ་མེད་པའི་བྱ་བར་སྣང་མོད།　རྗེས་སུ་ངས་ང་རང་གིས་དེ་སྔའི་བསམ་བློའི་གཏོང་ཕྱོགས་དང་།　ལྷག་པར་དུ་པཱ་ལགས་ཁོང་གི་ཕྱག་ལས་གནང་སྟངས་དང་།　འཚོ་བར་འཛིན་པའི་གཏན་ཚིགས་ལ་འགྱུར་ལྡོག་ངེས་ཅན་བྱུང་སོང་།　གང་ཡིན་ཟེར་ན་མི་མང་པོ་ཞིག་གསོན་མི་ཡུལ་ལ་ཡོད་དུས།　མི་གཞན་གྱིས་རྒྱུ་དངོས་པོ་དང་དབང་གྲགས་ལ་སོགས་རྒྱུ་རྐྱེན་མང་པོ་ཞིག་ལ་བརྟེན་ནས།　སེམས་གཏིང་ནས་མ་འདོད་བཞིན་དུ་ཁ་འཚེར་འཚེར་དང་གུས་ཞུམ་ཞུམ།　དེ་བཞིན་གཅམ་བུའི་ཚིག་གིས་བསྟོད་པར་བྱེད་ཀྱང་།　མི་དེའི་དབང་གྲགས་ཉམས་པའམ་འཇིག་རྟེན་མི་ཡུལ་ལས་འདས་རྗེས།　ངན་སྨྲས་ཚིག་མཚོན་འདེབས་པར་བྱེད་མོད།　ངའི་པཱ་ལགས་ཁོང་ནི་དེ་ལས་ལྡོག་པ་སྟེ་མི་ཡུལ་འདིར་འཚོ་བཞུགས་སྐབས།　གཞན་ཕན་ལྷག་བསམ་དཀར་པོའི་སེམས་ཤིག་ལས།　རྒྱུ་དངོས་པོ་དང་དབང་གྲགས་པ་གང་ཡང་མེད་པའི་སྐྱེ་བོ་ཕལ་པའི་ནང་གི་ཕལ་པ་ཞིག་ཡིན་མོད།　ཁོང་འཚོ་བཞུགས་སྐབས་མི་སྙན་གཏམ་གྱིས་ངན་སྨྲས་བྱེད་མཁན་བྱུང་མྱོང་མེད་ལ།　ཚེ་ལས་འདས་རྗེས་ཀྱང་བསྟོད་པའི་ཚིག་ལས་མི་སྙན་སྦྲང་སྐད་ཙམ་ཡང་བཤད་མཁན་བྱུང་མ་མྱོང་།　ངའི་བསམ་པར་སྐྱེ་བོ་གང་ཞིག་འཇིག་རྟེན་མི་ཡུལ་འདིའི་སྟེང་མིང་དང་གྲགས་པ་གཉེར་མི་ཐུབ་ཀྱང་།　མཐའ་མར་མི་ཡུལ་ལས་བྲལ་དུས་མི་དེ་མི་ཡག་པོ་ཞིག་རེད་ཟེར་བའི་བསྡོམས་ཚིག་ཅིག་འཇོག་ཐུབ་ནའང་དེ་ནི་གཟི་བརྗིད་ཆེན་པོ་ཞིག་ཏུ་བརྩི་ཆོག་བསམས།