འདི་ནི་པད་མ་ཆོས་སྒྲོན་གྱིས་རང་སྡེ་ཁུལ་གྱི་གྲོང་མིར་སློབ་ཚན་འཁྲིད་པའི་གནས་ཚུལ་ཡིན་པ།
ཉེ་དུས་ལྟ་ས་གྲོང་ཁྱེར་ཁྲེན་ཀོན་ཆུས་རྗེ་འབུམ་སྒང་སྡེ་ཁུལ་གྱི་དཔེ་ཁང་ནང་དུ་གསར་འགོད་པར་ཤེས་རྟོགས་བྱུང་གསལ།ཁང་པའི་ནང་དུ་དཔེ་ཀློག་གི་སྒྲ་ལྷང་ལྷང་ཐོས་དུས་དགུན་དུས་ཀྱི་གྲང་ངར་བརྗེད་པར་སྣང་།རྗེ་འབུམ་སྒང་སྡེ་ཁུལ་ཏང་ཀྲི་པུའུ་ཧྲུའུ་ཅི་སྤེན་པ་ཚེ་རིང་གིས་གསར་འགོད་པར་བརྗོད་དོན།འདི་ནི་རང་སྡེ་ཁུལ་གྱི་དང་བླངས་པས་སྡེ་ཁུལ་གྱི་གྲོང་མི་ཚོར་སློབ་ཚན་འཁྲིད་བཞིན་པའི་སྒང་ཡིན།དང་བླངས་དགེ་རྒན་དེ་དག་ནི་རང་སྡེ་ཁུལ་དུ་འཚར་ལོངས་བྱུང་བའི་ཕྲུ་གུ་ཤ་སྟག་ཡིན་ཞིང་།ད་ལྟ་ཁོང་ཚོས་དགུན་གྱི་གུང་གསེང་བེད་སྤྱད་ནས་རང་སྡེ་ཁུལ་གྱི་གྲོང་མིར་ཡི་གེ་སློབ་བཞིན་ཡོད།གསར་འགོད་པས་ད་དུང་ཤེས་རྟོགས་བྱུང་གསལ།གཟའ་འཁོར་རེའི་གཟའ་མིག་དམར་དང་གཟའ་པ་སངས་ཀྱི་ཕྱི་དྲོའི་ཆུ་ཚོད་5དང་ཕྱེད་ཀའི་ཐོག་དུས་ཐོག་ཏུ་རྗེ་འབུམ་སྒང་སྡེ་ཁུལ་གྱི་དཔེ་ཀློག་ཁང་ནས་དཔེ་དེབ་ཀློག་པའི་སྒྲ་ཐོས་རྒྱུ་འདུག
གསར་འགོད་པ་སྡེ་ཁུལ་གྱི་དཔེ་ཀློག་ཁང་ནང་དུ་འཛུལ་དུས་སུ་པད་མ་ཆོས་སྒྲོན་གྱིས་རང་སྡེ་ཁུལ་གྱི་གྲོང་མི་ཚོར་སློབ་ཚན་འཁྲིད་བཞིན་འདུགགྲོང་མི་ཚོའི་ལག་ཏུ་གཅིག་འགྱུར་གྱི་དཔེ་དེབ་ཞིག་འཁྱེར་ནས་ཚང་མས་ནན་ཏན་ངང་ནས་དཔེ་ཀློག་བྱེད་བཞིན་འདུག་པས་སློབ་ཁང་ཡོངས་ཚ་ཚ་འུར་འུར་གྱི་རྣམ་པས་ཁེངས་བཞིན་འདུགཔད་མ་ཆོས་སྒྲོན་ཁོང་ནི་སྙེ་མོར་ལས་ཀ་བྱེད་བཞིན་ཡོད་ཅིང་ད་ལྟ་ངལ་གསོའི་དུས་བེད་སྤྱད་ནས་རང་སྡེ་ཁུལ་གྱི་གྲོང་མིར་རིག་གནས་ཀྱི་གསབ་སྦྱོང་བྱེད་བཞིན་འདུག་ལ།ད་དུང་ཁོང་གིས་སྐད་འཕྲིན་ནང་དུ་“པད་མས་སྒྲུང་གཏམ་བརྗོད”ཞེས་པའི་ལེ་ཚན་ཞིག་གཉེར་ནས་སྙན་འཇེབས་ལྡན་པའི་སྒྲུང་གཏམ་སྣ་ཚོགས་བོད་ཡིག་ཏུ་འགྱུར་ཏེ་ཁ་པར་སོགས་སྨྱན་སྦྱོར་གསར་པའི་ལག་རྩལ་ལ་བརྟེན་ནས་མི་རྣམས་ལ་རྒྱུད་བསྐུར་བྱས་ནས་མི་རྣམས་ཀྱི་རིག་གནས་བྱང་ཚད་གོང་མཐོར་གཏོང་རྒྱུར་རང་གི་ལེགས་སྐྱེས་འབུལ་བཞིན་ཡོད།གསབ་སྦྱོང་འཛིན་གྲྭའི་ནང་གི་ཨ་ཅག་གཡང་འཛོམས་ནི་རང་སྡེ་ཁུལ་གྱི་གྲོང་མི་ཞིག་ཡིན་ཞིང་།ད་ལོ་དགུང་ལོ་38ཡིན་ཞིང་སློབ་ཆུང་གི་རིག་གནས་ཆུ་ཚད་ཙམ་ལས་མེད།ཕྲུ་གུ་གཉིས་ཀྱི་ཕ་མ་ཡིན་པའི་ཁོང་ནི་རིག་གནས་ཆུ་ཚད་ཞན་པའི་དབང་གིས་རང་གི་ཕྲུ་གུའི་སློབ་སྦྱོང་ལ་རོགས་བྱེད་མི་ཐུབ་པས་ཁོང་གིས་རིག་གནས་ཀྱི་གལ་ཆེའི་རང་བཞིན་ཚོར།གྲོང་མི་གཡང་འཛོམས་ལགས་ཀྱིས་གསར་འགོད་པར་བཤད་དོན་རང་ཉིད་གསབ་སྦྱོང་འཛིན་གྲྭ་དེར་བཞུགས་རྗེས་ཤེས་བྱ་མང་པོ་ཤེས་བྱུང་ལ་རང་གི་ཕྲུ་གུའི་སྦྱང་ཚན་ཐོག་ལའང་རོགས་བྱེད་ཐུབ་ཀྱི་འདུག་ཅེས་བཤད་བྱུང་།རྗེ་འབུམ་སྒང་སྡེ་ཁུལ་གྱི་ཏང་ཀྲི་པུའུ་ཧྲུའུ་ཅིས་གསབ་སྦྱོང་འཛིན་གྲྭར་ཕེབས་པའི་དང་བླངས་དགེ་རྒན་རྣམས་ནི་རང་སྡེ་ཁུལ་གྱི་ཕྲུ་གུ་ཡིན་ཞིང་།ཁོང་ཚོ་ནི་ནང་སའི་མཐོ་རིམ་སློབ་ཆེན་ཐོན་པ་ཡིན་ཞིང་།དང་བླངས་དགེ་རྒན་ཚོས་གཟབ་སྦྱོང་འཛིན་གྲྭ་སྤེལ་བ་དེས་གཅིག་ནས་དགེ་རྒན་ཚོའི་དགུང་གསེང་གི་འཚོ་བ་ཕུན་སུམ་ཚོགས་སུ་ཕྱིན་ཡོད་པ་མ་ཟད་རང་སྡེ་ཁུལ་གྱི་གྲོང་མིའི་རིག་གནས་བྱང་ཚད་ཀྱང་གོང་མཐོར་ཕྱིན་ཡོད་ཅེས་གསར་འགོད་པར་བཤད།
གྲོང་མིར་རིག་གནས་ཀྱི་གསབ་སྦྱོང་འཛིན་གྲྭ་སྤེལ་ཆེད་རྗེ་འབུམ་སྒང་ཨུ་ཡོན་ལྷན་ཁང་དང་བཅའ་སྡོད་ལས་དོན་ཚོགས་ཆུང་གིས་གྲོང་མི་ཚོར་སློབ་སྦྱོང་གི་ཡོ་བྱད་སོགས་ཉོས་ཏེ་གྲོང་མི་ཚོའི་རིག་གནས་གསབ་སྦྱོང་གི་དགའ་ཞེན་ཇེ་ཆེར་ཕྱིན་ཡོད་ལ་སྡེ་ཁུལ་ཡོངས་སུ་སློབ་སྦྱོང་བྱེད་པའི་རྣམ་པ་གསར་པ་ཞིག་ཆགས་ཡོད།