རང་རེའི་ཞིང་འབྲོག་ཁུལ་དུ་ཆུ་ཁོལ་བཏུང་བའི་སྲོལ་དེ་ཙམ་མེད་པར་མ་ཟད་ཕྱི་སྐྱ་ཆུ་ནག་ཅེས་རྗོད་ནས།རྩམ་རྐྱང་དང་ཆུ་ཁོལ་གཉིས་ནི་ནད་པའི་ཟས་སྐོམ་ཞིག་ལ་ངོས་འཛིན་བྱེད་ཀྱི་འདུགའདི་ནི་ཕལ་ཆེར་ཆུ་ཁོལ་གྱི་དགེ་མཚན་མ་ཤེས་པས་ཡིན་གྱི་རེད།དེ་ཕྱིར་ཆུ་ཁོལ་བཏུང་བའི་ཕན་ཡོན་མདོར་ཙམ་ཞིག་བརྗོད་ཚེ།
༡སྤྱིར་ཆུ་ལ་ཡག་སྡུག་གི་དབྱེ་བ་མང་ཡང་ཆུ་གང་ཐོན་སའམ་འབབ་སའི་ས་ཕྱོགས་གཙང་ཞིང་ཉི་འོད་དང་རླུང་བསེར་བུའི་རེག་བྱ་ཕོག་པའི་ཆུ་དེ་བཟང་ཞིང་དེ་ལས་ལྡོག་པའི་ཆུ་དེ་ཞན་ནོ།
༢ ལྦུ་བ་མ་སངས་བར་དུ་ལེགས་པར་བསྐོལ་པའི་ཆུ་དེ་རྒྱུན་དུ་མང་ཙམ་བཏུང་ན་ཕོ་བའི་མེ་དྲོད་སྐྱེད་ཅིང་ཁ་ཟས་འཇུ་བའི་གྲོགས་བྱེད།སྐྱིགས་བུ་སེལ་ཞིང་བད་ཀན་གྱི་ནད་ལ་ཕན།གྲང་བའི་ཕོ་བ་སྦོས་པ་ཞི་ཐུབ།ཆམ་པ་སོགས་རིམས་གསར་གྱི་ནད་རྣམས་འཕྲལ་དུ་སེལ་ཞིང་རྒྱུ་ལམ་གྱི་འགོ་ནད་མི་ཕོག་པའི་སྔོན་འགོག་གི་ནུས་པ་ཡོད།ད་དུང་པགས་པའི་སྤུས་ཀ་དང་འོད་མདངས་ཇེ་ཡག་ཏུ་འགྲོ་བའི་ནུས་པ་ལྡན་ཡོད།
༣བསྐོལ་ནས་གྲང་དུ་བཅུག་པའི་ཆུ་དེ་བཏུང་ན་བད་ཀན་གྱི་ནད་མི་སྐྱེད་ཅིང་མཁྲིས་པའི་ནད་སེལ།འོན་ཀྱང་ཞག་གཅིག་ལོན་ན་རྩ་བ་ནས་སྤྱོད་མི་རུང་།ཆུ་དེ་གྲང་རྗེས་སླར་ཡང་བསྐོལ་ནས་བཏུང་ན་ལུས་ལ་མི་འཕྲོད་པར་མ་ཟད་གནོད་པ་ཡོད།
༤ཟས་ཟོས་པའི་རྗེས་སུ་ཆུ་ཁོལ་བཏུང་ན་ཟས་སྐོམ་གཉིས་འདེས་ནས་ཟས་ཀྱི་རྡོག་པོ་དག་བཤིག་ཅིང་མྱག་ནས་བདེ་བླག་ངང་འཇུ་བ་དང་ལུས་བརྟས་ཤིང་སྟོབས་འཕེལ་བར་བྱེད།འོན་ཀྱང་ཆམ་ནད་དང་།ནམ་ཚོང་ཡན་ཆད་ཀྱི་ནད་ཡོད་པ་དག་གིས་ཟས་རྗེས་སུ་བཏུང་ན་གནོད་ཅིང་མི་འཕྲོད།ཁ་ཟས་གང་ཟོས་པ་དེའི་སྔོན་དུ་ཆུ་ཁོལ་བཏུང་ན་ལུས་ཤ་སྐམ་པོར་འགྱུར་བ་དང་།ཁ་ཟས་དང་སྦྲག་ནས་བཏུང་ན་སྐེམ་སྦོམ་གང་ཡང་མ་ཡིན་པ་ལུས་ཤ་རན་པར་འགྱུར་བ་དང་།ཐ་མར་བཏུང་ན་སྦོམ་པོར་ཆགས་པས་སོ་སོའི་ལུས་དང་འཚམས་པའི་སྒོ་ནས་སྤྱོད་རྒྱུ་གལ་ཆེའོ།