གཞིས་རྩེ་གྲོང་ཁྱེར་ལྷ་རྩེ་རྫོང་མི་དམངས་ཁྲིམས་ཁང་ཕྱོགས་བསྡུས་འདྲི་གཅོད་དིང་གི་དིང་ཀྲང་བདེ་སྐྱིད་གཡང་འཛོམས་དང་རྣམ་གླིང་རྫོང་མི་དམངས་ཁྲིམས་ཁང་ཨེ་མ་ཤང་མི་དམངས་ཁྲིམས་ཁང་གི་དིང་ཀྲང་བསོད་ནམས་ཆོས་སྒྲོན་གཉིས་ཀྱིས་ཕ་ཡུལ་ལ་དགའ་ཞེན་དང་བཅའ་ཁྲིམས་ལ་དད་མོས་བཅངས་ནས་མ་གྲོས་གཅིག་མཐུན་ངང་ཁྲིམས་འཛིན་གྱི་ལས་གནས་སུ་བསྐྱོད་དེ། གཞི་རིམ་གྱི་ཁྲིམས་འཛིན་ལས་དོན་ཆེད་དུ་འབད་འབུངས་བྱེད་བཞིན་མཆིས།

ཐོག་མའི་བསམ་འདུན་སྲུང་། ཁྲིམས་འཛིན་ཞབས་ཞུར་འབད།

བདེ་སྐྱིད་གཡང་འཛོམས་ཀྱིས། དང་ཐོག་ཁྲིམས་དཔོན་གྱི་ལས་རིགས་བདམས་དོན་ནི། ཁྲིམས་དཔོན་ཚོའི་དྲང་གཞག་དྲང་བདེན་དང་བློ་བརྟན་གཞུང་དྲང་གི་གཟུགས་བརྙན་ལས་རང་ཉིད་ལ་སྐུལ་མ་ཆེན་པོ་ཐེབས་པས། དྲང་བདེན་སྲུང་སྐྱོང་བྱེད་མཁན་ཞིག་བྱེད་རྒྱུའི་སེམས་ཐག་བཅད་པ་ཡིན་ཞེས་བཤད་པ་དང་། “ལས་དེར་ཞུགས་ནས་ད་བར་དུ། རང་ཉིད་ཀྱིས་ཕྱིར་བཤོལ་མ་བྱས་པར་འབད་འབུངས་ཧུར་བརྩོན་བྱེད་ཐུབ་དོན་ཡང་བརྗིད་ཆེའི་གཏམ་ཚོགས་དག་མིན་པར། དོ་བདག་ཕན་ཚུན་འདུམ་འགྲིག་བྱུང་བའི་འཛུམ་མདངས་དང་། ཡང་ཡང་ཐུགས་རྗེ་ཞུ་བའི་སྐད་ཆ། ཁྲིམས་འཛིན་ལས་ལ་བཅངས་པའི་ཡིད་ཆེས་སོགས་ཡིན”ཞེས་བཤད།

བསོད་ནམས་ཆོས་སྒྲོན་གྱིས་ཐོག་མའི་དུས་ནས་ཕ་ཡུལ་ལ་བརྩེ་བ་ཟབ་མོ་བཅངས་ཤིང་། ཁོང་གིས“ང་ནི་མི་སེར་གྱི་ཕྲུ་གུ་ཞིག་ཡིན་པས། ཕ་ཡུལ་དུ་ལོག་ནས་ཡུལ་མི་ཚོའི་དཀའ་ངལ་སེལ་བ་དང་བྱ་བ་དངོས་སྒྲུབ་འདོད་འདུག”ཅེས་བཤད། ཁྲིམས་ཁང་དུ་ལས་ཀར་བསྐྱོད་པའི་ཉིན་ནས་བཟུང་། ཁོང་གི་སེམས་སུ་ཡུལ་མི་ཚོའི་ཆེད་དུ་བྱ་བ་དངོས་སྒྲུབ་རྒྱུའི་འདུན་པ་བརྟན་པོ་བཅངས་ཡོད།

ཁྲིམས་རའི་དྲུང་ཡིག་ནས་ཁྲིམས་རའི་དིང་ཀྲང་བར། ཁོང་གཉིས་ཀྱི་འཚར་ལོངས་ལམ་བུ་ཧ་ལམ་གཅིག་མཚུངས་ཡིན། བདེ་སྐྱིད་གཡང་འཛོམས་ཀྱིས་གྱོད་གཞི་ཐག་གཅོད་ཡག་པོ་བྱས་པར་བརྟེན་མང་ཚོགས་བློ་ཡིད་ཚིམ་པ་དང་། བསོད་ནམས་ཆོས་སྒྲོན་གྱིས་འགན་འཁྲི་ལེགས་པར་འཁུར་ནས་ལས་དོན་ཞིབ་ཚགས་སྒྲུབ་ཀྱི་ཡོད་ལ། གཞི་རིམ་གྱི་གྱོད་གཞི་ཚང་མ་དམངས་ལ་འབྲེལ་བ་ཆེ་བས། གཟབ་ནན་དང་གཞུང་དྲང་བྱས་ཚེ་གཞི་ནས་ལུས་ལ་གྱོན་པའི་ཁྲིམས་གོས་དང་སེམས་ནང་གི་དད་མོས་ལ་གནོང་མི་དགོས་པ་ཁོང་གིས་གསལ་པོ་ཤེས་ཀྱི་ཡོད།

དྲང་གཞག་དྲང་བདེན་སྲུང་། དམངས་སེམས་དྲོ་བར་བྱས།

འདྲི་གཅོད་ཀྱི་འཐབ་ས་དང་པོར་ཁོང་ཚོ་ནི་བློ་བརྟན་གཞུང་དྲང་གི་བུད་མེད་ཁྲིམས་འཛིན་པ་ཡིན་ལ། མང་ཚོགས་མདུན་ཀྱི་ཁོང་ཚོ་ནི་སྙིང་ཉེ་བའི“ནང་མི”རེད།

བདེ་སྐྱིད་གཡང་འཛོམས་ནི་ནམ་ཡང་ཚོགས་པའི་ནང་གི་མཁྲེགས་སར་གཏུག་ཕོད་པའི་གདོང་ལེན་པ་ཞིག་རེད། ཁྲིམས་ཁང་དེར་འཕྲད་པའི་མ་རྐང་འཇོག་མཁན་གྱིས་མ་དངུལ་བཏང་བའི་རྩོད་གཞི་ཐོག་མ་དང་། གྱོད་འབྲེལ་དངུལ་གྲངས་སྒོར་དུང་ཕྱུར་ལས་བརྒལ་བའི་གྱོད་གཞི་གལ་ཆེན་གྱི་མདུན་དུ། ཁོང་གིས་ལས་དུས་འཕར་མ་བྱས་ནས་ཡིག་ཆ་ཞིབ་བཤེར་བྱས་པ་མ་ཟད། གཞོགས་འདེགས་ཞིབ་བཤེར་བརྡ་འཕྲིན་ཐེངས་མང་བཏང་ནས་དོན་དངོས་གསལ་པོ་བཟོས་པ་དང་། འཛུཌ་སྐྲུན་ལས་གྲྭའི་རྩོད་གཞི་ཐག་གཅོད་བྱེད་སྐབས། ཁོང་གིས་ཉིན་གཅིག་ལ་ལས་ཡུལ་དུ་ཐེངས་མང་བསྐྱོད་དེ་ས་རྡུལ་གྱིས་ཁེངས་པའི་ལས་ཡུལ་དུ་འགག་རྩའི་ཁུངས་སྣེ་བཙལ་ཡོད། ལས་ཀར་ཞུགས་ནས་ལོ་17སོང་རིང་། ཁོང་གིས་གྱོད་གཞི་500ལྷག་ཙམ་གྱི་འདྲི་ཞིབ་བྱེད་འགན་གཙོ་བོ་འཁུར་བ་དང་། སྤུས་ཚད་དང་གྲངས་འབོར་ཚང་མ་ཁྲིམས་ཁང་ཡོངས་ཀྱི་མདུན་གྲལ་དུ་སླེབས་ཡོད་ལ། དཔྱད་གཅོད་ཚང་མར་ཞིབ་བཤེར་ཐེག་ཐུབ་པ་རེད།

བསོད་ནམས་ཆོས་སྒྲོན་གྱིས་གཏུག་བཤེར་གྱི་འབྱུང་རྩ་ནས་བཅོས་སྒྲིག་བྱེད་པར་གཞོལ་བ་དང་། “མང་ཙམ་སྐྱོད་པ་དང་། མང་ཙམ་འདྲི་བ། བསམ་བློ་མང་ཙམ་གཏོང་བའི”ལས་དོན་སྒྲུབ་སྟངས་མཐའ་འཁྱོངས་བྱེད་ཀྱི་ཡོད། གན་རྒྱའི་རྩོད་གཞིའི་མདུན་དུ། ཁོང་གིས་རྟག་ཏུ་ཞུ་གཏུག་མ་བྱས་གོང་ནས་བར་འདུམ་བྱ་རྒྱུར་ཁྲིད་སྟོན་བྱས་ནས། མང་ཚོགས་ཚོའི་གཏུག་བཤེར་མ་གནས་གྲོན་ཆུང་དང་རྩོད་གཞི་ཐག་གཅོད་ཀྱི་དུས་ཡུན་ཐུང་དུ་གཏོང་གང་ཐུབ་བྱེད་ཀྱི་ཡོད། རྙོག་འཛིང་ཆེ་བའི་འགལ་ཟླའི་མདུན་དུ། ཁོང་གིས་ཡིག་ཆ་མང་ཙམ་ལྟ་བ་དང་སྐད་ཆ་མང་ཙམ་ཉན་པ། ཕྱོགས་གཉིས་པོའི་དཀའ་ངལ་སེམས་སུ་བཅངས་ནས་ཉེ་རིང་མེད་པར་དྲང་བཞག་ངང་ཁྲུན་ཐག་གཅོད་ཀྱི་ཡོད།

ཁྲིམས་ཁང་གི་ཕྱི་རུ། ཁོང་གཉིས་ཀྱིས་ནང་ཡང་བུད་མེད་དང་བྱིས་པ། དཀའ་ངལ་ཡོད་པའི་མང་ཚོགས་རྣམས་སེམས་སུ་བཅངས་ཡོད།

གསོ་སྐྱོང་གྲོན་དངུལ་གྱི་རྩོད་གཞི་ཞིག་ནང་། བདེ་སྐྱིད་གཡང་འཛོམས་ཀྱིས་ཕ་མས་བསྐྱུར་བའི་ལོ་13ལ་སླེབས་པའི་དབང་སྐྱོན་བུ་མོ་ཞིག་གི་གསོ་སྐྱོང་གི་དཀའ་གནད་ཐག་གཅོད་བྱ་ཆེད། ཕྱོགས་མང་མཐུན་སྦྱོར་ཡང་ཡང་བྱས་ནས་རིན་མེད་དྲག་སྐྱེད་ཐོན་ཁུངས་ལོངས་སྤྱོད་ཐུབ་པར་བྱས་པ་དང་། བསོད་ནམས་ཆོས་སྒྲོན་གྱིས་ཀྱང་གྱོད་གཞི་སྒྲུབ་རིང་དབང་སྐྱོན་བྱིས་པའི་སློབ་ཞུགས་ཀྱི་དཀའ་གནད་སེལ་ཆེད། རང་དངུལ་བཏོན་ནས་འཚོ་བའི་མཁོ་ཆས་ཉོས་པ་མ་ཟད། མཐུན་སྦྱོར་འབྲེལ་གཏུག་ཐེངས་མང་བྱས་མཐར་ཕྲུ་གུ་དེ་དམིགས་བསལ་སློབ་གསོའི་སློབ་གྲྭར་བདེ་བླག་ངང་ཞུགས་ཐུབ་ཡོད།

ཁྲིམས་ལུགས་དྲིལ་བསྒྲགས་བྱེད། ཁྲིམས་སྐྱོང་འདུ་ཤེས་བསྐྱེད།

གྱོད་སྒྲུབ་ནི་འཕྲལ་བཅོས་དང་ཁྲིམས་ལུགས་ཁྱབ་གདལ་ནི་རྩ་བཅོས་ཡིན། བདེ་སྐྱིད་གཡང་འཛོམས་དང་བསོད་ནམས་ཆོས་སྒྲོན་གཉིས་ཀྱིས་རང་འགུལ་ངང་ཁྲིམས་ལུགས་ཁྱབ་གདལ་གྱི་འགན་འཁྲི་འཁུར་ནས་བོད་རྒྱ་སྐད་གཉིས་དང་མང་ཚོགས་ཀྱིས་མཐོང་འདོད་ལ་ཉན་སྤྲོ་བའི་རྣམ་པའི་ཐོག་ནས་བཅའ་ཁྲིམས་ཤེས་བྱ་ཞིང་ནང་དང་འབྲོག་རར་ཁྱབ་གདལ་བཏང་ཡོད།

གྱོད་གཞི་རེ་རེ་ལས་མཚོན་པའི་དམངས་འཚོའི་དོན་སྙིང་གསལ་པོར་ཤེས་པས། བདེ་སྐྱིད་གཡང་འཛོམས་ཀྱིས“ཁྲིམས་དཔོན་གྱི་དྲ་ཐོག་སློབ་ཁང”གི་ཁྲིམས་ལུགས་ཁྱབ་གདལ་གྱི་བྱ་ཐབས་བཏོད་ཅིང་། བོད་རྒྱ་སྐད་གཉིས་དང་དངོས་ལྗོངས་ཟློས་གར་སོགས་མང་ཚོགས་དང་ཉེ་བཅར་གྱི་རྣམ་པ་སྤྱད་ནས་རྟོགས་དཀའ་བའི་ཁྲིམས་ལུགས་ཀྱི་དོན་ཚན་དག་གོ་བདེ་བར་བྱས་པ་དང་། ལྐོག་གྱུར་གྱི་བཅའ་ཁྲིམས་རེ་རེ་མངོན་སུམ་གྱི་གྱོད་དཔེ་ལ་སྦྱར་བས། དྲིལ་བསྒྲགས་བརྙན་ལམ་ལ་ལྟ་མཁན་མི་ཐེངས་ཁྲི་300ལས་བརྒལ་ཏེ། ས་གནས་དེ་གའི་ཁྱིམ་ཚང་ཀུན་གྱིས་ཤེས་པའི་ཁྲིམས་ལུགས་ཁྱབ་གདལ་གྱི་མིང་བྱང་ཞིག་ཏུ་གྱུར་ཡོད།

བསོད་ནམས་ཆོས་སྒྲོན་གྱིས་མང་ཚོགས་ཁྲོད་དུ་བསྐྱོད་ནས་ཁྲིམས་འཛིན་ཞབས་འདེགས་ཞུས་ཤིང་། ཁོང་གིས་ཁྲིམས་ཁང་གི་ལས་བྱེད་པ་དང་ཉེན་རྟོག་པའི་སྣེ་ཁྲིད་དེ། ལོ་ལྟར་གྲོང་ཚོ་དང་དུད་ཚང་དུ་བསྐྱོད་ནས་མང་ཚོགས་ཀྱི་སྒོ་འགྲམ་དུ་འདུམ་འགྲིག་ཁྲིམས་ར་འཛུགས་པ་དང་། རྒྱུ་ནོར་བགོ་བའི་རྩོད་གཞི་དང་གྲོང་པ་ཁྱིམ་མཚེས་དབར་གྱི་རྩོད་གཞི་སོགས་གྱོད་གཞི་ཐག་གཅོད་བྱེད་སྐབས། ཁོང་གིས་ཁྲིམས་དང་གནས་ལུགས་ལྷན་དུ་སྤྱད་ནས། བཅའ་ཁྲིམས་ཀྱི་དམ་ནན་དང་སྤྱི་ཚོགས་ཀྱི་སྲོལ་བཟང་མཉམ་དུ་སྲུང་བཞིན་ཡོད། ཁྲིམས་ལུགས་སྐོར་སྐྱོད་ཁྱབ་གདལ་གཏོང་སྐབས་སུའང། ཁོང་གིས་བབ་ཆགས་ཀྱི་སྐད་ཆར་བརྟེན་ཏེ་ཁེ་དབང་སྲུང་སྐྱོང་གི་ཁྲིམས་ལུགས་གསལ་འགྲེལ་བྱས་ནས་ཡུལ་མི་ཚོས་གོ་ཐུབ་པ་དང་། ཡིད་ཆེས་ཐུབ་པ། སྤྱོད་ཐུབ་པ་བཅས་བྱས་ཡོད།

ས་མཐོའི་འབྲོག་ཁུལ་དུ་བཅའ་ཁྲིམས་ཁྱབ་གདལ་གཏོང་བར་སྐད་བརྡ་མི་འཕྲོད་པ་མ་ཟད། ཡིད་ཆེས་ཡང་ལས་སླ་པོར་ཐོབ་དཀའ་བས། བུད་མེད་ཁྲིམས་དཔོན་གཉིས་པོས་རྟག་ཏུ་ངང་རྒྱུད་རིང་པོ་དང་། ཞིབ་ཚགས་པོ། ལྷག་བསམ་ཟོལ་མེད་བཅས་ཀྱི་སྒོ་ནས་དྲིལ་བསྒྲགས་ཧུར་ཐག་བྱས་ཏེ། ཁྲིམས་སྐྱོང་གི་ས་བོན་གངས་ལྗོངས་ས་མཐོར་གཏོར་བ་རེད།

ལས་ཀའི་ཁྲོད་ཁོང་ཚོ་ནི་ཐོག་ལྟར་དྲག་ལ་རླུང་ལྟར་མྱུར་བ་དང་ཆེད་ལས་ཀྱི་རྨང་གཞི་ཟབ་མོ་ལྡན་པའི་དིང་ཀྲང་ཡིན་པ་དང་། འཚོ་བའི་ཁྲོད་ཁོང་ཚོ་ནི་ཨ་མ་དང་། བཟའ་ཟླ། བུ་མོ་བཅས་ཡིན། ཁོང་ཚོས་ཁྱིམ་ཚང་དང་བྱ་གཞག་དོ་སྙོམས་ཡོང་བར་ལེགས་སྐྱེས་འབུལ་བ་དང་། ས་མཐོ་དང་ལས་འགན་གྱི་གདམ་གའི་ཁྲོད་ཕྱིར་བཤོལ་མི་བྱེད་པར་བྱ་སྤྱོད་དངོས་ཀྱི་ཐོག་ནས་དུས་རབས་གསར་པའི་བུད་མེད་ཀྱི་རང་བཀུར་དང་། རང་ལ་ཡིད་ཆེས། རང་ཚུགས། རང་འབད་བཅས་ཀྱི་བསམ་པའི་ཉམས་འགྱུར་གང་ལེགས་མངོན་ཏེ། གངས་ལྗོངས་ས་མཐོའི་ཁྲིམས་འཛིན་གྱི་འཐབ་ས་དང་པོར་ཆེས་མཛེས་སྡུག་ལྡན་པའི་ཉམས་འགྱུར་མངོན་པར་བྱས་ཡོད།