འདི་ནི་དྲིལ་བསྒྲགས་མི་སྣས་སྦྲ་གུར་ནང་མེ་ཟོན་བདེ་འཇགས་ཀྱི་དྲིལ་བསྒྲགས་སློབ་གསོ་གཏོང་བཞིན་པ།

ཉེ་ཆར། ནག་ཆུ་གྲོང་ཁྱེར་མེ་གསོད་རོགས་སྐྱོབ་ཉིང་ལག་རུ་ཁག(གཤམ་དུ“ཉིང་ལག་རུ་ཁག”ཅེས་བསྡུ་རྒྱུ)གིས་དབྱར་རྩྭ་དགུན་འབུ་སྔོག་འཐུ་ཁུལ་གྱི་མེ་ཟོན་བདེ་འཇགས་ཀྱི་འགག་གནད་དང་དཀའ་གནད་ལ་དམིགས་ཏེ། གནོད་འཚེ་སྔོན་འགོག་དང་ཉུང་གཏོང་གི་ཕྱོགས་བསྡུས་དྲིལ་བསྒྲཌ་སློབ་གསོའི་བྱ་སྤྱོད་ཕྱོགས་ཡོངས་ནས་སྤེལ་བ་རེད།

ཉིང་ལག་རུ་ཁག་གིས་སྦག་སྦག་དྲིལ་བསྒྲགས་རུ་ཁག་བཙུགས་ཏེ། ས་མཐོའི་རི་ཁུལ་གྱི་འགྲོ་ལམ་ཀྱག་ཀྱོག་དང་དབྱར་རྩྭ་དགུན་འབུ་སྔོག་འཐུ་ཁུལ་ཁ་ཐོར་ཡིན་པའི་དོན་དངོས་ལ་དམིགས་ནས། “གཅིག་སྡུད་དྲིལ་བསྒྲགས་དང་སྒོ་རྡུང་དྲིལ་བསྒྲགས”ཟུང་དུ་འབྲེལ་བའི་སྟབས་བསྟུན་ཐབས་ལམ་སྤྱད་དེ། ཐག་རིང་ལུང་ཁུག་དང་སྦྲ་གུར་མང་སར་བསྐྱོད་ནས་གནོད་འཚེ་སྔོན་འགོག་དང་ཉུང་གཏོང་གི་ཕྱོགས་བསྡུས་དྲིལ་བསྒྲགས་བྱས་པ་རེད། དྲིལ་བསྒྲགས་ནང་དོན་ཁྲོད་མེ་ཟོན་བདེ་འཇགས་དང་། ཐོག་རྒྱག་འགོག་ཟོན། ས་གཤིས་གནོད་འཚེ་ལས་གཡོལ་བ། རི་སྐྱེས་སྲོག་ཆགས་ལ་ཁ་གཏད་གཅོག་པ། གསོ་རླུང་མི་འདང་བ་སོགས་ཁྱབ་ཁོངས་མང་པོའི་སྤྱོད་སྒོ་ཆེ་བའི་བདེ་འཇགས་ཤེས་བྱ་ཚུད་པ་དང་། ཉེ་བའི་ལོ་ཤས་རིང་ལྷག་པའི་གྱོད་དཔེ་དངོས་དང་ཟུང་འབྲེལ་བྱས་ཏེ། གོ་བདེ་ཤེས་སླའི་སྐད་ཆའི་ཐོག་ནས་བདེ་འཇགས་ཀྱི་ཤེས་བྱ་ཞིབ་པར་བཤད་དེ་མང་ཚོགས་ཀྱིས་གོ་ཐུབ་པ་དང་། སེམས་ལ་ངེས་ཐུབ་པ། བེད་སྤྱོད་ཐུབ་པ་བཅས་བྱས་པ་རེད།

ཉིང་ལག་རུ་ཁག་གིས་རྒྱ་བོད་སྐད་གཉིས་ཀྱི་ཕྱོགས་བསྡུས་བདེ་འཇགས་ལག་དེབ་དང་། བརྗོད་དོན་གཙོ་བོའི་རྒྱ་ཁྱབ་བརྡ་སྦྱོར། དྲན་སྐུལ་གྱི་སྒྲ་སྙན། དེ་བཞིན《དབྱར་རྩྭ་དགུན་འབུ་སྔོག་འཐུའི་དུས་ཚིགས་ཀྱི་རང་བྱུང་གནོད་འཚེ་འགོག་པའི་རྒྱུན་ཤེས》དང《གུར་མང་མཉམ་གནས་ཁུལ་གྱི་མེ་ཟོན་བདེ་འཇགས》ཞེས་པའི་ཚན་རིག་ཁྱབ་གདལ་བརྙན་ལམ་གཉིས་སྒྲིག་བཟོ་བྱས་ཏེ། དྲ་ཐོག་དང་དྲ་ཕྱི་ཟུང་དུ་འབྲེལ་བའི་དྲིལ་བསྒྲགས་རྟེན་གཞི་བཏོད་ཅིང་། དྲ་ཐོག་ཏུ་གཞུང་ཕྱོགས་སྐད་འཕྲིན་དང་། བརྙན་ལམ་ཨང་རྟགས། ཁྱུག་དབྱིངས་ཨང་གྲངས་སོགས་བརྒྱུད་བསྒྲགས་ཤུགས་ཆེན་བྱས་པ་དང་། དྲ་ཕྱིར་དབྱར་རྩྭ་དགུན་འབུ་སྔོག་འཐུའི་ཁུལ་གྱི་སྐབས་འཕྲལ་དྲིལ་བསྒྲགས་ས་ཚིགས་སུ་རེས་འཁོར་འགྲེམས་སྟོན་བྱས་ཡོད། དབྱར་རྩྭ་དགུན་འབུ་སྔོག་འཐུའི་ཁུལ་གྱི་འཛུལ་སྒོ་དང་གུར་གནས་ཁུལ་གྱི་གཞུང་ལམ་ཨ་མ་སོགས་མི་ཚོགས་མང་བའི་སར་རྒྱ་ཁྱབ་བརྡ་སྦྱོར་སྦྱར་བ་དང་། མང་ཚོགས་ལ་ཡིག་རིས་ལག་དེབ་སྤྲོད་པ། དྲིལ་བསྒྲཌ་རླངས་འཁོར་གྱིས་བདེ་འཇགས་དྲན་སྐུལ་བྱེད་པ་བཅས་བརྒྱུད་ནས། བདེ་འཇགས་ཤེས་བྱ་རི་ཁུལ་ཡོངས་ལ་ཁྱབ་པར་བྱས་པ་རེད།

མིག་སྔའི་བར། ཉིང་ལག་རུ་ཁག་གིས་རིགས་ཁག་གི་དྲིལ་བསྒྲགས་དཔྱད་གཞི་6200སྤྲད་པ་དང་བརྗོད་དོན་གཙོ་བོའི་རྒྱ་ཁྱབ་བརྡ་སྦྱོར་280ལྷག་ཙམ་བཀྲམ་ནས། དབྱར་རྩྭ་དགུན་འབུ་འཐུ་མཁན་དང་ཉེ་འཁོར་གྱི་འབྲོག་པ་མི་ཐེངས་2520ལྷག་ཙམ་ལ་ཁྱབ་ཡོད། དུས་མཚུངས་སུ་མེ་ཟོན་བདེ་འཇགས་ཀྱི་མངོན་མེད་རྐྱེན་ངན་སྣ་ཚོགས་156ལ་གྲལ་བཤེར་བྱས་པ་དང་། གནད་དོན་ཁག་129ལ་ས་ཡུལ་དངོས་སུ་དག་ཐེར་བྱས་པས། མང་ཚོགས་ཀྱི་བདེ་འཇགས་འགོག་ཟོན་འདུ་ཤེས་དང་རང་སྐྱོབ་གཞན་སྐྱོབ་ཀྱི་ནུས་པ་ཆེ་རུ་ནུས་ལྡན་ཕྱིན་ནས། འབྱུང་རྩ་ནས་དབྱར་རྩྭ་དགུན་འབུ་སྔོག་འཐུའི་དུས་ཚིགས་ཀྱི་བདེ་འཇགས་ཉེན་ཁ་འགོག་སེལ་ཐུབ་ཡོད།