སྨར་ཁམས་རྫོང་མི་དམངས་ཁྲིམས་ཁང་གིས་ས་གནས་ས་ཐོག་ཏུ་སྐོར་སྐྱོད་འདྲི་གཅོད་དང་ཁོར་ཡུག་ཐོན་ཁུངས་ཀྱི་ཁྲིམས་སྐྱོང་དྲིལ་བསྒྲགས་བྱེད་སྒོ་སྤེལ་བ།
ཉེ་ཆར། ཆབ་མདོ་གྲོང་ཁྱེར་སྨར་ཁམས་རྫོང་མི་དམངས་ཁྲིམས་ཁང་གིས་ཁོར་ཡུག་ཐོན་ཁུངས་ཀྱི་འདྲི་གཅོད་འགན་ནུས་གང་ལེགས་བཏོན་ཏེ། ནགས་ཤིང་བརྐུས་གཅོད་ཉེས་དོན་གྱི་ཞོར་གཏོགས་དམངས་དོན་སྤྱི་ཕན་གཏུག་བཤེར་གྱི་གྱོད་གཞི་7ལ་ས་གནས་ས་ཐོག་ཏུ་སྐོར་སྐྱོད་འདྲི་གཅོད་བྱས་པ་རེད།
བྱེད་སྒོ་སྤེལ་བའི་ཉིན་དེར། སྨར་ཁམས་རྫོང་མི་དམངས་ཁྲིམས་ཁང་གིས་རྫོང་དེའི་ཚོགས་ཁང་ཆེ་མོར་སྐོར་སྐྱོད་ཁྲིམས་ར་བཙུགས་ནས། ཞིབ་དཔྱོད་ལས་ཁུངས་ཀྱིས་གཞུང་གཏུག་བྱས་པའི་ཞུ་སྦྱོར་ཕྱི་མ་ཉི་ཆེ་གེ་མོ་སོགས་མི་7གྱིས་ནགས་ཤིང་བརྐུས་གཅོད་ཀྱི་ཉེས་དོན་ཞོར་གཏོགས་དམངས་དོན་སྤྱི་ཕན་གཏུག་བཤེར་གྱི་གྱོད་གཞིར་ཡོངས་བསྒྲགས་ངང་ཁྲིམས་ར་འཚོགས་ཏེ་འདྲི་ཞིབ་བྱས་པ་རེད། མཉམ་གྲོས་ཁྲིམས་རས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》དང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ནགས་ཚལ་བཅའ་ཁྲིམས》《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང》བཅས་ཀྱི་འབྲེལ་ཡོད་གཏན་འབེབས་གཞིར་བཟུང་། དོན་དངོས་རྩད་གཅོད་གསལ་པོ་བྱས་པའི་རྨང་གཞིའི་ཐོག་ཁྲིམས་ར་དེ་གར་ཁྲིམས་ཐག་བཅད་པ་སྟེ། ནགས་ཤིང་བརྐུས་གཅོད་ཀྱི་ཉེས་གསོག་ལ་གཞིགས་ནས་ཞུ་སྦྱོར་ཕྱི་མ་ཁག་སོ་སོར་བཙན་ཉར་ལས་སྐུལ་ལམ་ཡང་ན་དུས་བཀག་བཙོན་འཇུག་བྱ་རྒྱུ་དང་འབྲེལ་ཉེས་ཆད་ཕྱིར་འགྱངས་དང་། དངུལ་ཆད་གཅོད་རྒྱུའི་ཐག་བཅད་པ་རེད། དེ་དང་ཆབས་ཅིག་ཞུ་སྦྱོར་ཕྱི་མ་ཁག་ལ་སྐྱེ་ཁམས་ཁོར་ཡུག་ཉམས་གསོ་བྱེད་རྒྱུའི་བཀའ་བཏང་བ་དང་། སྐྱེ་ཁམས་སླར་གསོའི་ཇུས་གཞིར་གཞིགས་ཏེ་གཏན་འཁེལ་བྱས་པའི་ས་ཁོངས་སུ་ལྗོན་ཤིང་གསབ་འཛུགས་བྱེད་དགོས་པ་དང་འབྲེལ། རྫོང་རིམ་པ་ཡན་གྱི་སྨྱན་སྦྱོར་ཐོག་སྤྱི་ཚོགས་ཀྱི་སྤྱི་དམངས་ལ་དགོངས་དག་ཞུ་དགོས་པའི་ཁྲུན་ཐག་བཅད་པ་རེད།
ད་ཐེངས་ཀྱི་ཁྲིམས་རའི་འདྲི་གཅོད་ནང་སྨར་ཁམས་རྫོང་མི་དམངས་འཐུས་ཚོགས་ཀྱི་འཐུས་མི་དང་། སྲིད་གྲོས་ཨུ་ཡོན། ནགས་ལས་སྡེ་ཚན་གྱི་ལས་དོན་པ། ཤང་དང་གྲོང་རྡལ་གྱི་ནགས་སྲུང་བ་དང་དེ་བཞིན་ས་གནས་དེ་གའི་མང་ཚོགས་ཀྱི་འཐུས་མི་བཅས་གདན་འདྲེན་ཞུས་པ་དང་འབྲེལ། ཤང་དང་གྲོང་རྡལ་15དང་བརྙན་ལམ་སྦྲེལ་ནས་མི་2000ཙམ་ཁྲིམས་རའི་འདྲི་གཅོད་ཟུར་ཉན་ནང་ཞུགས་ཤིང་། “ཉེ་འགྲམ་གྱི་གྱོད་གཞིར”བརྟེན་ནས“ཉེ་འགྲམ་གྱི་མིར”སློབ་གསོ་གཏོང་བའི་རྣམ་པ་བརྒྱུད། ས་གནས་དེ་གའི་མང་ཚོགས་ལ་སྐྱེ་ཁམས་ཁོར་ཡུག་སྲུང་སྐྱོང་གི་ཉེན་བརྡ་བཏང་བ་རེད།
གྱོད་གཞི་དེ་ཞིབ་གཅོད་བྱེད་རིང་། སྨར་ཁམས་རྫོང་མི་དམངས་ཁྲིམས་ཁང་གིས་སླར་གསོའི་རང་བཞིན་གྱི་ཁྲིམས་འཛིན་འདུ་ཤེས་ལག་བསྟར་གཏིང་ཟབ་བྱས་ཏེ་ཉེས་གསོག་བྱེད་སྤྱོད་ལ་ཁྲིམས་ལྟར་ཆད་གཅོད་བྱས་པ་མ་ཟད། གཏོར་སྐྱོན་ཕོག་པའི་སྐྱེ་ཁམས་ཁོར་ཡུག་སླར་གསོར་ཡང་སྐུལ་འདེད་གང་ལེགས་བཏང་ཡོད།
འབྲེལ་ཡོད་གསར་འགྱུར།