7.དྲི་བ། མི་དམངས་མང་ཚོགས་ཀྱིས་ནག་གཤེད་དང་འབྲེལ་བའི་ཁྲིམས་འགལ་ཉེས་གསོག་གི་གནད་དོན་ཐེར་འདོན་བྱེད་པའི་ཐབས་ལམ་གང་དག་ཡོད་དམ།

ལན། ད་ཐེངས་ཀྱི་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ནང་མི་དམངས་མང་ཚོགས་ཀྱིས་གཤམ་གསལ་གྱི་ཐབས་ལམ་བརྒྱུད་ཐེར་འདོན་གོང་ཞུ་བྱེད་ཆོག་པ་སྟེ། གཅིག་ནི་རྒྱལ་ཡོངས་ཀྱི“12337”གཅིག་གྱུར་དྲ་ཐོག་ཐེར་འདོན་ལས་སྟེགས་རེད། དྲ་ཐོག་ནས“12337”འཚོལ་བའམ་ཡང་ན་ཀྲུང་གོ་ཁྲང་ཨན་དྲ་བ་དང་ཀྲུང་དབྱང་སྲིད་ཁྲིམས་ཨུ་ལྷན་ཁྲང་ཨན་རལ་གྲི་སྐད་འཕྲིན་སྤྱི་རྟགས་སོགས་བརྒྱུད་དུས་དང་རྣམ་པ་ཀུན་ཏུ་སྟབས་བདེ་ལ་མྱུར་པོས་ཐེར་འདོན་གོང་ཞུའི་ལས་སྟེགས་ནས་འབྲེལ་ཡོད་ཆ་འཕྲིན་བརྒྱངས་རྗེས་རྒྱལ་ཡོངས་ནག་སེལ་གཤེད་བཅོམ་གཞུང་དོན་ཁང་ནས་དུས་ཐོག་ཏུ་བདག་སྤྲོད་བྱེད་ཀྱི་ཡོད། གཉིས་ནི་སྤྱི་བདེ་པུའུ་དང་། རྒྱལ་ཁབ་ཡིག་འབུལ་ཞུ་བཅར་ཅུས། ཞིང་ཆེན་རིམ་པའི་ནག་སེལ་གཤེད་བཅོམ་གཞུང་དོན་ཁང་བཅས་ཀྱིས་ཡོངས་བསྒྲགས་བྱས་པའི་ཐེར་འདོན་ཐབས་ལམ་དང་དེ་བཞིན་གློག་འཕྲིན་དྲ་རྒྱ་དང་དངུལ་རྩ་སོགས་ལས་རིགས་ཀྱི་གཙོ་གཉེར་སྡེ་ཚན་དང་དེ་བཞིན་འབྲེལ་ཡོད་དྲ་སྦྲེལ་ལས་སྟེགས་ཀྱི་ཞུ་གཏུག་ཐེར་འདོན་ཐབས་ལམ་བརྒྱུད་ཐེར་འདོན་བྱེད་ཆོག གསུམ་ནི་ས་གནས་ཁག་གིས་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་གཏིང་ཟབ་བྱེད་རིང་གསར་དུ་ཡོངས་བསྒྲགས་བྱས་པའི་ཐེར་འདོན་ཁ་པར་ཨང་གྲངས་དང་། ཐེར་འདོན་ལས་སྟེགས། ཐེར་འདོན་ས་གནས་དང་ཡིག་སྒམ་སོགས་ནས་ཐེར་འདོན་བྱེད་ཆོག གོང་གསལ་གྱི་ཐབས་ལམ་བརྒྱུད་ཐོབ་པའི་ཁུངས་སྣེར་ཆ་མཚོན་ན། ང་ཚོས་སྒྲུབ་སྤྲོད་དང་། སྒྲུབ་སྐུལ། ཞིབ་བཤེར། ལན་སྤྲོད་སོགས་ཀྱི་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་པ་དང་། དགོས་ངེས་ཀྱི་སྐབས་སུ་རིམ་སྤོར་འཐེན་བཤེར་གྱི་བསྐྱར་བཤེར་ལས་དོན་སྤེལ་ནས་ཞིབ་བཤེར་མཐའ་གསལ་ཡོང་བར་སྐུལ་འདེད་གཏོང་གི་ཡིན། དེ་དང་ཆབས་ཅིག་ཁུངས་སྣེ་གསང་སྲུང་དང་། མི་ལུས་སྲུང་སྐྱོང་། ཐེར་འདོན་ལ་བྱ་དགའ་སྤྲོད་པ་བཅས་ཀྱི་ལམ་ལུགས་དོན་འཁྱོལ་ནན་པོ་བྱས་ཏེ་མང་ཚོགས་ལ་ནག་གཤེད་དང་འབྲེལ་བའི་ཁུངས་སྣེ་རང་འགུལ་ངང་ཐེར་འདོན་བྱ་རྒྱུའི་ཁྲིད་སྟོན་བྱེད་ཀྱི་ཡིན།

8.དྲི་བ། “སྲུང་དྲ”ཡོད་ན་བརྟོལ་བ་དང“སྲུང་གདུགས”ཡོད་ན་གཏོར་དགོས། ཆེད་དོན་འཐབ་རྩོད་ནང་ནག་གཤེད་དང་འབྲེལ་བའི་རུལ་སུངས་དང“སྲུང་གདུགས”ལ་ཞིབ་བཤེར་གཏིང་ཟབ་བྱེད་དགོས་པའི་བླང་བྱ་བཏོན་ཡོད། འདིའི་ཐད་ལ་བཀོད་སྒྲིག་གང་བྱས་ཡོད་དམ།

ལན། ང་ཚོས་ཐོག་མཐའ་བར་གསུམ་དུ་ནག་སེལ་གཤེད་བཅོམ་དང“སྲུང་དྲ”དང“སྲུང་གདུགས”རྒྱབ་རྩ་གཏོར་རྒྱུར་དུས་གཅིག་ཏུ་སྐུལ་སྤེལ་དང་ཕྱོགས་གཅིག་ཏུ་ཤུགས་རྒྱག་གི་ཡོད། སྒྲིག་བཤེར་ལྟ་ཞིབ་ལས་ཁུངས་དང་སྲིད་ཁྲིམས་ལས་ཁུངས་ཀྱི་གནད་དོན་གྱི་ཁུངས་སྣེ་མྱུར་པོ་སྐྱེལ་བའི་ལམ་སྲོལ་འཐུས་སྒོ་ཚང་དུ་གཏོང་བ་དང་། ནག་གཤེད་དང་འབྲེལ་བའི་ཁྲིམས་འགལ་ཉེས་གསོག་རྒྱབ་ཀྱི་རུལ་སུངས་དང་། “སྲུང་གདུགས”རྒྱབ་རྩ། “འབྲེལ་བའི་དྲ་བ”བཅས་དུས་ཐོག་ཏུ་སྔོག་འཚོལ་བྱས་ཏེ། གཅིག་ཡོད་པ་ཤེས་ཕྱིན་ཞིབ་བཤེར་ཐག་གཅོད་མཐའ་གཅིག་ཏུ་བྱེད་པ་ལས་རྒྱ་ཡན་དུ་གཏན་ནས་གཏོང་གི་མིན། སྒྲུབ་སྐུལ་བྱེད་ཤུགས་ཆེ་རུ་བཏང་ནས་ནག་གཤེད་དང་འབྲེལ་བ་ཡོད་པ་དང་རུལ་སུངས་དང་ཡུན་རིང་གཏིང་ཟབ་འབྲེལ་བའི་གྱོད་གཞི་གཙོ་གནད་ཐོག་སྒྲུབ་སྐུལ་བྱེད་ཀྱི་ཡིན། ཞིབ་དཔྱོད་ལས་ཁུངས་ཀྱིས་ཞིབ་དཔྱོད་མྱུལ་ཞིབ་འགན་ནུས་བཏོན་ཏེ་ཁྲིམས་འཛིན་ལས་དོན་པའི་འབྲེལ་ཡོད་ལས་ཐོག་ཉེས་གསོག་ལ་ཁྲིམས་ལྟར་ཞིབ་བཤེར་ཐག་གཅོད་བྱེད་ཀྱི་ཡོད། དེ་དང་ཆབས་ཅིག་སྔོན་ནས་དོགས་ཟོན་བྱེད་སྐབས་ལྟ་སྐུལ་མཐའ་འཁྱོངས་བྱས་ཏེ་སྔ་ཙམ་དང་ཆུང་ས་ནས་དམ་འཛིན་དང་རྐྱེན་རྩ་ཆུང་ཟློག་བྱེད་ཀྱི་ཡིན།

9.དྲི་བ། ཆེད་དོན་འཐབ་རྩོད་ལ་ནག་གཤེད་ཉེས་གསོག་སྔོན་འགོག་དང་བཅོས་སྒྲིག་གི་ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་དགོས་པའི་བླང་བྱ་བཏོན་ཡོད། འདིའི་ཐད་བསམ་གཞིག་གང་འདྲ་བྱས་ཡོད་དམ།

ལན། ང་ཚོས་ཆད་གཅོད་དང་སྔོན་འགོག་གལ་ཆེ་མཉམ་འཛིན་དང་རྩ་ལག་མཉམ་བཅོས་བྱས་ཏེ་གཙོ་གནད་ལས་རིགས་ཁྱབ་ཁོངས་ཀྱི་འགོག་ཟོན་དང་བཅོས་སྒྲིག་ཟམ་མི་ཆད་པར་ཟབ་ཏུ་གཏོང་གི་ཡིན།

དཔེར་ན་ནག་གཤེད་སྟོབས་ཤུགས་ཀྱིས་ཆ་འཕྲིན་དྲ་རྒྱ་སྤྱད་དེ་ཉེས་པ་གསོག་པའི་གནད་དོན་ཐད། ང་ཚོས་དྲ་རྒྱའི་ལས་སྟེགས་ཀྱི་བྱེད་པོའི་འགན་འཁྲི་ནན་དུ་བཏང་སྟེ་དྲ་རྒྱ་བཅོས་སྐྱོང་ལ་སྐུལ་འདེད་གཏིང་ཟབ་གཏོང་བ་དང་། སྤྱི་དམངས་མི་སྒེར་གྱི་ཆ་འཕྲིན་ལ་གནོད་འཚེ་གཏོང་བ་དང་། ཁྲིམས་འགལ་མཉེན་ཆས་གསར་སྤེལ་བྱེད་པ། “ཐོ་ཁོངས་ཨང་གྲངས་ལ་བརྟེན་ནས་དཔྱད་གཏམ་ལ་ཁ་ལོ་སྒྱུར་བ”དང་། “མི་མང་ལྟ་རུབ་ལ་འགུགས་པ” “ནག་དངུལ་གཙང་སྒྱུར་བྱེད་པ”སོགས་མགོ་མཇུག་ཡོད་པའི་ཁྲིམས་འགལ་ཉེས་གསོག་གི་སྦྲེལ་ཐག་མཐའ་གཅིག་ཏུ་མེད་པ་བཟོས་ཏེ་དྲ་རྒྱར་བརྟེན་ནས་ནག་གཤེད་དང་འབྲེལ་བའི་ཉེས་གསོག་དང་དེ་འབྲེལ་གྱི་ནག་ཉེས་གསོག་པར་རྒྱུན་མཐུད་རྡུང་རྡེག་གཏོང་གི་ཡིན། དྲ་རྒྱའི་ལས་སྟེགས་ནས་དངུལ་བུན་གཏོང་བའི་སྣང་ཚུལ་ཟང་ཟིང་སོགས་ལ་དམིགས་ནས་འབྲེལ་ཡོད་ལས་རིགས་ཀྱི་ལྟ་འདོམས་སྡེ་ཚན་གྱིས་གློག་འཕྲིན་གཉེར་སྐྱོང་པ་དང་། ཚོང་ལས་དངུལ་ཁང་། དྲ་སྦྲེལ་ཁེ་ལས་སོགས་གཉེར་སྐྱོང་བྱེད་པོར་ཁྲིམས་ལྟར་ལྟ་སྐུལ་བྱེད་ཤུགས་ཆེ་རུ་བཏང་སྟེ་དྲ་རྒྱའི་དངུལ་བུན་ཚད་ལྡན་འཁོར་རྒྱུག་ཡོང་བར་སྐུལ་འདེད་བཏང་ནས་བུ་ལོན་འདེད་ལེན་སོགས་དང་འབྲེལ་བའི་ཁྲིམས་འགལ་ཉེས་གསོག་བྱེད་སྤྱོད་འབྱུང་རྩ་ནས་འགོག་ཟོན་བྱེད་ཀྱི་ཡིན། དེའི་རྨང་གཞིའི་ཐོག་ལྟ་ཞིབ་གྲོས་གཞིའི་ཡི་གེ་དང་། ཁྲིམས་འཛིན་གྲོས་གཞིའི་ཡི་གེ ཞིབ་དཔྱོད་གྲོས་གཞིའི་ཡི་གེ སྤྱི་བདེའི་དྲན་སྐུལ་ཡི་གེ་བཅས“ཡིག་གསུམ་འཕྲིན་གཅིག”བཟོ་སྤེལ་དང་། དག་ཐེར། ལྡོག་འདྲེན་བཅས་ཀྱི་ལས་ཀའི་ལམ་སྲོལ་སྔར་བས་འཐུས་སྒོ་ཚང་དུ་བཏང་སྟེ། ལས་རིགས་ཁྱབ་ཁོངས་ཀྱི་ལྟ་འདོམས་སྡེ་ཚན་གྱིས་དུས་ཐོག་ཏུ་ལྟ་འདོམས་ཀྱི་སྐྱོན་ཆ་ཤེས་རྟོགས་དང་ལས་ཀའི་ལམ་སྲོལ་འཐུས་སྒོ་ཚང་དུ་གཏོང་བར་སྐུལ་འདེད་གཏོང་གི་ཡིན།

དུས་མཚུངས་གཙོ་གནད་ས་ཁུལ་གྱི་འགོག་ཟོན་བཅོས་སྐྱོང་སྔར་བས་གཏིང་ཟབ་ཏུ་གཏོང་གི་ཡིན། གྲོང་གསེབ་ཀྱི་ཆོས་ལུགས་ནག་གཤེད་སྟོབས་ཤུགས་ཀྱི་གནད་དོན་འགོག་ཟོན་བཅོས་སྒྲིག་ལ་གཙོ་གནད་ཐོག་སྐུལ་འདེད་གཏོང་བ་དང་། ནུས་མེད་ཟབ་ཟོབ་ཀྱི་གྲོང་ཚོའི་ཏང་རྩ་འཛུགས་མུ་མཐུད་བཅོས་སྒྲིག་བྱེད་པ། གྲོང་ཚོའི“ཨུ་ལྷན་གཉིས”ཚན་ཁག་གི་ཁོངས་མིའི་ཐོབ་ཐང་མཉམ་བཤེར་ལམ་སྲོལ་དོན་འཁྱོལ་ནན་པོ་བྱེད་པ། གྲོང་ཚོའི(སྡེ་ཁུལ)“ཨུ་ལྷན་གཉིས”ཚན་ཁག་ལེགས་འདེམས་ཧྲག་སྒྲིག་བཅས་བྱས་ནས། གྲོང་གསེབ་དར་རྒྱས་ཀྱི་གཞི་རིམ་རྩ་འཛུགས་ཀྱི་རྨང་གཞི་བརྟན་དུ་གཏོང་གི་ཡིན། ང་ཚོས་མང་ཚོགས་ཀྱིས་ཐེར་འདོན་བྱེད་མང་བ་དང་། ནག་གཤེད་དང་འབྲེལ་བ་ཡོད་པའི་ཉེན་བརྡའི་གནས་ཚུལ་མང་བ། བདེ་འཇགས་ཀྱི་གནས་ཚུལ་རྙོག་འཛིང་ཆེ་བ་བཅས་ཀྱི་གཙོ་གནད་ཆུས་དང་རྫོང་བདམས་ནས། འགོག་ཟོན་དང་བཅོས་སྒྲིག་གཏིང་ཟབ་བྱེད་པ་དང་བདེ་འཇགས་ཟང་ཟིང་གི་གནད་དོན་བསལ་ནས། ནག་གཤེད་དང་འབྲེལ་བ་ཡོད་པའི་ཉེས་གསོག་གྲོང་གསེབ་ས་ཁུལ་དུ་ཁྱབ་རྒྱུར་འགོག་ཟོན་བྱ་རྒྱུ་ཡིན།