ཉེ་ཆར། གསར་འགོད་པར་རང་སྐྱོང་ལྗོངས་མི་སྤྱི་ཐིང་ནས་ཤེས་རྟོགས་བྱུང་བར། ད་ལོའི་ཟླ་7ཚེས་1ཉིན་ནས་བཟུང《བོད་རང་སྐྱོང་ལྗོངས་ཀྱི་ལས་ཞུགས་རྣམ་གསར་མི་སྣའི་ལས་རིགས་གནོད་འཚེ་འགན་སྲུང་ལག་བསྟར་བྱ་ཐབས》(གཤམ་དུ《བྱ་ཐབས》ཞེས་བསྡུ་རྒྱུ)དངོས་སུ་ལག་ལེན་བསྟར་རྒྱུ་ཡིན་ཞིང་། འགན་སྲུང་ཁྱབ་ཁོངས་ནང་ཕྱིར་སྐྱོད་དང་། འཕྲལ་མར་སྡེབ་སྐྱེལ། གྲོང་གཅིག་ཟོག་འདྲེན་བཅས་ལས་རིགས་ཆེན་པོ་གསུམ་ཚུད་རྒྱུ་ཡིན་ཞིང་། དེ་དག་མོས་འདེམས་དང་། ཏིར་ཏིར་གླ་འཁོར། ཧྲུན་ཧྥུང་སོགས་ལས་སྟེགས་ཁེ་ལས་བཅུ་ལྷག་ཙམ་དང་འབྲེལ་བ་ཡོད་པ་རེད། འགན་སྲུང་གྲོན་དངུལ་དེ་དག་ཚང་མ་ལས་སྟེགས་ཁེ་ལས་ཀྱིས་འགན་འཁུར་དགོས་པ་ལས། ངལ་རྩོལ་པ་མི་སྒེར་གྱིས་གྲོན་དངུལ་སྤྲོད་མི་དགོས་པར“ཁུར་པོ་མེད་པའི”འགན་བཅོལ་ནང་ཞུགས་རྒྱུ་ཡོད་པ་རེད།

འགན་སྲུང་ཐོབ་ཐང་ཐད། ལས་ཞུགས་རྣམ་པ་གསར་པའི་མི་སྣའི་ལས་རིགས་གནོད་འཚེའི་འགན་སྲུང་ནང་སྨན་བཅོས་བདེ་ཐང་སླར་གསོ་དང་། རྨས་སྐྱོན་ཁ་གསབ། འདས་པོའི་གོད་གསོ་བཅས་རིགས་ཆེན་པོ་གསུམ་ཚུད་ཡོད། དེའི་ནང་འགན་སྲུང་ཐེབས་རྩས་སྨན་བཅོས་གྲོན་དངུལ་ཆ་ཚང་གཏོང་རྒྱུ་དང་ངལ་རྩོལ་པས་སྨན་བཅོས་བྱེད་རིང་འཚོ་བའི་འགན་སྲུང་གྲོན་དངུལ་ལོངས་སྤྱོད་བྱེད་ཆོག རྨས་སྐྱོན་གྱི་ཐོབ་ཐང་རིམ་པ་1ནས་10བར་ལྟར་རིམ་པ་དབྱེ་ནས་སྤྲོད་རྒྱུ་ཡིན་པ་དང་རྨས་སྐྱོན་ཕོག་ཚད་རིམ་པ་1ནས་4བར་གྱི་མི་སྣས་རྨས་སྐྱོན་གྱི་ཁ་གསབ་ལེན་ཆོག འདས་པོའི་ཐོབ་ཐང་ནང་སྤྲོད་གཅིག་མའི་གསབ་དངུལ(ཚད་གཞི་ནི་རྒྱལ་ཡོངས་ཀྱི་གྲོང་ཁྱེར་དང་གྲོང་རྡལ་གྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་ཀྱི་ལྡབ་20ཡིན་པ)དང་དེ་བཞིན་རྗེས་འཇུག་ཁ་གསབ་རོགས་དངུལ་དང་བསྙེན་བཀུར་བྱ་ཡུལ་གཉེན་ཉེའི་འཆི་གོད་གུན་གསབ་རོགས་དངུལ་བཅས་ཚུད་ཡོད་པ་རེད།