-
ང་ཚོ་དང་བློ་གྲོས་ལ་བརྟེན་ནས་གངས་ལྗོངས་ཀྱི་མཁའ་ལམ་བསྐྲུན་པ།
—— ཀྲུང་གོ་ལྕགས་ལམ་ཅུས་བཅུ་གཉིས་པའི་བདག་སྐྱོང་ཀུང་སིའི་སྤྱི་ཁྱབ་ལག་རྩལ་ཆེ་མོ་བ་ གཞོན་པ་ཀའོ་ཆན་ཧྲེང་གི་སྐོར་བཀོད་པ།
-
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ། | སྤེལ་དུས། 2026-03-06
འདི་ནི་ཀའོ་ཆན་ཧྲེང(གཡོན)གིས་ལས་ཀ་བྱེད་ཞོར་ལྕགས་ལམ་གྱི་བར་ཐག་རིང་ཐུང་ལ་ཞིབ་བཤེར་བྱེད་བཞིན་པ།
འཛམ་གླིང་གི་ཡང་རྩེར་མཚོ་བོད་ལྕགས་ལམ་འདི་ཉིད་གཡུ་འབྲུག་སྔོ་མོ་ཞིག་དང་འདྲ་བར་གྱ་གྱུའི་ངང་ཐག་རིང་དུ་བསྲིངས་ཡོད། “མཁའ་ལམ”དེ་བསྐྲུན་པར་ལོ་བཅུ་ལྷག་ཙམ་རིང་འཁྱགས་སའི་དཀའ་གནད་དབྱེ་ཞིབ་དང་ཐག་གཅོད་བྱེད་པར་ཀྲུང་གོ་ལྕགས་ལམ་ཅུས་བཅུ་གཉིས་པའི་བདག་སྐྱོང་ཀུང་སིའི་སྤྱི་ཁྱབ་ལག་རྩལ་ཆེ་མོ་བ་གཞོན་པ་ཀའོ་ཆན་ཧྲེང་གིས་ལེགས་སྐྱེས་ཆེན་པོ་ཕུལ་ཡོད། “ཀྲུང་གོའི་གཞོན་ནུའི་ལྔ་བཞིའི་གཟེངས་རྟགས”དང་། “བོད་ཀྱི་བཟོ་བོ” “བོད་རང་སྐྱོང་ལྗོངས་ཀྱི་ངལ་རྩོལ་དཔེ་བཟང་བ”སོགས་ཀྱི་གཟི་བརྗིད་མཚན་སྙན་ཐོབ་པ་དེ་དག་ནི་ཁོང་གིས་གངས་ལྗོངས་ས་མཐོར་རྩ་བ་ཚུགས་ཏེ་ལག་རྩལ་གསར་གཏོད་ལ་བརྟེན་ནས་ས་མཐོའི་ཚེ་སྲོག་ལམ་ཐིག་སྲུང་སྐྱོབ་བྱས་པའི་བློ་བརྟན་འགྱུར་མེད་ཀྱི་ཆོད་སེམས་དེའོ།
མི་རིང་བའི་གོང་། ཀའོ་ཆན་ཧྲེང་གིས་ལས་རོགས་དང་མཉམ་དུ་འགག་སྒྲོལ་བྱས་པའི《ས་མཐོའི་འཁྱགས་སའི་ཁུལ་གྱི་མཉམ་འདུས་རྒྱུ་ཆའི་ཨར་ལས་ལག་རྩལ》ལ་བོད་རང་སྐྱོང་ལྗོངས་ཀྱི་2025ལོའི་ལོ་འཁོར་གྱི“ཆུང་ཆུང་ལྔའི”བྱེད་སྒོའི་ཕུལ་བྱུང་གསར་གཏོད་གྲུབ་འབྲས་ཀྱི་བྱ་དགའ་ཨང་གསུམ་པ་ཐོབ་པ་རེད།
ཀའོ་ཆན་ཧྲེང་གིས“ས་མཐོའི་འཁྱགས་ས་བདག་སྐྱོང་བྱེད་པ་ནི་ངེས་པར་དུ་རྒྱལ་ཁ་ལེན་དགོས་པའི་ཚན་རྩལ་གྱི་འགག་སྒྲོལ་དམག་འཐབ་ཅིག་ཡིན”ཞེས་རྟག་ཏུ་བརྗོད་ཀྱི་ཡོད། ཁོང་དང་ཁོང་གི་ཚོགས་པ་ལོ་ལྟར་ས་བབ་སྨི་4000ཡན་ཟིན་པའི་ལྕགས་ལམ་རྒྱུད་དུ་ལྟ་ཞིབ་ཟིན་ཐོ་འགོད་པ་དང་། དབྱེ་ཞིབ་བརྡར་གཅོད་བྱེད་པ། ཚོད་ལྟ་ཡང་ཡང་བཅས་བྱེད་པར་བསྐྱོད་ཀྱི་ཡོད། དཔྱད་གྲངས་ལེགས་སྒྲིག་བྱེད་ཐེངས་རེ་རེ་དང་བཟོ་རྩལ་ལེགས་སུ་གཏོང་ཐེངས་རེ་རེར་ས་ཆ་འདི་དང་ལྕགས་ལམ་འདིར་བཅངས་པའི་བརྩེ་བ་ཟབ་མོ་མཚོན་ཡོད།
ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག“ཆུ་ཚད་མཐོ་བའི་ཚན་རྩལ་རང་ཚུགས་རང་དར་བྱེད་མགྱོགས་སུ་གཏོང་བ”དང“འགག་རྩའི་སྲོག་ཤིང་ལག་རྩལ་འགག་སྒྲོལ་ལ་ཤུགས་སྣོན་རྒྱག་དགོས་པའི”སྐོར་བཀོད་སྒྲིག་བྱས་པ་དེས་ཀའོ་ཆན་ཧྲེང་དང་ཚོགས་པར་སེམས་ཤུགས་ཆེན་པོ་བསྐྱེད་ཡོད། ཁོང་གིས“ཚང་འཛོམས་གྲོས་ཚོགས་ཀྱི་དགོངས་དོན་གྱིས་ང་ཚོར་ཁ་ཕྱོགས་གསལ་སྟོན་བྱས་ཡོད་ལ། ང་ཚོའི་ཕྲག་ཐོག་གི་ཁུར་པོ་ཡང་དེ་བས་ལྕི་རུ་ཕྱིན་སོང”ཞེས་བཤད་པ་དང་། ཁོང་གིས། ད་ཡོད་ཀྱི་བྱ་དགའ་ཐོབ་པའི་ལག་རྩལ་ནི་འགོ་འཛུགས་ས་གསར་པ་ཙམ་ཞིག་རེད་ཅེས་བཤད།
གཞོན་ནུ་ལག་རྩལ་པ་དཀྱུས་མ་ཞིག་ནས་ལས་རིགས་ཀྱི་ཚད་ཤིང་ལྟ་བུར་འཚར་ལོངས་བྱུང་བའི་ཀའོ་ཆན་ཧྲེང་གི་འབད་འཐབ་ཀྱི་བརྒྱུད་རིམ་དེ་དུས་རབས་གསར་པས་ཚན་རྩལ་གསར་གཏོད་ལ་འབོད་སྐུལ་བྱས་པའི་གོམ་སྟབས་དང་གཅིག་ཏུ་གྱུར་ཡོད། ད་ཆ་ཁོང་གིས་གཞོན་ནུ་ལག་རྩལ་གྱི་ཚོགས་པ་ཞིག་གསོ་སྐྱོང་བྱེད་བཞིན་ཡོད།
འབྲེལ་ཡོད་གསར་འགྱུར།