སྟོད་ལུང་བདེ་ཆེན་ཆུས་མི་དམངས་ཁྲིམས་ཁང་གིས།
ཉིན་བདུན་ནང་ཉོ་ཚོང་གན་རྒྱའི་རྩོད་གཞི་ཞིག་འདུམ་འགྲིག་བྱས་པ།
ཉེ་དུས་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་མི་དམངས་ཁྲིམས་ཁང་དམངས་དོན་འདྲི་གཅོད་ཐིང་གིས་ཁྲིམས་སའི་སྔོན་གྱི་འདུམ་འགྲིག་ལམ་སྲོལ་ལ་བརྟེན་ནས་ཉོ་ཚོང་གན་རྒྱའི་རྩོད་གཞི་ཞིག་བདེ་བླག་ངང་འདུམ་འགྲིག་བྱས་པ་དང་། གྱོད་དོན་ཐོ་འགོད་བྱས་པ་ནས་རྩོད་གཞི་རྩ་བ་ནས་འདུམ་འགྲིག་ཐུབ་པའི་བར་ཉིན་བདུན་ལས་འགོར་མེད། ཞུ་སྦྱོར་ཕྱི་མས་ཁྲིམས་ས་དེ་རང་དུ་ཞུ་སྦྱོར་སྔ་མར་གྲོན་དངུལ་ཚང་མ་སྤྲད་པས་བཅའ་ཁྲིམས་ཀྱི་ཕན་འབྲས་དང་སྤྱི་ཚོགས་ཀྱི་ཕན་འབྲས་གཅིག་གྱུར་ནུས་ལྡན་བྱུང་ནས་ནུས་ཆེའི་ཁྲིམས་འཛིན་ཞབས་ཞུར་བརྟེན་ནས་ཚོང་གཉེར་ཁོར་ཡུག་ལེགས་སུ་བཏང་བ་རེད།
ཤེས་རྟོགས་བྱུང་བར་གཞིགས་ན། གྱོད་དཔེ་དེ་ཞུ་སྦྱོར་ཕྱི་མ་ལིང་ཆེ་གེ་མོས་སྔ་རྗེས་སུ་ཞུ་སྦྱོར་སྔ་མ་བོད་ལྗོངས་ཀྱི་ཀུང་སི་ཞིག་ནས་གློག་ཆས་དང་གཙང་འཁྲུད་ཡོ་ཆས་སོགས་དངོས་ཟོག་ཉོས་ཀྱང་དངོས་ཟོག་གི་རིན་པ་སྒོར་ཁྲི་4ལྷག་ཙམ་འགྱངས་ཆད་བྱས་པ་དང་ཞུ་སྦྱོར་སྔ་མས་ཐེངས་མང་འདེད་ཀྱང་མ་སྤྲད་སྟབས། སྟོད་ལུང་བདེ་ཆེན་ཆུས་མི་དམངས་ཁྲིམས་ཁང་ལ་ཞུ་གཏུག་བརྒྱབ་ནས་ཞུ་སྦྱོར་ཕྱི་མར་དངོས་ཟོག་གི་རིན་པ་དང་དུས་བཀག་ལས་བརྒལ་བའི་སྐྱེད་ཀ་བསྡོམས་སྒོར་ཁྲི་5ལྷག་ཙམ་སྤྲོད་དགོས་པའི་བཀའ་གཏོང་རྒྱུའི་རེ་བ་བཏོན་ཡོད། གྱོད་གཞི་བདག་སྤྲོད་བྱས་རྗེས། གྱོད་དོན་སྒྲུབ་འགན་འཁུར་མཁན་ཁྲིམས་དཔོན་གྱིས་ཞིབ་འཇུག་དང་བརྡར་གཅོད་བྱས་རྗེས། གྱོད་དོན་དེའི་དོན་དངོས་ཁ་གསལ་ཡིན་ལ་དངུལ་འབོར་ཅུང་ཉུང་བ། འདུམ་འགྲིག་གི་རྨང་གཞི་ཡོད་པ་བཅས་ཡིན་པས། དོ་བདག་གི་གཏུག་ངལ་ཆུང་དུ་གང་ཐུབ་གཏོང་ཆེད། འཕྲལ་མར་ཁྲིམས་སའི་སྔོན་གྱི་འདུམ་འགྲིག་གི་ལས་དོན་སྤེལ་འགོ་ཚུགས་པ་རེད།
འདུམ་འགྲིག་བྱེད་རིང་། གྱོད་དོན་སྒྲུབ་འགན་འཁུར་མཁན་ཁྲིམས་དཔོན་གྱིས་ཕྱོགས་གཉིས་ཀྱི་བསམ་འཆར་གང་ལེགས་ཉན་རྗེས། ཕྱོགས་གཅིག་ནས་ཞུ་སྦྱོར་ཕྱི་མར་འབྲེལ་ཡོད་བཅའ་ཁྲིམས་དང་ཁྲིམས་སྲོལ་དང་དེ་བཞིན་བུ་ལོན་མ་འཇལ་བའི་བཅའ་ཁྲིམས་ཀྱི་མཇུག་འབྲས་གསལ་བཤད་བྱས་པ་དང་། ཕྱོགས་གཞན་ཞིག་ནས་བརྩེ་དུང་དང་ཡུན་རིང་འཕེལ་རྒྱས་མཉམ་ལས་ཐད་ནས་ཞུ་སྦྱོར་སྔ་མར་ཕན་ཚུན་བསམ་ཤེས་དང་བཟོད་སྒོམ་བྱེད་པར་ཁྲིད་སྟོན་བྱས་ཡོད། སྒྲུབ་འགན་འཁུར་མཁན་ཁྲིམས་དཔོན་གྱིས་ངང་རྒྱུད་རིང་པོས་བཅའ་ཁྲིམས་གསལ་འགྲེལ་དང་མཐུན་སྦྱོར་ཧུར་ཐག་བྱས་པ་བརྒྱུད། ཞུ་སྦྱོར་ཕྱི་མས་ས་ཆ་དེ་རང་དུ་སྐད་འཕྲིན་དང་དངུལ་ཁང་གི་རྩིས་སྒྱུར་བྱེད་ཐབས་བརྒྱུད་ཐེངས་གཅིག་རང་ལ་དངུལ་བུན་ཚང་མ་གཙང་མར་འཇལ་བ་དང་། ཞུ་སྦྱོར་སྔ་མས་ཀྱང་ས་ཆ་དེ་རང་དུ་ཞུ་གཏུག་ཕྱིར་འཐེན་བྱས་པ་རེད། མཇུག་ཏུ་ཕྱོགས་གཉིས་པོས་ལག་པ་བཏང་ནས་རྩོད་གཞི་འདུམ་པ་རེད། གནས་ཚུལ་ཐག་གཅོད་ཐུབ་རྗེས་དོ་བདག་གིས་ཆེད་མངགས་སྒྲུབ་འགན་འཁུར་མཁན་ཁྲིམས་དཔོན་ལ་གོས་དར་ཕུལ་ནས་ཁྲིམས་ཁང་གི་ཆེད་ལས་ནུས་ཆེའི་གྱོད་སྒྲུབ་ཆུ་ཚད་དང་དེ་བཞིན་དམངས་དོན་དུ་ཁྲིམས་འཛིན་པའི་ལས་ཀའི་རྣམ་འགྱུར་ལ་ཐུགས་རྗེ་ཆེ་ཞུས་པ་རེད།
ད་ཐེངས་ཀྱི་ཉིན་བདུན་ནང་འདུམ་འགྲིག་ཐུབ་པ་ནི་སྟོད་ལུང་བདེ་ཆེན་ཆུས་མི་དམངས་ཁྲིམས་ཁང་གིས་དམངས་ཆེད་ཁྲིམས་འཛིན་པ་དང་ཚོང་གཉེར་ཁོར་ཡུག་ལེགས་སུ་གཏོང་བར་ཞབས་འདེགས་ཞུ་བའི་གསོན་ཉམས་དོད་པའི་ལག་ལེན་ཞིག་རེད།
འབྲེལ་ཡོད་གསར་འགྱུར།