ཉེ་ཆར། གཞིས་རྩེ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ཁྲིམས་ར་འཚོགས་ནས་ལས་ཐོག་ཉེས་གསོག་གི་གྱོད་གཞི་ཞིག་ཡོངས་བསྒྲགས་ངང་འདྲི་ཞིབ་བྱས་པ་དང་། གྲོང་ཁྱེར་ཐད་གཏོགས་ལས་ཁུངས་དང་ཚན་པའི་ལས་དོན་པ་དང་བོད་སྐྱོར་ལས་བྱེད་པ་སོགས་གཞུང་ལས་པ་162ཁྲིམས་རར་ཟུར་ཉན་བྱེད་པར་དམིགས་སུ་གདན་དྲངས་ཏེ། ས་གནས་ས་ཐོག་ཏུ་སྲིད་གཙང་སློབ་གསོ་ལྟ་སྦྱོང་བྱས་པ་རེད།

ཁྲིམས་ར་དངོས་སུ་འགོ་ཚུགས་རྗེས། བརྒྱུད་རིམ་ཧྲིལ་པོ་སྒམ་ནན་ཆེ་ལ་གོ་རིམ་ལྡན་པ་མ་ཟད། ཁྲིམས་རར་བརྟག་དཔྱད་དང་། དཔང་རྟགས་འདོན་པ་དང་ངོ་ཐུག་ར་སྤྲོད། ཁྲིམས་རར་རྩོད་གླེང་། ཞུ་སྦྱོར་ཕྱི་མས་མཐའ་མའི་གསལ་འདེབས་སོགས་བྱེད་པའི་ལྷུ་ཚིགས་རིམ་པ་བཞིན་བསྒྲུབས་ཏེ། དབང་ཆའི་མདུན་དུ་ཞུ་སྦྱོར་ཕྱི་མས་རང་ཚོད་རང་གིས་མ་ཟིན་པར་སྒྲིག་ཁྲིམས་ཀྱི་མཐའ་ཚད་དང་བཅའ་ཁྲིམས་ཀྱི་མཐའ་ཚད་ལས་བརྒལ་ནས་ཉེས་གསོག་གི་གཡང་སར་ལྷུང་བའི་བརྒྱུད་རིམ་ཧྲིལ་པོ་གསལ་པོར་མཚོན་པར་བྱས་ཡོད། འདྲི་གཅོད་བྱེད་རིང་། ཁྲིམས་རར་ཞུ་སྦྱོར་ཕྱི་མས་རང་གིས་བསགས་པའི་ནག་ཉེས་ངོས་ལེན་དང་ཆད་གཅོད་དང་ལེན་བྱས་པ་མ་ཟད། རང་ཉིད་ཀྱི་སྒྲིག་འགལ་ཁྲིམས་འགལ་གྱི་བྱེད་སྤྱོད་ལ་འགྱོད་བཤགས་དྲག་པོའང་བྱས་ཤིང་། སྣ་སུན་ཕོག་པའི་གནས་ཚུལ་དེར་མི་རྣམས་བསམ་གཞིག་ཟབ་མོ་བྱེད་དགོས་བྱུང་ལ། ཟུར་ཉན་བྱེད་མཁན་ཏང་ཡོན་ལས་བྱེད་པར་སེམས་གཏིང་ནས་གོ་བསྐོན་སློབ་གསོ་ཐེབས་པའི་ཉེན་བརྡའི་སློབ་གསོའི་སློབ་ཚན་ཞིག་ཀྱང་འཁྲིད་པ་རེད།

“འདི་ལྟ་བུའི་ཁྲིམས་རའི་འདྲི་གཅོད་ལ་ལྟ་སྦྱོང་བྱེད་པ་དེ་གཞུང་ལུགས་རྐྱང་རྐྱང་ཁྲིད་པ་ལས་ཀྱང་ཕན་ཐོགས་ཆེ་བ་འདུག དེ་ལས་ང་ཚོས་བཅའ་ཁྲིམས་ཀྱི་ཟིལ་རྔམ་དང་ཁྲིམས་འགལ་སྒྲིག་འགལ་བྱས་ན་ཕམ་ཁ་ཆེན་པོ་རག་ངེས་ཡིན་པ་ཐད་ཀར་ཚོར་བྱུང” ཁྲིམས་རའི་འདྲི་གཅོད་མཇུག་འགྲིལ་རྗེས་ཟུར་ཉན་བྱེད་མཁན་ཚོས། ད་ཐེངས་ཀྱི་འདྲི་གཅོད་བསླབ་བྱར་བླངས་ཏེ། རྒྱུན་དུ་རང་གཅུན་གྱི་བསམ་པ་འཆང་བ་དང་། འདོད་རྔམ་གྱི་མཇུག་འབྲས་རྟག་ཏུ་དྲན་པ། སྤྱོད་གཙང་རང་འདོམས་ཀྱི་རྩ་བ་དེ་དུས་དང་རྣམ་པ་ཀུན་ཏུ་དམ་པོར་སྲུང་བ། ཏང་གཤིས་བློ་སྦྱོང་དང་བཅའ་ཁྲིམས་ཁྲིམས་སྲོལ་སློབ་སྦྱོང་ལ་རྒྱུན་ཆད་མེད་པར་ཤུགས་སྣོན་རྒྱག་པ། ཡང་དག་པའི་དབང་ཆའི་ལྟ་བ་དང་། གནས་བབ་ཀྱི་ལྟ་བ། ཁེ་ཕན་གྱི་ལྟ་བ་བཅས་བརྟན་པོ་འཛུགས་པ། བསླུ་བྲིད་སྣ་ཚོགས་རང་རྟོགས་ངང་འགོག་པ། གུས་སྐྲག་ཤེས་པ་དང་། དོགས་ཟོན་བྱེད་པ། མཐའ་ཚད་སྲུང་བ་བཅས་བྱས་ནས་བཅའ་ཁྲིམས་ལ་བརྩི་བཀུར་དང་འགན་འཁྲི་བརྟན་པོ་བསྲུང་རྒྱུ་དེ་རྒྱུན་གཏན་གྱི་ལས་ཀ་དང་འཚོ་བར་མཉམ་འདྲེས་ཐུབ་པ་བྱེད་ཀྱི་ཡིན་ཞེས་གཅིག་མཇུག་གཉིས་མཐུད་ངང་བཤད།