འདི་ནི་ཆིང་ཧྭ་སློབ་ཆེན་གྱི་སློབ་མས་མཐའ་སྲུང་དཔོན་དམག་དང་མཉམ་དུ་སྐོར་གཡེང་རྒྱག་བཞིན་པ།

འདི་ནི་ཆིང་ཧྭ་སློབ་ཆེན་གྱི་དགེ་སློབ་དང་དཔོན་དམག་གི་མཉམ་པར་ཡིན་པ།

འདི་ནི་ཆིང་ཧྭ་སློབ་ཆེན་གྱི་དགེ་སློབ་ཀྱིས་དཔོན་དམག་དང་མཉམ་དུ་སོ་ལྟ་ཁང་གི་མཐོ་ཤོས་སུ་གནས་པའི“མིང་མེད་མཚོ”ཞེས་པའི་བྲག་ལྡེབས་ཀྱི་ཡི་གེར་རྩི་དམར་པོ་བྱུག་བཞིན་པ།

“ང་རང་གནས་སའི་ས་ཆ་ནི་ཀྲུང་གོ་ཡིན། ཀྲུང་གོ་ཡིན། ཀྲུང་གོ་ཡིན”ཞེས་ས་བབ་སྨི་5000ཟིན་པའི་ལས་སྒྲུབ་བྱ་ཡུལ་དུ། ཆིང་ཧྭ་སློབ་ཆེན་གྱི་དགེ་སློབ་དང་དཔུང་སྡེའི་དཔོན་དམག་14ཡིས་དཔུང་པ་མཉམ་གཤིབ་ཀྱིས་རྒྱལ་དར་མཐོན་པོར་བསྒྲེངས་ནས་རྔམ་བརྗིད་དོད་པོས་དམ་བཅའ་བཞག ཉེ་ཆར། ཆིང་ཧྭ་སློབ་ཆེན་གྱི“ལང་ཚོའི་མཐའ་མཚམས་རྡོ་རིང་། རྒྱལ་ཁབ་ས་ཆའི་མཐའ་སྲུང”གི་ལག་ལེན་ཡན་ལག་རུ་ཁག་གིས་སྤྱི་ལེ་སྟོང་ཕྲག་བརྒལ་ནས་བོད་དམག་ཁུལ་ཁང་གི་དཔུང་སྡེ་ཞིག་གི་མཐའ་སྲུང་བྱ་ཡུལ་དུ་བསྐྱོད་དེ། རྒྱལ་སྲུང་སློབ་གསོའི་ལག་ལེན་བྱེད་སྒོ་སྤེལ་བ་རེད།

“འདི་གའི་རི་བོ་བརྗིད་ཉམས་ཆེ་རུང‘སྲོག་གནས་དཀའ་ཁུལ’རེད། དགུན་ཁ་སྐོར་གཡེང་རྒྱག་སྐབས་ངོ་རས་ཐོག་འཁྱཌ་པ་སྲབ་མོ་ཞིག་ཐེབས་ཀྱི་ཡོད”ཅེས་མཐའ་སྲུང་འཐབ་འཛིང་པས་ཆིང་ཧྭ་སློབ་མ་སྐྱོར་བཞིན་དེ་ལྟར་བཤད། ཆིང་ཧྭ་སློབ་མས་མཐའ་སྲུང་དཔོན་དམག་དང་མཉམ་དུ་ས་བབ་སྨི་4000ལྷག་ཙམ་ཟིན་པ་དང་། གསོ་རླུང་འདུས་ཚད་རྒྱ་མཚོའི་ངོས་ཀྱི་50%ནས་60%ཙམ་ལས་མེད་པ། ས་བབ་བར་ཁྱད་སྨི་1000 ཙམ་ཆོད་པ་བཅས་ཀྱི་སྐོར་གཡེང་ལམ་བུར་གྲང་རླུང་དང་ཁ་བ་བུ་ཡུག་ལ་མ་འཛེམས་པར་མཐའ་སྲུང་དཔོན་དམག་གིས་བརྟན་སྲུང་དང་ལེགས་སྐྱེས་འབུལ་བའི་རྣམ་པ་དངོས་སུ་ཉམས་ལེན་བྱས་པ་རེད།

སྐོར་གཡེང་མཇུག་འགྲིལ་རྗེས། ཆིང་ཧྭ་སློབ་མ་ཝུང་ཧྲི་ཡོན་གྱིས“ས་ཆ་འདིར་བྱེ་ཧྲུག་དང་འཁྱགས་རོམ་གྱིས་ཁེངས་ནས་སྔོ་ཁེབས་ལྷེབ་ཙམ་ཡང་མེད་རུང་། དེ་ནི་གསོ་རླུང་དཀོན་ཡང་དད་སེམས་མི་ཉམས་པའི་ས་ཆ་ཞིག་རེད། ད་ཐེངས་ཀྱི་སྐོར་གཡེང་ནང་ཞུགས་པ་བརྒྱུད། ངས་མེས་རྒྱལ་གྱི་དགོས་མཁོ་ཆེ་ཤོས་ཀྱི་ས་ཆ་དང་རྒྱལ་སྲུང་ཆེད་ལང་ཚོ་སྐྱེས་སུ་འབུལ་བའི་དད་སེམས་དེ་བས་བརྟན་དུ་ཕྱིན་སོང”ཞེས་བཤད།