འདི་ནི་འབྲི་རུ་རྫོང་མེ་ཟོན་རོགས་སྐྱོབ་རུ་ཆེན་གྱིས་སྦྲག་སྲིད་ལས་མིར་མེ་ཟོན་དྲིལ་བསྒྲགས་དང་བླངས་རུ་ཁག་འཛུགས་པར་ཁྲིད་སྟོན་དང་ཆེད་དོན་མེ་ཟོན་ཤེས་བྱའི་གསོ་སྦྱོང་བྱེད་བཞིན་པ།

མེ་ཟོན་བདེ་འཇགས་ཀྱི་དྲིལ་བསྒྲགས་ཕྱོགས་ཡོངས་ལ་ཁྱབ་པར་སྐུལ་འདེད་བཏང་སྟེ། བདེ་འཇགས་ཤེས་བྱ་མཐའ་མཚམས་ཞིང་འབྲོག་མང་ཚོགས་ཀྱི་སེམས་ལ་བརྟན་པོར་ཟུག་ཆེད། ཉེ་ཆར། ནག་ཆུ་གྲོང་ཁྱེར་འབྲི་རུ་རྫོང་མེ་གསོད་རོགས་སྐྱོབ་རུ་ཆེན་གྱིས་ཞབས་ཞུ་དང་མེ་ཟོན་ཟུང་དུ་འབྲེལ་བའི་ལས་ཀའི་རྣམ་པ་བཏོད་དེ། སྦྲག་སྲིད་དང་མཉམ་འགུལ་གཏིང་ཟབ་བྱས་ནས། དྲིལ་བསྒྲགས་ཀྱི་ཐོན་ཁུངས་ཟླ་སྒྲིལ་དང་དྲིལ་བསྒྲགས་ཀྱི་ཐབས་ལམ་རྒྱ་ཆེ་རུ་བཏང་ཐོག དམངས་ཡོངས་ཞུགས་པ་དང་ཁུལ་ཡོངས་སུ་ཁྱབ་པའི་མེ་ཟོན་བདེ་འཇགས་དྲིལ་བསྒྲགས་ཀྱི་རྣམ་པ་གསར་པ་བཏོད་ནས། མེ་ཟོན་རྒྱུན་ཤེས་མི་སེམས་ལ་ཟུག་ཤུགས་དང་ཤུགས་རྐྱེན་ཐེབས་ཤུགས་ཆེ་རུ་ཏན་ཏིག་བཏང་བ་རེད།

འབྲི་རུ་རྫོང་མེ་གསོད་རོགས་སྐྱོབ་རུ་ཆེན་གྱིས་རྫོང་ཡོངས་ཀྱི་སྦྲག་སྲིད་ས་ཚིགས་དང་ལས་སྒྲུབ་སྒུག་སྡོད་ཁུལ་དུ་མེ་ཟོན་དྲིལ་བསྒྲགས་ལག་དེབ་ཡག་པོ་བསྒྲིགས་པ་དང་། གྱང་ལྡེབས་སུ་མེ་ཟོན་ཉེན་བརྡའི་བརྡ་ཁྱབ་སྦྱར་བར། ནང་དོན་གཙོ་བོ་ནི་ཁང་པའི་ནང་དུ་གློག་སྒུལ་སྦག་སྦག་ལ་གློག་གསོག་མི་ཆོག་པ་དང་། བར་ཁྱམས་ཤར་གཏོང་། མེ་སྤྱོད་གློག་སྤྱོད་ཀྱི་བདེ་འཇགས་སོགས་མང་ཚོགས་ཀྱི་རྒྱུན་གཏན་འཚོ་བ་དང་འབྲེལ་བའི་བདེ་འཇགས་ཤེས་བྱ་ཡིན་ཞིང་། མང་ཚོགས་ཀྱིས་ལས་སྒོ་སྒྲུབ་པ་དང་དུས་མཚུངས། སྟབས་བདེ་པོའི་སྒོ་ནས་མེ་ཟོན་རྒྱུན་ཤེས་སློབ་སྦྱོང་ཐུབ་པར་བྱས་ཡོད། གྲོང་ཚོར་མྱུར་སྐྱེལ་འབྱོར་བའི་ལེགས་ཆར་བརྟེན་ཏེ། མྱུར་སྐྱེལ་བསྐུར་མའི་ཐུམ་སྒྲིལ་ཐོག་མེ་ཟོན་དྲན་སྐུལ་གྱི་སྦྱར་ཡིག་སྦྱར་ནས། “གཙང་སེལ་གསུམ་དང་ཁ་རྒྱག་པ་གསུམ”དང་མེ་སྐྱོན་ཐོན་མ་ཐག་ཇི་ལྟར་གསོད་ཐབས་སོགས་སྤྱོད་སྒོ་ཆེ་བའི་ལག་རྩལ་དག་ཟོག་འགྲུལ་གྱི་ལྷུ་ཚིགས་ནང་མཉམ་འདྲེས་ཐུབ་པར་བྱས་ཏེ། “མྱུར་སྐྱེལ་བསྐུར་མ་སྐུར་ལེན་སྐབས་བདེ་འཇགས་མཉམ་འགྲོགས”ཡོང་བར་བྱས་ནས། མེ་ཟོན་དྲིལ་བསྒྲགས་ཚང་མས་ཤེས་ཐུབ་པ་བྱས་པ་རེད།

དེ་དང་དུས་མཚུངས། འབྲི་རུ་རྫོང་མེ་གསོད་རོགས་སྐྱོབ་རུ་ཆེན་གྱིས་སྤྱི་ཚོགས་ཐོག་གི་མི་སྣ་གསོ་སྐྱོང་བྱེད་ཤུགས་ཆེ་རུ་བཏང་སྟེ། སྦྲག་སྲིད་ལས་མིར་མེ་ཟོན་དྲིལ་བསྒྲགས་དང་བླངས་རུ་ཁག་འཛུགས་པའི་མཛུབ་ཁྲིད་བྱས་པ་རེད། སྦྲག་སྲིད་ལས་མི་ནམ་རྒྱུན་མང་ཚོགས་དང་འབྲེལ་འདྲིས་ཆེ་བ་དང་ཁྱིམ་ཚང་མང་པོར་སྐྱོད་དགོས་པའི་ཁྱད་ཆོས་ལ་དམིགས་ཏེ། འབྲི་རུ་རྫོང་མེ་གསོད་རོགས་སྐྱོབ་རུ་ཆེན་གྱིས་ཆེད་དོན་མེ་ཟོན་ཤེས་བྱའི་གསོ་སྦྱོང་བྱས་ནས། དང་བླངས་པ་ཚོས་མེ་སྐྱོན་སྔོན་འགོག་དང་། ཁ་འགྲེམས་སྲོག་ཐར། ཞིང་འབྲོག་ཁུལ་གྱི་དྲོད་ལེན་གློག་སྤྱོད་བདེ་འཇགས། གྲོང་ཁུལ་གྱི་མེ་ཟོན་བགྲོད་ལམ་ཤར་གཏོང་སོགས་ཀྱི་རྨང་གཞིའི་རྒྱུན་ཤེས་ཁོང་དུ་ཆུད་པར་བྱས་ཏེ། དང་བླངས་པས་ལས་སྒོ་སྒྲུབ་གཉེར་དང་མྱུར་སྐྱེལ་བསྐུར་མ་སྐྱེལ་བའི་བརྒྱུད་རིམ་ཁྲོད། རང་འགུལ་ངང་མང་ཚོགས་ལ་མེ་ཟོན་རྒྱུན་ཤེས་ཁྱབ་གདལ་གཏོང་བ་དང་གོ་བདེ་ཤེས་སླའི་སྐད་ཆའི་ཐོག་ནས་བདེ་འཇགས་ཀྱི་གཙོ་གནད་གསལ་འགྲེལ་བྱས་ནས། “གནས་གཅིག་ལ་ཞབས་འདེགས་ཞུས་ན་ཁུལ་གཅིག་ལ་དྲིལ་བསྒྲགས་ཐུབ་པར”བྱས་ཏེ། མེ་ཟོན་དྲིལ་བསྒྲགས་ཀྱི་དཔུང་ཁག་རྫོང་ཡོངས་ཀྱི་ས་ཆ་གང་སར་ཁྱབ་པར་བྱས་ནས། བདེ་འཇགས་རྒྱུན་ཤེས་མང་ཚོགས་ཚོས་ཤེས་རྟོགས་ཐུབ་པར་བྱས་པ་རེད།