2025ལོ་ནི་བོད་ཀྱི་འཕེལ་རྒྱས་ལོ་རྒྱུས་ཐོག་དམིགས་བསལ་གྱི་རྟགས་མཚན་ལྡན་པའི་ལོ་ཞིག་རེད། ལོ་འདིའི་ནང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མ་བོད་དུ་ཕེབས་ནས་གཟིགས་ཞིབ་དང་མཛུབ་ཁྲིད་གནང་སྟེ། བོད་འདི་ཉིད་འཕེལ་རྒྱས་གཏོང་བར་ཕྱོགས་སྟོན་སྣེ་ཁྲིད་གནང་ནས་སྒུལ་ཤུགས་ཆེན་པོ་བསྣན་པ་དང་། ལོ་འདིའི་ནང་། “ལོ་ལྔ་ཚན་བཅུ་བཞི་པ”ཕུན་སུམ་ཚོགས་པའི་ངང་མཇུག་འགྲིལ་བ་དང་ཆབས་ཅིག “ལོ་ལྔ་ཚན་བཅོ་ལྔ་པར”ཚན་རིག་དང་མཐུན་པའི་ངང་འཆར་འགོད་བྱས་ཡོད། རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བ་དང་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་དབུ་བརྙེས་ནས་ལོ་ངོ་60འཁོར་བའི་ལོ་རྒྱུས་ཀྱི་མཚམས་ཚིགས་ནས་ཕྱིར་མིག་ཞིག་བལྟས་ཚེ། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་འགན་སྒྲུབ་ཞབས་རྗེས་དེ་གངས་ལྗོངས་ས་མཐོའི་ས་གཞི་ཆེན་པོ་སྒྱུར་བཅོས་འཕེལ་རྒྱས་ཀྱི་བརྗིད་ཆེའི་རྒྱང་སྐྱོད་ལམ་བུའི་ཐོག་གསལ་པོར་འཁོད་ཡོད་པ་མཐོང་ཐུབ།

ལོ་གཅིག་རིང་། རང་སྐྱོང་ལྗོངས་ཏང་ཨུད་ཀྱི་སྲ་ཞིང་བརྟན་པའི་འགོ་ཁྲིད་འོག རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་རྩ་ཁྲིམས་དང་བཅའ་ཁྲིམས་ཀྱིས་དཀྲིས་པའི་འགན་འཁྲི་ཁག་ཁྲིམས་ལྟར་བསྒྲུབས་ཏེ། བརྒྱུད་རིམ་ཧྲིལ་པོའི་མི་དམངས་དམངས་གཙོ་ལག་ལེན་བསྟར་བ་དང་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་ལ་ཞབས་འདེགས་ཞུས་པའི་ལེའུ་གསར་རྐྱང་ཞིག་བརྩམས་ཡོད།

ཁྲིམས་བཟང་སྐྱོང་མཁས་ཀྱི་འཆར་འགོད་བྱས་ཏེ་སྤུས་ཚད་མཐོ་བའི་ཁྲིམས་འཛུགས་ལ་བརྟེན་ནས་ཡུན་རིང་བདེ་འཁོད་ཀྱི་རྨང་གཞི་བརྟན་པོ་བཏིངས་པ།

འདས་ཟིན་པའི་ལོ་གཅིག་ནང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་ཁྲིམས་འཛུགས་སྤུས་ཚད་མཐོ་རུ་གཏོང་བའི་འགག་རྩ་དེར་དམ་འཛིན་ནན་པོ་བྱས་ནས། བཟོ་བཅོས་དོར་གསུམ་ཁྲོད་དུ་ཁྲིམས་སྐྱོང་བོད་ལྗོངས་ཀྱི“ཀ་བརྒྱད་གདུང་བཞི”སྔར་བས་བརྟན་པོ་ཡོང་བར་སྐུལ་འདེད་བཏང་ཡོད།

ཁྲིམས་འཛུགས་ཀྱི་ཁྱད་ཆོས་སྔར་བས་མངོན་གསལ་དོད་པ་དང་སྤྱི་ཡོངས་ལ་ཞབས་འདེགས་ཞུ་བར་གནད་སྨིན་ཤུགས་བརྒྱབ་པ། ཁྲིམས་འཛུགས་ལས་དོན་ཐོག་མཐའ་བར་གསུམ་དུ་རང་སྐྱོང་ལྗོངས་ཏང་ཨུད་ཀྱི་ལྟེ་བའི་ལས་དོན་དང་བློ་ཁ་གཅིག་མཐུན་དང་གོམ་སྟབས་གཅིག་གྱུར་བྱས་ཐོག རྒྱལ་ཁབ་ཀྱི་བདེ་འཇགས་སྲུང་བཅད་བརྟན་པོ་འཛུགས་པར་དམིགས་ནས་ཀུན་གྱི་སྣེ་ཁྲིད་དེ་རྒྱལ་ཁབ་ཀྱི་མཐའ་བརྟན་མཐའ་དར་དམངས་ཕྱུག་བྱ་སྤྱོད་ཀྱི་དཔེ་སྟོན་ཁུལ་འཛུགས་གཏོད་སྲོལ་ཡིག་འཆར་ཟིན་བཀོད་པ་དང་དེར་གྲོས་ཞིབ་བྱས་ནས་འཆམ་བྱུང་ཞིང་། མཐའ་མཚམས་སྟོབས་ཆེར་གཏོང་བའི་ཁྱབ་ཁོངས་ཀྱི་རང་སྐྱོང་ལྗོངས་ཏང་ཨུད་སྐབས་བཅུ་པའི་གྲུབ་འབྲས་ཐོབ་པའི་ཉམས་མྱོང་དང་དགེ་མཚན་ལྡན་པའི་བྱེད་སྟངས་ཁག་ཁྲིམས་འཛུགས་ཀྱི་རྣམ་པ་བརྒྱུད་གཏན་འཁེལ་བྱས་ཏེ། ཁྲིམས་སྐྱོང་གི་བྱེད་སྟངས་ལ་བརྟེན་ནས་མཐའ་མཚམས་ས་ཁུལ་དེང་རབས་ཅན་ལ་སྐུལ་འདེད་བཏང་ཡོད། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་བརྟན་པོ་འཛུགས་པར་དམིགས་ནས། གཞན་གྱི་སྔོན་ལ་མཚོ་བོད་ས་མཐོའི་སྐྱེ་ཁམས་སྲུང་སྐྱོང་བཅའ་ཁྲིམས་ལག་བསྟར་བྱེད་ཐབས་བཟོས་ཏེ། ཀྲུང་དབྱང་གི་སྐྱེ་ཁམས་འཐབ་ཇུས་དེ་ཞིབ་ཕྲའི་ཁྲིམས་སྐྱོང་དོན་ཚན་དུ་བསྒྱུར་ཏེ། ལམ་ལུགས་ནན་ཤོས་དང་ཁྲིམས་སྐྱོང་ནན་ཤོས་ལ་བརྟེན་ནས་ས་མཐོའི་རྩྭ་རྩི་ཤིང་ཚུན་ཆད་དང་རི་ཆུ་ཀླུང་གསུམ་སྲུང་སྐྱོང་ཡག་པོ་བྱས་ཡོད།

སྤྱི་ཚོགས་ཀྱི་ཐུན་མོང་ངོས་འཛིན་གཅིག་སྒྲིལ་རྒྱ་ཁྱབ་བྱས་པས་དམངས་གཙོའི་ཁྲིམས་འཛུགས་མི་སེམས་སུ་གཏིང་ཟབ་ཟུག་པ། གཞི་རིམ་གྱི་ཁྲིམས་འཛུགས་འབྲེལ་གཏུག་ས་ཚིགས་འཛུགས་སྐྲུན་ཡག་པོ་དང་བེད་སྤྱོད་ཡག་པོ་བྱེད་པ་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཁྲིམས་འཛུགས་བློ་འདྲིའི་རིགས་གཅིག་མཁས་ཅན་གྱི་ནུས་པ་གང་ལེགས་བཏོན་ནས། ཁྲིམས་འཛུགས་ལས་དོན་གཞི་རིམ་དུ་སྤེལ་བ་དང་དམངས་འདོད་དང་ཐད་སྦྲེལ་ཐུབ་པར་བྱས་ཡོད། ཁྲིམས་འཛུགས་བྱེད་སྐབས་སྒོ་རྩར་བསྐྱོད་དེ་བསམ་འཆར་བསྡུ་ལེན་བྱ་རྒྱུ་འཚོལ་ཞིབ་བྱས་ཤིང་། ཁྲིམས་སྲོལ་བཟོ་བ་དང་བཟོ་བཅོས་རྒྱག་པར་དམིགས་ནས་རང་འགུལ་ངང་ལས་སྒོའི་སྡེ་ཚན་དང་གཞི་རིམ་གྱི་འཐབ་ས་དང་པོར་བསྐྱོད་དེ་བསམ་འཆར་ཉན་ནས། ཁྲིམས་སྲོལ་དོན་ཚན་གྱིས“དམངས་སེམས”སྔར་བས་མཚོན་ཐུབ་པར་བྱས་ཡོད། ལོ་གཅིག་གི་རིང་། རིམ་རྩིས་བརྒྱབ་ན་ཕྱོགས་ཁག་གིས་ཁྲིམས་སྲོལ་འཆར་ཟིན་ཐད་བཏོན་པའི་བསམ་འཆར་དང་གྲོས་འགོ་ཁག་2328བསྡུ་ལེན་བྱས་ནས། ཁྲིམས་སྲོལ་ཚང་མའི་ནང་དམངས་འདོད་དང་དྲོ་སྐྱིད་ཀྱིས་ཁེངས་པར་བྱས་ཡོད།

ཁྲིམས་འཛུགས་ལམ་སྲོལ་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་ནས་སྤུས་ཚད་མཐོ་བའི་ཁྲིམས་འཛུགས་ཡང་དག་པའི་སྲོལ་ལམ་དུ་བསྐྱོད་པ། ཁྲིམས་འཛུགས་ལས་དོན་གྱི་ལམ་ལུགས་གཙང་བཤེར་དང་འཐུས་སྒོ་ཚང་དུ་གཏོང་བ་དང་། དུས་རབས་གསར་པར་ཁྲིམས་འཛུགས་ལས་དོན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་བསམ་འཆར་འདོན་པ། ཁྲིམས་འཛུགས་ལས་དོན་གྱི་ཆེད་དོན་གྲོས་ཚོགས་ལམ་ལུགས་འཛུགས་པ་བཅས་བྱས་ཐོག “ཁྲིམས་འཛུགས་དང་དྲིལ་བསྒྲགས་ཟུང་འབྲེལ”མཐའ་འཁྱོངས་བྱས་ནས་ཁྲིམས་འཛུགས་བརྒྱུད་རིམ་ཧྲིལ་པོ་དྲིལ་བསྒྲགས་གསལ་འགྲེལ་བྱེད་པར་ཤུགས་སྣོན་བརྒྱབ་པས། ས་གནས་ཀྱི་ཁྲིམས་འཛུགས་ལས་དོན་ཚད་ལྡན་ཅན་དང་ལམ་ལུགས་ཅན་གྱི་འཕེལ་རྒྱས་བྱུང་བ་མ་ཟད། ཁྲིམས་འཛུགས་ཀྱི་སྤུས་ཚད་དང་ལས་ཆོད་ཀྱང་མངོན་གསལ་དོད་པོས་ཆེ་རུ་ཕྱིན་ཡོད། ལོ་ཧྲིལ་པོར་དཔལ་འབྱོར་དང་སྤྱི་ཚོགས་ཀྱི་ཕྱོཌ་གང་ཅིའི་ཐད་ཀྱི་ཁྲིམས་སྲོལ་ཐེངས་གྲངས་51ལ་གྲོས་ཞིབ་དང་ཞིབ་བཤེར་བྱས་ནས། ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་ཁྲིམས་སྐྱོང་རྨང་གཞི་རྒྱུན་ཆད་མེད་པར་སྲ་བརྟན་དུ་བཏང་ཡོད།

མི་དམངས་འཐུས་ཚོགས་ཀྱི་ལྟ་སྐུལ་གྱི་རལ་གྲི་མཐོན་པོར་འཕྱར་ཏེ། ནུས་ཆེའི་ལྟ་སྐུལ་ལ་བརྟེན་ནས་ཐབས་ཇུས་བཀོད་སྒྲིག་ཁག་དོན་ཐོག་ཏུ་འཁྱོལ་ཏེ་ཕན་འབྲས་ཐོན་པར་སྐུལ་འདེད་བཏང་བ།

ལྟ་སྐུལ་དབང་ཆ་ནི་རྩ་ཁྲིམས་དང་བཅའ་ཁྲིམས་ཀྱིས་མི་དམངས་འཐུས་ཚོགས་ལ་དཀྲིས་པའི་འགན་དབང་གལ་ཆེན་ཞིག་ཡིན་པས། ལྟ་སྐུལ་ཡང་དག་དང་། ལྟ་སྐུལ་ནུས་ལྡན། ཁྲིམས་ལྟར་ལྟ་སྐུལ་བཅས་མཐའ་འཁྱོངས་བྱས་ནས“གཞུང་གཅིག་དང་། ཨུད་གཅིག ཁང་གཉིས”ཀྱིས་ཁྲིམས་ལྟར་འགན་འཁྲི་སྒྲུབ་པར་སྐུལ་འདེད་བཏང་སྟེ། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་དོན་བཀོད་སྒྲིག་ཁག་དོན་ཐོག་ཏུ་འཁྱོལ་བའི་འགན་ལེན་ཏན་ཏིག་བྱས་ཡོད།

སྤྱི་ཡོངས་བརྟན་པོ་ཡོང་བར་དམིགས་ཏེ་བདེ་འཇགས་འགོག་རགས་བརྟན་དུ་བཏང་བ། ཁྲིམས་སྒྱུར་ཞིབ་བཤེར་གྱི“བཅའ་ཁྲིམས་སྐོར་ཞིབ”བརྒྱུད་མེ་ཟོན་བཅའ་ཁྲིམས་དང་བཟོ་ཚོགས་བཅའ་ཁྲིམས་སོགས་བཅའ་ཁྲིམས་དང་ཁྲིམས་སྲོལ་ས་མཐོར་ཇི་མ་ཇི་བཞིན་ལག་ལེན་བསྟར་རྒྱུར་སྐུལ་འདེད་བཏང་ཡོད། མང་ཚོགས་ཀྱི་བདེ་རྩར་ཐུག་པའི་ཁེ་ཕན་དང་འབྲེལ་བའི་སྲིད་འཛིན་ཁྲིམས་སྒྱུར་གྱི་འགག་རྩའི་ལྷུ་ཚིགས་དེར་དམིགས་ནས། སྲིད་འཛིན་ཁྲིམས་སྒྱུར་གྱི་ལྟ་སྐུལ་ལས་དོན་སྤེལ་ཚུལ་གྱི་ཆེད་དོན་བློ་འདྲི་སྒྲིག་འཛུགས་ཀྱིས་སྤེལ་བ་དང་འབྲེལ་བློ་ཡིད་ཚིམ་ཚད་ལ་བལྟས་ཏེ། ཁྲིམས་སྒྱུར་སྔར་བས་ཚད་ལྡན་དང་། གཞུང་དྲང་། ཤེས་དཔལ་བཅས་ཡོང་བར་སྐུལ་འདེད་བཏང་ཡོད།

སྤུས་ཚད་མཐོ་བའི་འཕེལ་རྒྱས་ལ་དམིགས་ནས་དཔལ་འབྱོར་མཆོང་སྐྱོད་ཡོང་བར་སྐུལ་འདེད་བཏང་བ། སྲིད་གཞུང་གི་བུ་ལོན་དོ་དམ་བྱས་ཚུལ་སྐོར་གྱི་སྙན་ཞུ་ཐོག་མར་ཉན་ནས་གྲོས་ཞིབ་བྱས་ཏེ་ཉེན་ཁ་འགོག་སེལ་བྱས་ཡོད། ཐོན་ཁུངས་ཀྱི་ལེགས་ཆ་དེ་འཕེལ་རྒྱས་ཀྱི་ལེགས་ཆར་བསྒྱུར་བར་དམིགས་ནས་ལྗོངས་ཡོངས་ཀྱི་ལྗང་མདོག་གཏེར་ལས་འཛུགས་སྐྲུན་གྱི་ཆེད་དོན་བརྟག་ཞིབ་བྱས་ཏེ་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ཐབས་འདོན་ཇུས་འབུལ་བྱས་ཡོད། རྩིས་བཤེར་བྱས་ནས་ཐོན་པའི་གནད་དོན་དག་ཐེར་བྱས་ཚུལ་ལ་མུ་མཐུད་རྗེས་སྙེག་ལྟ་སྐུལ་བྱས་ཏེ་རྗེས་མའི་ལས་དོན་ཏན་ཏིག་སྒྲུབ་པ་དང་དེར་ལྟ་སྐུལ་བྱས་ནས་གནད་དོན་དངོས་འབྲེལ་ཐག་གཅོད་ཐུབ་པ་དང་ལས་དོན་དངོས་འབྲེལ་དོན་འཁྱོལ་ཐུབ་པར་སྐུལ་འདེད་བཏང་ཡོད།

དམངས་འཚོའི་བདེ་རྩར་དམིགས་ནས་དམངས་ལ་ཞབས་འདེགས་ཞུ་བའི་ཐོག་མའི་བསམ་འདུན་མངོན་པར་བྱས་པ། གཞི་རིམ་གྱི་འཐབ་ས་དང་པོ་ཐོག་མཐའ་བར་གསུམ་དུ་ལྟ་སྐུལ་བྱ་ཡུལ་ལ་བརྩིས་ཏེ། སློབ་གྲྭའི་བཟའ་བཅའི་བདེ་འཇགས་ནས་རྫོང་ཁོངས་ཀྱི་སྨན་བཅོས་གཅིག་མཐུན་ཚོགས་པ་འཛུགས་རྒྱུའི་བར་དང་། ཞིང་འབྲོག་པའི་ངལ་ནུས་ལས་ཞུགས་ནས་དབྱར་རྩྭ་དགུན་འབུ་སྔོག་འཐུ་དང་ཉོ་ཚོང་བར་སོགས་དམངས་འཚོའི་གླེང་མང་བའི་གནད་དོན་དང་བཅོས་སྒྲིག་གི་དཀའ་གནད་ལ་དམིགས་ནས་བརྟག་ཞིབ་རབ་དང་རིམ་པ་བྱས་ཡོད། མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་གནད་དོན་བཅོས་སྒྲིག་ལས་དོན་སྤེལ་ཚུལ་སྐོར་གྱི་སྙན་ཞུ་ཉན་ནས་གྲོས་ཞིབ་བྱས་ཏེ། ཕྱོགས་ཡོངས་ནས་ཏང་ནན་པོས་སྐྱོང་རྒྱུ་དེ་གཞི་རིམ་དུ་སྣུར་སྲིང་བྱེད་པར་སྐུལ་འདེད་བཏང་ནས། མང་ཚོགས་ཉེ་འགྲམ་གྱི་གཞུང་དྲང་དྲང་བདེན་ཡག་པོ་བསྲུངས་ཡོད།

སྐྱེ་ཁམས་སྲུང་སྐྱོང་ལ་དམིགས་ནས་སྔོ་ལྗང་རི་ཀླུང་བསྲུངས་པ། ལྗོངས་ཡོངས་ཀྱི་ཁོར་ཡུག་གནས་ཚུལ་དང་ཁོར་ཡུག་སྲུང་སྐྱོང་དམིགས་ཚད་ལེགས་གྲུབ་བྱུང་ཚུལ་དང་། རྒྱལ་ཁབ་ཀྱི་སྐྱེ་ཁམས་ཤེས་དཔལ་མཐོ་ས་འཛུགས་སྐྲུན་དང་མཚོ་བོད་ས་མཐོའི་སྐྱེ་ཁམས་སྲུང་སྐྱོང་ལས་དོན་སྤེལ་ཚུལ་སྐོར་གྱི་སྙན་ཞུར་ལོ་མང་བསྟུད་མར་ཉན་ནས་གྲོས་ཞིབ་བྱས་ཡོད། གྲོས་ཞིབ་བསམ་འཆར་ནང་བཏོན་པའི་གནད་དོན་ལ་དམིགས་ནས་གསལ་ཐོ་ཅན་གྱི་དོ་དམ་དང་རྣམ་གྲངས་ཅན་གྱི་སྒྲུབ་སྐུལ་ལམ་སྲོལ་དོན་འཁྱོལ་བྱས་ཏེ། ལྟ་སྐུལ་བསམ་འཆར་ཚང་མར་ལན་ཡོད་པ་དང་ཚང་མ་དོན་འཁྱོལ་ཐུབ་པའི་འགན་ལེན་བྱས་ཡོད། ཀྲུང་ཧྭའི་ཁོར་ཡུག་སྲུང་སྐྱོང་དུས་རབས་བྱ་སྤྱོད་ཀྱི་བོད་ཀྱི་བྱ་སྤྱོད་བྱེད་སྒོས“སྐྱེ་ཁམས་ཁོར་ཡུག་སྲུང་སྐྱོང་གི་འདུ་ཤེས་ཟབ་ཏུ་བཏང་ནས་ས་མཐོའི་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་ལ་སྐུལ་འདེད་གཏོང་དགོས”ཞེས་པ་བརྗོད་དོན་གཙོ་བོར་བྱས་ཏེ། སྤྱི་ཚོགས་ཡོངས་ཀྱིས་རང་ཉིད་ཀྱི་མིག་འབྲས་ལ་གཅེས་སྤྲས་བྱེད་པ་ལྟར་སྐྱེ་ཁམས་ཁོར་ཡུག་ལ་སྲུང་སྐྱོང་བྱས་ནས། གངས་ལྗོངས་ས་མཐོར“རི་གཉིས”ཀྱི་འདུ་ཤེས་ལས་དེ་བས་གཡུར་ཟའི་གྲུབ་འབྲས་ཐོབ་པར་བྱས་ཡོད།

དམངས་ཆེད་འགན་སྒྲུབ་ཀྱི་རྨང་གཞི་བརྟན་དུ་བཏང་སྟེ་ཚད་གཞི་དེ་བས་མཐོ་བའི་ཞབས་ཞུར་བརྟེན་ནས་འཐུས་མིས་བྱེད་པོའི་ནུས་པ་འདོན་ཐུབ་པར་བྱས་པ།

མི་དམངས་འཐུས་མི་ཚོགས་ཆེན་གྱི་བྱེད་པོ་ཡིན་པའི་མི་དམངས་འཐུས་ཚོགས་ཀྱི་འཐུས་མི་ནི་ཏང་དང་རྒྱལ་ཁབ་ཀྱིས་མི་དམངས་མང་ཚོགས་དང་འབྲེལ་བ་བྱེད་པའི་སྦྲེལ་ཟམ་ལྟ་བུ་ཡིན། ཐོག་མཐའ་བར་གསུམ་དུ་འཐུས་མིའི་བྱེད་པོའི་གནས་བབ་ལ་བརྩི་འཇོག་བྱེད་པ་དང་། ཞབས་ཞུའི་འགན་སྲུང་ལམ་སྲོལ་རྒྱུན་ཆད་མེད་པར་གསར་གཏོད་བྱས་ཏེ། འཐུས་མིའི“རྩ་བ”མི་དམངས་མང་ཚོགས་ཁྲོད་སྔར་བས་གཏིང་ཟབ་ཚུགས་པར་བྱས་ཡོད།

གྲོས་འགོ་ཐག་གཅོད་བྱེད་པ་དེ“ལན་བློ་ཡིད་ཚིམ་པ”ནས“འབྲས་བུ་བློ་ཡིད་ཚིམ་པའི”ཕྱོགས་སུ་བསྒྱུར་བ། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པའི་རིང་འཐུས་མིས་བཏོན་པའི་གྲོས་འགོ་ཁག་367ལ་ལན་འདེབས་ཚད་དང་སྒྲུབ་གཉེར་བྱེད་ཚད་ཚང་མ་100%ཟིན་ཡོད། གྲངས་གཞི་དེ་དག་ལམ་སྲོལ་གསར་གཏོད་དང་འགན་འཁྲི་དོན་འཁྱོལ་བྱས་པ་ལས་བྱུང་བ་ཞིག་རེད། གཙོ་གནད་གྲོས་འགོ་དང་རིམ་མང་སྒྲུབ་སྐུལ་གྱི་ལས་ཀའི་ལམ་སྲོལ་བཙུགས་པས་མཐའ་མཚམས་ས་ཁུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་དང་ཁྱད་ལྡན་ཐོན་ལས་འཕེལ་རྒྱས་སོགས་ཕུགས་ཀྱི་འཕེལ་རྒྱས་དང་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་དང་འབྲེལ་བའི་གནད་དོན་ཁག་གཅིག་ཐག་གཅོད་བྱེད་པར་སྐུལ་འདེད་བཏང་སྟེ་འཐུས་མིའི“གཏམ་སྙན”དམངས་ཕན་གྱི“ཐབས་བཟང”དུ་དངོས་འབྲེལ་བསྒྱུར་ཡོད།

“འབྲེལ་གཏུག་གཉིས”དེ“ལམ་ལུགས་ཀྱི་བླང་བྱ”ནས“རྒྱུན་གཏན་གྱི་ལག་ལེན”དུ་བསྒྱུར་བ། ལོ་ཧྲིལ་པོར་ཟུར་ཞུགས་འཐུས་མིའི་བཞུགས་མོལ་ཚོགས་འདུ་ཐེངས་4འཚོགས་ཏེ་ངོ་ཐུག་ནས་བསམ་འཆར་དང་གྲོས་འགོ་ཉན་པ། གཞི་རིམ་མང་ཚོགས་ཀྱིས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཟུར་ཉན་བྱེད་པའི་ལམ་ལུགས་བཙུགས་ནས་དབང་ཆ་ཡོངས་བསྒྲགས་ངང་འཁོར་སྐྱོད་ཐུབ་པ་དང་ཚོགས་ཁང་ནང་དམངས་འདོད་མངོན་པར་བྱས་ཡོད། འཐུས་མི་ཚོས་ལྗོངས་ཡོངས་སུ་ཁྱབ་པའི“མི་དམངས་འཐུས་ཚོགས་ཀྱི་འཐུས་མིའི་ཁྱིམ་གཞིས”དང“འཐུས་མིའི་འབྲེལ་གཏུག་ས་ཚིགས”ལ་བརྟེན་ནས། དམངས་འདོད་ཉན་པ་དང་། དམངས་ཀྱི་བློ་གྲོས་བསྡུ་བ། དམངས་ཀྱི་སེམས་ཁྲལ་སེལ་བ་བཅས་བྱས་ཏེ། འགན་སྒྲུབ་འཐབ་ས་དེ་གཞི་རིམ་གྱི་འཐབ་ས་མདུན་མར་སྣུར་སྲིང་བྱས་ཡོད། ལོ་གཅིག་གི་རིང་། རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་མི་ཐེངས་233རྒྱུན་ལས་ཨུ་ཡོན་ལྷན་ཁང་གི་ཁྲིམས་འཛུགས་དང་ལྟ་སྐུལ་སོགས་ཀྱི་ལས་དོན་ནང་ཞུགས་པ་རེད།

ལོ་གཅིག་གི་རིང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་ཐོག་མཐའ་བར་གསུམ་དུ“ལས་ཁུངས་བཞིའི”ངེས་གནས་ཀྱི་བླང་བྱར་དམ་པོར་བསྟུན་ནས་རང་ངོས་འཛུགས་སྐྱོང་ལ་སྐུལ་འདེད་བཏང་ཡོད། ཏང་ཙུའུ་ཡི་ལས་ཀའི་སྒྲིག་སྲོལ་དང་དོན་གྲོས་སྒྲིག་སྲོལ་བཟོ་བཅོས་རྒྱག་པ་དང་འཐུས་སྒོ་ཚང་དུ་བཏང་ཞིང་། བརྟག་ཞིབ་བྱེད་སྲོལ་རབ་ཏུ་དར་བ་དང་། ལས་བྱེད་པའི་དཔུང་ཁག་འཛུགས་སྐྱོང་དང་གསར་འགྱུར་དྲིལ་བསྒྲགས་ལ་ཤུགས་སྣོན་རྒྱག་པ། ཕྱོགས་ཡོངས་ནས་ཏང་ནན་པོས་སྐྱོང་རྒྱུ་གཏིང་ཟབ་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱས་ཏེ། རང་ངོས་འཛུགས་སྐྱོང་གི་རྣམ་པ་གསར་པར་བརྟེན་ནས་རང་འགན་གཙང་སྒྲུབ་ཀྱི་བྱས་རྗེས་གསར་པ་འཇོག་ཐུབ་པའི་འགན་ལེན་བྱས་ཡོད།