འདི་ནི་འཚོལ་སྐྱོབ་རུ་ཆུང་གི་ཉེན་རྟོག་པས་ཡུལ་སྐོར་བ་ཧོང་ཆེ་གེ་མོ་རི་གཤམ་དུ་བསྐྱོར་ནས་འཁྲིད་བཞིན་པ། (རྒྱལ་རྩེ་རྫོང་སྤྱི་བདེ་ཅུས་ཀྱིས་པར་རིས་མཁོ་འདོན་བྱས)

ཉེ་ཆར། ར་ལུང་ཤང་མངགས་གཏོང་ཁང་གི་བཀོད་འདོམས་ཁང་ལ་ཡུལ་སྐོར་བ་ཧོང་ཆེ་གེ་མོས་རོགས་སྐྱོབ་ཞུ་བའི་ཛ་དྲག་ཁ་པར་ཞིག་འབྱོར་བ་དང་། སྙན་སེང་འབྱོར་རྗེས། མངགས་གཏོང་ཁང་གིས་འཕྲལ་དུ་ས་མཐོའི་འཕྲལ་སྡོམ་རོགས་སྐྱོབ་ལག་ལེན་བསྟར་ཏེ། སུའོ་ཀྲང་གིས་རུ་སྣེ་ཁྲིད་དེ་འཕྲལ་མར་གསོ་རླུང་དམ་བི་དང་། རོགས་སྐྱོབ་སྨན་སྒམ། དྲོད་སྲུང་གདན། རི་འཛེག་ཐག་པ་སོགས་ཆེད་ལས་ཀྱི་རོགས་སྐྱོབ་ཡོ་ཆས་རླངས་འཁོར་ནང་བླུགས་ཏེ་གནས་ཚུལ་ཐོན་སར་བསྐྱོད།

ཤེས་རྟོགས་བྱུང་བར་གཞིགས་ན། ཁ་རོ་ལའི་འཁྱགས་རོམ་གྱི་ལྟེ་བའི་ཁུལ་ལ་ཆ་སྙོམས་ས་བབ་སྨི་5000ཡོད་ཅིང་། དེ་ནི་གསར་སྤེལ་བྱས་མེད་པ་དང་། རི་ལམ་ཀྱག་ཀྱོག་དང་ཉེན་ཁ་ཆེ་བ། གཅོང་རོང་དང་གཡང་གཟར་བའི་ཐོག་ལོ་འཁོར་མོར་གྲང་ངར་ཆེ་བ་དང་། གསོ་རླུང་དཀོན་པ། རླུང་ཤུགས་ཆེ་ལ། སྔ་དྲོ་ནམ་མཁའ་གཡའ་དག་ཀྱང་ཕྱི་དྲོར་ཁ་བ་བུ་ཡུག་འཚུབ་པ་སོགས་གནམ་གཤིས་འགྱུར་ལྡོག་ཆེ་བས། ས་ཁུལ་དེར་བསྐྱོད་ཁག་པ་མ་ཟད། ལ་དུག་བརྒྱབ་སླ་བ་དང་། འདྲེད་རྡབ་ཤོར་སླ་བ་སོགས་ཀྱི་བདེ་འཇགས་ལས་འཛོལ་ཐོན་སླ་བས་རོགས་སྐྱོབ་ལས་དོན་ལ་དཀའ་ངལ་ཆེན་པོ་འཕྲད་ཡོད།

ར་ལུང་ཤང་མངགས་གཏོང་ཁང་གི་སུའོ་ཀྲང་བསྟན་ནོར་གྱིས། ཉིན་དེར་རོགས་སྐྱོབ་རུ་ཁག་འཁྱགས་རོམ་ཡོད་སའི་རི་གཤམ་དུ་སླེབས་སྐབས། རི་ལམ་གུ་དོག་ཅིང་གཡང་གཟར་བ་དང་། རྡོ་ཧྲུག་གིས་ཁེངས་ཤིང་འཁྱགས་པ་སྲབ་མོའང་ཐེབས་ནས་རླངས་འཁོར་མུ་མཐུད་འགྲོ་མི་ཐུབ་སྟབས། མི་དམངས་ཉེན་རྟོག་པས་འཕྲལ་མར་རྗེས་སུ་འོང་བའི་ཤང་སྲིད་གཞུང་གི་ལས་དོན་པ་དང་མཉམ་དུ་འཚོལ་སྐྱོབ་རུ་ཆུང་བཙུགས་ཏེ་རྐང་ཐང་མར་རིར་འཛེག་རྒྱུའི་ཐག་བཅད་པ་ཡིན་ཞེས་གསར་འགོད་པར་བཤད་བྱུང་།

རྐང་ཐང་མར་ཆུ་ཚད་གཉིས་ཙམ་བསྐྱོད་མཐར་ས་བབ་སྨི་5200ཟིན་པའི་རི་ཁུག་ཅིག་ནས་ཧོང་ཆེ་གེ་མོ་རྙེད་པ་རེད།

སྐབས་དེར། ཧོང་ཆེ་གེ་མོ་ནི་དུས་ཡུན་རིང་མོར་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་བཅུ་གྲངས་ཁ་ཤས་ཟིན་པའི་མཐོ་གྲང་དང་གསོ་རླུང་དཀོན་པའི་ཁོར་ཡུག་ཁྲོད་ལུས་པའི་རྐྱེན་གྱིས་མགོ་ཡུ་འཁོར་བ་དང་། དབུགས་ཧལ་བ། རྐང་ལག་གི་ཤུགས་ཟད་པ། གདོང་མདོག་སྐྱ་བོར་གྱུར་པ་སོགས་ལ་དུག་ཕོག་པའི་ནད་རྟགས་མངོན་པ་མ་ཟད། གཟུགས་པོའི་ཤུཌ་ཟད་པས། རིག་པ་གསལ་ཡང་རང་གཅིག་པུ་འགྲོ་ཐུབ་ཀྱི་མེད། གནས་ཚུལ་དེ་མཐོང་འཕྲལ་མི་དམངས་ཉེན་རྟོག་པས་ལམ་སེང་རང་ལུས་ཀྱི་གསོ་རླུང་དམ་བི་ཧོང་ཆེ་གེ་མོར་སྤྲད་པ་དང་སྦྲཌ། དྲོད་སྲུང་གདན་གྱིས་ཧོང་ཆེ་གེ་མོའི་གཟུགས་པོ་བསྒྲིལ་ཏེ་དྲོད་ཁུག་ཐབས་བྱས་པ་དང་། ད་དུང་རོགས་སྐྱོབ་སྨན་སྒམ་ནས་ཁྲག་ཤེད་ལྟ་ཆས་བཏོན་ཏེ་གཟུགས་པོར་བརྟག་དཔྱད་བྱས་ཤིང་། ཉེན་རྟོག་པས་ཧོང་ཆེ་གེ་མོའི་གདོང་གི་རྔུལ་ནག་དལ་གྱིས་འཕྱིད་ཞོར་ངང་རྒྱུད་རིང་པོས་སེམས་གསོ་གཏོང་གིན“ང་ཚོ་སླེབས་ཚར་བས་དངངས་འཚབ་བྱེད་མི་དགོས། ཁྱེད་བདེ་འཇགས་ངང་རི་གཤམ་དུ་སྐྱེལ་ཐུབ་པ་བྱེད་ཀྱི་ཡིན”ཞེས་བཤད། ཉེན་རྟོག་པའི་སེམས་གསོའི་གཏམ་དང་ཆེད་ལས་ཅན་གྱི་བྱེད་སྟངས་དག་གིས་ཧོང་ཆེ་གེ་མོའི་སེམས་པ་རིམ་བཞིན་ལྷོད་ལ་བབས་པ་རེད།

ཧོང་ཆེ་གེ་མོ་གཟུགས་པོ་ཅུང་བདེ་རུ་ཕྱིན་པ་དང་སྦྲགས། རུ་མི་ཚོས་རེས་མོས་ངང་ཁོང་བསྐྱོར་ཏེ། ཀྱག་ཀྱོག་གི་རི་ལམ་བརྒྱུད་དལ་གྱིས་རི་གཤམ་དུ་བསྐྱོད། ཆུ་ཚོད་གསུམ་ཙམ་དཀའ་ཚེགས་ཆེན་པོས་བསྐྱོད་མཐར་ཧོང་ཆེ་གེ་མོ་རི་གཤམ་གྱི་བདེ་འཇགས་ཁུལ་དུ་བདེ་བླག་ངང་འབྱོར་བ་དང་། དེ་དུས་ཕྱི་དྲོར་སླེབས་ཟིན་ཡོད་པ་རེད།

“ཉེན་ཁ་ཆེ་བའི་ས་ཆ་འདི་འདྲར་གལ་སྲིད་ཁྱེད་ཚོ་འཕྲལ་དུ་འབྱོར་མེད་ཚེ། ངར་གནས་ཚུལ་གང་ཞིག་འབྱུང་རྒྱུ་ཡིན་པ་ཤོད་ཚོད་ཐེབས་མི་སྲིད། ཁྱེད་ཚོར་ཐུགས་རྗེ་ཆེ་ཞུ་རྒྱུ་ཡིན”ཞེས་ཉེན་ཁ་ལས་གྲོལ་བའི་ཧོང་ཆེ་གེ་མོས་མི་དམངས་ཉེན་རྟོག་པའི་ལག་ནས་བཟུང་སྟེ་མིག་ལ་མཆི་ཞགས་འཁོར་བཞིན་ཐུགས་རྗེ་ཆེ་ཞུས།