ལྷ་ས་འགྲིམ་འགྲུལ་ཉེན་རྟོག་པས་ཁྲིམས་འགལ་ངང་རླངས་འཁོར་འཇོག་རིགས་ལ་བཅོས་སྒྲིག་བྱ་སྤྱོད་རྒྱུན་མཐུད་སྤེལ་བ།
ཐེན་ལུའུ་ལམ་མདོ་ནས་ལི་ཐའེ་ཐང་ཆེན་ལམ་མདོ་བར་གྱི་འགྲིམ་འགྲུལ་སྒྲིག་ལམ་སྔར་བས་ཚད་ལྡན་དུ་བཏང་ནས་མང་ཚོགས་ཕྱིར་སྐྱོད་བདེ་འཇགས་ཡོང་བ་དང་གཞུང་ལམ་ཤར་བགྲོད་ཐུབ་པའི་འགན་ལེན་བྱ་ཆེད། ཉེ་ཆར་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་དོ་དམ་ཉིང་ལག་རུ་ཁག་གིས་ལམ་དུམ་དེར་ཁྲིམས་འགལ་ངང་རླངས་འཁོར་འཇོག་རིགས་ལ་ཆེད་དོན་བཅོས་སྒྲིག་བྱ་སྤྱོད་རྒྱུན་མཐུད་སྤེལ་ཏེ“ཞིབ་བཤེར་ཐག་གཅོད་ནན་པོ་དང་དྲིལ་བསྒྲགས་སློབ་གསོ་ཟུང་འབྲེལ”གྱི་བྱ་ཐབས་ལ་བརྟེན་ནས་གྲོང་ཁྱེར་གྱི་འགྲིམ་འགྲུལ་ཤར་བགྲོད་ཐུབ་པ་བྱས་པ་རེད།
བཅོས་སྒྲིག་བྱེད་རིང་། ལས་སྒྲུབ་མི་དམངས་ཉེན་རྟོག་པས་ལམ་དུམ་དེའི་མཐའ་འཁོར་གྱི་ཚོང་ལས་གཅིག་སྡུད་ཆེ་བ་དང་མི་འགྲུལ་དང་འཁོར་རིགས་མང་བའི་དོན་དངོས་ཀྱི་ཁྱད་ཆོས་ལ་དམིགས་ཏེ“གནས་གཏན་འཁེལ་གྱི་དོ་དམ་ནན་པོ་དང་འགུལ་རྣམ་སྐོར་གཡེང་ཟུང་འབྲེལ”གྱི་ལས་སྒྲུབ་བྱེད་སྟངས་སྤྱད་ཡོད། ཁ་ལོ་བས་ཁྲིམས་འགལ་ངང་རླངས་འཁོར་འཇོག་སྐབས“འདི་གར་རླངས་འཁོར་འཇོག་མི་ཆོག་པས་འཕྲལ་མར་གཏོང་རོགས”ཞེས་མི་དམངས་ཉེན་རྟོག་པས་ལམ་སེང་ཁ་ཏ་བསླབ་བྱ་བྱེད་པ་དང་། ཁ་ཏ་བྱས་ཀྱང་སྣང་འཇོག་མི་བྱེད་པའམ་ཡང་ན་ཁ་ལོ་བ་མཐོང་རྒྱུ་མེད་ཚེ་ཁྲིམས་ལྟར་ཆད་པ་གཅོད་ཀྱི་ཡོད། དེ་དང་དུས་མཚུངས་མི་དམངས་ཉེན་རྟོག་པས་མེ་གསོད་བགྲོད་ལམ་དང་། སྤྱི་སྤྱོད་རླངས་འཁོར་གྱི་འབབ་ཚུགས། མི་སྐྱོད་འགྲོ་ལམ་སོགས་བཟུང་བའི་སྤྱི་པའི་བདེ་འཇགས་ལ་ཤུགས་རྐྱེན་བཟོ་བའི་ཁྲིམས་འགལ་རླངས་འཁོར་འཇོག་རིགས་གཙོ་གནད་ཐོག་གཙང་བཤེར་བྱས་ཏེ་བདེ་འཇགས་ཀྱི་མངོན་མེད་རྐྱེན་ངན་གཙང་སེལ་བྱས་པ་རེད། “རླངས་འཁོར་གནས་སྐབས་ཁ་བཀག་ནས་འཇོག་རིང་ཛ་དྲག་གི་གནས་ཚུལ་ཐོན་ཚེ་རོགས་སྐྱོབ་རླངས་འཁོར་ཤར་བགྲོད་མི་ཐུབ་པས་མཇུག་འབྲས་ཚབས་ཆེན་ཐོན་སྲིད” ཁྲིམས་སྒྱུར་བྱ་ཡུལ་དུ་མི་དམངས་ཉེན་རྟོག་པས་དཔེ་མཚོན་གྱོད་དཔེ་དང་ཟུང་འབྲེལ་གྱིས་ཁ་ལོ་བར་ངང་རྒྱུད་རིང་པོས་ཁྲིམས་འགལ་ངང་རླངས་འཁོར་འཇོག་པའི་གནོད་འཚེ་སྣ་ཚོགས་གསལ་བཤད་བྱས་ཡོད། “དེ་སྔ་སྐར་མ་ཁ་ཤས་བཞག་ན་སྐྱོན་གང་ཡང་མེད་སྙམ་གྱི་ཡོད། དེ་ནི་མི་གཞན་གྱི་ཚེ་སྲོག་སྐྱོབ་པར་འགོག་རྐྱེན་བཟོ་བ་ཞིག་ཡིན་པ་ད་གཟོད་ཤེས་བྱུང”ཞེས་ཁ་ལོ་བ་ཞིག་གིས་བཤད་པ་རེད།
འབྲེལ་ཡོད་གསར་འགྱུར།