གཞིས་རྩེ་གྲོང་ཁྱེར་སྤྱི་བདེ་ཅུས་བསམ་གྲུབ་རྩེ་ཉིང་ལག་ཅུས་ཀྱིས་སྔ་ཕྱི་བར་གསུམ་དུ་རྒྱན་འགྱེད་ཀྱི་ཁྲིམས་འགལ་ཉེས་གསོག་ལ་རྡུང་རྡེག་གཏོང་རྒྱུ་དང་བཅོས་སྒྲིག་བྱ་རྒྱུ་དེ་ཁོངས་གཏོགས་ཁུལ་གྱི་བདེ་འཇགས་བརྟན་ལྷིང་ལ་སྲུང་སྐྱོང་བྱེད་པའི་དམ་འཛིན་བྱ་གཞི་གལ་ཆེན་ཞིག་ཏུ་བརྩིས་ཏེ།“ཐར་པ་གཏན་ནས་མི་གཏོང་བའི”རྣམ་འགྱུར་ཐོག་ནས་ཆགས་སྲེད་དང་། རྒྱན་འགྱེད། དུག་འཐེན་བཅས་ཀྱི་ཁྲིམས་འགལ་ཉེས་གསོག་བྱེད་སྤྱོད་ལ་རྡུང་རྡེག་ནན་པོ་བཏང་ཡོད།

ཉེ་ཆར། བསམ་གྲུབ་རྩེའི་སྤྱི་བདེས་གནད་སྨིན་ཤུགས་འདོན་དང་མགྱོགས་མྱུར་བྱ་སྤྱོད་སྤེལ་བ་བརྒྱུད། རྒྱན་འགྱེད་ཀྱི་གྱོད་གཞི་1ཞིབ་བཤེར་ཐག་གཅོད་ཐུབ་པ་དང་། ས་གནས་ས་ཐོག་ནས་ཁྲིམས་འགལ་བྱེད་སྤྱོད་སྤེལ་མཁན་4རྩད་ཆོད་པ། རྒྱན་དངུལ་སྒོར་12620རྩད་ཆོད་ཡོད། ད་ཐེངས་ཀྱི་བྱ་སྤྱོད་ལས་རྒྱན་འགྱེད་དང་འབྲེལ་བའི་ཁྲིམས་འགལ་ཉེས་གསོག་བྱེད་སྤྱོད་ལ་འཇིགས་སྣང་ཆེན་པོ་སྐུལ་ཡོད།

གསར་འགོད་པར་ཤེས་རྟོགས་བྱུང་བར། ཉིན་དེར་གཞིས་རྩེ་གྲོང་ཁྱེར་སྤྱི་བདེ་ཅུས་བསམ་གྲུབ་རྩེ་ཡན་ལག་ཅུས་གྲོང་ལྷོ་མངགས་གཏོང་ཁང་གིས་ཁོངས་གཏོགས་ཁུལ་དུ་འཆར་ཅན་གྱི་ཞིབ་བཤེར་བྱེད་སྐབས། ཇ་ཁང་ཞིག་གི་བཅད་ཁང་ནང་མི་མང་པོ་འཛོམས་ནས་རྒྱན་པོ་འགྱེད་བཟོ་ཆེ་བ་ཤེས་རྟོགས་བྱུང་བ་རེད། མི་དམངས་ཉེན་རྟོག་པས་འཕྲལ་དུ་བཅད་ཁང་དེའི་ནང་ཞིབ་བཤེར་བྱས་པས་ས་གནས་ས་ཐོག་ཏུ་ཏག་སེ་བརྒྱབ་ནས་རྒྱན་པོ་འགྱེད་མཁན་བློ་ཆེ་གེ་མོ་སོགས་ཁྲིམས་འགལ་བྱེད་སྤྱོད་སྤེལ་མཁན་4རྩད་ཆོད་པ་རེད། དཔང་རྟགས་ཁུངས་བཙན་གྱི་མདུན་དུ་མི་བཞི་པོས་རྒྱན་པོ་འགྱེད་པའི་ཁྲིམས་འགལ་དོན་དངོས་ངོས་ལེན་ཞུས་པ་རེད།

མིག་སྔར། བློ་ཆེ་གེ་མོ་སོགས་ཁྲིམས་འགལ་བ་4སྤྱི་བདེ་ལས་ཁུངས་ཀྱིས་ཁྲིམས་ལྟར་སྲིད་འཛིན་བཀག་ཉར་བྱས་ཡོད།