ཉེ་ཆར། ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ཆེད་དོན་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་སྤྱི་ཚོགས་ལས་རིགས་ཁག་ལ་2023ལོ་ཚུན་གྱི་ལྷ་སའི་རིམ་གཉིས་ཁྲིམས་ཁང་གི་ཤེས་བྱའི་བདག་དབང་གི་ཁྲིམས་འཛིན་སྲུང་སྐྱོང་ལས་དོན་གྱི་སྤྱིའི་འཕེལ་ཕྱོགས་དང་། བྱེད་ཐབས་གཙོ་བོ། དུས་མཚམས་རང་བཞིན་གྱི་ཕན་འབྲས་བཅས་བརྡ་ཁྱབ་བཏང་བ་རེད། ལོ་གསུམ་རིང་། ལྷ་སའི་ཁྲིམས་ཁང་གིས“ཤེས་བྱའི་བདག་དབང་གི་ཁྲིམས་སྐྱོང་འགན་སྲུང་ལ་ཤུགས་སྣོན་རྒྱག་པའི”སྐོར་གྱི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་གལ་ཆེན་ཕྱོགས་ཡོངས་ནས་དོན་འཁྱོལ་བྱས་ཏེ། ལྷ་ས་གྲོང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་དང་གོང་རིམ་ཁྲིམས་ཁང་གི་མཛུབ་ཁྲིད་ནུས་ལྡན་འོག ཆེད་ལས་ཅན་གྱི་འདྲི་གཅོད་དང་། མཉམ་རོགས་ཅན་གྱི་བཅོས་སྐྱོང་། གནད་འཁེལ་ཅན་གྱི་ཞབས་ཞུ་བཅས་གཞི་གཅིག་ཏུ་འདུས་པའི་ཤེས་བྱའི་བདག་དབང་གི་ཁྲིམས་འཛིན་སྲུང་སྐྱོང་རྣམ་པ་གསར་པ་བརྒྱུད་རིམ་ལྡན་པའི་སྒོ་ནས་བཏོད་པ་དང་། “ཁུར་པོ་ལྕི་པོ་དང་འགན་འཁྲི་ལྕི་པོ་འཁུར་བའི”ལྗོངས་ཡོངས་ཀྱི་ཁྲིམས་ཁང་གི་ལས་འགན་དང་འགན་འཁྲི་ཏན་ཏིག་བསྒྲུབས་ཏེ། ལྷ་སའི་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་ཁྲིམས་འཛིན་གྱི་འགན་སྲུང་བརྟན་པོ་བྱས་ཡོད།

གྱོད་གཞིའི་གྲངས་འབོར་ཤུགས་ཆེན་འཕར་བ་དང་གྱོད་སྣ་མང་དུ་ཕྱིན་པའི་འཕེལ་ཕྱོགས་གསར་པའི་མདུན་དུ། ལྷ་སའི་ཁྲིམས་ཁང་གིས་ཤེས་བྱའི་བདག་དབང་གི་གྱོད་གཞི་གཅིག་སྡུད་དོ་དམ་ལེགས་སྒྲིག་བྱེད་པའི་སྒྱུར་བཅོས་ཀྱི་རྒྱབ་ལྗོངས་ལ་གཞིགས་ནས་འགན་ནུས་རིམ་པ་ལེགས་སུ་གཏོང་བ་བརྒྱུད་འདྲི་གཅོད་ཀྱི་གཙོ་གནད་གཞི་རིམ་གྱི་ཁྲིམས་ཁང་ལ་གོ་རིམ་ལྡན་པའི་སྒོ་ནས་ངང་ཕྱོགས་པར་སྐུལ་འདེད་བཏང་ཡོད། ལོ་གསུམ་རིང“རིགས་འགྲེའི་གྱོད་གཞིར་འདྲི་གཅོད་མི་འདྲ་བའི”སྣང་ཚུལ་བཀག་འགོག་ནུས་ལྡན་བྱས་པས། འདྲི་གཅོད་དཔུང་ཁག་གི་ཆེད་ལས་ཅན་དང་ཚད་ལྡན་ཅན་གྱི་ཆུ་ཚད་ལ་དོ་བདག་གི་ཁས་ལེན་རྒྱ་ཁྱབ་ཐོབ་ཡོད།

ལྷ་སའི་ཁྲིམས་ཁང་གིས་གཏུག་བཤེར་བྱེད་དགོས་མེད་པའི་རྩོད་གཞི་ཐག་གཅོད་ལམ་སྲོལ་སྔོན་ལ་འཇོག་རྒྱུ་མཐའ་འཁྱོངས་ཀྱིས“ཏང་ཨུད་ཀྱིས་འགོ་ཁྲིད་དང་། ཁྲིམས་འཛིན་གྱིས་སྐུལ་འདེད། སྡེ་ཚན་མཉམ་རོགས། ལས་རིགས་ཞུགས་པ”བཅས་ཀྱི་ཤེས་བྱའི་བདག་དབང་སྲུང་སྐྱོང་ཆེན་པོའི་རྣམ་པ་ནུས་ཤུགས་ཡོད་རྒུས་བཏོད་པ་རེད། 2023ལོ་ཚུན་དུ་ཤེས་བྱའི་བདག་དབང་གི་ཉེས་དོན་གྱོད་གཞིའི་དཔྱད་བཀུར་གྱོད་འཇགས་བྱེད་ཚད་ལོ་ལྟར་99%རྒྱུན་འཁྱོངས་ཐུབ་ནས་ཁྲིམས་འཛིན་གྱི་དབང་གྲགས་དང་སྤྱི་རྟོན་གང་ལེགས་མངོན་ཡོད།