མངའ་རིས་ས་ཁུལ་འབྲིང་རིམ་མི་དམངས་ཁྲིམས་ཁང་གིས་གླ་ཆ་འགྱངས་ཆད་རྩོད་གཞི་ནུས་ལྡན་ངང་བསལ་བ།
ཉེ་ཆར་མངའ་རིས་ས་ཁུལ་འབྲིང་རིམ་མི་དམངས་ཁྲིམས་ཁང་གིས་ལོ་མཇུག་གོང་གི་ཞིང་པ་ལས་མིའི“འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས”ཡིན་པའི་གླ་ཆ་འགྱངས་ཆད་ཀྱི་གནད་དོན་ལ་དམིགས་ནས་ཐོགས་མེད་བགྲོད་ལམ་བཏོད་དེ“འཕྲལ་མར་ཐོ་འགོད་དང་། ཞིབ་བཤེར། ཐག་གཅོད་བཅས”ཀྱི་བྱེད་ཐབས་ལ་བརྟེན་ནས་གླ་ཆ་འགྱངས་ཆད་ཀྱི་རྩོད་གཞི་ནུས་ལྡན་ངང་བསལ་བ་རེད།
དེའི་རིང་མངའ་རིས་ས་ཁུལ་འབྲིང་རིམ་མི་དམངས་ཁྲིམས་ཁང་གི་དམངས་དོན་འདྲི་གཅོད་ཚོགས་པས“སྔོན་ལ་འདུམ་འགྲིག་དང་ཐག་གཅོད་མཇུག་འགྲིལ”གྱི་རྩ་དོན་མཐའ་འཁྱོངས་ཀྱིས་ཞིང་པ་ལས་མི་10དང་འབྲེལ་བ་ཡོད་པའི་གླ་ཆ་འགྱངས་ཆད་ཀྱི་གྱོད་གཞི་5བདེ་བླག་ངང་འདུམ་འགྲིག་བྱས་ནས་ཞིང་པ་ལས་མིའི་གླ་ཆ་དུས་ཐོག་ཏུ་སྤྲད་པ་ལས། ཞིང་པ་ལས་མིའི་ཁྲིམས་མཐུན་ཁེ་དབང་ལ་སྲུང་སྐྱོང་ཏན་ཏིག་ཐུབ་པ་དང་སྤྱི་ཚོགས་ཞི་མཐུན་བརྟན་ལྷིང་ལ་སྐུལ་འདེད་ཐུབ་ཡོད། ཁྲིམས་དཔོན་གྱིས་གླ་པ་རྒྱུག་མཁན་ལས་མིའི་ངལ་རྩོལ་ཐོབ་ཆའི་ལྟེ་བའི་རེ་ཞུར་དམ་པོར་དམིགས་ཏེ། ཕྱོགས་གཉིས་པོའི་རྩོད་གཞི་གནད་སྨིན་ངང་སྟངས་འཛིན་དང་ས་མཐོར་གླ་པ་རྒྱུག་མཁན་གྱི་ཁེ་དབང་སྲུང་སྐྱོང་གི་དམིགས་བསལ་རང་བཞིན་དང་ཟུང་འབྲེལ་གྱིས《ཞིང་པ་ལས་མིའི་གླ་ཆ་སྤྲོད་པའི་འགན་ལེན་སྲོལ་ཡིག》སོགས་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞིར་བཟུང་། སྐད་རིགས་གཉིས་ཀྱི་ཐོག་ནས་ཁྲིམས་སྲོལ་གསལ་འགྲེལ་དང་། སྣ་མང་གི་རྩོད་གཞི་སེལ་བའི་ལམ་སྲོལ་ལག་བསྟར། ངང་རྒྱུད་རིང་པོས་རེ་ཞུ་ཉན་པ། འགན་དབང་གསལ་བཤད་གང་ལེགས། དོ་བདག་ཕྱོགས་གཉིས་པོའི་དོགས་པ་སེལ་བ་བཅས་བྱས་ནས་ལས་མི་སྤྱོད་མཁན་ཕྱོགས་ཀྱིས་འགྱངས་ཆད་བྱས་པའི་གླ་ཆ་རང་སར་ཆ་ཚང་ངང་སྤྲོད་དུ་བཅུག་པ་རེད།
འབྲེལ་ཡོད་གསར་འགྱུར།