རང་ལྗོངས་ཀྱིས་ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ཁྲིམས་འགལ་བྱེད་སྤྱོད་ལ་ཆེད་དོན་བཅོས་སྒྲིག་བྱས་པ།
མང་ཚོགས་ཕྱིར་སྐྱོད་ཀྱི་བདེ་འཇགས་ལ་འགན་སྲུང་ཏན་ཏིག་བྱས་ནས་ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ཁྲིམས་འགལ་བྱེད་སྤྱོད་ལ་ཆེད་དོན་བཅོས་སྒྲིག་བྱེད་པར་ཤུགས་སྣོན་རྒྱག་ཆེད། རང་སྐྱོང་ལྗོངས་སྤྱི་བདེ་ཐིང་གིས་ལྗོངས་ཡོངས་ཀྱི་ཁྱབ་ཁོངས་ནང་ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ཁྲིམས་འགལ་བྱེད་སྤྱོད་ལ་ཆེད་དོན་བཅོས་སྒྲིག་ལས་དོན་སྤེལ་རྒྱུའི་ཐག་གཅོད་བྱས་ཡོད།
ད་ཐེངས་ཀྱི་ཆེད་དོན་བཅོས་སྒྲིག་ཀྱིས་འགྲིམ་འགྲུལ་ལས་འཛོལ་སྔོན་འགོག་གི“གྲངས་ཚད་ཉུང་དུ་གཏོང་བ་དང་ལས་འཛོལ་ཚབས་ཆེན་ཐོན་རྒྱུ་ཚོད་འཛིན་བྱེད་པའི”གཙོ་འགན་གཙོ་ལས་ལ་དམིགས་ཏེ《ལྗོངས་ཡོངས་ཀྱི་སྟོན་དགུན་གཉིས་ལ་གཞུང་ལམ་འགྲིམ་འགྲུལ་གྱི་ལས་འཛོལ་མ་ཐོན་སྔོན་འགོག་གི་བྱ་ཐབས་བཅུ》ལ་གཞིགས་ནས་ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ཁྲིམས་འགལ་གྱི་ཉེས་གསོག་བྱ་སྤྱོད་ལ་རྡུང་རྡེག་ཚ་ནན་བཏང་ཡོད།
གསར་འགོད་པར་ཤེས་རྟོགས་བྱུང་བར། འདི་ལོ་ནས་བཟུང་ས་གནས(གྲོང་ཁྱེར)དང་རྫོང(ཆུས)ཁག་ཏུ་ཐོན་པའི་ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ཁྲིམས་འགལ་ཞིབ་བཤེར་ཐག་གཅོད་དང་། ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ལས་འཛོལ་དོན་རྐྱེན་ལ་དབྱེ་ཞིབ་བྱས་པར་གཞིགས་ཏེ། ད་རེས་ཀྱི་བཅོས་སྒྲིག་ལས་དོན་ཁྲོད་ལྗོངས་ཀྱི་རིམ་ཁག་སྤྱི་བདེ་འགྲིམ་འགྲུལ་སྡེ་ཚན་ཁག་གིས་རྒྱུན་རྣམ་ཅན་གྱི་བཅོས་སྒྲིག་ལས་དོན་ལག་ལེན་བསྟར་བའི་ཐོག“དུས་རྒྱུན་དང་གཟའ་མཇུག་ཟུང་འབྲེལ”དང“ཉིན་མོ་དང་མཚན་མོ་ཟུང་འབྲེལ”གྱི་དམག་འཐབ་བྱེད་སྟངས་མཐའ་འཁྱོངས་བྱས་ཏེ། གཟའ་འཁོར་ནང་ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ཁྲིམས་འགལ་བྱེད་སྤྱོད་ལ་ཞིབ་བཤེར་ཐག་གཅོད་ལས་དོན་རྒྱུན་གཏན་བཞིན་སྤེལ་བ་དང་། གཟའ་མཇུག་ཏུ་ཆང་བཏུངས་འཁོར་གཏོང་དང་ར་བཟི་འཁོར་གཏོང་ལ་ཆེད་དོན་བཅོས་སྒྲིག་ལས་དོན་གཅིག་སྡུད་ཐོག་སྤེལ་བ་མ་ཟད། ཉིན་མོར་ལས་འགན་སྒྲུབ་པ་དང་ཆབས་ཅིག“ཆང་བཏུང་ཞག་སོང་འཁོར་གཏོང”སོགས་ཀྱི་ཁྲིམས་འགལ་བྱེད་སྤྱོད་ལ་ཞིབ་བཤེར་ཐག་གཅོད་བྱས་ཏེ། མཚན་མོར་ཆང་བཏུངས་འཁོར་གཏོང་དང་དང་ར་བཟི་འཁོར་གཏོང་གི་ཁྲིམས་འགལ་ཉེས་གསོག་བྱེད་སྤྱོད་ལ་རྡུང་རྡེག་གཏོང་ཤུགས་ཆེ་རུ་བཏང་ཡོད། གཞན་ཡང་། ད་ཐེངས་ཀྱི་བཅོས་སྒྲིག་ལས་དོན་གྱིས་ད་དུང་ཐེངས་14པའི“རྒྱལ་ཡོངས་ཀྱི་འགྲིམ་འགྲུལ་བདེ་འཇགས་ཉིན་མོའི”བརྗོད་དོན་གཙོ་བོའི་བྱེད་སྒོ་122པ་དང་ཟུང་འབྲེལ་བྱས་ནས་གཙོ་རྒྱུན་སྨྱན་སྦྱོར་དང་གསར་དར་སྨྱན་སྦྱོར་གྱི་ལས་སྟེགས་སྤྱད་དེ་ཆང་བཏུངས་འཁོར་གཏོང་དང་ར་བཟི་འཁོར་གཏོང་གི་ཉེན་ཁ་དང་དེའི་མཇུག་འབྲས་དྲིལ་བསྒྲགས་བྱས་ཏེ། གྲོང་མི་དང་མང་ཚོགས་ཀྱི་འགྲིམ་འགྲུལ་བདེ་འཇགས་ཀྱི་འདུ་ཤེས་དང་བཅའ་ཁྲིམས་ཀྱི་འདུ་ཤེས་ཟབ་ཏུ་བཏང་ཡོད།
འགྲིམ་འགྲུལ་ཉེན་རྟོག་པའི་འབོད་སྐུལ།
“རླངས་འཁོར་བཏང་ཚེ་ཆང་རག་མི་བཏུང་བ་དང་། ཆང་རག་བཏུངས་ཚེ་རླངས་འཁོར་མི་གཏོང་བ”དང་འགྲིམ་འགྲུལ་གྱི་གོམས་གཤིས་ངན་པ་དོར་ནས་ཡ་རབས་ངང་ཕྱིར་སྐྱོད་པའི་ལག་ལེན་མཁན་ཞིག་ཧུར་ཐག་བྱས་ཏེ། བདེ་འཇགས་ངང་ཤར་བགྲོད་དང་། ཡ་རབས་དང་གོ་རིམ་ལྡན་པའི་གཞུང་ལམ་འགྲིམ་འགྲུལ་གྱི་ཁོར་ཡུག་བཟང་པོ་ཞིག་མཉམ་དུ་གཏོད་དགོས།
འབྲེལ་ཡོད་གསར་འགྱུར།