འདི་ནི་ཟངས་རི་རྫོང་མི་དམངས་ཁྲིམས་ཁང་གིས་ཡོངས་བསྒྲགས་ཁྲིམས་ར་འཚོགས་ནས་རྒྱལ་ཁབ་ཀྱི་གཙོ་གནད་སྲུང་སྐྱོང་བྱ་ཡུལ་གྱི་རྩི་ཤིང་ལ་གནོད་འཚེ་བཏང་བའི་ཉེས་གསོག་གྱོད་གཞིར་ཞིབ་གཅོད་བྱེད་བཞིན་པ།

ཉེ་ཆར། རྒྱལ་ཁབ་ཀྱི་གཙོ་གནད་སྲུང་སྐྱོང་བྱ་ཡུལ་གྱི་རྩི་ཤིང་ལ་གནོད་འཚེ་བཏང་བའི་ཉེས་གསོག་གྱོད་གཞི་གསུམ་ལ་ཞིབ་གཅོད་བྱེད་སྐབས། ལྷོ་ཁ་གྲོང་ཁྱེར་ཟངས་རི་རྫོང་མི་དམངས་ཞིབ་དཔྱོད་ཁང་དང་ཟངས་རི་རྫོང་མི་དམངས་ཁྲིམས་ཁང་གིས་ཆད་གཅོད་དང་ཉམས་གསོ་གཉིས་གལ་ཆེ་མཉམ་དུ་འཛིན་རྒྱུ་མཐའ་འཁྱོངས་ཀྱིས“ཉེས་དོན་འགན་འཁྲི་བདའ་འདེད་གཏོང་བ”དང“སྐྱེ་ཁམས་སླར་གསོ”ཟུང་འབྲེལ་བྱས་ཏེ“སྐྱེ་ཁམས་སྲུང་སྐྱོང་སྔོན་ལ་འཇོག་པའི”འདུ་ཤེས་ལག་ལེན་ཞིབ་ཚགས་བསྟར་བས། བཅའ་ཁྲིམས་ཀྱི་ཕན་འབྲས་དང་སྤྱི་ཚོགས་ཀྱི་ཕན་འབྲས་བཟང་པོ་ཐོན་ཡོད་པ་རེད།

ཤེས་རྟོགས་བྱུང་བར་གཞིགས་ན། བསྟན་ཆེ་གེ་མོ་སོགས་ཞུ་སྦྱོར་ཕྱི་མ་11གིས་སྒེར་ཕན་དོན་གཉེར་བྱ་ཆེད། རང་དགར་གཟི་བྱིན་བླ་མཚོའི་ཉེ་འགྲམ་གྱི་རི་རྒྱུད་ནས་རི་སྐྱེས་སྲོ་ལོ་དམར་པོ་རྐང་1121བཏུས་པ་རེད། སྲིད་འཛིན་ལས་ཁུངས་ཀྱིས་འཕྲལ་མར་བཀའ་དང་ལེན་ཞུས་ནས། གྱོད་གཞི་གསུམ་པོའི་ཁྲོད་གཏོར་སྐྱོན་ཕོག་པའི་ས་ཁོངས་སུ་གཅིག་སྡུད་རྩད་ཞིབ་དང་། གནོད་འཚེ་གཏན་འཁེལ། སྐྱེ་ཁམས་ཚོད་སྐོར་བཅས་བྱས་པ་དང་། རྩི་ཤིང་སླར་གསོའི་མ་གནས་དང་བསྟུན་ཏེ་གྱོད་གཞི་མི་རེ་ངོ་རེའི་དེ་མཚུངས་ཀྱི་སྐྱེ་ཁམས་གནོད་འཚེའི་གུན་གསབ་དངུལ་ཞིབ་རྩིས་བརྒྱབ་ཡོད། གྱོད་གཞི་ཚང་མ་རིགས་གཅིག་པའི་སྐྱེ་ཁམས་ལ་གཏོར་སྐྱོན་བཏང་བའི་བྱེད་སྤྱོད་ཁོངས་སུ་གཏོགས་པ་མ་ཟད། གྱོད་འབྲེལ་མི་སྣ་ཁག་གཅིག་ལ་རང་ཉེས་འགྱོད་བཤགས་ཀྱི་རྣམ་འགྱུར་ཡག་པོ་ཡོད་པར་གཞིགས་ནས་སྲིད་འཛིན་ལས་ཁུངས་ཀྱིས་གྱོད་གཞི་གསུམ་པོའི་མི་11ལ་དུས་གཅིག་ཏུ་སྐྱེ་ཁམས་ཁོར་ཡུག་གི་གནོད་འཚེའི་གུན་གསབ་འཇལ་རྒྱུའི་གཏན་འཁེལ་བྱས་ཤིང་། གྲོས་མོལ་ཚོགས་འདུའི་ཐོག་ཞིབ་དཔྱོད་ཁང་གིས་བཅའ་ཁྲིམས་ཀྱི་ལྟ་སྐུལ་འགན་ནུས་ལ་གཞི་ཚུགས་ཏེ་རི་སྐྱེས་སྲོ་ལོ་དམར་པོའི་སྐྱེ་ཁམས་རིན་ཐང་དང་། ཁྲིམས་འགལ་ངང་སྔོག་འཐུ་བྱས་པའི་མཇུག་འབྲས། གུན་གསབ་འགྲོ་སོང་རྩིས་རྒྱག་པའི་གཞི་འཛིན་ས་སོགས་ཀྱི་ལྟེ་བའི་གནད་དོན་ལ་དམིགས་ཏེ་གྲོས་བསྡུར་བསམ་འཆར་ལ་མོས་མཐུན་བྱས་པ་དང་། མཐར་སྲིད་འཛིན་ལས་ཁུངས་དང་གྱོད་འབྲེལ་མི་སྣ་11ཚང་མའི་དབར་ངོས་འཛིན་གཅིག་མཐུན་བྱུང་སྟེ། 《སྐྱེ་ཁམས་ཁོར་ཡུག་གི་གནོད་འཚེའི་གུན་གསབ་གྲོས་མཐུན》ལ་མིང་རྟགས་བཀོད་པ་དང་། གྱོད་འབྲེལ་མི་སྣར་གཏན་འཁེལ་བྱས་པའི་དུས་བཀག་ནང་ཐེངས་གཅིག་གམ་ཡང་ན་དུས་བགོས་ཀྱིས་དེ་མཚུངས་ཀྱི་སྐྱེ་ཁམས་གནོད་འཚེའི་གུན་གསབ་གྲོན་དངུལ་མི་དམངས་ཤོག་སྒོར་70816.99འཇལ་དགོས་པའི་ཁ་ཆད་བྱས་པ་དང་། གྲོན་དངུལ་དེ་ཡུལ་གཞན་དུ་རྩི་ཤིང་འདེབས་པའི་ཐད་སྤྱོད་རྒྱུ་རེད།

ཞུ་སྦྱོར་ཕྱི་མ་ཁྲིམས་ཁང་ལ་རྩིས་སྤྲད་རྗེས་ཁྲིམས་ཁང་གིས་ཡོངས་བསྒྲགས་ཁྲིམས་ར་འཚོགས་ནས་འདྲི་ཞིབ་བྱས་པ་དང་འབྲེལ་ཁྲིམས་རའི་ཐོག་བཅད་ཁྲ་ཁྱབ་བསྒྲགས་བྱས་པ་དང་། རྫོང་མི་དམངས་འཐུས་ཚོགས་ཀྱི་འཐུས་མི་དང་། རྫོང་སྲིད་གྲོས་ཀྱི་ཨུ་ཡོན། དེ་བཞིན་གྲོང་ཚོའི་ལས་བྱེད་པ། ནགས་སྲུང་བ་སོགས་མི་50ལྷག་ཙམ་ས་ཡུལ་དངོས་སུ་ཟུར་ཉན་བྱེད་པར་གདན་ཞུ་བྱས་ཡོད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》གཞིར་བཟུང་། ཞུ་སྦྱོར་ཕྱི་མ་རྣམས་ཀྱིས་ཉེས་གསོག་གནས་ཚུལ་དང་བྱས་ཉེས་ངོས་ལེན་དང་ཁྲིམས་བཅད་དང་ལེན་བྱས་ཚུལ་ལ་ཕྱོགས་བསྡུས་ཐོག་བསམ་གཞིག་བྱས་པ་བརྒྱུད། ཟངས་རི་རྫོང་མི་དམངས་ཁྲིམས་ཁང་གིས་ཞུ་སྦྱོར་ཕྱི་མ་11ལ་དུས་བཀག་བཙོན་འཇུག་ལོ་གཅིག་ནས་ལོ་གསུམ་བར་གྱི་ཉེས་ཡུན་མི་འདྲ་བ་སོ་སོར་བཅད་པ་དང་། ཚང་མ་ཉེས་ཆད་ཕྱིར་འགྱངས་བྱེད་ཆོག་པ་དང་འབྲེལ་དངུལ་ཆད་ཀྱང་བཅད་པ་རེད